Read Sabu LUKAS 23 Bible Online

LUKAS 23 - Sabu bible

LUKAS 23

¹Hari-hari ne ddau do era pa era happo hala Yesus ne, ta titu ke ro, jhe aggo Yesus ri ro la hedhapa Pilatus.

²Pa ni ta pemaho ke ri ro ne likela penaja nga Yesus. Ne lii ro, ”Abo ri jhi ne Ddau do nadhe do pa dhara pehuli peteballi ana-rai. Pedidi ddau ri No ta bhole ma'i bhea pa Kehe, rowi ne ane No, No ke ne Kristus ne, heddau do Duae.”

³Moko ta kebhali ke Pilatus pa Yesus, ”Do petu ta Au dhe ne Duae Yahudi?” Bhale ri Yesus, ”Mina harre ke ne lii au ma.”

⁴Moko ta lii ke Pilatus pa kattu-kattu mone tunu-menahu nga pa ddau lowe he, ”Ngadde dho ri ya ie ta hahhi hala he pa Ddau do nadhe tu ta wole No.”

⁵Tapulara ta rihi ri ke ro ne meggai, ”Ri liajha No ke, pedidi ddau ri No pa hari hewue Yudea; uru jhara pa Galilea, jhe pa awe nadhe, dhai ke hape ma dhe.”

⁶Ta rangnge ri Pilatus ne naanne, ta kebhali ke no, ”Ddau nadhe ngati Galilea?”

⁷Ta alla ro pepika ta do Yesus ngati ihi rai do dha'i pereda Herodes, ta moe ke Yesus ri Pilatus la nga Herodes, do pa dhara awe do naanne do era lema la Yerusalem.

⁸Dhai mengallu dhara Herodes, ta dhai ta ngadde Yesus ri no, rowi do tui ke ne rangnge ri no ne jhara lua Yesus, jhe do ddhei ke Herodes ta ngadde Yesus. Do henao ke ri Herodes, ta nara ta heleo ne lua madalae do ta tao ri Yesus.

⁹Rowi do mina harre ke, ae ne likebhali do kebhali ri Herodes pa Yesus, tapulara bhale dho ri Yesus ie ta heubha he.

¹⁰Ne kattu-kattu mone tunu-menahu he nga guru-guru aigama he do la mengadha ke la anne, jhe pemaho ri ne likela do rihi rui ri penaja nga Yesus.

¹¹Ri Herodes nga do horodhadhu no he, e'e ne ddhei ro he ke ne pemange nga kare menihe Yesus, jhe pepake ri ro bhara pake nadhuae, ta alla pemina harre ta moe bhale wari ke Yesus la nga Pilatus.

¹²Pa dhara lodho do naanne lema Herodes nga Pilatus ta peihi-anga bhale wari ke, do pa uru jhara he do pemuhu ro.

¹³Ta pekupu ke ri Pilatus ne kattu-kattu mone tunu-menahu, kattu-kattu ana-rai he,

¹⁴jhe lii Pilatus pa ro, ”Aggo ri mu ne ddau do nadhe ma nga ya, jhe lii mu ta No do pehuli-peteballi ddau. Pa awe nadhe pa hedhapa mu ma, alle ke ri ya pepereha ne hala No, ngadde tu-tu dho ri ya, ie ta hahhi lua apa he ne do tao ri No, pedutu mii likela mu penaja nga No.

¹⁵Mina harre lema pa dhahi Herodes, ri do mina harre ke hakku alle ke no pemoe Yesus ma nga jhi ri. Ddau do nadhe ngaddi dho No ta tao ie ta hahhi lai he do jhamma ta wole ri lua wolo made.

¹⁶Rowi do mina harre ke do medae ta dede ri gui he ke ri ya, ki alla pemina harre ta gole he ke No ri ya.” [

¹⁷Hadhi dhai la lua nga'a kewahhu Paskah, do jhamma ta gole heddau do rate tu ddau-rai.]

¹⁸Ta peka hari-hari ne ddau do era paanne, ”Pemade No! Gole Barabas tu jhi!” (

¹⁹Hakku bhaddo Barabas, rowi do tao lua pelawa pa dhara rae nga taga tari pemade ddau.)

²⁰Do ddhei ke Pilatus ta gole Yesus, ri do mina harre ke, ta pedai lii ri ke no hewari ri nga ddau lowe he.

²¹Tapulara ta peka ke ro, ”Ketoe peabbha-rappa No, ketoe peabbha-rappa No!”

²²Tu pa do ketallu wari ne ta lii ri ke Pilatus pa ro, ”Tapulara ne nga ne hala do tao ri No? Ngadde dho ri ya ie ta hahhi hala he pa No do jhamma No ta wole ri lua wolo made! Ta dede ri gui he we No ri ya, jhe gole No ri ya.”

²³Tapulara ta pee ke ro nga peka do maddu-maddu ta Yesus do jhamma ta ketoe peabbha-rappa. Moko pa pedakka, ta jadhi he ke pedutu nga lii peka ro.

²⁴Moko ta pebune he ke ne lua wolo ta pemade pa ngi'u Yesus penau nga lua ddhei ddau do na harre,

²⁵jhe gole ne ddau do ame ri ro ne, ddau do bhaddo taga tari tao lua pelawa nga pemade ddau. Ta alla pemina harre, ta jhole he ke Yesus pa ro ta tao e'e ne ddhei ro.

²⁶Moko ta aggo ke Yesus ri ro. Pa telora rujhara, ta peabu ke ro nga heddau ne ngara Simon, ddau ngati Kirene, do ta maho ju la dhara rae. Ta kappe ke Simon ri ro, jhe pehahhe no ta hape ne ajhu ketoe Yesus ne pa kejhunga Yesus.

²⁷Ae ddau ne do pedute Yesus ngati kejhunga — pa telora ro era do parri ddau mobanni lema. Ne mobanni do na harre do nga tangi taga Yesus.

²⁸Tapulara ta kebhibha ke Yesus la nga ro jhe lii, ”Wo mobanni-mobanni Yerusalem! Bhole tangi mu taga ngi'u Ya. Tangi we mu taga ngi'u mu nga taga ana-ana mu.

²⁹Rowi do ta dhai ne awe ne, ddau do medae ta lii, ’Dhai tarra mengallu dhara tu mobanni-mobanni do dho ngaddi ta era wue nga wila, do dho ngaddi ta era nga ana, nga do dho ngaddi ta pehuhu ana!’

³⁰ Pa dhara awe do naanne ke, ddau do ta lii pa lede nga bhojo, ’Mai we ma nappi ma kebii jhi!’

³¹Rowi ki penaja nga ajhu do muri ke, do mina hedhe ke ne tao ddau, mina mii ri ko ne do ta tao ri ro penaja nga ajhu do made!”

³²Do era lema do dhue ddau do wala — hari do dhue ddau ne ddau do na harre ddau do tao apa — do aggu tu ta wolo ta pemade hela'u-la'u nga Yesus.

³³Ta dhai la era do pale ta ”Golgota” (pa dhara lii di Rui Kabha Kattu) ta ketoe peabbha-rappa ke Yesus ri ro nga hari do dhue ddau do tao apa he — heddau pa hebhakka kedhanga jhe heddau ri pa hebhakka keriu Yesus.

³⁴ Moko ta hebhajha ke Yesus, ”Ama, pehuba we ro! Toi dho ri ro ne nga ne do tao ri ro hedhe.” Ne bhara pake Yesus ta pebhagi-bhagi ke ri ro nga pepidhi ode.

³⁵ Ne ddau-ddau do titu paanne do pa dhara nga heleo, jhe pa dhara awe naanne lema ne kattu-kattu do Yahudi he do pa dhara nga kare-menihe Yesus jhe lii ro, ”Ddau do wala alla ke ri No pepehelame, pa awe nadhe ri, hakko ko ri No ta pehelame ne ngi'u No miha, ki do tarra ma No ta Duae Mone ma'i-Mone golo ne, do pidhe ri Deo ne!”

³⁶ Do horodhadhu he lema do kare-menihe Yesus. Ta kako ke ro la wie ne eiago do menyilu pa Yesus,

³⁷jhe lii ro, ”Ki do tarra ma Au ta Duae ngati do Yahudi, pehelame we ne ngi'u Au dhe!”

³⁸Pa dhida ajhu ketoe Yesus ne, do bhuke ne lii do nadhe: ”Nadhe ke ne Duae do Yahudi ne.”

³⁹Heddau ngati ddau do tao apa he, do ketoe paanne, do kare-menihe Yesus lema. Ne lii no, ”Adho Au ke ne Duae Mone ma'i-Mone golo ne? Golo-anni ko we Au, jhe golo le jhi!”

⁴⁰Tapulara ta jhege ke no ri do heddau ne, jhe lii no, ”Ta do dho meda'u le ke au ri Deo? Au do hela'u-la'u ne wole mii No lema.

⁴¹Tapulara we ne lua wolo tu di do pekatta nga wui-ai wui-tao di. Tapulara we, No dhe, bhule tu-tu dho nga hala!”

⁴²Moko ta lii ke no, ”Woo Yesus, henge we ya, kinga dakka Au mii Duae ne hine!”

⁴³Ta lii ke Yesus pa no, ”Parahajha we au, lodho do nadhe dhangnge do ta era ke au hela'u-la'u nga Ya pa era mengallu nge nga kehaka dhara ne.”

⁴⁴Era ma pa wabba henguru dhue nattu lodho he, weo dho ke mada lodho, jhe hari hewue raiwawa do nadhe, ta kerabba-guru-rai ke lohe la wabba tallu madha lodho he.

⁴⁵ Ne bhalla pewata do pa dhara Ammu Deo ne, tore bhagi dhue.

⁴⁶ Moko ta peka ke Yesus nga lipeka do rihi maddu, ”Ama! La dhara wolaabba Au ke ne jhole ri Ya ne ngi'u Ya!” Ta alla pepali mina harre, moko ta made ke No.

⁴⁷Ta ngadde ke ri kattu horodhadhu ne, ne lai do alla pejadhi ne, moko ta wue-waje ke Deo ri no, jhe lii no, ”Tarra, bhule dho No nga hala!”

⁴⁸Ne ddau lowe do kako la heleo he la anne, jhe ngadde ke ne nga ne do alla pejadhi ne. Ro hari-hari, bhale nga ade do dhai menyaha.

⁴⁹ Jhe hari-hari ne do petada he nga Yesus, nga mobanni he lema, do pedute No rai ngati Galilea, do titu ngati jjhau, jhe heleo hari-hari ne napoharre.

⁵⁰Ta era ke heddau ne ngara no Yusuf, do ngati dhara rae Arimatea pa ihi-rai Yudea. No heddau do woie nga do takke pekerihe ri ddau, jhe do pa dhara nga mate ne awe Deo ta jhare ne lua pereda No mii Duae. Maji lema no ta heddau ngati Kattu-kattu Aigama he, adho no do hela'u lii, nga lihappo nga hari-hari do tao ri Kattu-kattu Aigama he penaja nga Yesus.

⁵¹

⁵²Bhale Yusuf dhe, ta kako ke no la mengadha nga Pilatus, jhe ame ne ngi'u Yesus ne ta wie pa no.

⁵³Ta alla pemina harre ta la pepure ke ri no ne ngi'u Yesus ne ngati kolo ajhu ketoe ne, jhe wute ri bhalla linen ri no. Ta alla pemina harre, ta la takke ke ri no la dhara raidare do kee pa bhojo wowadu — ne raidare do naanne adho dae do ngaddi ta pake.

⁵⁴Lodho do naanne lodho Lammi; jhe do hedharra ke ta jhari ta lodho Pengaha-ihi.

⁵⁵Ne mobanni do dakka penau nga Yesus he do ngati Galilea he, do pedute le Yusuf ri ro, jhe do ngadde ri ro ne raidare ne. Do ngadde lema ri ro mi nami ne takke ne ngi'u Yesus pa dhara raidare ne.

⁵⁶ Ta alla pemina harre ta bhale ke ro la pemoko lawo-ajhu wwau mangngi nga eiloko wwau mangngi, tu ta la pehame ne ngi'u Yesus ne. Pa lodho Pengaha-ihi ne, jhagga dho ro ne nga-nga tu ta pedutu uku aigama.