Read Sabu LUKAS 4 Bible Online

LUKAS 4 - Sabu bible

LUKAS 4

¹Ta helibho ke Yesus ri Henga Deo, ta dhai ta alle ri No pehane Loko Yordan. Ta aggo ke No ri Henga Deo la dhara padha-ae.

²Pa ni ke No ne hakko ri wango appa nguru lodho ne tui. Pa awe do mina harre ke No ne worawwu-tui, nga'a-nginu dho No ne nga-nga. Hakku pa pedakka rahi ta menganga heke No.

³Ta lii ke wango pa No, ”Adho Au ke ne Ana Deo ne, we adho? Hakku lii we Au pa wowadu nadhe ta jadhi roti ta bhari-anni ta roti.”

⁴ Ta bhale ke ri Yesus, ”Pa dhara Buku Lidara-Likewahhu Deo do hure do bhuke, ’Ddau raiwawa, nara dho ta muri mada ngati roti we.’ ”

⁵Moko ta aggo ke Yesus ri wango ne, la era do dhai dhida, jhe pa dhara hekewu'u namada we, ta pengaddi ke ri wango ne, hari-hari ne rai-pereda pa raiwawa pa Yesus.

⁶”Hari-hari lua pereda nga lua kaja nga kete'e do na hedhe do ta wie ri ya pa Au,” ne ane wango pa Yesus, ”Rowi hari-hari do alla ke pewie pa ya, jhe do nara ta wie ri ya pa nadu ne do ddhei ta wie ri ya.

⁷Na hedhe do ta jadhi ta unu-oha Au, kinga wie hu nga mejura au pa ya.”

⁸ Ta bhale ke ri Yesus, ”Do hure do bhuke pa dhara Buku Lidara-Likewahhu Deo, ’Wie we hu nga mejura pa Deo Muri mu, jhe wata ke ta pemoke No we.’ ”

⁹Moko ta aggo ri ke Yesus ri wango ne la Yerusalem, jhe la petito la danni Ammu Deo ne, jhe lii pa Yesus, ”Adho Au ke ne Ana Deo ne? Ki do mina harre riju ko Au ngati dhe.

¹⁰ Rowi era do hure do bhuke pa dhara Buku Lidara-Likewahhu Deo, ’Do ta pepu ma ri Deo ne naju No he, ta ma jage Au pewoie-ie.

¹¹ Jhe mina harre lema ne ri naju Deo he do ta henate Au pa ruai ro, mita do dho goe he le ne kae Au pa wowadu.’ ”

¹² Ta bhale ke ri Yesus, ”Do hure do bhuke pa dhara Buku Lidara-Likewahhu Deo, ’Bhole hakku Deo, Muri mu.’ ”

¹³Ta moko le wango ne hakku Yesus, nga pake heworawwu-worawwu loro jhara, ta hane he ke Yesus ri wango ne, jhe mate ne awe do woie ne ri no.

¹⁴Ta alla pemina harre ta bhale ke Yesus la Galilea; jhe helobho No ri Henga Deo. Ne lii jhara lua ngi'u No ta menyabbha ke la hari hewue ihi-rai do naanne.

¹⁵Ta ajha ke ri No ne ddau-ddau he pa ammu-ammu hebhajha, ta puji ke No ri ddau he hari-hari.

¹⁶Ta kako ri ke Yesus la Nazaret, era manga No tade kepai ne. Pa lodho Pengaha-ihi, pedutu mii pa tima ma, ta kako ke No la ammu hebhajha. Ta titu ke No ta ajhe Buku Lidara-Likewahhu Deo,

¹⁷ta wie ke pa No ne Buku Nabi Yesaya. Ta boke ke ri No ne lulu buku do naanne, jhe maddhe ri No pa lilolo do nadhe,

¹⁸ ”Henga Deo do nee ke pa Ya, rowi do alle ke Ya pehue ri No tu ta pepeke ne Li Hagha Dhara ne pa ddau do kehia nga gahara. No ke ne do pepue ri Ya tu ta ma pepeke ne lua balla kattu pa ddau do ujhu-ai rapi ubha nga lua ie tu ddau do bhaddu; tu ta ma peballa kattu ne ddau do jhalli do kerupu

¹⁹nga ta ma pepeke ne awe dakka Muri ta ma ma'i ma golo ne annu-niki No.”

²⁰Ta lule ke ri Yesus ne buku do naanne, jhe pebhale ri No pa ddau jhagga paanne, jhe kako No la mejaddhi. Ta ketarre ke No ri hari-hari ddau do paanne.

²¹Ta jhari ke Yesus ta pedai lii nga ro, mina hedhe, ”Ne lilolo-lilolo ngati Buku Lidara-Likewahhu Deo do nadhe, tobo ke pa dhara awe dhanno ri mu, pa lodho do nadhe.”

²²Dhai meduru tarra ne lipedai-lipedai do pali ri No he, hakku ta madalae ke jhe perabha nga No. Ta lii ke ro, ”Adho ana Yusuf No dhe?”

²³Moko ta lii ke Yesus pa ro, ”Do bhara tatu ke mu ta pake ne lipepahhi do nadhe, ’Dote, peie we ne ngi'u au ma miha.’ Ne lua madalae do tao ri Au pa Kapernaum he, tao le ko we ri Au pa rae nga kowa Au miha. ”

²⁴ Ta pebhue ke ri Yesus ri, ”Henge we, bhule dho heddau nabi he do takke pekerihe pa dhara rae nga kowa no miha.

²⁵ Tapulara dhanno we: pa awe Elia, pa awe do dho puru ke ajjhi tallu bhue ttau anna warru ne tui, jadhi ne lua menganga-rai do dhai tarra ne hedui pa hari hewue ihi-rai. Pa awe do naanne, ae mobanni wue-moniki wue pa Israel.

²⁶ Maji lema ta mina harre, pepue dho Elia ri Deo la nga heddau he ti telora mobanni do na harre, titu wata la nga heddau mobanni wue pa Sarfat pa ihi-rai Sidon.

²⁷ Mina harre lema pa awe Nabi Elisa, era do ae ddau pa Israel do lakka ri paddha nadato, maji lema ta mina harre bhule dho heddau he do peie, wata ke Naaman do Siria ne we.”

²⁸Hari-hari ddau pa ammu hebhajha do naanne, dhai bubu dhara ta rangnge ne lii No do naanne.

²⁹Ta kaddhi ke ro ta titu, jhe hudhe Yesus ri ro la tele ngati dhara rae do naanne, jhe aggo ri ro la lede do tabbi, do pa lede do naanne ke ne petito ri ro ne rae ro ne. Ne pedabbho ro ta nyakke ngati naanne ke Yesus pebune la dhara ro'a.

³⁰Tapulara ta pehira-anni ke Yesus ngati telora ddau lowe do na harre, jhe langnga ngati naanne.

³¹Ta kako ke Yesus la Kapernaum pa Galilea. Pa ni ta ajha ke ne ddau-ddau he pa lodho Pengaha-ihi.

³² Dhai madalae ne ddau he hari-hari, ta ngadde ri ro mina mii ne ajha ri No ne ddau he, rowi ki pedai ke No lii, do mii lii heddau do jhamma ta tengare he.

³³Pa ammu hebhajha do naanne do era heddau do wujhu. Ne ddau do naanne do pee nga peka-pekarra we,

³⁴”Wo Yesus, do Nazaret ne nga ke ne do ta tao ri Au penaja nga jhi? Ta ma pemade jhi ke ri Au? Do ta de Au ri ya ta nadu: Au ke ne ddau pepu-peju do mmau do megala do ngati Deo ne!”

³⁵Ta jhege ke ri Yesus ne wango do naanne, ”Heh, pehangngo-anni! Mahhu-anni au ngati ddau do nadhe!” Moko ta bhate ke pekelole ne ddau do naanne ri wango ne pa hedhapa ro hari-hari, jhe mahhu-anni ngati ddau do naanne nga do dho pepaddhe nga-nga ri wango ne.

³⁶Ta madalae ke ne ddau he hari-hari, jhe lii ro heddau pa heddau, ”Dhai tarra ne lipedai No dhe. Rowi do nga higa nga kuaha, ta lii he we No ta mahhu-anni pa wango he, ta mahhu-anni tarra dhangnge ma we ro!”

³⁷Moko ne lii ne ta menyabbha ke pa hari-hari ihi-rai do naanne.

³⁸Ta pekaddhi ke Yesus ngati ammu hebhajha ne, jhe kako la ammu Simon. Ina ri ihi-ammu Simon ne era do emo. Ta peke ke ne lai do naanne ri ddau he pa Yesus.

³⁹Ta kako ke Yesus la era bba'i ina do naanne, jhe hudhe kelure ri No ne emo do naanne. Ta ie ke ne ina ri ihi-ammu Simon ne, jhe kaddhi ne la pemoko nga'a-nginu nga ro.

⁴⁰Ta umu le ta janna lodho, ta dakka ke hari-hari ddau la nga Yesus do nga aggu ne a'a-ari ro do paddha heworawwu-heworawwu paddha. Ta herai ke ri ruai Yesus pa ro heddau-heddau, jhe peie ro.

⁴¹Jhajhi ae ne wango do mahhu-anni ngati do ae ddau, jhe peka ro, ”Au ke ne Ana Deo ne!” Tapulara ta jhege ke ro ri Yesus, jhe wie dho ke lua pa ro ri Yesus ta pedai lii, rowi do toi ke ri ro ta do Yesus ke ne Duae Mone ma'i-Mone golo ne.

⁴²Pa dhara nga ta hhau ne lodho ne, ta pekaddhi ke Yesus ngati rae do naanne, jhe kako No la era do keliu. Ta jhari ke No ta kale ri ddau-ddau he, ta dhai ro ta peabu nga Yesus, ta ami ke ro mita bhole langnga No ti telora ro.

⁴³Tapulara ta lii ke Yesus pa ro, ”Li Hagha Dhara, jhara lua mina mii Deo ne pereda, do jhamma ta pepeke ri Ya la dhara rae do hewala he lema, rowi tu lai do napoanne ke ne peppue Ya ri Deo ma raiwawa do nadhe.”

⁴⁴Rowi do mina harre ke, ta peliba lii ke Yesus pa ammu-ammu hebhajha pa hari hewue ihi-rai Yudea.