Read Sabu YOHANES 13 Bible Online

YOHANES 13 - Sabu bible

YOHANES 13

¹Ti helodho nga do dho dhai dae la lodho nga'a kewahhu Paskah ne, do toi ke ri Yesus ta do dhai ke ne awe ne, ta hane ne raiwawa do nadhe, tu ta bhale la nga Ama No. Do hajha-do ddhei No nga ddau-ddau do jadhi ta unu-oha No, jhe do pee No nga hajha nga ddhei nga ro tade la pedakka rahi.

²Yesus nga ana hekola No he do era pa dhara ta nga'a pa awe maddha. Ri wanga do alle ke pepemaho ne lua ddhei no pa dhara ade Yudas ana Simon Iskariot tu ta pewie Yesus.

³Do toi ke ri Yesus ta do alle ke pejhole ri Ama, hari-hari higa nga kuaha pa No. Do toi lema ri No, ta do No do dakka ngati Deo, jhe do ta bhale la nga Deo ma.

⁴Ri do mina harre ke, ta titu ke No, jhe boke ne juba No jhe akke ne kelebho No ri hadu.

⁵Ta alla pemina harre ta ihe ke ri No hewue bita ri eiloko, jhe jhari ta lonye ri No ne rubhebho ana hekola No he, jhe heka ri No pekemangu ri hadu do akke pa kelebho No ne.

⁶Ta dhai No la nga Petrus, ta lii ke Petrus pa No, ”Muri, mina mii ne jadhi, ta Muri ri ne do ma lonye ne rubhebho ya?”

⁷Ta bhale ke ri Yesus, ”Pa dhara awe nadhe tada de dho au dae ne do tao ri Ya dhe, tapulara do ta toi ma ri au hine.”

⁸Ta lii ke Petrus, ”Bhole Muri eeh. Bhole lonye tu-tu ri Muri ne rubhebho ya!” Tapulara ta lii ke Yesus, ”Ki dho lonye ke ri Ya ne rubhebho au, moko au bhule dho ke nga lua pedu nga Ya.”

⁹Ta lii Simon Petrus, ”Ki do mina harre ma Muri, bhole ta rubhebho dhe we, tapulara ruai nga kattu ya lema!”

¹⁰”Ddau do alle ke pejhiu-ei, do mmau ke hari heddau,” ane Yesus pa Petrus, ”Tenge dho ke no ta pemoo ri, titu wata rubhebho ne ke. Mu hedhe do mmau ke tapulara adho hari-hari.” (

¹¹Do toi ke ri Yesus ta nadu ne do ta pewie No ne. Ri do mina harre ke hakku lii No, ”Do mmau ke mu, tapulara adho hari-hari.”)

¹² Ta alla pelonye ne rubhebho ro hari-hari ri Yesus, ta pake wari ke ri No ne juba No ne, jhe mejaddhi ri. Moko ta lii ke No pa ro, ”Tada ke mu ne nga ne itu ta alle petao ri Ya ne penaja nga mu?

¹³Pedoe Ya ri mu ta Guru nga Muri. Jhe do petu ta do mina harre.

¹⁴Kinga Ya do mii Guru nga Muri unu mu, alla ke pelonye ne rubhebho mu, do jhamma ke mu ta lonye ne rubhebho mu, heddau ri heddau.

¹⁵Do wie ke ri Ya ne telia do woie pa mu, mita ie ke ri mu ta tao ne nga ne do alle petao ri Ya pa mu.

¹⁶ Do petu-petarra ne lii Ya do nadhe: He ddau naannu rihi dho no ngati muri no, jhe heddau ddau-depu, rihi dho ngati do pepue no ne.

¹⁷Ki do toi ke ri mu hari-hari ne na hedhe, mangngi nga mengallu dhara ke tu mu ki nga tao ri mu.

¹⁸ Ne nga ne do pale ri Ya do nadhe, adho jhara lua mu hari-hari. Do toi ke ri Ya, nadu-nadu ne do alla pepidhi ri Ya. Tapulara ne nga ne do hure do bhuke pa dhara Buku Lidara-Likewahhu Deo, do jhamma ke ta jadhi, ’Ddau do nga'a hela'u nga ne, do ta pelawa nga Ya.’

¹⁹Ne pedhae ri Ya ne lai napoanne pa mu pa dhara awe nadhe, nga do dho jadhi dae, mita kinga dhai ke ta jadhi hine ne lai do naanne, ta parahajha ke mu, ta do Ya ke ne do pale ta YA DO ERA.

²⁰ Tarra-tarra do petu ne lii Ya do nadhe: Nadu ne do hamme ne ddau do pepue riya ne, napoanne nnau mii hamme Ya ke. Jhe nadu do hamme Ya, napoanne nnau mii hamme No ke do pepue Ya ne.”

²¹Ta alla Yesus pelii mina harre, dhai hedui ke ne ade No. Moko ta lii ke No, ”Do petu tarra ne lii Ya do nadhe, Heddau ti telora mu do ta pewie Ya.”

²²Ta peketarri ke ne ana hekola No he, heddau nga heddau nga dhai madalae, rowi toi dho ri ro, ta nadu ke ne do naanne.

²³Ne ana hekola do rihi ddhei ne Yesus do mejaddhi pa hebhakka keraha Yesus.

²⁴Ta wiu-ai ke Simon Petrus pa no, mita ie no ta kebhali pa Yesus, ta nadu ke ke do ane Yesus ne.

²⁵Moko ne ana hekola do naanne ta peumu-anni ke nga Yesus, jhe kebhali, ”Na du ke no we Muri?”

²⁶Bhale ri Yesus, ”Ddau do wie ri Ya ne roti do pehabbho la dhara mago ne, no ke do naanne.” Moko ta aggo ke ri Yesus ne roti ne hekedalli, jhe pehabho la dhara mago ne, jhe jhole ne roti do naanne pa Yudas ana Simon Iskariot.

²⁷Ta alle dhangnge pehamme ne roti do naanne ri Yudas, ta maho dhangnge Wango nga henginga la dhara ade no. Moko ta lii ke Yesus pa no, ”Henginga we au ne tao ne nga do ddhei ta tao ri au.”

²⁸Bhule dho heddau ti telora ro do mejaddhi he do toi ta nga hakku lii Yesus mina harre pa Yudas.

²⁹Era ma do penge ta do pepue ta la walli ne nga-nga Yudas ri Yesus, tu lai tao do naanne, kiadho ta la wie doi hudi he pa do kehia nga gahara — rowi Yudas do mone parru doi ka ro.

³⁰Ta alle pehamme ri Yudas ne roti do naane, ta mahhu-anni dhangnge ke no la tele. Awe naanne do maddha ke.

³¹Ta ludu Yudas, ta lii ke Yesus, ”Pa dhara awe nadhe ke, do ta pekelode ke Ana Ddau Raiwawa, jhe Deo do ta pekelode ke pelake jhara No.

³²Ki pekelode ke Deo pelake jhara No, No lema do ta pekelode ke ri Deo, pelake jhara No. No lema do ta pekelode ke ri Deo pelake jhara ngi'u No miha. Rihi ri ti naanne do ta pekelode ke No nga henginga.

³³ Wo ana-ana Ya, adho ke Ya do ta tui ri ne era nga mu. Do ta kale ke Ya ri mu, tapulara mii do alla ke Ya pelii pa mu, la era kako Ya dhe, nara dho mu ta dhai la ni.

³⁴ Ta wie ke ri Ya ne lipereda do wowiu pa mu: Pehajha-peddhei we mu heddau nga heddau. Hela'u le mii Ya ne ddhei nga mu, mina harre le ke mu ne jhamma ta pehajha-peddhei heddau nga heddau.

³⁵Kinga pehajha-peddhei ke mu heddau nga heddau, do ta toi ke ri hari-hari ddau ta mu ke ne ana hekola-ana hekola Ya.”

³⁶Ta kebhali ke Petrus, ”Muri, do ddhei ta la mii ke Muri?” Ta bhale ke ri Yesus, ”La mii ne era kako Ya, nara dho ri au ta pedute pa dhara awe nadhe. Do medae ma ta pedute Ya ri au hine.”

³⁷”Muri, ta nga hakku do dho nara ri ya ta pedute pa dhara awe nadhe?” ne kebhale ri Petrus, ”Do ddhei ya ta made tu Muri!”

³⁸Ta bhele ke ri Yesus, ”Tarra ke au do ddhei ta made tu Ya? Mita toi ri au, nga do dho tutu-oo dae manu nabbho, tallu wari ke au ne alle pepehile ya, ta do dho tade ya ri Au!”