Read Sabu LUKAS 7 Bible Online

LUKAS 7 - Sabu bible

LUKAS 7

¹Ta moko Yesus ne pedai ne lai-lai do na harre nga ddau lowe he, ta kako ke No la Kapernaum.

²Pa ni do era heddau kattu horodhadhu Roma, do nga naannu heddau do dhai hajha no. Ne naannu do naanne do era pa dhara paddha do ta mate ta made he ke.

³Ta rangnge ri kattu horodhadhu do naanne, ne jhara Yesus, ta pepu ke no do parri ddau kattu do Yahudi ta ame Yesus mita kako la peie ne naannu no ne.

⁴Ta ddhai ne ddau do na harre la nga Yesus, ta meggai ke ro ne ame Yesus mita kako No la ruba dhara nga kattu horodhadhu do naanne. Ta lii ke ro pa Yesus, ”Ama, do jhamma ke Ama ta ruba dhara nga kattu horodhadhu do nadhe,

⁵rowi no dhe do dhai woie nga ddau-ddau di, nga do alla ke no pepetitu hewue ammu hebhajha tu jhi.”

⁶Moko ta kako ke Yesus penau nga ro. Ta dhai Yesus ta umu nga ammu kattu horodhadhu do naanne, moko ta pepu ke ri kattu horodhadhu ne do parri ddau ihi-anga no, ta la lii mina hedhe pa Yesus, ”Tenge dho Ama ta pehedui-anni ta tade dhai ma ammu ya. Jhamma dho ya ta hamme Ama ma ammu ya.

⁷Rowi mina harre ke, hakku ya miha bhani dho ta la peabu nga Ama. Hakku ri do mina harre ke ta wie lii he we ri Ama mita ie ne naannu ya dhe.

⁸Rowi ya lema do jhamma ta pewawa-anni pa kattu unu ya, jhe pa dha'i ya ri do era do horodhadhu-horodhadhu do jhamma ta pedute ne lipereda ya. Ki pereda ke ya pa heddau do horodhadhu, ’Kako!’ ta i'a kako he we no; jhe ki pali ya pa do hewala ri, ’Mai madhe!’ ta dakka ke no. Jhe ki pereda ke ya pa naannu ya ’Jhagge nadhe!’ ta i'a jhagge he we ri no.”

⁹Ta madalae ke Yesus ne dhanno ne lii do naanne. Ta kebhibha ke Yesus jhe lii pa ddau lowe do pedute No he, ”Dhai tarra ne ddau do nadhe. Pa telora do Israel le miha, ngaddi do dho Ya ta peabu nga lua manno do mina hedhe ne worawwu mone-ae!”

¹⁰Ta dhai ne ddau-ddau do pepu ri kattu horodhadhu he la ammu, era ke ne naannu do naanne do ie.

¹¹Rihi dho ne tui ta alla penaanne ta kako ke Yesus la dhara rae Nain. Ne ana hekola No he nga ddau lowe he do kako le penau hela'u nga No.

¹²Ta dhai Yesus ta umu nga ubha toka rae do naanne, ta era ke ne ddau-ddau nga merrei do made do ta mahhu-anni ngati dhara rae do naanne. Ne do made do naanne, heddau ana momone do mone miha ngati heddau mobanni-wue. Ae ne ddau ngati dhara rae do naanne do penau nga ina do naanne.

¹³Ta dhai ta ngadde ri Yesus ne mobanni do naanne, ta ruba ke ne dhara No jhe lii, ”Ina, bhole tangi!”

¹⁴Ta pehedharra-anni ke Yesus nga era mere do made ne. Moko ta pengaha ke ne ddau-ddau do merrei he. Ta lii ke Yesus, ”Wo ana do ngarru, ne lii Ya pa au, kaddhi we!”

¹⁵Moko ne ana momone do made do naanne ta kaddhi ke jhe mejaddhi, jhe jhari ta pedai lii. Moko ta wie ke ri Yesus ne ana momone do naanne pa ina no.

¹⁶Hari-hari ne ddau do na harre ta meda'u ke jhe jhari ta wue-waje Deo. Ta lii ke ro, ”Heddau Nabi mone-ae, nee ke do dakka ma telora di! Nee ke Deo do dakka ma ruba dhara, ta ma ma'i ma golo ne annu-niki No!”

¹⁷Ne lii jhara lua Yesus dhe ta menyabbha ke la hari hewue Yudea nga ihi-rai ihi-rai do peumu he.

¹⁸Ta pedhiri ke ri ana hekola Yohanes ne, ne hari-hari lai do alla pejadhi he pa Yohanes. Moko ta pedoa ke ri Yohanes do dhue ddau ne ana hekola no,

¹⁹jhe pepu ro la nga Muri Yesus, ta la kebhali, ”Ama ke ne ddau do ta mate ta dakka ne pedutu nga do jaje ri Deo ne, we do ta mate ri ko ri jhi heddau do wala ri?”

²⁰Ta kako ke hari do dhue ne ana hekola Yohanes he la nga Yesus, jhe lii ro, ”Jhi hedhe pepu ri Yohanes Mone Pejhiu ta ma kebhali pa Ama, Ama ke ne do ta dakka ne pedutu nga do jaje ri Deo ne, we do jhamma ko ri jhi ta mate heddau do wala ri?”

²¹Pa awe naanne do ae ke ddau do peie ri Yesus, jhe do ae lema wango ne do hudhi do peraga ri Yesus, mina harre lema do bhaddu nara ke ta ngaddi wari.

²² Hakku ta bhale ke ri Yesus, ”Bhale we mu la nga Yohanes, jhe la peke we pa no, ne nga ne do ngaddi ri mu: do bhaddu nara ke ta ngaddi bhale wari, do made heatta nara ke ta kako, do paddha nadato ie ke, do hoe rangngi ke, do made muri bhale wari ke, nga Li Hagha Dhara do ngati Deo nee ke do pejha'e-pepeke ke pa do kehia nga gahara.

²³Mangngi nga mengallu dhara tu ddau do dho bhule ri nga hekera'a-hekera'a lai tu ta nyakke Ya dhe.”

²⁴Ta ludu le ne ddau pepu Yohanes he, ta lii ke Yesus pa ddau lowe he jhara lua Yohanes, ane No, ”Ne kako mu la dhara padha-ae, ta la heleo ne nga mu? Helai ruju'u do hewi'o ri ngallu?

²⁵Ne kako mu la ni ta la heleo ne nga? Heddau do nga nnau bhara do weo do kana? Ddau-ddau do nga nnau bhara do mina harre do pee pa dhara rae duae we!

²⁶Hakku ne mahhu-anni mu ta la heleo ne nga we? Ta la heleo heddau nabi? Tarra rihi ri ko ti heddau nabi.

²⁷ Rowi jhara lua Yohanes ke ne pedabbho ri lilolo Buku Lidara-Likewahhu Deo do nadhe, Mina hedhe ke ne lii Deo, ’No ke ne ddau pepu-peju Ya,’ ’Do ta pepue uru jhara ke no ri Ya ngati Au, mita ie no ta la perawi loro jhara tu Au!’ ”

²⁸Ta lii ri ke Yesus, ”Henge we, pa raiwawa do nadhe adho ke do ta era ri do rihi ngati Yohanes Mone Pejhiu. Tapulara ddau do rihi hemaddha pa telora annu-niki Deo, do rihi mone-ae ngati Yohanes Mone Pejhiu.”

²⁹ Hari-hari ddau — do maho le ke nga mone hammi bhea he — do rangngi ne nga ne do pale ri Yesus ne; ro ke ne ddau-ddau do pedhanno nga lidhuku-lidhuki Deo he nga do ddhei ta pejhio ri Yohanes.

³⁰Tapulara ne do Farisi he nga guru-guru aigama he, adho do wae ta hammi ne do peato ri Deo tu ngi'u ro. Wae dho ro ta pejhio ri Yohanes.

³¹Moko ta lii ri ke Yesus, ane No, ”Nga ne nga ke ne nara ri Ya ta penono ne ddau-ddau do pa dhara awe do nadhe? Do mii ne nga ke ro?

³²Hala dho ke ro mi naiki do mejaddhi pa paha he; hekewolo pekoo la hekewolo do wala he, ’Ggei ke jhi alu lii mengallu dhara tu mu, tapulara wae dho mu ta ledo! Jhuka ke jhi alu lalu, wae dho mu ta tangi!’

³³Ta dakka Yohanes Mone Pejhiu — puasa no, jhe adho no do nginu ei-ago — lii mu pa no, ’Nnai ke no do hala kattu!’

³⁴Ta dakka Ana Ddau Raiwawa — nga'a-nginu No — moko ne ane mu, ’Heleo ko ne ddau do nidhe! Do lala-do hopa, mone nginu mawo, ihi-anga mone dhuki bhea, nga ihi-anga ddau do nga lubhu harro nga menyilu.’

³⁵Maji lema ta mina harre, lua mmau dhara Deo do teleo ke ngati hari-hari ddau do hamme No.”

³⁶Heddau do Farisi, ne ngara no Simon, ta perihe ke Yesus ta nga'a la ammu no. Moko ta kako ke Yesus la ammu Simon, jhe mejaddhi ta nga'a.

³⁷ Pa dhara rae do naanne do era lema heddau mobanni do muri mada pa dhara lai do woapa. Ta rangnge ri mobanni do naanne ta do era Yesus do nga'a pa ammu Simon, moko ta dakka ke no nga aggu henawonabhuri eiloko wwau mangngi.

³⁸Ta la titu ke no pa kejhunga Yesus, peumu nga rubhebho Yesus, ta tangi ke no jhe pehute ne einamada ne la rubhebho Yesus. Ta alla pemina harre, ta hae ke ri rukattu no pekemangu ne rubhebho Yesus ne. Ta kemangu le, ta hengaddho ke ri no, jhe tude ri eiloko wwau mangngi ne.

³⁹Ta ngadde ri do Farisi do perihe Yesus, ne lai do tao ri mobanni do naanne, ta lii ke no pa dhara ade no, ”Ki do petu tarra ma ne ddau do nadhe ta nabi, do tatu ta toi ri No ta nadu ne mobanni do la bhuje No nidhe, ta heddau do muri mada pa dhara lubhu harro nga menyilu!”

⁴⁰Moko ta lii ke Yesus pa Simon, ”Simon, nee hahhi lai do ddhei ta pedae ri Ya nga au.” Ta bhale ke ri Simon, ”Owe Ama Guru, pedae we ri Ama.”

⁴¹Ta lii ke Yesus, ”Era do dhue ddau do lakka ri kallu pa ddau mone pepija doi. Heddau ne kallu no, lammi ngahu doi mela pudi, jhe heddau ri lammi nguru doi wopudi.

⁴²Nara dho ke ro hari do dhue ta ma'i ne kallu ro do na harre. Moko ri ddau mone pepija doi ne ta lii ke pa ro ta bhole tenge ri ta ma'i ne kallu ro do na harre. Nah, nadu ti telora ro hari do dhue, ne do rihi ddhei nga mone pepija doi ne?”

⁴³Ta bhale ke ri Simon, ”Pa penge ya, ddau do rihi ae kallu ne ke!” ”Do petu ne lii au do napoanne,” ne bhale ri Yesus.

⁴⁴Moko ta heleo ke ri Yesus ne mobanni do naanne, jhe lii pa Simon, ”Ngadde ri au ne mobanni do nadhe? Dakka Ya ma ammu au, pemoke dho ri au ne eiloko ta lonye ne kabha-jhalla Ya; tapulara ri mobanni do nadhe, alle ke pepemo ri no ne rubhebho Ya ri einamada no, jhe hae pekemangu ri rukattu no.

⁴⁵Ri au, hamme dho Ya ri au ta hengaddho, tapulara ri mobanni do nadhe pengaha dho no ne hengaddho ne rubhebho Ya, rai ta dhai Ya madhe.

⁴⁶Tude dho ri au ne wokolo Ya ri eiloko wwau mangngi, tapulara ri mobanni do nadhe alle ke petude ne rubhebho Ya ri eiloko wwau mangngi.

⁴⁷Tarra-tarra ne lua ddhei no do rihi ngati ihi do nadhe, nnau mii hahhi lua ta peteleo ke ta do ne lubhu harro nga menyilu no do dhai ae he do alla ke pepehai-pehuba! Ki ddau do hudi ne lua pehuba, moko ne lua hajha nga ddhei no do hudi lema we.”

⁴⁸Moko ta lii ke Yesus pa mobanni do naanne, ”Alle ke pepehai-pehuba ne lubhu harro nga menyilu au do ae he.”

⁴⁹Moko ne ddau-ddau do mejaddhi ta nga'a hela'u nga Yesus he, ta jhari ke ta lii ke heddau pa heddau, ”Nadu ke ne ddau nadhe, hakku nara No ta pehai-pehuba lubhu harro nga menyilu?”

⁵⁰Tapulara ta lii ke Yesus pa mobanni do naanne, ”Taga tari do parahajha ke au pa Ya, nara ke au ne lua helama tona ie ne. Bhale we au nga mengallu nge nga kehaka dhara!”