Read Sabu YOHANES 11 Bible Online

YOHANES 11 - Sabu bible

YOHANES 11

¹ Era heddau do pee pa Betania, ne ngara no Lazarus, do pee hela'u-la'u nga nawanni no Marta nga Maria.

² Maria ke ne mobanni do tude rubhebho Muri ne ri eiloko-wwau-mangngi, jhe hae ri rukattu no. Pa dhara hewari, ta lakka ri paddha ke Lazarus.

³Ta pedhai lii ne nawanni he hari do dhue pa Yesus nga lii, ”Muri, nee ke ne namone jhi ne, do ddhei Muri ne, nee ke do paddha.”

⁴Ta rangnge ri Yesus ne lii do naanne, ta lii ke No, ”Jadhi dho No ta made rowi banyaki do nadhe. Hakku jadhi ne nadhe. Hakku jadhi ne nadhe, mita pekelode Deo ke, jhe hari lema, mita ri no, Ana Deo ta pekelode ke.”

⁵Yesus do hajha nga Marta, Maria nga Lazarus.

⁶Tapulara ta rangnge ne lipaddha Lazarus ne, ta pekebakka-anni ko ke Yesus pa anne dhue lodho ri.

⁷Ta alla pemina harre, jhe itu lii Yesus pa ana hekola No he, ”Mai we di ma bhale la Yudea.”

⁸Ta bhale ke ri ro, ”Ama Guru, ta itu kowe ne do Yahudi he, ddhei ta tuke Muri ri wowadu, jhe pa awe nadhe ri, ddhei ke Ama ta bhale ri la ni?”

⁹Ta lii ke Yesus pa ro, ”Ta do adho dhe ngine, ki anni-lodho, ne tui ne ta henguru dhue ja? Ddau do kako pa awe anni lodho, adho no do ta kedune rowi do ngadde ri no ne teleo raiwawa dhe.

¹⁰Tapulara ddau do kako pa dhara awe maddha, do ta kedhune no, rowi do adho do era ne teleo pa no.”

¹¹Mina harre ke ne lii Yesus. Ta alla pemine harre ta lii ri ke No, ”Ihi-anga di Lazarus, nnai ke do bba'i, tapulara do ta kako ke Ya la peree no.”

¹²Ta lii ke ne ana hekola Yesus he, ”Muri, ki do ta bba'i ke we Lazarus, do medae ma no ta ie.”

¹³Ne pedabbho Yesus hakku lii No mina harre, ta peke ta do alla ke Lazarus pemade. Pa dhara peira ri ana hekola he, ne pedabbho Yesus do naanne, ta do ta bba'i mi pa tima he we Lazarus.

¹⁴Ro do mina harre ta lii mola-mola he ke Yesus pa ro, ”Alla ke Lazarus pemade.

¹⁵Tapulara, do mengallu dhara lema Ya, ri do adho Ya do era pa ni, rowi do rihi ie tu mu, mita nara mua ta parahajha. Mai we doi ma kako la nga Lazarus pa dhara awe nadhe.”

¹⁶Tomas do pedoe lema ta ”Do kedue” ne, ta lii ke no pa ihi-anga no he, ”Mai we di ma pedute No, la'a we nota made le di hela'u-la'u nga No!”

¹⁷Ta dhai Yesus la era do naanne, appa lodho ke Lazarus ne alla pemade.

¹⁸Betania do peumu nga Yerusalem, era ma ne jjhau ne ta tallu kilo he.

¹⁹Do ae ke ne do Yahudi do dakka la heahu Marta nga Maria tu ta lii-anga nga ro, ri lua made Lazarus namone ro ne.

²⁰Ta dhai ta rangnge ri Marta ta do dakka ke Yesus laanne, ta mahhu-anni ke no la peabu nga Yesus, bhale Maria do pee pa ammu we.

²¹Ta lii ke Marta pa Yesus, ”Muri, ki ta do era he Muri pa dhe, awe do naanne, do bhara tatu ta do dho made ne tuahhu jhi ne.

²²Maji lema ta mina harre, toi ma ri ya ta do pa dhara awe nadhe lema do ta wie ma ri Deo, ne nga we ne do ame ri Muri.”

²³Ta lii ke Yesus pa Marta, ”Namone mu ne do ta muri bhale wari.”

²⁴Ta bhale ke ri Marta, ”Toi ma ri ya, ta do ta kaddhi bhale wari Lazarus, kinga dhai ta pekaddhi bhale wari ddau do made pa Lodho Pedakka Rahi Raiwawa.”

²⁵Ta lii ke Yesus pa Marta, ”Ya ke ne do wie muri mada nga do pekaddhi ddau do made. Ddau do parahajha pa Ya do ta muri no, maji lema ta do alla ke pemade.

²⁶Jhe ne ddau do muri, do parahajha pa Ya, made dho ke no lohe la lodho do nami-mii ne. Parahajha au pa lai do naanne?”

²⁷Bhale ri Marta, ”Muri, parahajha ya ta Muri ke ne Ana Deo ne, Duae Mone mai-Mone golo ne do dakka ma danni raiwawa do nadhe.”

²⁸Ta alla Marta pelii mina harre, ta kako ke no la pedoe Maria, tuahhu no ne, jhe pekewure ri no pa Maria, ”Nee ke Ama Guru pa dhe, jhe do nnai ta kebhale au.”

²⁹Ta rangnge mina harre, ta kaddhi ke Maria nga henginga, jhe kako la peabu nga Yesus.

³⁰Pa dhara awe do naanne, adho dae Yesus do maho la dhara rae ne. Do era ko ma No, pa era peabu Marta ne nga No.

³¹Ta ngadde ta kaddhi Maria nga henginga-nginga la tele, ta pedute le ke ri ro, rowi pa dhara penge ro, do ta la tangi la raidare ne.

³²Ta dhai Maria la nga Yesus, jhe ngadde Yesus ri No, ta la lakku rutu ke no pa hedhapa Yesus jhe lii, ”Muri, kita do era he Muri pa dhe, pa awe naanne bhara tatu ne namone ya ne made dho.”

³³Ta ngadde Maria do tangi ri Yesus, mina harre lema ne do Yahudi do penau nga Maria he, ta hedui ke ne ade Yesus, jhe ruba dhara No nga Maria.

³⁴Moko ta kebhale ke ri Yesus pa ro, ”Nnai pa mii no ne pedane ri mu?” Bhale ri ro, ”Mai we la heleo ri Muri.”

³⁵Moko ta tangi ke Yesus.

³⁶Ta lii ke ne do Yahudi he, ”Heleo we, dhai tarra No ne hajha nga Lazarus!”

³⁷Tapulara hagghe era do lii, ”Do bhaddu nara ma ri No ta peie, ta nga ri No hakku do dho labbe le Lazarus mita do dho made?”

³⁸Do dhai ruba dhara tarra Yesus, moko ta kako ke No la raidare ne. Ne raidare ne hewue ro'a lie jhe henabbhe ri wowadu do warena.

³⁹Ta lii ke Yesus, ”Riho ko ne wowadu do napoanne.” Ta bhale ke ri Marta tuahhu do made ne, ”Wo Muri ya, appa lodho ke no ne alla pepedane. Do bhara tatu ke ta do dhai wwau ke no.”

⁴⁰Ta lii ke Yesus pa Marta, ”Adho do alla ke Ya pelii pa au ngine ne: Kinga parahajha au, do ta ngadde ri au mina mii ne mone-ae higa Deo!”

⁴¹Moko ta riho ke ri ro ne wowadu ne. Ta alla pemina harre ta tengara ke Yesus la liru jhe pali, ”Ama, peha'e ri Ya ne kolo lii ie-ae pa Ama, rowi do alle ke pedhanno nga tanae Ya ri Ama.

⁴²Do toi ri Ya ta do era loro ma Ama pa dhara dhanno nga tenae Ya, tapulara do ta pale ri Ya ne nadhe, tu ddau-ddau do era pa dhe; mita ie ke ro ta parahajha, ta do Au ke ne do pepue Ya.”

⁴³Ta alla pemina harre ta peka ke Yesus nga lipeka do maddu, ”Lazarus, mahhu-anni we au!”

⁴⁴Moko ta mahhu-anni ke ne ddau do alla pemade do na anne. Ne ruai nga rubhebho no, era do kebore ko ri bhalla keboro he. Ta lii ke Yesus pa ddau do era paanne, ”La ma'i ko ne bhalla keboro kae no he mita nara no ta kako nga woie.”

⁴⁵Ae ne do Yahudi do la heaho Maria he do parahajha pa Yesus, ta dhai ta ngadde ri ro ne lai do naanne.

⁴⁶Tapulara do parri ddau ti telora ro, era do kako la nga do Farisi he ta la peke ne nga ne alle petao ri Yesus ne.

⁴⁷Rido mina harre ke ne do Farisi he nga kattu-kattu mone tunu-menahu he ta tao lua peowu ke nga Kattu-katu Aigama he. Ta lii ke ro, ”Ne nga ke ne do jhamma ta tao ri di? Ne ddau do nadhe, do ae ke ne lua madalae do tao ri No.

⁴⁸Kinga ta hane loro ri di mina hedhe do medae ke hari-hari ddau ta parahajha pa No. Jhe dai ne pedakka, ta dakka he ke mone peredda Roma ta ma peape ne Ammu Deo dhe nga hari-hari ddau-rai di!”

⁴⁹Heddau ti telora ro, ne ngara no Kayafas, kattu mone-ae ngati mone tunu menahu pa ttau do naanne, Ta lii ke, ”Mu hedhe tada dho nga-nga.

⁵⁰Ta do dho toi ke rowi mu, ta do taga ddau-rai, do rihi ie heddau ddau ta made, ngati apa kerewe-rai hari-hari ddau-rai?”

⁵¹Do ne pa petu ne, ne lii Kayafas mina harre, adho dakka ngati penge no miha. Tapulara mi heddau kattu mone-ae ngati mone tunu menahu pa ttau do naanne, ta pedara ke no, ta do ta made Yesus tu do Yahudi.

⁵²Jhe do adho ta tu do Yahudi he we tapulara lema tu ta keworo nga ta peheujhu-headde ne ana-ana Deo do menyabbha kebali-bali he.

⁵³Jhari ngati lodho do naanne ta pehela'u-lii ke ne mone pereda do Yahudi he ta pemade Yesus.

⁵⁴Ri do mina harre ke ngaddi dho ke ta pehhau-anni pa telora ddau lowe he pa kejie do Yahudi he. Ta pekaddhi ke Yesus ngati Yudea la hewue rae ne ngara rae do naanne Efraim do peumu nga kebhalla-ae. Ta pee ke No pa ni hela'u-la'u nga ana hekola No he.

⁵⁵Pa awe naanne do hedhara ke ne awe nga'a Kewahhu Paskah Yahudi. Ae ke ddau ngati roa nga kejobho do kao la Yerusalem tu ta la pekako ne lua pemmau-anni nga do dho dhai dae la lodho nga'a kewahhu do naanne.

⁵⁶Ta kale ke Yesus ri ro, jhe dhai ta awe ta pekupu ne pa Ammu Deo, ta lii ke ro heddau pa heddau ”Mina mii pa penge mu? Wue marra No ta do dho dakka ma dhara lua nga'a kewahhu do nadhe.”

⁵⁷Hakku lii ro mina harre, rowi do alla ke ne kattu-kattu mone tunu-menahu pepemahhu lipereda, mita ie ta nadu we ne do toi ne era pee Yesus, do jhamma ke ta pika pa ro, mita nara ri ro ta kappe No.