Read Sabu YOHANES 17 Bible Online

YOHANES 17 - Sabu bible

YOHANES 17

¹Ta alla pemina harre, ta tengara ke Yesus la liru, jhe lii, ”Ama, pa awe do nadhe, dhai ke ne awe ne. Pekelode we Ana Au, mita ie ri Ana ta pekelode Ama ri.

²Do alle ke pejhole ri Ama pa Ana ne lua higa nga kuaha pa hari-hari ddau raiwawa, mita ie ri No ta wie ne muri mada do petu nga do pelo ro ne pa hari-hari ddau do alla pejhula ri Ama pa No.

³Nadhe ke ne muri mada do petu nga do peloro ne; mita ie ddau ta tade Ama, do titu wata No he ke ne petu ne, jhe tade Yesus Kristus do pepue ri Ama ne.

⁴Alle ke ri Ya pepekelode Ama pa danni raiwawa dhe nga pemoke ne lua jhagga do wie ri Ama ne pa Ya.

⁵Ama! Pekelode we Ya pa dhara awe nadhe, ri lua dhida nga kelodo do unu ri Ya hela'u-la'u nga Ama, uru jhara ngati do dho peera dae raiwawa dhe.

⁶Alle ke ri Ya pa pepetade Ama pa ddau-ddau ngati raiwawa do nadhe, ddau do alla pewie ri Ama pa Ya. Ro, do unu ke ri Ama, jhe do alla ke ri Ama pejhula ro pa Ya. Do pedute ke ri ro ne lipedai Ama.

⁷Pa dhara awe nadhe do toi ke ro ta do hari-hari ne do wie ri Ama pa Ya do dakka ngati Ama ma.

⁸Alla ke ri pepedhai pa ro ne lepedai do wie ri Ama pa Ya; jhe do alla ke pehammi ri ro. Do toi ke ri ro ta do tarra-tarra Ya do dakka ngati Ama, jhe do parahajha ke ro ta do Ama ke ne do pepue Ya.

⁹Hebhajha tu ro. Hebhajha dho Ya tu raiwawa, titu wata ke tu ddau-ddau do alla pewie ri Ama pa Ya, rowi ro do unu ri Ama.

¹⁰Hari-hari do unu ri Ya, na poharre do unu ri Ama lema ke, jhe hari-hari do unu ri Ama, do unu ri Ya lema ke. Do pekelode ke Ya pa telora ro.

¹¹Pa dhara awe nadhe nee ke Ya ma nga Ama. Adho ke Ya do pee ri pa raiwawa dhe; tapulara ro do hee ko pa raiwawa dhe. Ama do mmau do megala! Keramme we ro ri lua higa nga kuaha ngara Ama, ri ngara do alle pewie ri Ama pa Ya ne — mita ie ro ta jadhi hahhi, hela'u le mii Ama nga Ya do jadhi ta hahhi we.

¹² Pa dhara awe hela'u-la'u ko Ya nga ro, alla ke ri Ya pekeramme ro ri higa nga kuaha ngara Ama — ngara do wie ri Ama pa Ya. Alla ke ro pekeramme ri Ya, hakku bhule dho heddau heddau he ngati ro do ila, titu wata no we do jhamma ta ele ne, mita ri lai do naanne ke, ta tobo ke ne do hure do bhuke pa dhara Buku Lidara-Likewahhu Deo.

¹³Pa dhara awe nadhe, nee ke Ya ma nga Ama. Ne pali ri Ya hari-hari ne na hedhe, rowi do nee ko Ya pa raiwawa dhe, mita toi ke ri ro nga kemolo ne lua mengallu nge nge ke haka dhara Ya.

¹⁴Alla ke ri ya pepedhae ne lipedai Ama pa ro, jhe ne raiwawa dhe do bubu dhara nga ro, rowi do adho ke ro do unu ri raiwawa dhe, mii Ya lema adho do unu ri raiwawa dhe.

¹⁵Ami dho ro ri Ya mita aggu ro ri Amu ngati raiwawa dhe tapulara ne ame ri Ya, mita ie ke ro ta jaga ri Ama ngati mone tao apa nga ke rewe ne.

¹⁶Hela'u lema mii Ya do adho do unu ri raiwawa dhe, ro lema adho do unu ri raiwawa dhe.

¹⁷Pejadhi we ro ta do kemolo ta unu ri Ama we do narru pa lua mola-mira ne; lipedai Ama ke ne lua mola-mira ne.

¹⁸Mii do alle ke Ya pepeue ri Ama ma raiwawa dhe, mina harre lema ke ro ne pepu ri Ya la raiwawa dhe.

¹⁹Tu ro ke, ne jhole ri Ya ne ngi'u Ya, mita petala ta unu miha ri Ama, mita ro lema jadhi ta do petone ta unu miha rowi Ama do narru pa lua mola mira ne.

²⁰Adho ke ta tu ro we do na hedhe, ne hebhajha Ya. Hebhajha lema Ya tu ddau ddau do medae ta parahajha ri lipeliba ro do na hedhe.

²¹Ne menangnge ri Ya, Ama, mii Ama do jadhi ta hahhi nga Ya, Ya do jadhi ta hahhi nga Ama. Jhe kinga ie mudhe he ro ta jadhi hahhi nga di, mita parahajha ddau raiwawa, ta do Ama ke ne do pepue Ya.

²²Alla ke pe wie ya pa ro ne lua dhida nga kelodo do wie ri Ama pa Ya ne, mita ie ro ta jadhi hahhi, hela'u mii di le do jadhi ta hahhi we;

²³Ya nga ro, jhe Ama nga Ya, mita tarra-tarra ro ta jadhi hahhi we. Moko do ta toi ke ri raiwawa dhe ta do Ama ke ne do pepue Ya, jhe Ama do hajha do ddhei nga ro, mii Ama do hajha do ddhei nga Ya.

²⁴Ama, ne ddhei Ya mita ie ke ro do wie ri Ama he pa Ya, ta era hela'u-la'u nga Ya pa mii we Ya ne era, mita ngadde ri ro ne lua dhida nga kelodo Ya do wie ri Ama ne pa Ya, rowi Ama ke do hajha do ddhei nga Ya rai nga do dho peera dae raiwawa dhe.

²⁵Ama do mola do mira! Tade dho Ama ri raiwawa dhe, tapulara Ama do tade ri Ya, jhe do toi ke ri ddau-ddau do na hedhe, ta do Ama ke do pepue Ya.

²⁶Alle ke ri Ya pepeteleo ne ngara Ama pa ro; jhe do ta tao loro ri Ya mina harre, mita ie ne lua ddhei Ama nga Ya ta halla-anni pa dhara ade ro, jhe jadhi ta heujhu headde nga ro.”