Read Sabu LUKAS 2 Bible Online

LUKAS 2 - Sabu bible

LUKAS 2

¹Pa dhara naanne, ta pereda ke Kehe Agustus, pa hari-hari ddau do pa dhara Rai-pereda Roma, ta bhuki ngara mita toi ne ae ddau pa dhara rai-pereda no.

²Nadhe ke ne lua bhuki ngara do petari-rai, do pekako pa dhara awe Kirenius do jadhi ta gubernur ihi-rai Siria.

³Hari-hari ddau pa dhara awe naanne, ta kako la bhuki ngara la dhara rae nga kowa ro miha.

⁴Ta pekaddhi ke Yusuf ngati Nazaret pa Galilea, la Betlehem pa Yudea, era metana Duae Daud; rowi Yusuf ngati kolo loro Daud.

⁵Ta la bhuki ke ri Yusuf ne no hela'u-la'u nga Maria, ana mobanni do peddhei nga Yusuf ne, do era pa dhara nga mejanni ihi ne.

⁶Pa dhara awe pa Betlehem ro, ta dhai ke ne awe pa Maria ta keho-dhara.

⁷Ta metana ke ri no heddau ana momone, ana mone-a'a ri no. Ta perobe ke ri no ri ra'a jhe pebba'e; pa dhara kerabha nga'a bhada do walle ri ruju'u made; rowi do dho nara ke ro era tu ta huri kattu.

⁸Pa dhara maddha do naanne do era ne mone bhata-bhata do nga jaga ne naki'i ro pa dhara padha pa ihi-rai do naanne.

⁹Ta harra hewakka ke ne naju Muri la pengaddi-anni pa ro, do nga weo nga kana ngati Deo la pekelale pa ro, moko ta meda'u-dhai ke ro.

¹⁰Tapulara ta lii ke ne naju Deo ne pa ro, ”Bhole meda'u! Rowi ne dakka ya, nga aggu li hagha dhara tu mu — lii do dhai tarra ne wie lua mengallu nge nga kehaka dhara tu hari-hari ddau.

¹¹Pa lodho do nadhe pa dhara rae Daud, alla ke pemetana ne Duae Mone ma'i-Mone golo ne, Kristus, Muri.

¹²Nadhe ke ne tada tu mu: Do ta peabu mu nga heddau naiki do perobe ri ra'a, jhe do pebba'e pa dhara kerabha nga'a bhada.”

¹³Nga do dho e'e do dho toi ri ro, ne naju Deo do naanne do lere ri do ae naju Deo do wala do nga wue-waje Deo. Ne ane ro,

¹⁴”Lua dhida nga kelodo tu Deo do pa liru do rihi dhida nga ketutu! Nga pa raiwawa, ta hagha hilu dhara pemengallu ke ddau raiwawa, do pemengallu dhara Muri!”

¹⁵Ta ludu ne naju Deo he la era do mmau do megala, ta peli ke ro heddau nga heddau ne mone bhata he, ”Mai we di la Betlehem, la heleo ne lai do jadhi ne, do peke ri Muri pa di hedhe.”

¹⁶Ta kako dhangnge ke ro nga henginga-nginga, ta peabu ke ro nga Maria nga Yusuf, mina harre lema nga naiki do naanne, do pebba'e pa dhara kerabha nga'a bhada.

¹⁷Ta ngadde ri mone bhata he ne naiki do naanne, ta pedhiri ke ri ro nenga ne do peke ri naju Deo ne pa ro, jhara lua naiki do naanne.

¹⁸Ta madalae ke hari-hari ne ddau do dhanno ne lipedhiri mone bhata he.

¹⁹Tapulara ri Maria ta kedu'e ke ri no hari-hari ne napoharre, jhe keriwo pa dhara ade no.

²⁰Ta bhale ke ne mone bhata he nga wue-waje Deo, rowi hari-hari ne do dhanno nga do ngadde ri ro, do petu-tarra mii do lii naju Deo ne pa ro.

²¹ Ta aru lodho ne alla pemetana, ta dare ngutu ke ne naiki do naanne. Ta pehune ke ri ro ne ngara no ta Yesus, ngara do alle pepehune ri naju Deo ne pa naiki do naanne, nga do dho melole dae ri ina No.

²² Ta dhai ne awe pa Yusuf nga Maria, ta petobe ne uku pemmau-anni pedutu nga do dare ri Musa. Hakku ri do mina harre ke, ta aggo ke ri ro ne Naiki do naanne la Yerusalem, tu ta la jhole pa Muri.

²³ Rowi pa dhara Lipedara Muri do hure do bhuke mina hedhe, ”Hari-hari ana momone do mone-a'a, do jhamma ta jhole pa Muri.”

²⁴Ro lema do nga lua pedabbho ta la jhula bhara jhula, hemawo koro-iki, kiadho dhue ngi'u ana koro jhawa, mii do petakke pa dhara Lipedara Muri.

²⁵Pa dhara awe do naanne, pa Yerusalem do era heddau ne ngara no Simeon. No ddau do woie, do meda'u ri Deo, jhe do pa dhara nga mate ne awe Deo ta peballa kattu do Israel. Ta helobho ke no ri Henga Deo,

²⁶jhe do alle ke pepeke ri Henga Deo pa no, ta do dho made dae no, ki do dho ngadde dae ri no ne Duae Mone ma'i-Mone golo ne do alle pejaje ri Muri ne.

²⁷Ri lua jhagga Henga Deo pa Simeon, ta maho ke no la dhara Ammu Deo. Pa awe naanne lema ta maho le ke Yusuf nga Maria nga hero'e Yesus do dhai kappi hala ko, tu ta la petobe ne nga ne do alle pedare pa dhara uku aigama.

²⁸Moko ta hamme ke ri Simeon ne Naiki do naanne, jhe hero'e ri no, moko ta wue-waje ke Deo ri no,

²⁹”Muri ya ee, alle ke ri Au pepetobe ne lijaji Au pa dhara awe nadhe. Hane we naannu Au dhe, pebhale kattu nga ketanna.

³⁰Rowi do ngadde ke ri namada ya miha, ne Mone ma'i-Mone golo do ngati Au ne.

³¹Do alle ke pepemoke No ri Au tu hari-hari ddau-rai:

³² pala mii weo do peteleo ne rujhara tu ddau-ddau rai do wala, tu ta dakka ma nga Au; teleo do ta wie ne lua weo nga kana tu annu Au Israel!”

³³Ta madalae ke Yusuf nga Maria ne dhanno ne nga ne do pale ri Simeon jhara lua Ana ro ne.

³⁴Ta wie ke ri Simeon ne lua tarro ie nga menyarro mangngi pa ro jhe lii pa Maria ina ri Naiki ne, ”Naiki do nadhe do alle ke pepidhe ri Deo tu ta pemae-tebho-ttei nga ta ma'i ta golo ae ddau do Israel. Do ta jadhi tada no ngati Deo, do ta pebhata nga No do ae ddau,

³⁵jhe ri mina harre do ta megalli ke ne ihi ade ro. Lua hedui-herui do ta peno'e ne ade au mii no'e ri hebhangngu kelewa do na'a he.”

³⁶Era ri heddau nabi mobanni, do dhai weka ke. Ne ngara no Hana, ana Fanuel, ngati udu Asyer. Ta alla no pemanno-ammu pidu bhue ttau,

³⁷ta made ke ne ddau pa hedhapa no, pa dhara awe nadhe ne pemuri no aru nguru appa bhue ttau ke. Adho ke no do ngaddi ta langnga ti Ammu Deo ne. Anni maddha nga anni lodho do pee nga penina ke no ne hebhajha nga puasa.

³⁸Pa dhara awe naanne lema, ta dakka le ke no, jhe waje Deo, jhe pedae ri no ne jhara lua Naiki do naanne pa hari-hari ddau do mate ne awe ngati Deo tu ta peballe-kattu Yerusalem.

³⁹ Ta moko le hari-hari ne nga ne do jhamma ta petobe ri Yusuf nga Maria pedutu nga lai do dare do Kewahho ri Deo, moko ta bhale ke Yusuf nga Maria la Nazaret pa Galilea.

⁴⁰Ju kepai ne Naiki do naanne ju rui nga kedi. Do dhai mmau dhara, jhe do dhai tarra-tarra Deo ne hajha nga ddhei nga No.

⁴¹ Hewue ttau-hewue ttau, ina nga ama Yesus he, kako la Yerusalem tu ta la Nga'a Kewahhu Paskah.

⁴²Ta dhai ta henguru dhue bhue ttau ne pemuri Yesus, ta kako ke ro mii pa tima he.

⁴³Ta moko ne awe nga'a kewahhu ne, ta bhale ke ro, tapulara Yesus, Naiki do naanne do pee ko pa Yerusalem, adho do toi ri ina nga ama No.

⁴⁴Pa penge ro, do era ma No pa telora ddau lowe he. Ta tobo le ta helodho-rai ro ne kako, jhe itu pekale gaa ro; ta kale ke Yesus ri ro pa telora a'a-ari ro he nga pa telora ddau-ddau do petada he nga ro.

⁴⁵Tapulara ngadde dho Yesus ri ro, hakku ta bhale ke ro la Yerusalem.

⁴⁶Ta tallu lodho ne kale ri ro, ta ngadde ke Yesus ri ro, era pa dhara Ammu Deo. Era do mejaddhi ta pedhanno nga lii guru-guru aigama he, jhe pemaho ri No ne likebhali-likebhali.

⁴⁷Dhai madalae hari-hari ddau do dhanno ne libhale No do mina harre ne worawwu pekatta.

⁴⁸Dhai madalae lema ina nga ama No ne heleo No. Moko ta lii ke ina No pa No, ”Ana ya-ee, ta nga ke Au hakku tau mina hedhe pa jhi? Dhai hetenga made jhi dhue ne nga ama Au ne kale Au!”

⁴⁹Ta bhale ke ri Yesus, ”Ta nga ama nga ina hakku pekale nga Ya? Ta do dho toi ri ina nga ama ta do jhamma Ya ta era pa dhara Ammu Ama Ya?”

⁵⁰Tapulara tada dho ro, ta ne nga ne lua pedabbho libhale Yesus do naanne.

⁵¹Ta alla pemina harre ta bhale ke Yesus hela'u-la'u nga ro la Nazaret, jhe pee No nga pedhanno nga ro. Hari-hari ne lai do na harre ta kedu'e we ri Maria pa dhara ade no.

⁵² Ju kepai No, ju mmau dhara, jhe Deo ju hajha ju ddhei nga No, mina harre lema ddau raiwawa do ddhei nga No.