Read Sabu LUKAS 21 Bible Online

LUKAS 21 - Sabu bible

LUKAS 21

¹Pa dhara Ammu Deo, ta ngaddi ke ri Yesus ne ddau-ddau do kaja he do pemaho doi la dhara patti era jhula ne.

²Ta ngadde ke ri No lema heddau mobanni-wue do dhai kehia, do pemaho dhue mada doi mara.

³Moko ta lii ke Yesus, ”Dhanno ko ri mu: mobanni-wue do nadhe, do pemaho rihi ae ngati hari-hari ddau do wala he.

⁴Rowi ne do wie ri ro hari-hari ngati lua do kerihi ngati unu-oha ro. Tapulara mobanni-wue do nadhe, maji lema no ta do dhai kehia, alla ke pewie ri no hari-hari ne nga ne do era pa no, do paralu tu muri mada no.”

⁵Ta era ke ne ddau-ddau do pedae jhara lua gaa nga merake Ammu Deo, do penoo ri wowadu-wowadu do gaa nga merake nga bhara jhula-bhara jhula do jhula pa Deo. Moko ta lii ke Yesus pa ro,

⁶”Do ta era ne awe ne hine, hari-hari ne do ngaddi ri mu hedhe do ta pemenyalla; bhule dho hewue wowadu he hine do ta pee ri nga pera'a pa era ro!”

⁷Ta kebhali ke ro pa Yesus, ”Ama Guru, parri ke ne jadhi ne lai do naanne? Ne nga ke ne telia ta do ta jadhi ke ne lai do naanne?”

⁸Ta lii ke Yesus, ”Jaga pewoie we mu mita do dho dhai mu ta luu. Do ta ae ne ddau do ta nga ngara Ya, jhe lii ro, ’Ya ke dhe no!’ nga, ’Dhai ke ne awe ne.’ Tapulara bhole pedutu ro ri mu.

⁹Bhole meda'u lema mu kinga rangngi mu ne lii jhara lua pemuhu-pelawa nga lua pepara-petabbhu. Hari-hari do napoharre do ne pa petu ne, adho dae awe pedakka rahi raiwawa.”

¹⁰Moko ta peterue ke ri Yesus ne lipedai No, ”Ddau-rai ngati hewue rai do ta la pemuhu-pelawa nga ddau-ddau rai do wala rai nga hewue rai-pereda do ta la pemuhu nga rai-pereda do wala.

¹¹Pa hebhakka-hebhakka do ta jadhi dhai-ie do meliri dhara, lua menganga-rai nga lua paddha nga hagu. Do ta jadhi ne lai-lai do rihi meliri dhara pa ihi liru.

¹²Tapulara nga do dho jadhi dae ne hari-hari ne na harre, do ta kappa mu jhe dede jhe merahhu. Do ta pereha ne hala mu pa ammu-ammu hebhajha jhe pemaho mu la dhara ammu bhaddo. Jhe do ta nuni ta pera'u mu la hedhapa duae-duae nga mone pereda-mone pereda taga ta ri mu ddau pedute Ya.

¹³Naanne ke ne awe tu mu ta pepeke ne Li Hagha Dhara do ngati Deo ne.

¹⁴ Halla-anni we mu pa dhara ade mu, bhole era ne lua kepapi jhara lua ne nga ne do jhamma ta bhale ri mu tu ta pemole ne ngi'u mu.

¹⁵Do ta wie ri Ya pa mu ne libhale-libhale nga uku nga mmau dhara, hakku ri do mina harre ke bhule dho ke heddau, ngati ihi-muhu ihi-lawa mu do nara ta pebhata nga mu kiadho ta pehile ri ne do pale ri mu he.

¹⁶Do ta pewie mu ri ina-ama mu, ri tuahhu-tuahhu mu, ri ana-oha mu nga ri ihi-anga mu. Haghe ri ti telora mu do ta pemade ri ro.

¹⁷Hari-hari ddau do ta bubu dhara kanna dhallu nga mu ddau pedute Ya.

¹⁸Tapulara ie ta helai rukattu he ngati mu adho do medae ta era do keloro ngati kattu mu.

¹⁹Kinga makka mu tee nga wangnge, do ta helama ke mu.”

²⁰”Kinga ngadde ke ri mu Yerusalem do lao do kehero ri do horodhadhu, do ta toi ke ri mu ta do ne rae do napoanne adho ke ri ne medae ta pemere nga worai.

²¹Pa awe do naanne, ddau do era pa Yudea do jhamma ke ta perai la kolo lari-ae. Ro ne do era pa dhara rae do jhamma ke ta mahhu-anni ngati dhara rae, nga ro do era pa tele bhole maho wari la dhara rae.

²² Rowi pa dhara lodho-lodho do napoharre ke, ’Lodho-lodho do ta pebune ke ne lua wolo’, mita tobo ke ne nga ne do hure do bhuke pa dhara Buku Lidara-Likewahhu Deo.

²³Do dhai tarra ne meliri dhara lodho-lodho do napoharre tu mobanni do era pa dhara nga mejanni ihi, nga ina-ina do era pa dhara nga pehuhu ana! Ne ihi rai do nadhe do medae ta peabu nga lua hedui-herui do mone-ae, jhe do ta wolo ri Muri ne ddau-rai do nadhe.

²⁴Era do ta pemade ri kelewa, era ri do ta aggu la rai ddau do wala mii ddau do jharra pa dhara muhu; jhe Yerusalem do ta ma jhalle ma kerupe ri ddau-ddau do dho tade Deo, tade alle ne awe do petakke ri Muri ne tu ro.”

²⁵ ”Do ta ngaddi ne tada nga telia pa mada lodho, warru nga pa moto-moto pa ihi liru nidhe hine. Pa raiwawa, ddau rai-ddau rai do ta meghighi meda'u jhe bhingu pa dhara hedhape ne likedu-kedarru kolo dahi do pehilo-wole.

²⁶Ddau raiwawa do ta meda'u hetenga made penaja nga hari-hari nga ne nga we ne do ta jadhi pa hari hewue raiwawa do nadhe, rowi hari-hari do pereda jhara dhida nidhe do ta kenyawu-nyela.

²⁷ Pa dhara awe do naanne ke ne dakka Ana Ddau Raiwawa, jhara kolo merammu pudi nga kuaha jhe nga lua weo nga kana do ketutu ne.

²⁸Jhe kinga jhari ke ta jadhi ne lai do naanne, kaddhi we jhe pekaddhe ne kattu mu, adho do ta rajja ri, do ta peballa kattu ke mu.”

²⁹Moko ta pedhire ke ri Yesus ne lipehakku do nadhe, ne ane No, ”Heleo we ri mu kepue kepallu nga hari-hari kepue ajhu do wala he.

³⁰Kinga jhari ke ta obo ne rukolo he, ta toi ke ri mu ta do hedharra ke warru pana.

³¹Mina harre lema kinga jadhi ke ne lai-lai do na harre, ta toi ke ri mu ta do henginga ke Deo ne ma pereda mii heddau Duae.

³²Mita toi ri mu! Ne lai-lai do na harre do ta jadhi nga do dho made dae hari-hari ddau do muri pa awe nadhe.

³³Liru nga raiwawa do ta ila, tapulara lipedai Ya do na hedhe do peloro lohe la lodho do nami-mii ne.”

³⁴”Jage we ne ngi'u mu, mita do dho dhai mu ta rihi ne bilu nga lai ala-lai ala nga nginu mawo, kiadho ta rihi penge ne lai-lai muri mada mu, hakku ki harra hewakka ne Lodho do naanne era mu nga do dho moko dae.

³⁵Rowi ne Lodho do naanne do pala mii kejhajji he pa hari-hari ddau pa raiwawa dhe.

³⁶Jaga-jaga we mu, jhe hebhajha we loro-loro mita nara mu ta peludu hari-hari do medae ta jadhi, jhe nara mu ta la peabu nga Ana Ddau Raiwawa.”

³⁷ Pa anni-lodho ne ajha ri Yesus ne ddau he pa Ammu Deo, jhe kinga anni-maddha kako No la Lede Zaitun jhe pee No paanne.

³⁸Hadhi jhammi-ae hari-hari ddau dakka la Ammu Deo tu ta la dhanno ne lii ajha Yesus.