Read Sabu LUKAS 9 Bible Online

LUKAS 9 - Sabu bible

LUKAS 9

¹Ta pedoa ke ri Yesus hari henguru do dhue ddau ne ana hekola No he, jhe wie pa ro ne kuaha tu ta hudhi nga keluru wango nga ta peie lua paddha.

²Ta alla pemina harre ta pepu ke ro ri Yesus, ta la peie ddau do paddha nga ta la pepeke ne lii jhara lua mina mii Deo ne pereda mii Duae.

³ Ta lii ke Yesus pa ro, ”Bhole aggu mu ne nga-nga tu pa loro jhara kako mu. Bhole aggu mu kajji kiadho allokohu doi, kiadho bhara nga'a, doi, jhe bhole aggu lema bhara pedhue bhalla.

⁴Pa mii we mu ne hammi ri ddau, pee we mu paanne tade dhai ta pekaddhi ngati dhara rae do napoanne.

⁵ Jhe pa mii we mu ne do dho hammi, ki dhai mu ta pekaddhi ti dhara rae do naanne, llatte ne awu do keparre pa dhara kabha-jhalla mu ne, mii hahhi lii pekebhaddi tu ro.”

⁶Moko ta pekaddhi ke ne ana hekola No he, jhe kako la dhara rae nga kowa, jhe la pepeke ne Li Hagha Dhara ne, nga peie ne ddau do paddha pa hebhakka-hebhakka.

⁷ Ta rangnge ri Herodes, do pereda pa Galilea, ne hari-hari lai do tao ri Yesus he, ta bhingu ke no. Rowi era ddau do lii ta do alla ke Yohanes Mone Pejhiu pemuri bhale wari.

⁸Era lema do lii ta do nee ri ke Elia. Era ri ma do lii ta heddau nabi ti telora nabi do rai uru he, do muri bhale wari ke.

⁹Ta lii ke Herodes, ”Do alla ke ya peli pa ddau he ta lore Yohanes. Tapulara ne ddau do nadhe, ne pa petu ne, nadu ke No? Ae ke ne do rangnge ri ya ne jhara lua No.” Moko ta pee ke Herodes ta petadi mita ngadde Yesus.

¹⁰Moko ta bhale ke ne rasul-rasul he, jhe pedhiri ro pa Yesus ne nga ne do alla petao ri ro. Moko ta tina ke ro ri Yesus jhe kako ro la pekiha-anni la dhara rae Betsaida.

¹¹Tapulara ta toi ri ddau he ne lai ta do mina harre, ta la pedute ke Yesus ri ro. Ta hammi ke ro ri Yesus, jhe peteleo pa ro, mina mii Deo ne pereda mii heddau Duae he. Jhe hari lema, peie ri No ne ddau do paddha do era pa telora ro he.

¹²Ta dhai ta meringi lodho pa ihi he, ta dakka ke hari henguru do dhue ne ana hekola Yesus he la nga Yesus, jhe lii, ”Ama, ne era do nadhe era do kiha. Rihi ie Ama ta lii we pa ddau-ddau do na hedhe ta bhale, mita nara ko ro ta la kale nga'a-nginu nga ta la pengaha-ihi ko ro pa rae nga kowa do peumu hedhe.”

¹³Tapulara ta bhale ke ri Yesus pa ro, ”Penga'a ri mu we ro.” Ta lii ke ne ana hekola he pa Yesus, ”Ne do era pa jhi wata ke lammi bhue roti nga dhue ngi'u nadu'u we. Mina mii, ne kako jhi ri la walli nga'a tu ddau do mina hedhe ne worawwu ae?”

¹⁴(Momone we, era ma ta do lammi tabbha ddau he.) Ta lii ke Yesus pa ana hekola he, ”Lii we pa ddau-ddau do na hedhe ta mejaddhi pehekewolo-hekewolo, ki ie he, do lammi nguru ddau pa hekewolo.”

¹⁵Ta kako ke ne ana hekola Yesus he la lii pa ddau lowe he mii do lii Yesus pa ro.

¹⁶Moko ta aggu ke ri Yesus ne roti do lammi bhue he nga nadu'u do dhue ngi'u he, ta alla pemina harre ta tengara ke No la liru, jhe peha'e No olo lii ie-ae pa Deo. Ta alla pemina harre, ta pemae ke ri ruai No ne roti nga nadu'u he, jhe wie ri No pa ana hekola he, tu ta la pebhagi-bhagi pa ddau lowe he.

¹⁷Ta nga'a ke ro hari-hari tade bhahhu le. Moko ta pekupu ke ri ana hekola he ne do hiha he ne ae henguru dhue hope.

¹⁸Pa dhara helodho, pa dhara nga hebhajha miha-miha Yesus, ta dakka ke ne ana hekola he la nga Yesus. Ta kebhali ke Yesus pa ro, ”Ki pedutu nga lii ddau he, nadu ke Ya dhe?”

¹⁹ Ta bhale ke ri ro, ”Era do lii ta Yohanes Mone Pejhiu. Era lema do lii ta Elia, do wala ri, lii ta heddau ti telora nabi rai uru he, do alla ke pemuri bhale wari.”

²⁰ Ta kebhali ke Yesus pa ro, ”Tapulara ki pedutu nga lii mu miha, nadu ke Ya dhe?” Ta bhale ke ri Petrus, ”Ama ke ne Duae Mone ma'i-Mone golo ne, do jaje ri Deo ne.”

²¹Moko ta lii ke Yesus pa ana hekola No he, ”Bhole peke tu-tu ri mu ne lai do napoanne, ie ta pa nadu we.”

²²Ane Yesus lema, ”Ana Ddau Raiwawa do jhamma ke ta dhui hape dhai ae lua hedui-herui, jhe do ta tobhe No ri mone kettau-mone kettau, ri kattu-kattu mone tunu-menahu nga ri guru-guru aigama. Do medae ta pemade No, tapulara pa lodho do ketallu ne do ta pekaddhe bhale wari No.”

²³ Ta alla pemina harre ta lii ke Yesus pa hari-hari ddau do era paanne, ”Ddau do dhei ta pedute Ya, do jhamma ke ri no ta do dho penge ri no ne jhara lua ngi'u no, dhue-hape ri no ne bhara-dhui bhara-hape no do helodho-lodho ne jhe pee loro nga pedute Ya.

²⁴ Rowi heddau do ddhei ta jage ne muri mada no, do ta ele ne muri mada no do naanne. Tapulara ddau do jhole ne muri mada no tu Ya, do ta helama ke no.

²⁵Ne nga ke ne lua mangngi tu heddau-ddau maji lema hari hewue raiwawa dhe jadhi ta unu-oha no, tapulara do peape nga do pe e ri no ne muri mada no?

²⁶Ki do mekae ddau ne mengaku Ya nga liajha Ya he, Ana Ddau Raiwawa lema do ta mekae ne mengaku ddau do napoanne, kinga dhai Ana Ddau Raiwawa ta dakka hine nga kuaha No, jhe nga kuaha Ama No hari lema nga kuaha naju Deo do mmau do megala he!

²⁷Do ie ke ta toi ri mu: ti telora mu do na hedhe era ko do dho made dae, ki do dho ngadde dae Deo ne pereda ri no.”

²⁸ Era ma ta hewue do migu he ne tui, ta alla Yesus peajha ne lai-lai do napoharre, ta aggu ke ri No, Petrus, Yohanes nga Yakobus la kolo hewue lede ta la hebhajha.

²⁹Pa dhara nga hebhajha Yesus paanne, ta bhari-anni ke ne worawwu No, jhe ne bhara pake No ta pudi kebhela ke.

³⁰Ta harra hewakka ke do dhue ddau, Musa nga Elia do pengaddi-anni nga lua weo nga kana ngati era do mmau do megala. Pedae ri ro nga Yesus ne jhara lua made Yesus, do adho ke do ta tui ri do ta lake ri Yesus pa Yerusalem.

³¹

³²Pa dhara awe naanne Petrus nga ihi-anga no he do bba'i-luu, tapulara ta kebhaddi ke ro ta kaddhi, jhe ngadde ri Yesus ri ro era ke do weo-do kelala nga do dhue ddau he era ke do titu hela'u nga No.

³³Pa dhara ta hane ke Yesus ri do dhue ddau do na harre, ta lii ke Petrus pa Yesus, ”Ama Guru, do dhai woie di pa dhe. Rihi ie jhi ta petitu tallu bhue leo-bhalla-lai pa dhe: hewue tu Muri, hewue tu Musa nga hewue ri tu Elia.” (Ne lii Petrus do mina harre do pali nga do dho pali nga hara ghaggha he we no.)

³⁴Pa dhara nga pali ko Petrus mina harre, ta dakka ke hekewolo merammu, jhe la herimu ro, hakku ta meda'u ke ro.

³⁵ Ta rangnge ke ri ro ne lipedai ti dhara merammu do naanne, do pali mina hedhe, ”Nadhe ke ne Ana Ya do jhujhe do pi dhe ne ri Ya. Dhanno-tenae we No!”

³⁶Ta pengaha ne lipedai do naanne, ta ngadde ke Yesus ri ro, do era miha-miha ke paanne. I-a dho ke lii nga-nga ri ne ana hekola he, jhara hari-hari lai do napoharre, jhe hari lema, peja'e-pepeke le dho ma ri ro ie ta pa heddau he ne jhara lai do ngadde ri ro do naanne.

³⁷Ta bhale ma jhammi-ae he, ta puru ke Yesus nga do tallu ddau ana hekola No he ti kolo lede do naanne, moko ta dakka le ke ne ddau lowe la nga Yesus.

³⁸Ta peka ke heddau momone do era pa telora ddau lowe he, ”Ama Guru, ruba ko we Ama ta la heleo ko ne ana ya — do helamuhi ddau no we miha ne ana ya!

³⁹Ki dhai ke no ta ghughe ri henga kerabba ne, ta kebhaddi ta peka ke jhe hekoto hari heddau jhe woro ne ubha ne. Do pee nga pehedue we no ri henga kerabba do naanne, jhe wae dho ta mahhu-anni ngati no!

⁴⁰Alla lema ke peami ri ya ne ana hekola Ama he, ta hudhe ne henga kerabba do naanne, tapulara nara dho ta hudhe ri ro.”

⁴¹Ta bhale ke ri Yesus, ”Do dhai tarra mu hedhe! Do tarra-tarra mu hedhe ta ddau do huli do teballi nga ddau do dho parahajha! Ne pa ddhei mu tade mina mii ri ko Ya ne tui ne pee nga mu, jhe makka tee penaja nga mu hedhe? Aggo ma dhe ne naiki do napoanne!”

⁴²Pa dhara nga kako ko ne naiki do naanne ju la nga Yesus, ta bhate petabbho-laggo ke ne naiki do naanne ri henga kerabba ne, jhe kepangngi-kepangngi ne ihi naiki ne. Tapulara ta pereda ke Yesus pa henga kerabba ne ta mahhu-anni, moko ta ie dhangnge ke ne naiki do naanne. Moko ta wie ke ri Yesus ne naiki do naanne pa ama no.

⁴³Hari-hari ne ddau he ta madalae ke ne heleo higa Deo do mina harre ne worawwu mone-ae. Pa dhara nga madalae ko ne ddau do na harre taga tari ngaddi hari-hari ne lai do tao ri Yesus he, ta lii ke Yesus pa ana hekola No he,

⁴⁴”Heleo we ri mu pewoie-ie, jhe bhole bhallo ri mu ne lipedai Ya do nadhe: Ana Ddau Raiwawa do ta jhole la woalaabba ddau raiwawa.”

⁴⁵Tapulara tada dho ne ana hekola he ne nga ne lii Yesus do naanne. Do pehuni ko ne lai do naanne pa ro mita ro ta do dho tada. Tapulara do meda'u ro ta kebhali pa Yesus ne lai do naanne.

⁴⁶ Pa telora ana hekola Yesus he ta era ke ne pehala jhara lua ta nadu do rihi mone-ae.

⁴⁷Do toi ri Yesus nenga ne do era pa penge ro, rowi do mina harre ke, ta aggo ke ri Yesus heddau naiki jhe petito pa keraha No.

⁴⁸ Moko ta lii ke No pa ana hekola he, ”Ddau do hamme naiki do nadhe taga Ya, napoanne do mii hamme Ya lema ke. Jhe ddau do hamme Ya, do hamme No ke do pepue Ya dhe. Rowi ddau do dhai rihi hemaddha pa telora mu, no ke ne do rihi mone-ae!”

⁴⁹Ta lii ke Yohanes, ”Muri, ngadde ri jhi heddau do hudhi wango nga pake ngara Muri, ri do mina harre ke ta lii ke jhi pa no ta bhole tao mina harre, rowi no adho ngati ihi di.”

⁵⁰”Bhole labbe no,” ane Yesus pa Yohanes nga pa ana hekola do wala he, ”rowi ddau do dho pelawa nga mu, ddau do napoanne do jhara nga mu ke.”

⁵¹Ta dhai ta umu le ne awe pa Yesus ta dhede la era do mmau do megala, ta happo ke ri Yesus ta kako la Yerusalem.

⁵²Moko ta pepu ke ri Yesus ne ddau he ta kako uru jhara ngati No. Ne ddau do pepu ri Yesus do na harre, ta maho ke la dhara hewue kapo pa Samaria tu ta la pemoko ne nga-nga tu Yesus.

⁵³Tapulara, ne ddau-ddau do pa dhara kapo do naanne wae dho ta hamme Yesus, rowi No do teleo ke ta ju la Yerusalem.

⁵⁴ Moko ta dhai ta toi ne lai do naanne ri ana hekola Yesus, ri Yakobus nga Yohanes, moko ta lii ke ro, ”Muri, ddhei marra Muri, ta ami ai jhi ta puru ti liru tu ta ma pekappo ladu-ladu ne ddau-ddau do na hedhe?”

⁵⁵Ta kebhibha ke Yesus la nga ro, jhe bhani nga ro.

⁵⁶Ta alla pemina harre ta pekaddhi ke ro la kapo do wala he.

⁵⁷Pa dhara nga peterue ko ne loro jhara kako ro, ri Yesus nga ana hekola No he, ta era ke ne ddau do la lii pa Yesus, ”Ama, ya ddhei ta pedute Ama ke, la mii we Ama ne kako!”

⁵⁸Ta bhale ke ri Yesus, ”Ngaka-addu do era nga ro'a jhe dolila do era nga nyabbhu, tapulara tu Ana Ddau Raiwawa bhule dho nga era tu ta pelakku-anni he le.”

⁵⁹Moko ta lii ke Yesus pa heddau do wala, ”Pedute we Ya.” Tapulara ta lii ke ne ddau do naanne, ”Hane ko we ya pebhale ngarra ko, tu ta la pedane ama ya ko.”

⁶⁰Ta bhale ke ri Yesus, ”Hane ro do made pepedane ri ddau ro miha do made he. Tapulara au dhe, kako we la pepeke ne jhara lii ta do Deo do jhari ke ta pereda.”

⁶¹ Era ri heddau do wala do lii, ”Ama, ddhei ya ta pedute Ama, tapulara gole ko we ya uru ta la pelangu ko.”

⁶²Ta lii ke Yesus, ”Ddau do era pa dhara nga kebhalla worai ri bajak, jhe kebhibha la kejhunga, jhamma dho no ta jadhi ai-alla annu-niki Deo.”