Read Sabu LUKAS 22 Bible Online

LUKAS 22 - Sabu bible

LUKAS 22

¹ Do hedharra ke ne awe ne ta nga'a kewahhu Roti do Dho Bhule nga Muu ne do pale ta Paskah ne.

²Kattu-kattu mone tunu-menahu nga guru-guru aigama he do pa dhara nga kale ne loro jhara tu ta pemade Yesus nga do dho tenge ta toi ie ta ri nadu we, rowi do meda'u ro ri ddau lowe he.

³Ta alla pemina harre ta maho ke wango pa Yudas do pedoe lema ta Iskariot, heddau ngati henguru do dhue ddau ana hekola Yesus he.

⁴Rowi mina harre ke ta Yudas la peli nga kattu-kattu mone tunu-menahu he nga kattu-kattu jaga Ammu Deo he jhara lua mina mii no ne nara ta jhole Yesus pa ro.

⁵Dhai mengallu dhara ro, jhe pejaji ro ta wie doi pa Yudas.

⁶Ta maddhi le ke pa dhara Yudas, jhe kale ne awe do woie tu ta jhole Yesus pa ro, nga do dho toi ri ddau.

⁷Ta dhai ke ne lodho nga'a kewahhu ne, Nga'a Roti do Dho Bhule nga Muu ne nga awe kehabbhe naki'i jhawa tu nga'a Paskah ne.

⁸Moko ta pepu ke Petrus nga Yohanes ri Yesus, ”Kako we mu la pemoko ne nga'a tu ta nga'a Paskah ne di.”

⁹Ta kebhali ke ro, ”Pa mii ke ne ddhei Ama, ne pemoke ri jhi?”

¹⁰Ta bhale ke ri Yesus pa ro, ”Ki dhai mu ta maho la dhara rae ne, do ta peabu mu nga heddau momone do nga aggu gidi do ihe ri ei. Pedute no ri mu tade maho no la dhara ammu,

¹¹jhe lii mu pa muri ammu do naanne: Ane Guru, ’Pa mii ne era tu Ya nga ana hekola Ya he, tu ta nga'a, nga'a Paskah ne?’

¹²Do ta pejhujhe ri no pa mu hewue kama pa dhida do balla, jhe do nabbu ke ne nalu paanne.”

¹³Moko ta kako ke Petrus nga Yohanes, jhe peabu tarra ro, do hala mii lii Yesus pa ro he. Ta pemoko he ke ri ro ne nga'a Paskah ne.

¹⁴Ta dhai ne awe tu ta nga'a Paskah ne, ta mejaddhi ke Yesus nga ana hekola No he pa era lai tao ne.

¹⁵Moko ta lii ke Yesus pa ro, ”Do ddhei tarra ke Ya ta nga'a ne nga'a Paskah do nadhe hela'u-la'u nga mu, nga do dho dhue-hape dae ri Ya ne lua hedui-herui ne!

¹⁶Rowi, parahajha we: Adho ke Ya do ta nga'a ri tade dhai ta peteleo ne, lua pedabbho ngati lai tao do nadhe pa Raiwawa Deo do Wowiu ne.”

¹⁷Ta alla pemina harre ta aggo ke ri Yesus ne kabha nginu ago ne, jhe peha'e ri No ne kolo lii ie-ae pa Deo, jhe lii No, ”Aggo we ne nadhe, jhe pejhole-jhole we;

¹⁸jhe mita toi ri mu: jhari ngati awe do nadhe, adho ke do ta nginu ri Ya ne ei-ago do nadhe tade dhai Deo ta pereda nga kemolo.”

¹⁹Ta alla pemina harre ta aggo ke ri Yesus ne roti ne. Ta alla No pepeha'e ne kolo lii ie-ae, ta pipi-pipi ke ri No ne roti do na harre, jhe wie ri No pa ana hekola he, jhe lii, ”Nadhe ke ne ngi'u Ya do jhole tu mu. Tao we ne nadhe tu ta pehenge ne jhara lua Ya.”

²⁰ Mina harre lema ta alla penga'a he, ta wie ke ri Yesus ne kabha nginu ago ne pa ro jhe lii, ”Kabha nginu do nadhe, lipejaji Deo do wowiu, do pekehamme ri raa Ya — raa do alle pedhute tu mu.”

²¹ ”Tapulara heleo we! Ne ddau do ta pewie Ya ne, do nee hela'u-la'u nga Ya pa dhe!

²²Do tarra ma Ana Ddau Raiwawa do ta made mii do alle ke pepetato ri Deo; tapulara apa nga kerewe tu ddau do pewie No ne!”

²³Moko ta jhari ke ne ana hekola No he ta pekerrei-kebhali heddau nga heddau, ta nadu ti telora ro do ta tao ne lai do naanne.

²⁴ Pa telora ana hekola Yesus he, ta era ke ne lua pehala, jhara nadu ti telora ro, do jhamma ta ege ta do rihi mone-ae.

²⁵ Ta lii ke Yesus pa ro, ”Duae-duae ngati ddau-rai do dho tade Deo, do ta jhalli-ta kerupu ana-ari, nga mone pereda-mone pereda he, do pali ta ’Mone Herugu ana-rai’.

²⁶ Tapulara mu, ie dho mu ta tao mina harre. Do ne pa petu ne, ddau do mone-ae pa telora mu, do jhamma ke ta jadhi ta do rihi naiki ri, jhe do jadhi ta mii kattu ta mii naannu.

²⁷ Nadu ke ne do rihi mone-ae ne: ddau do mejaddhi pa meja, we ddau do pemoke no? Do tatu ke ta ddau do mejaddhi pa meja ne. Tapulara ne era Ya pa telora mu mii heddau mone pemoko he.

²⁸Pa dhara hari-hari lua hedui-herui Ya, era loro mu hela'u-la'u nga Ya.

²⁹Mina mii Ama ne jhole ne higa pa Ya tu ta pereda, mina harre lema ne jhole ri Ya pa mu ne higa do naanne.

³⁰ Ri do mina harre do ie ke mu ta mengallu nge nga kehaka dhara hela'u-la'u nga Ya pa awe jadhi Ya ta Duae ne. Jhe do ta mejaddhi pa dhida henguru dhue bhue kedera, tu ta pereda pa henguru dhue huhu do Israel.”

³¹”Simon, Simon, dhanno ko ri au! Pa wango do alle ke pewie lua ta hakku mu; mii gandum do ta petale ngati kuri ne, mita do woie ta petale ti do woapa.

³²Tapulara alla ke Ya pehebhajha tu au, Simon, mita do dho muru ne lua manno au. Jhe kinga alle ke au pepebhale ma nga Ya, do jhamma ke ri au ta perui ne tuahhu au he.”

³³Ta bhale ke ri Petrus, ”Muri, do moko ke ya ta maho la dhara ammu bhaddo, nga ta made hela'u-la'u nga Muri!”

³⁴Ane Yesus pa no, ”Parahajha we au, Petrus, nga do dho tutu-oo dae manu pa dhara rammi do nadhe, tallu wari ke au ne alle pepehile Ya.”

³⁵ Ta alla pemina harre ta lii ke Yesus pa ro, ”Pa awe do uru he, pepu mu ri Ya, nga do dho o'o ta aggu wokepaka doi, haku, kiadho helapa, era mu ta peabu nga lua kehakku nga gahara pa lua ne nga-nga?” Bhale ri ro, ”Ngaddi dho!”

³⁶Ta lii ke Yesus pa ro, ”Tapulara pa dhara awe nadhe, ne lii Ya pa mu, nadu do nga wokepaka doi kiadho do nga haku, do jhamma ke ta aggu ri no; jhe nadu do dho bhule nga kelewa, do jhamma ke ri no ta pewie ne juba no tu ta walli kelewa.

³⁷ Rowi, parahajha we, lilolo ti Buku Lidara-Likewahhu Deo do lii mina hedhe, ’Do ege ke No ta mii heddau do apa nga kerewe’, do jhamma ke ta jadhi pa ngi'u Ya. Rowi ne nga ne do hure do bhuke pa dhara Buku Lidara-Likewahhu Deo, jhara lua ngi'u Ya, do nee ke pa dhara nga jadhi pa awe do nadhe.”

³⁸Ta lii ke ne ana hekola Yesus he, ”Muri, pa dhe hee dhue bhangngu kelewa.” Bhale ri Yesus, ”Waji we!”

³⁹Ta pekaddhi ke Yesus ngati dhara rae ne, jhe kako mii pa tima he la Lede Zaitun. Ne ana hekola No lema he do kako penau nga No.

⁴⁰Ta dhai la anne ta lii ke Yesus pa ana hekola No he, ”Hebhajha we mu mita do dho tao mu lubhu harro nga menyilu, kinga lakka mu ri ruluji-ruhakku.”

⁴¹Ta alla pemina harre ta kako ke No pejjhau-anni hudi ngati ro, era ma mii jjhau hewari pekajjhi wowadu he, ta lakku rutu ke No jhe hebhajha,

⁴²”Ama, ki ta ie mudhe he, pejjho ko we ngati Ya ne lua hedui-herui do narro do lake ri Ya dhe. Tapulara bhole pedute nga do ddhei Ya, pedute we nga lua ddhei Ama ma.” [

⁴³Ta dakka ke heddau naju Deo la perue No.

⁴⁴Do dhai hedui tarra ne ade No, hakku ri do mina harre ke, ta ju penina ke No ne hebhajha. Ne eikebahhu No ta peghahi ke huti mii raa he la worai.]

⁴⁵Ta alla No pehebhajha ne, ta bhale ke No la nga ana hekola No he. Ta ngaddi ke ri No ne ana hekola he era ke do bba'i, ri do rihi hedui ne ade ro.

⁴⁶Moko ta lii ke Yesus pa ro, ”Ta nga mu hakku bba'i? Kaddhi we mu jhe hebhajha we mita do dho lakka mu ri ruluji-ruhakku.”

⁴⁷Pa dhara nga pedai lii ko Yesus, ta dakka hekewolo ddau, jhe Yudas ne mone jhuru kattu tu ro, heddau ti telora ana hekola Yesus he. Ta kako ke Yudas la nga Yesus, jhe la hengaddho Yesus.

⁴⁸Tapulara ta lii ke Yesus pa no, ”Yudas, ri lua hengaddho nadhe ke, ne pewie Ana Ddau Raiwawa ri au?”

⁴⁹Ta dhai ta heleo ri ana hekola he, ne nga ne do ta jadhi, ta lii ke ro, ”Muri, para ko ri kelewa jhi ne ddau do na hedhe?”

⁵⁰Moko heddau ti telora ro ta wino ke ri no ne kelewa no pa naannu mone tunu-menahu mone-ae ne, hakku happo ne wodilu hebhakka kedhanga ne.

⁵¹Tapulara ta lii ke Yesus, ”Pengaha!” Moko ta bhuje ke ri Yesus ne wodilu ddau do naanne jhe peie ri No.

⁵²Ta alla pemina harre ta lii ke Yesus pa kattu-kattu mone tunu-menahu he, nga pa do horodhadhu do jaga Ammu Deo he, nga pa kattu-kattu unu do Yahudi he, do dakka la anne tu la kappe Yesus, ”Pa penge mu, Ya dhe ddau do tao apa nga kerewe ko, hakku dakka mu nga aggu kelewa nga tubu ta ma kappe Ya?

⁵³ Helodho-helodho Ya, do nga mu pa Ammu Deo, kappe dho Ya ri mu. Tapulara nadhe ke ne awe unu mu ta tao, awe do unu ri henga kerabba ke.”

⁵⁴Ta kappe ke Yesus ri ro, jhe aggo la ammu kattu mone-ae mone tunu-menahu. Petrus do pedutu ma ngati jjhau.

⁵⁵Pa telora kebhalla ammu do naanne do era rao ai do weo, moko ta kako ke Petrus la mejaddhi hela'u nga ddau-ddau do mejaddhi pekehero ne rao ai do naanne.

⁵⁶Ta ngadde ke Petrus ri heddau naannu mobanni do mejaddhi pa ngidi rao ai do naanne, moko ta lii ke no, ”Ddau nadhe lema ngine ne do era hela'u-la'u nga Yesus!”

⁵⁷Tapulara ta pehile ke Petrus, ane no, ”Tade tu-tu dho ri ya ne Ddau do naanne!”

⁵⁸Rihi dho ne tui ti naanne, ta ngadde ri ke Petrus ri heddau do wala, jhe lii no, ”Au lema dhe, heddau ti telora ro!” Tapulara ta bhale ke ri Petrus, ”Adho, adho ya!”

⁵⁹Era heja he ne tui ri, nga lii do maddu, ta lii ke heddau do wala ri, ”Au dhe ana hekola Yesus, rowi no lema do Galilea!”

⁶⁰Tapulara bhale ri Petrus, ”Ne nga ne do pale ri au ne, tada dho ya!” Pa dhara nga pedai lii ko Petrus, ta tu-tu-oo ke manu.

⁶¹Ta kebhibha ke Yesus jhe ketarre Petrus. Moko ta henge ke ri Petrus ta do alla ke Muri pelii pa no, ”Nga do dho tu-tu-oo dae manu pa dhara rammi do nadhe, alle ke Ya pepehile ri au tallu wari.”

⁶²Moko ta mahhu-anni ke Petrus ngati anne, jhe la tangi pedihi-noho.

⁶³Ta kare-menihe ke Yesus jhe dede jhe merahho ri ddau-ddau do jage Yesus he.

⁶⁴Ta henabbhe ke ri ro ne namada Yesus, jhe kebhale pa No, ”Hakko ko ta peke ri au pa jhi, nadu ke ne do dede Au dhe?”

⁶⁵Ae ri ko ne lii kara-menihi do pali ri ro pa Yesus.

⁶⁶Ta bhale ma jhammi-ae, ne kattu-kattu do Yahudi nga kattu-kattu mone tunu-menahu he nga guru-guru aigama he ta peowu ke, jhe aggo Yesus la hedhapa Kattu-kattu Aigama ro.

⁶⁷Ta lii ke ro pa Yesus, ”Peke ko ri Au pa jhi, Au ke ne Duae Mone ma'i-Mone golo ne?” Ta bhale ke ri Yesus, ”Kinga peke ri Ya pa mu, parahajha dho ma mu.

⁶⁸Jhe kinga kebhali Ya pa mu, wae dho ri mu ta bhale.

⁶⁹Tapulara jhari ngati awe nadhe, Ana Ddau Raiwawa do ta mejaddhi ke pa hebhakka kedhanga Deo do Mone Wiki Rihi Higa nga Kuaha ne.”

⁷⁰Ta lii ke ro hari-hari, ”Ki do mina harre, Au ke ne Ana Deo ne?” Bhale ri Yesus, ”Mina harre ke ne ane mu ma.”

⁷¹Moko ta lii ke ro, ”Tenge dho ke ta era hakahi ri. Do rangnge ke ri di ma miha ne lipedai ngati ubha No ma miha!”