Read Sabu YOHANES 1 Bible Online

YOHANES 1 - Sabu bible

YOHANES 1

¹Pa petari-rai, nga do peera dae raiwawa, Lidara do lore ke peera. Lidara do era ke hela'u-la'u nga Deo, jhe Lidara do hela'u nga Deo.

²Rai ti petari do era ke hela'u-la'u nga Deo.

³Hari-hari ne do era hedhe, do pelake jha ra No ke ne tao ri Deo, jhe ngati hari-hari ne do era hedhe, bhule dho ke hahhi he do adho do tao pelake jhara No.

⁴Lidara do naanne ke, ne kepue muri mada ne, jhe ngati muri mada do nadhe ke ne do wie teleo pa ddau raiwawa.

⁵Teleo do naanne ke ne do ta kelala pa dhara do kerabba, jhe ri kerabba ne adho ke do nara ta pemade No ri.

⁶ Ta dakka ke ne ddau do pepue ri Deo ne, ne ngara no Yohanes.

⁷Ne dakka no ta ma pepeke ne jhara lua teleo ne, mita ie ke hari-hari ddau ta parahajha pa No.

⁸No miha, adho teleo do naanne, ne dakka no tu ta ma pepeke ne jhara lua teleo do naanne ke.

⁹Teleo do petu-petarra ne do ta ma peteleo hari-hari ddau, nee ke do dakka ma danni raiwawa.

¹⁰Ne lidara ne, do nee ke pa danni raiwawa, raiwawa dhe do tao pelake jhara No ke, tapulara tade dho No ri ddau raiwawa dhe.

¹¹Nee ke No do dakka ma rai No ma miha, tapulara ne ddau-rai No he wae dho ta hamme No.

¹²Maji le ta mina harre, do era ma ne ddau do hamme nga do parahajha pa No; do wie ke ri No ne higa pa ro ta jadhi ana ri Deo,

¹³do metana adho ngati ddau raiwawa, rowi ne muri mada do wowiu ne do dakka ngati Deo.

¹⁴Ne lidara do naanne do alla ke pejadhi ta ddau-raiwawa, jhe do nee ke No do pee pa telora di, jhe do ngadde ke ri di ne lua dhida nga kelodo No. Lua dhida nga kelodo do naanne do hamme ri No mii ana mone miha ri Ama. Pelake jha ra No ke ne ngadde Deo ri di nga lua hajha nga ddhei No nga di.

¹⁵Nee ke Yohanes mii hakahi ngati No, do pepeke ke ri Yohanes, ”No ke dhe ne do lii ya ne, do ta dakka leto ngati ya, tapulara do rihi mone-ae No ngati ya, rowi nga do dho era dae ya, do lore ke No peera.”

¹⁶No do tobo ri lua hajha nga ddhei, jhe do wie peloro ri No pa di, ne lua tarro-ie nga menyarro mangngi.

¹⁷Do alle ke pehamme ri di ne Lipedara Deo ne, do pelake jhara Musa. Tapulara lua hajha-ddhei nga lua ha'u nga keremme Deo do peteleo pelake jhara Yesus Kristus.

¹⁸Bhule dho ie ta heddau do ngaddi ta ngadde Deo, wala ngati ana do mone miha ne, do hela'u nga Ama jhe do hekeradde nga Ama. No ke ne do petade Ama pa di.

¹⁹Ta pepu ke ri Mone Pereda pa Yerusalem, ne mone tunu-menahu nga do Lewi he la nga Yohanes, ta la kebhali pa no, ”Nadu ke au dhe?”

²⁰Ta pika mola-mola ke Yohanes, ”Ya dhe, adho Duae Mone ma'i-Mone golo ne.”

²¹ Ta kebhali ke ro ri, ”Ki do mina harre ma, nadu ke au dhe, Elia ke au?” Bhale ri Yohanes, ”Adho.” ”Au heddau nabi?” ne kabhali ro ri. ”Adho,” bhale ri Yohanes.

²²”Ki do mina harre ma, lii ko we au pa jhi, nadu ke au dhe?” ne ane ro, ”Mi ta nara jhi ta wie ne libhale pa ddau do pepu jhi he. Ne nga ke ne lii au jhara lua ngi'u au miha?”

²³ Ta bhale ke ri Yohanes, ”Ya ke dhe no, do pale ri Nabi Yesaya; ’Ddau do lagu do petoda pa dhara kebhalla-ae; Pemere we ne ruhara tu Muri.’ ”

²⁴Ta kebhali ke ne ddau do peu ri do Farisi he,

²⁵”Ki do adho ma au ne Duae Mone ma'i-Mone golo ne, adho ma Elia, jhe adho lema Nabi, ta nga au hakku pejhiu ddau?”

²⁶Ta bhale ke ri Yohanes, ”Ne pejhiu ri ya, ri ei-loko he we. Tapulara pa telora mu, nee heddau do dho tade ri mu.

²⁷No do dakka leto ngati ya, tapulara we, tu ta ma'e ne dari helapa No he le we, jhamma tu-tu le dho ya.”

²⁸Ne lai do na harre hari-hari jadhi pa Betania, pa hebhakka bira dimu Loko Yordan pa era pejhiu Yohanes.

²⁹Ta dhai ta jhammi-ae he, ta ngadde ke Yesus ri Yohanes do dakka la nga no. Moko ta lii ke Yohanes, ”Heleo we, oni ke ne Ana Ki'i-jhawa Deo do ta ma pehai pehuba lubhu harro nga menyilu raiwawa dhe.

³⁰No ke ne do ane ya ne, do ta dakka leto ne ngati ya, tapulara No do rihi mone-ae ngati ya, rowi nga do dho metana dae ya, do lore ke No peera.

³¹Pa petari-tari tade dho No ri ya ta nadu. Jhe ne do pa petu ne, ne dakka ya ma pejhiu ri eiloko, mita ie ke No ta ta de ri do Israel.”

³²Do pepeke le ri Yohanes ne lai do nadhe, ”Henga Deo do ngadde ke ri ya do puru mii hengi'u koro jhawa he ngati liru jhe la kajji pa wokolo No.

³³Pa awe do naanne tade dho No ri ya ta nadu. Tapulara Deo do lii pa ya ta pejhiu ri ei loko ne, do alla ke pelii pa ya, ’Kinga ngadde ri au, Henga Deo do puru jhe la kajji la wokolo heddau ddau, No ke dhe bhoke ne do ta pejhiu ddau ri Henga Deo.’

³⁴Do ngadde miha ke ri ya ne lai do napoanne,” ane Yohanes, ”nga peteleo ke ri ya ta do No ke ne Ana Deo ne.”

³⁵Ta bhale ma jhammi-ae ri, ta era ke Yohanes nga do dhue ddau ana hekola no, pa era do naanne ri.

³⁶Ta ngadde ke Yesus ri ro, era do lake jhara anne, ta lii ke Yohanes, ”Heleo we! Oni ke ne Ana Ki'i-jhawa Deo ne.”

³⁷Ne lipedai Yohanes do na harre do rangnge ri hari do dhue ana hekola Yohanes he, moko ta kako ke ro la nga Yesus.

³⁸Ta kebhibha ke Yesus la kejhunga, ta ngaddi ke ro ri Yesus do era do pedute No. Ta kebhali ke Yesus pa ro, ”Kale ne nga ke mu?” Ta bhale ke ri ro, ”Rabi, pa mii ke ne era pee Rabi?” (’Rabi’ pebhale ma lirai di: ’guru’).

³⁹”Mai we la heleo ri mu,” ane Yesus pa ro. Ta kako ke ro penau nga Yesus, jhe ngadde ri ro pa mii ne era pe Yesus. Ne awe napoanne, wabba appa maddha lo dho. Ta pee ke ro pa lodho do naanne nga Yesus.

⁴⁰Heddau ti telora do dhue ddau do rangnge ne nga ne do pale ri Yohanes ne, ne ngara no Andreas, jhe ne tuahhu no Simon Petrus.

⁴¹Ta kako ke no marri-ai-ai la kale Simon, tuahhu no ne, jhe lii, ”Alla ke jhi pepeabu nga Mesias!” (Mesias, hela'u nga Kristus, do ne pa pedabbho ne: Duae Mone ma'i-Mone golo ne ke).

⁴²Ta la pengaddo ke Simon ri Andreas la nga Yesus. Ta ketarre ke Simon ri Yesus, jhe lii, ”Au, Simon, ana Yonas, Au do ta pale ta Kefas.” (Kefas hela'u nga Petrus, pa lii rai di: lede-pahi-ae.)

⁴³Ta bhale ma jhammi-ae, ta happo ke ri Yesus ta kako la Galilea. Ta peabu ke Yesus nga Filipus, jhe lii pa no, ”Mai ma pedute Ya!”

⁴⁴Filipus dhe do ti ti Betsaida, era pee Andreas nga Petrus.

⁴⁵Ta peabu ke Filipus nga Natanael, jhe lii pa no, ”Alla ke jhi pepeabu nga ddau do pale ri Musa ne pa dhara Buku Lidara-Likewahhu Deo ne nga do pepeke ri nabi-nabi he. Ne ddau do naanne wala dho ke ngati Yesus ana Yusuf do ngati Nazaret ne.”

⁴⁶Tapulara ta bhale ke ri Natanael, ”Era marra do nara ta dakka hahhi ne do woie ngati Nazaret?” Ta bhale ke ri Filipus, ”Mai we au ma miha la heleo.”

⁴⁷Ta ngadde Natanael ri Yesus pa dhara nga kako ju la nga No, ta lii ke Yesus jhara lua Natanael, ”Heleo, ddau napoanne ne do Israel-ihi ne. Bhule dho pa no ne lai-lai do ta pedhame-dhame he we.”

⁴⁸Ta kebhali ke Natanael pa Yesus, ”Mina mii hakku tade ya ri Ama?” Bhale ri Yesus pa no, ”Nga do dho pedoe dae au ri Filipus, do ngadde ke ru ri Ya pa rame kepallu ne.”

⁴⁹”Ama Guru,” ane Natanael, ”Ama ke ne Ana Deo ne! Ama ke ne Duae do Israel!”

⁵⁰Ta lii ke Yesus, ”Parahajha ke au, wata ke taga tari do alla ke Ya pelii pa au ta do ngadde au ri Ya pa rame kepallu ne? Lai-lai do rihi ri ko ne mone-ae do ta ngaddi ri au!”

⁵¹ Ta lii ke Yesus, ”Tarra-tarra, parahajha we au, do medae ta ngadde ri au, liru do ta boka-anni nga naju-naju Deo do ha'e-puru pa Ana Ddau Raiwawa.”