Read Sabu YOHANES 2 Bible Online

YOHANES 2 - Sabu bible

YOHANES 2

¹Dhue lodho ngati napoanne, ta era ke ne lai-ala peloko-nga'a pa dhara rae Kana, jhe ina ri Yesus do era ke pa ni.

²Yesus nga ana hekola No he do pedoa le la lua peloko nga'a do naanne.

³Ta dhai ta alla ke ei-ago, moko ta la lii ke ina No pa Yesus, ”Hee ke dhe do alla ei-ago pa ro.”

⁴Ta bhale ke ri Yesus, ”Ina bhole li pa Ya. Dhai de dho ne awe tu Ya ta pe teleo-anni.”

⁵Tapulara ta lii ina ri Yesus pa ddau do jhagga he, ”Pedute ri mu, ki nga lii No ta jhagga ne nga-nga pa mu.”

⁶Pa anne do era anna bhue guhi do pemoko ta lonye bhebho pedutu nga hadha do Yahudi. Ne ihi guhi do na harre, hewue era ma ta hengahu liter he.

⁷Ta lii ke Yesus pa ddau jhagga he, ”Ihi ko ne guhi-guhi do na harre ri ei-loko.” Ta ihi ke ri ro hari-hari ne guhi tade tobo ri ei-loko.

⁸Ta lii ke Yesus pa ro, ”Taddhe ko ri mu hudi he ne eiloko do napoanne jhe aggo la nga kattu lai-tao do nadhe.” Ta aggo ke ri ro ne eiloko do naanne la nga kattu lai-tao ne,

⁹ta hakko ke ri no ne eiloko do alla ke pebhari-anni ta ei-ago. (Toi dho ri no nga ti mii ne ei-ago do naanne, wata ke ri ddau jhagga do ihi eiloko he we ne do toi.) Moko ta pedoe ke ri no ne mone ngedhe ne,

¹⁰jhe lii no, ”Pa tima hari-hari ddau, do pemoko uru jhara ko ei-ago do rihi woie, jhe ki bhenga le hari-hari tamu ne nginu jhe itu wie ei-ago do tima he. Tapulara tao au, ta takka ko ma ne ei-ago do rihi woie lohe ma dhara awe nadhe ri!”

¹¹Napoanne ke ne lua madalae do petari-rai ne tao ri Yesus. Ne tao ri No ne lua madalae do naanne pa Kana pa ihi rai Galilea. Ri tada do naanne ke, ne pedhelo ri No ne lua dhida nga kelodo No.

¹² Ta alla pe ia harre ta kako ke Yesus la Kapernaum hela'u-la'u nga ina No tuahhu-tuahhu No nga ana hekola No he. Ta pee ke ro pa nii parri lodho ne tui.

¹³ Ta dhai ta hedharra le ne lodho Nga'a Kewahhu Paskah do Yahudi, ta kako ke Yesus la Yerusalem.

¹⁴Pa Ammu Deo do pa Yerusalem ne, ta ngaddi ke ri Yesus ne ddau-ddau mone pewie hapi, ki'i jhawa, nga koro jhawa, mina harre lema mone pehuru doi he era do mejaddhi pa anne.

¹⁵Ta tao ke ri Yesus hebhangngu gui ngati dari jhe la hudhi keluru-keluru ri No ne bhada do era pa anne, ie ta ki'i jhawa he, mina harre lema ne hapi he, ngati dhara Ammu Deo ne. Ne meja-meja mone pehuru doi he, nyakka pebito-bato hakku ne doi he menyalla kebali-bali la hebhakka-bhakka.

¹⁶Moko ta lii ke Yesus pa mone pewie koro jhara he, ”Dhede hari-hari ngati dhe. Bhole pejadhi ri mu ne Ammu Ama Ya dhe ta era pedhaga!”

¹⁷ Moko ta henge ke ri ana hekola No he, ne lilolo do nadhe pa dhara Buku Lidara-Likewahhu Deo, ”Ne ade Ya wata le ne munu pa Ammu Au we, oo Deo, do kedu-kedaru mii ai he ke pa dhara Ya.”

¹⁸Ta la pebhata ke ne mone pereda do Yahudi he nga Yesus, jhe lii ro, ”Hakku ko Au ta tao lua madalae mii hahhi tada tu jhi ta do nga higa tarra Au hakku tao au mina hedhe.”

¹⁹ Ta bhale ke ri Yesus, ”Pekelole we ri mu ne Ammu do nadhe, pa dhara tallu lodho do ta petito bhale wari ri Ya.”

²⁰Moko ta lii ke ro, ”Appa nguru bhue ttau ne tui ne pettito ne Ammu do na dhe, jhe ri Au ta petito bhale wari pa dhara tallu lodho?”

²¹Tapulara ne Ammu Deo do pedabbho ri Yesus ne, ne pa petu ne, ngi'u No ma miha.

²²Hakku pa leto he ke, ta alle Yesus pepekaddhe ngati made mada, ta henge ke ri ana hekola No he ne lai do napoanne ta do ngaddi Yesus ta lii ma. Moko ta parahajha ke ro pa do bhuke pa dhara Buku Lidara-Likewahhu Deo, nga pa ne nga ne do pale ri Yesus pa ro he.

²³Pa dhara nga era ko Yesus pa Yerusalem pa awe nga'a kewahhu Paskah ne, ae ddau ne do parahajha pa Yesus taga ri lua madale do tao ri Yesus he.

²⁴Tapulara Yesus miha, adho do parahajha nga ro, rowi do tada ke ri No hari-hari ddau.

²⁵Adho do tenge ta pika pa No jhara lua nadu we, rowi ri No miha do toi ke ne nga ne do era pa dhara ade nga penge ddau raiwawa.