Read Sabu LUKAS 3 Bible Online

LUKAS 3 - Sabu bible

LUKAS 3

¹Pa ttau do ke henguru kelammi ne ngati lua pereda Kehe Tiberius, Pontius Pilatus ne do jadhi gubernur pa Yudea, nga Herodes ne do pereda pa Galilea. Filipus tuahhu Herodes, ne do pereda pa Iturea nga Trakhonitis, jhe Lisanias ne do pereda pa Abilene.

²Ne do jadhi ta ta Mone tunu-menahu Mone-ae pa awe naanne Hanas nga Kayafas. Pa ttau do naanne ke, ne pedai lii Deo pa Yohanes, ana Zakaria ne, pa padha ae.

³Moko ta bela-ta lappa ke Yohanes Mone Pejhiu la hebhakka-hebhakka pa kejobho Loko Yordan jhe pejha'e-pepeke ri no ne lii do ngati Deo ne. Ta langu ta petoda ke ri Yohanes, ”Jharra we mu ngati lubhu harro nga menyilu mu, jhe do jhamma ke mu ta pejhiu, mita pehai-pehuba mu ri Deo.”

⁴ Lai do nadhe do penau ke nga do hure do bhuke pa dhara Buku Nabi Yesaya: ”Era ne ddau do langu do petoda pa padha nga meraddha, ’Pemoke we ne rujhara tu Muri, pemere we ne rujhara tu No.

⁵Jhe hari-hari ne do kejobho dannu we pemira, hari-hari lede nga bhojo kkai we pemira. Rujhara do kelakku-kelakku pemola we, nga rujhara do rijhu-rrau pemira we.

⁶Do medae ta ngaddi ri ddau-ddau pa hari hewue raiwawa ne ma'i ne golo ddau raiwawa ri Deo!’ ”

⁷ Ae ne ddau do dakka la nga Yohanes tu ta la pejhio. Ta lii Yohanes pa ro, ”Mu hedhe ddau do tao apa nga kerewe! Nadu ke ne do lii pa mu ta do nara mu ta ludu ngati lua wolo Deo do medae ta dakka ne?

⁸ Pedhelo we ri mu ne wui-ai wui-tao mu, do nara ta peteleo ta do jharra ke mu ngati lubhu harro nga menyilu mu! Bhole pahe ri mu ta do Abraham ne ama-appu mu. Henge we ri mu: Ngati wo wadu do na hedhe, do nara ta tao ri Deo ta jadhi ta ana-appu ri Abraham!

⁹ Do moko ke ne ketaka ta petue ne kepue ajhu jhe do ta mengalle lohe la amo-wuru he. Jhe kepue ajhu do nami we do dho bhule nga wue do woie do ta petue, jhe nabha la dhara rao-ai.”

¹⁰Ta kebhali ke ne ddau he pa Yohanes, ”Hakku ne nga ne do jhamma ta tao ri jhi?”

¹¹Bhale ri Yohanes, ”Ddau do nga bhajhu dhue bhalla, do jhamma ke hebhalla ta wie ri no pa ddau-ddau do dho bhule nga bhajhu, jhe ne ddau do era nga nga'a nga nginu do jhamma ke ri no ta pebhagi-bhagi nga ddau-ddau do dho bhule nga nga'a nga nginu.”

¹² Ddau-ddau do mone dhuki bhea he, dakka lema la nga Yohanes tu ta la pejhio. Ta kebhali ke ro, ”Ama guru, ne nga ke ne do jhamma ta tao ri jhi?”

¹³Ta bhale ke ri Yohanes, ”Bhole dhuki perihi ae ngati henga ne do alle ke pepe tato.”

¹⁴Era lema ne do horodhadhu do kebhali, ”Mina mii ri nga jhi? Ne nga ne do jhamma ta tao ri jhi?” Bhale ri Yohanes, ”Bhole hemuhi nga raba unu-oha ddau, jhe bhole peanynyi ddau nga hekemada-mada. Waji we ri gaji mu ma!”

¹⁵Pa awe napoanne ta jhari ke ne ddau he ta pekerrai-kebhali, ta do Yohanes ke ne Mone ma'i-Mone golo ne we adho, do pa dhara nga mate-mate ne ri ro.

¹⁶Ri do mina harre ke, ta lii ke Yohanes pa ro hari-hari, ”Pejhio mu ri ya, ri eiloko we, tapulara do ta dakka Heddau do rihi mone-ae ngati ya. Ta la boke ne dari helapa No he le we, jhamma tu-tu ledho ya. No ke ne do medae ta pejhio mu ri Henga Deo nga ai.

¹⁷Pa dhara wolaabba No do moko ke ne kerigidai tu ta dai nga ohe gandum tade mmau. Do lamuhi do ta hali la dhara hoka, tapulara kaa nga do woapa do ta tunu la dhara rao-ai do dho i'a made wari!”

¹⁸Mina harre ke ne litakka Yohanes pa ddau he, nga heworawwu-heworawwu loro jhara, pa dhara tawe ri no ne Li Hagha Dhara ne.

¹⁹ Tapulara ta lii ke Yohanes pa Herodes, jhara lua banga-ammu Herodes nga Herodias, ddau pa hedhapa tuahhu Herodes; nga hari-hari wui-ai wui-tao Herodes do woapa he.

²⁰Tapulara Herodes ta ju la'a we ne tao do woapa jhe pemaho Yohanes la dhara ammu bhaddo.

²¹Ta alla pepejhio ne ddau do na harre, ta pejhio le ke Yesus. Pa dhara nga hebhajha No, ta boka-anni ke liru,

²² jhe puru Henga Deo la wokolo No mii he ngi'u koro jhawa he. Moko ta rangnge ke ne lipedai Deo do pali, ”Au ke ne Ana hajha-Ana ddhei Ya. Au ke ne do pemengallo dhara Ya.”

²³Pa awe jhari ta jhagga ne Yesus, ne pemuri No era ma ke ta tallu nguru bhue ttau he. Pedutu nga lilolo ddau, No ana ri Yusuf, ana Eli,

²⁴ana Matat, ana Lewi, ana Malkhi, ana Yanai, ana Yusuf,

²⁵ana Matica, ana Amos, ana Nahum, ana Hesli, ana Nagai,

²⁶ana Maat, ana Matica, ana Simei, ana Yosekh, ana Yoda,

²⁷ana Yohanan, ana Resa, ana Zerubabel, ana Sealtiel, ana Neri,

²⁸ana Malkhi, ana Adi, ana Kosam, ana Elmadam, ana Er,

²⁹ana Yesua, ana Eliezer, ana Yorim, ana Matat, ana Lewi,

³⁰ana Simeon, ana Yehuda, ana Yusuf, ana Yonam, ana Elyakim,

³¹ana Melea, ana Mina, ana Matata, ana Natan, ana Daud,

³²ana Isai, ana Obed, ana Boas, ana Salmon, ana Nahason,

³³ana Aminadap, ana Admin, ana Arni, ana Hezron, ana Peres, ana Yehuda,

³⁴ana Yakub, ana Ishak, ana Abraham, ana Terah, ana Nahor,

³⁵ana Serug, ana Rehu, ana Peleg, ana Eber, ana Salmon,

³⁶ana Kenan, ana Arpakhsad, ana Sem, ana Nuh, ana Lamekh,

³⁷ana Metusalah, ana Henokh, ana Yared, ana Mahalaleel, ana Kenan,

³⁸ana Enos, ana Set, ana Adam, ana Deo.