Read Sabu LUKAS 19 Bible Online

LUKAS 19 - Sabu bible

LUKAS 19

¹Ta dhai Yesus la Yerikho, ta narro pelohe ke ri No ne dhara rae do naanne.

²Pa dhara rae do naanne do era heddau ne kattu ngati mone dhuki bhea do kaja. Ne ngara no Zakheus.

³Do ddhei ke no ta la ngadde ta nadu ke Yesus ne pa petu ne, tapulara taga tari do rihi ae ddau, jhe Zakheus miha do mone bhabha, moko nara dho ke ta ngadde Yesus ri no.

⁴Hakku ri do mina harre ke ta perai ke no uru jhara ngati ddau lowe he, jhe ha'e no la kolo hekepue kepallu, mita nara ta ngadde Yesus ri no do ta lake jhara anne.

⁵Ta dhai Yesus la kepue kepallu ne, ta tengara ke No la dhida, jhe lii, ”Zakheus, henginga au ne puru ngati anne! Rowi lodho dhe, do ta hare Ya la ammu au.”

⁶Ta puru ke Zakheus nga henginga-nginga jhe nga mengallu nge nga kehaka dhara, ta la peabu ke no nga Yesus.

⁷Hari-hari ddau do heleo ne lai do naanne, ta pegu-pegallo ke ro. Ta lii ke ro, ”Bhueh! Ta hare la ammu ddau do kedhaha No!”

⁸Ta alla pemina harre, pa ammu Zakheus, ta kaddhi ke Zakheus ta titu, jhe lii pa Yesus, ”Muri, bhagi dhue ngati unu-oha ya, do ta wie ke ri ya pa do kehia nga gahara; jhe nadu we ne do alla pepelu ri ya, pa ro do ta ma'i ke ri ya appa wari lipa!”

⁹Moko ta lii Yesus pa no, ”Pa dhara lodho nadhe, au nga hari-hari ana-oha au, ri Deo do ta wie ke ne lua helama tona ie ne nga muri mada do wowiu ne, rowi au lema kolo loro Abraham.

¹⁰ Ne dakka Ana Ddau Raiwawa tu ta ma nama nga kale, nga ta ma pehelama do huli do teballi.”

¹¹ Pa dhara nga dhanno ri ddau he ne lipedai Yesus do naanne, ta pedhire ke ri No hewue lipehakku. Rowi, pa awe naanne do umu ke No nga Yerusalem, jhe pa dhara penge ddau he ta do hedharra ke Deo ta ma pereda mii heddau Duae pa raiwawa dhe.

¹²Ta lii ke Yesus, ”Era ke heddau naduae do ta pekaddhi la ihi-rai do jjhau tu ta dhede ta jadhi duae, jhe bhale wari.

¹³Nga do dho pekaddhi dae no, ta pedoa ke ri no henguru ddau ne naannu no, jhe wie pa ro heddau-heddau hemada doi mela lara. Ta lii ke no pa ro, ’Pedhaga we ri mu ne doi do na hedhe pa dhara awe nga langnga dhe ya.’

¹⁴Tapulara ana-rai pa dhara rai do naanne adho do mengallu dhara nga no. Hakku ta alla no pepekaddhi ta pepu ddau ke ro, tu ta la lii, ’Ddhei dho jhi nga ddau do nadhe ta jadhi duae tu jhi ri.’

¹⁵Tapulara ne naduae do naanne ta dhede ma ta jadhi duae, ta alla pemina harre ta bhale ke no la rai nga liha no. Ta pedoa ke ri no ne naannu no he ta la mengadha nga no, mita toi ri no ta henga ne lua mangngi do ta hammi ri no.

¹⁶Ta dakka ke ne naannu do petari-rai ne, jhe lii, ’Muri, ngati doi muri do hemada do wie pa ya ne, alle ke ri ya pepebhunga pejadhi ta henguru mada ke.’

¹⁷Ta lii ke ne muri no ne, ’Mina poharre ko do woie! Au heddau naannu do woie! Rowi pa lai do hudi do nara ke ddau ta parahajha nga au, do ta dhede ke au ri ya ta jadhi mone pereda pa henguru bhue rae.’

¹⁸Ta dakka ri ke ne naannu do kedhue ne, jhe lii, ’Muri, ngati doi mela muri do hemada do wie pa ya ne alle ke ri ya pepebhunga, jhe jadhi ke ta lammi mada ri.’

¹⁹Ta lii ne duae do naanne, ’Au do ta jadhi mone pereda pa lammi bhue rae.’

²⁰Ne naannu do wala ne ta dakka jhe lii, ’Muri, oni ne doi muri ne; do wute pa dhara nalehu ri ya.

²¹Do meda'u ya ri muri, rowi muri heddau do bhani. Muri do aggu ne nga do adho do unu ri muri, jhe muri la ghattu pa era do adho muri do ngaddi ta kujha.’

²²Moko ta lii ke ne duae ne pa no, ’Au dhe heddau naannu do apa do kerewe! Penau nga lipedai-lipedai au ma miha do ta wole au ri ya. Do toi ma ri au ta do ya dhe heddau do bhani; jhe ne do aggu ri ya adho do unu-oha ya, jhe ya dhe do ghattu ngati era do adho do kujha ri ya.

²³Ki do mina harre ma ta nga hakku do dho pemaho ri au ne doi ya ne la kato era takka doi, mijhi ki bhale ya, do nara ke ri ya ta la hamme ne bhunga ne?’

²⁴Ta alla pemina harre ta lii ke ne duae ne, ’Aggo ko ne doi do napoanne ngati no, jhe wie pa naannu do nga mada doi do henguru mada he.’

²⁵Tapulara ta lii ke ne ddau he, ’Muri, do hhai ke pa no ma ne do henguru mada he.’

²⁶ Bhale ri duae ne, ’Henge we! Ddau era nga unu nga oha ke, do ta wie ri tu no perihi ae ri. Tapulara ddau do dho bhule ke nga ne nga-nga ri, ne nga ko ne do era pa no do ta aggo ngati no.

²⁷Jhe pa awe nadhe, aggu we ne ihi-muhu ihi-lawa ya he, ro do dho wae penaja nga ya ta jadhi duae tu ro. Pemade ro hari-hari pa hedhapa ya!’ ”

²⁸Ta alla Yesus pepali hari-hari na harre, ta kako ke No uru jhara ti ro ju la Yerusalem.

²⁹Ta dhai ro ta umu la Betfage nga Betania pa Lede Zaitun, ta pepu ke ri Yesus do dhue ddau ngati ana hekola No he ta uru jhara ngati ro.

³⁰Ta lii ke Yesus pa ro mina hedhe, ”Kako we mu la kapo do pa hedhapa di nidhe, ki dhai mu ta maho la ni, do ta ngadde ri mu hengi'u ana keledai do akke. Ne keledai do naanne adho dae do ngaddi ta menya'e ri ddau. Ma'e ri mu ne keledai do naanne jhe aggo ri mu ma dhe.

³¹Kinga era ddau do kebhali pa mu, ’Ta nga hakku ma'e ri mu ne keledai do napoanne?’ lii mu, ’Nee ta paralu Muri nga no.’ ”

³²Ta kako ke ne ana hekola No he hari do dhue, jhe peabu tarra ro mii do lii Yesus ne pa ro.

³³Pa dhara nga ma'e ri ro ne keledai ne, ta kebhali ke ne mone unu keledai ne pa ro, ”Ta nga hakku ma'e ri mu ne keledai do napoanne?”

³⁴Ta bhale ke ri ro, ”Ta paralu Muri nga no.”

³⁵Moko ta aggo ke ri ro ne keledai do naanne la nga Yesus. Ta alla pemina harre ta walla ke ri juba ro pa rudanni na keledai do naanne, jhe pemenya'e Yesus ri ro la rudanni ne.

³⁶Pa dhara nga menya'e ri Yesus ne keledai do naanne, ta walla ke ri ddau he ne juba ro pa rujhara do ta narro ri Yesus ne.

³⁷Ta hedharra le Yesus la Yerusalem, pa rujhara do puru ngati Lede Zaitun, ne hari-hari ne ddau do pedute Yesus he, ta jhari ke ta hodha, jhe wue-waje Deo nga peha'e ne kolo lii ie-ae pa No, rowi do ngadde ke ri ro hari-hari ne lua madalae do tao ri Yesus he.

³⁸ Ta hodha ke ro jhe lii, ”Lua medi-melatu tu No do Duae, do dakka nga ngara Muri! Helama tona ie tu No do pa era do mmau do megala ne, dhida nga kelodo we Deo!”

³⁹Ta lii ke do parri ddau do Farisi ngati telora ddau lowe he pa Yesus, ”Ama Guru, lii ko ta bhole hodha pa ddau do pedute Ama he.”

⁴⁰Ta bhale ke ri Yesus pa ro, ”Parahajha we mu! Kinga pehangngo-anni ke ro, wowadu-wowadu do na hedhe do ta hodha he ke.”

⁴¹Ta umu le Yesus nga Yerusalem, jhe do ngadde ke ri No ne dhara rae do naanne, ta tangi ke No.

⁴²Ta lii ke No, ”Hedui tarra, do rihi ne woie, kita do toi he ri au pa dhara lodho do nadhe, ne nga ne do nara ta pedubhe ne lua pedhuri pemira ne! Tapulara pa dhara awe nadhe nara dho ke ta ngadde ri au.

⁴³Do ta narro ri au ne hahhi awe, ta do ne ihi-muhu ihi-lawa au do ta tao ne rulabba-rulabba, jhe labbe pekehero au; jhe medae ro ta pekehero au, jhe pekehahhe au nga ti hari-hari kebhihu.

⁴⁴Do ta pemae tebho ttai ke au ri ro, hela'u-la'u nga hari-hari ddau do pee pa dhara au; jhe adho ke do ta hane ri ro ie ta hewue wowadu he do ta pee ri nga pera'a pa era ro, rowi do adho au do pedhuli nga awe ta ma gole ne au ri Deo!”

⁴⁵Ta maho ke Yesus la dhara Ammu Deo, jhe la hudhi la keluru ne ana dhaga-ana dhaga do paanne.

⁴⁶ Ta lii ke Yesus pa ro, ”Pa dhara Buku Lidara-Likewahhu Deo, do hure do bhuke mina hedhe: Do lii Deo, ’Ammu Ya dhe do ta jadhi ammu hebhajha.’ Tapulara tao ri mu ta nyabbhu mone raba unu-oha ddau!”

⁴⁷ Helodho-helodho Yesus ne ajha ddau pa dhara Ammu Deo. Ne kattu-kattu mone tunu-menahu he nga guru-guru aigama he, hela'u-la'u nga kattu-kattu do Yahudi he, do ddhei ke ta pemade Yesus,

⁴⁸tapulara nara dho ro ne loro jhara ta tao ne lai do naanne, rowi ne ddau he do pee nga petadi we ta dhanno ne liajha Yesus, jhe do munu tarra ne pa dhara ade ro ne lipedai-lipedai No he.