Read Sabu YOHANES 21 Bible Online

YOHANES 21 - Sabu bible

YOHANES 21

¹Ta alla pemina harre ta pengaddi-anni ri ke Yesus pa ana hekola No he pa ngidi Eilobo Tieberias. Mina hedhe ke ne jadhi ne lai do naanne:

²Pa dhara helodho, Simon Petrus, Tomas do pale ta do Kedue ne, Natanael ngati Kana pa Galilea, ana-ana Zebedeus, nga do dhue ddau ana hekola Yesus ri do wala he do era do peteni.

³ Ta lii ke Petrus pa do wala he, ”Ddhei ta la jhala nadu'u ko ya.” ”Pedutu lema jhi,” ne ane ro do wala he pa Petrus. Moko ta kako ke ro, jhe la dhara hewue kowa. Tapulara herammi-rai ne nara dho ro ne nga-nga.

⁴Ta umu le ta hhau lodho, ta era ke Yesus do titu pa ngidi eilobo ne, tapulara tade de dho ri ro ta do naanne ke Yesus.

⁵Ta lii ke Yesus pa ro, ”Woo ana-ana ya, era ke pa mu ne dahi nga loko?” Bhale ri ro, ”Bhule dho.”

⁶ Ta lii ke Yesus pa ro, ”Ligo ko ri mu ne hala mu ne la hebhakka kedhanga kowa ne, do ta nara mu nadu'u.” Moko ta ligo tarra ke ri ro, jhe dhai, nara dho ke ta nune ri ro ne jhala ro ne, rowi do lakka ke nadu'u do dhai ae.

⁷Moko ta lii ke ne ana hekola do ddhei Yesus ne pa Petrus, ”Muri ke dhe na nidhe bhoke!” Ta rangnge ri Simon Petrus ta nanidhe ke Muri, ta pake ke ri no ne bhajhu no (rowi do boke ri no ne bhajhu no), jhe riju no la dhara ei ne.

⁸Ne ana hekola do wala he, ta pedutu le ke ju la kololede jhara kowa ne, jhe nga nune ne jhala do tobo ri nadu'u ne. Adho ro do rihi ne jjhau ngati kolole de, era ma ta hengahu mete he we.

⁹Ta dhai ro ta puru ngati kowa ne, ta ngadde ke ri ro ne rao-ai, nga nadu'u do pebhaja pa dhida rao-ai ne nga parri bhue roti.

¹⁰Ta lii ke Yesus pa ro, ”Hakku ko ta la aggu parri ngi'u he ne nadu'u do itu ta nara he mu ngine ne.”

¹¹Ta ha'e ke Simon Petrus la kowa ne, jhe la nune na jhala ne la kololede. Ne jhala ne do tobo ke ri nadu'u do mone-ae-ae, hengahu lammi nguru tallu ngi'u ne ae hari-hari. Maji lema ta mina harre ne worawwu-ae, bhule le dho ta era do hio ne jhala ne.

¹²Ta lii ke Yesus pa ro, ”Mai we ma nga'a.” Bhule dho he ddau he ngati ana hekola he do bhani ta kebhali, ”Nadu ke Ama?” Rowi do toi ke ri ro, ta Muri ke naanne.

¹³Ta dhai ta pehedharra-anni ke Yesus nga ro jhe aggu ne roti he, jhe wie pa ro. Mina harre lema ne tao ri No pa nadu'u he.

¹⁴Nadhe ke ne awe do ketallu wari ne Yesus ne pengaddi-anni pa ana hekola No he, ta alla No pekaddhi bhale wari ngati dhara made mada ne.

¹⁵Ta alla ro penga'a he, ta lii ke Yesus pa Simon Petrus, ”Simon ana Yona, do rihi ke ne lua ddhei au penaja nga Ya, ngati lua hajha nga ddhei au penaja nga ro do na hedhe we adho?” Ta bhale ke ri Petrus, ”Do petu, Muri, do toi ma ri Muri ta do ya dhe do ddhei ma nga Muri.” Ta lii ke Yesus pa no, ”Piara-peluja we ne naki'i-naki'i Ya he.”

¹⁶Tu do kedhue wari ne ta lii ri ke Yesus pa no, ”Simon ana Yona, ddhei ma ke au nga Ya?” Bhale ri Petrus, ”Do petu, Muri. Do toi ma ri Muri ta do ddhei ya nga Muri.” Ta lii ke Yesus pa no, ”Piara-peluja we ne ki'i-ki'i Ya he.”

¹⁷Tu do ketallu wari ne ta kebhali ri ke Yesus pa no, ”Simon ana Yona, ddhei au nga Ya?” Ta hedui ke ne ade Petrus rowi jhajhi ke ta tallu wari Yesus ne kebhali pa no. Moko ta bhale ke ri Petrus, ”Muri, do toi ma ri Muri hari-hari. Do toi ma ri Muri, ta do ddhei ya nga Muri!” Moko ta lii ke Yesus pa no, ”Piara peluja we ne ki'i-ki'i Ya he.

¹⁸Tarra-tarra ne lii Ya pa au. Pa awe nga ngarru ko au, au miha ne do wake ne kelebho au, jhe kako la mii we ne ddhei au. Tapulara kinga dhai au ta weka, do ta jho le ri au ne rukemakku au pa ddau do wala, jhe ujhe au, jhe aggo au ri ro la mii we ne ddhei ro ta kako.”

¹⁹(Ri lipedai Yesus do naanne, ta peteleo ke ta mina mii Petrus ne made tu ta pekelode Deo). Ta alla pemina harre, ta lii ke Yesus pa Petrus, ”Pedute we Ya!”

²⁰ Ta dhai ta kebhibha ke Petrus, ta ngadde ke ri no pa kejhunga no, ne ana hekola do ddhei Yesus ne. (No ke ne do mejaddhi peumu nga Yesus pa awe nga'a he, jhe do kebhali pa Yesus, ”Muri, nadu ke ne do ta pewie Muri ne?”)

²¹Ta ngadde ne ana hekola do naanne, ta kebhali ke Petrus pa Yesus, ”Muri, mina-mii ke nga ddau do nadhe?”

²²Ta bhale ke ri Yesus, ”Kinga ta ddhei he Ya, ta pee ko ma no nga muri ma da tade la awe dakka Ya, napoanne adho lua-lai au. Tapulara au, pedute we Ya!”

²³Moko ta bhabbha ke ne lii pa telora ana hekola Yesus he, ta do ne ana hekola do naanne adho ke do ta made ri. Jhe ne pa petu ne, ne lii Yesus do naanne adho ta do made ne ana hekola do naanne, tapulara; ”Kinga ta ddhei he Ya ta pee ko ma no nga muri mada tade dhai la awe dakka Ya, napoanne adho lua-lai au.”

²⁴Ana hekola do nadha ke ne do wie ne lipeliba jhara lai do na harre. No dhangnge lema ke ne do bhuke ne napoharre hari-hari. Jhe do toi ri di ta do ne nga ne do pale ri no do petu-petarra.

²⁵Dhai ae ko ne lai-lai do tao ri Yesus. Ki ta bhuke he hari-hari ne naharre ngati hahhi la hahhi, pa penge ya he, bhule dho era pa hari hewue raiwawa dhe do nara ta takka hari-hari ne buku do ne na harre.