Read Sabu LUKAS 5 Bible Online

LUKAS 5 - Sabu bible

LUKAS 5

¹ Pa dhara hewari ta titu ke Yesus pa tabbi Eilobo Genesaret. Ae ddau do perubhi-rai tu ta dhanno ne lii do ngati Deo ne.

²Ta ngaddi ke ri Yesus dhue bhue kowa pa lahalae ne; do alla ke pepuru ne mone jhala he ti kowa ro he, jhe do era pa dhara nga bhaha jhala ro pa awe do naanne.

³Ta ha'e ke Yesus la dhara hewue ngati kowa do na harre, kowa Simon, ta lii ke No pa Simon ta nyakke pejho hudi ne kowa ne ngati lahalae ne. Ta mejaddhi ke Yesus pa dhara kowa ne, jhe ajha ri No ne ddau-ddau he ngati dhara kowa ne.

⁴Ta alla No peajha ne ddau he, ta lii ke No pa Simon, ”Wohe ko ri au ju la do ei-ae, jhe ligo ne jhala au, tu ta jhala nadu'u.”

⁵ Ta lii ke Simon, ”Ama Guru, herammi-rai ne ngine jhi ne petadi, bhule le dho jhi ta nara wuru ne nga-nga he! Tapulara ri lii Ama ke, hakku ta pedute he ke ri ya ta ligo ne jhala ya dhe.”

⁶ Ta alla pepehhe ne jhala ne ri Simon ta lakka ke ne nadu'u do dhai ae, ta jhari ke ta menyi'i ne jhala ne.

⁷Ri do mina harre ke, ta ami tulu ke ro pa ihi-anga ro he, do era pa kowa do wala he ta la ruba dhara nga ro. Ta dakka ke ne ihi-anga he la ruba dhara nga ro, jhe ruba dhara nga ro, jhe la ihi ri ro ne kowa ro he hari dhue bhue tade tobo ri nadu'u he, tade miga ta bolo ne kowa he.

⁸Ta ngadde ri Simon ne lai do naanne, ta mejura ke no pa hedhapa Yesus, jhe lii, ”Hane we ya ri Muri! Rowi ya dhe ddau do nga lubhu harro nga menyilu!”

⁹Ta madalae ke Simon nga hari-hari ddau do hela'u nga no he paanne, ne heleo ne nadu'u do mina harre ne worawwu-ae ne do lakka pa jhala ro ne.

¹⁰Mina harre lema ne ihi-anga Simon he, Yakobus, Yohanes ana-ana Zebedeus he. Ta lii ke Yesus pa Simon, ”Bhole meda'u! Jhari rai ngati dhara awe nadhe, au do ta jadhi ke ta mone jhala ddau.”

¹¹Ta nuni ke ri Simon nga ihi-anga no he ne kowa he la lahalae, ta alla pemina harre ta hani ke ri ro hari-hari ne na harre, jhe pedute Yesus.

¹²Pa dhara helodho, era ke Yesus pa dhara hewue rae. Paanne do era heddau momone do kelabe ke hari hengi'u ri paddha nadato. Ta ngadde Yesus ri no, ta mejura ke no pa hedhapa Yesus, jhe ami, ”Ama, kita wae he Ama, do nara ta peie ya ri Ama!”

¹³Ta bhuje ke ri Yesus ne ddau do naanne, jhe lii pa no, ”Wae Ya, ie we au!” Pa awe naanne dhangnge ta ele ke ne paddha ddau do naanne.

¹⁴ Ta lii ke Yesus pa ddau do naanne, ta bhole pedhire ne lai do naanne ie ta pa nadu we, ane Yesus, ”Kako we au la nga mone tunu-menahu, jhe ami we au ta peteleo, ta do ie tarra ke au ngati lua paddha au dhe. Ki alla pemina harre la jhole we ne bhara jhula au, pedutu nga do dare ri Musa, mii hahhi telia tu hari-hari ddau ta do ie tarra-tarra ke au.”

¹⁵Tapulara ne lii jhara lua Yesus dhe ta ju we ne menyabbha la hebhakka-bhakka, jhe ae ne ddau do dakka la dhanno ne liajha No, mina harre lema tu ta la peie ne lua paddha ro.

¹⁶Ta alla pemina harre ta kako ke Yesus la hebhajha la era do keliu.

¹⁷Pa dhara helodho pa dhara nga ajha ddau Yesus, do era lema do parri ddau do Farisi nga guru-guru aigama do mejaddhi paanne. Ro do na harre do dakka ti Yerusalem nga ngati rae-rae pa Galilea nga Yudea. Higa nga kuaha Muri do era pa Yesus tu ta peie ddau-ddau do paddha.

¹⁸Pa dhara awe do naanne ta dakka ke do parri ddau nga meree pa dappi heddau do made heatta. Ta petadi ke ro ta kale loro jhara ta maho la dhara ammu ne ta la takke ne ddau do naanne la hedhapa Yesus.

¹⁹Tapulara do rrau-ae ddau paanne, hakku nara dho ro ta ta maho nga aggo ne ddau do paddha ne. Rowi do mina harre ke ta peha'e ke ri ro ne ddau do paddha ne la danni ammu ne. Ta bhoke ke ri ro ne ruammu ne, jhe pedhule ri ro ne ddau do paddha ne hela'u-la'u nga dappi no ne pa hedhapa Yesus pa telora ddau lowe he.

²⁰Ta ngadde ri Yesus ta do mina harre ke ne worawwu mone-ae lua manno ro, ta lii ke Yesus pa ddau do naanne, ”Tuahhu, ne lubhu harro nga menyilu au, alle ke pepehai-pehuba.”

²¹Ne guru-guru aigama nga do Farisi he ta jhari ke ro ta lii heddau pa heddau, ”Nadu ke No dhe, hakku bhani ta kare ta menihe Deo? Nadu do jhamma ta pehai-pehuba lubhu harro nga menyilu, wala ngati Deo miha?”

²²Do toi ri Yesus ne nga ne do pekerrai-kebhali ro he. Hakku ta lii ke Yesus, ”Ta nga mu hakku pekerrai-kebhali do mina harre pa dhara ade mu?

²³Nami ne do rihi memudhe ta pale, ’Alle ke pepehai-pehuba ne lubhu harro nga menyilu au’, we, ’Kaddhi we au jhe kako we!’?

²⁴Tapulara pa dhara awe do nadhe ta peteleo ke ri Ya pa mu, ta do pa danni raiwawa do nadhe, ta do Ana Ddau Raiwawa do nga higa ta pehuba lubhu harro nga menyilu.” Moko ta lii ke Yesus pa ddau do made heatta ne, ”Kaddhi we au, aggo ne dappi au ne, jhe bhale we au!”

²⁵Ta kaddhi dhangnge ke ne ddau do naanne pa hedhapa ro hari-hari, jhe aggo ne era bba'i no ne, jhe bhale no nga wue-waje Deo.

²⁶Dhai madalae ro hari-hari, jhe wue-waje Deo. Nga meda'u ro, ta lii ke ro, ”Dhai madalae tarra ne lai do jadhi do ngadde ri di pa lodho dhe!”

²⁷Ta alla penapoanne ta mahhu-anni ke Yesus, jhe ngadde ri No heddau mone dhuki bhea, ne ngara no Lewi, era do mejaddhi pa kato no. Ta lii ke Yesus pa no, ”Mai ma pedute Ya.”

²⁸Moko ta titu ke Lewi, jhe kako la pedute Yesus, jhe jhani hari-hari ne na harre.

²⁹Ta alla pemina harre, ta tao ke Lewi lai tao pa ammu no tu Yesus. Ae ne mone dhuki bhea nga ddau-ddau do wala he ri ko do nga'a hela'u-la'u nga ro.

³⁰ Do parri do Farisi nga guru-guru aigama, adho do mengallu dhara, hakku ta lii ke ro pa ana hekola Yesus he, ”Ta nga mu hari-hari hakku nga'a-nginu nga mone dhuki bhea nga ddau-ddau do apa?”

³¹Ta bhale ke ri Yesus, ”Ddau do ie kale dho dote; titu wata ddau do paddha we.

³²Ne dakka Ya adho ta ma pedoa ddau do penge ne ngi'u no ta do ie, tapulara tu ddau-ddau do nga lubhu harro nga menyilu, mita ie ro ta jharra ngati lubhu harro nga menyilu ro.”

³³Ta lii ke ne ddau he pa Yesus, ”Ana hekola Yohanes nga ddau-ddau pedutu do Farisi he, jhajhi wari ro ne puasa nga hebhajha. Tapulara we ne ana hekola Au hedhe pee nga nga'a nga nginu we ro.”

³⁴Ta bhale ke ri Yesus, ”Nara marra mu ta lii pa tamu-tamu ta bhole nga'a pa dhara lai ala peloko nga'a, kinga era ko ne mone ngedhe ne hela'u-la'u nga ro?

³⁵Do bhara tatu ta do dho nara! Tapulara do ta dhai ma ne awe ne, ne mone ngedhe ne, do medae ta aggo ti telora ro. Pa awe naanne ke ro ne do medae ta do dho nga'a do dho nginu.”

³⁶Moko ta pedhire ke ri Yesus ne lipehakku do nadhe pa ro, ”Bhule dho ddau do kelapu bhajhu do dui ri hekewudi bhalla do wiu ngati bhajhu do wowiu. Rowi do ta hio ke ri no ne bhajhu do wowiu ne. Mina harre lema, bhalla kelapu do wiu ne pekatta dho nga bhajhu do dui ne.

³⁷Mina harre lema, bhule dho ddau do hali ei-ago do wiu la dhara haku kuri do dui, rowi ri ei-ago do wiu ne do ta pekepahho ne haku kuri do dui ne. Moko dhute hari ele ne ei-ago ne jhe hari lema ne haku apa.

³⁸Ei-ago do wiu do jhamma ta hale pa dhara haku kuri do wiu ma.

³⁹Mina harre lema bhule dho ddau do ddhei ta nginu ei-ago do wiu ki do alla ke penginu ei-ago do dui. ’Ei-ago do dui do rihi woie ngati ei-ago do wiu,’ ne ane no.”