Read Sabu YOHANES 4 Bible Online

YOHANES 4 - Sabu bible

YOHANES 4

¹Ta rangngi ke ne do Farisi he, ta Yesus le do pejhiu ddau do rihi ae ke ngati Yohanes. (

²Do ne pa petu ne Yesus miha adho do pejhiu ddau, wata ke ana hekola No he we.)

³Ta toi ri Yesus ta do rangngi ke ne do Farisi he, ne jhara lai do naanne, ta bhale ke No ti Yudea la Galilea.

⁴Pa loro jhara kako No do naanne, ie nga dho ie do ta lake jhara Samaria No.

⁵ Moko ta dhai ke Yesus la hewue rae ne ngara ne Sikhar adho do rihi ne jjhau nga rai do wie ri Yakub pa Yusuf ana no ne pa awe do uru he.

⁶Pa anne do era ne ei-holo Yakub ne. Do dhai keloe tarra Yesus pa loro jhara No ne, rowi do mina harre ke, ta la mejaddhi ke No pa ngidi ei-holo do naanne. Pa awe naanne era ma ta wabba he nguru dhue nattu lodho he,

⁷jhe ne ana hekola Yesus he do langnga ke la walli nga'a la dhara rae. Ta dhai ta dakka ke heddau mobanni do Samaria la dhulu ei ngati ei-holo ne. Ta lii ke Yesus pa mobanni do naane, ”Ina, ie Ya ta ami ei ta nginu pa ina?”

⁸

⁹ Ta bhale ke ri mobanni do Samaria ne, ”Muri heddau do Yahudi, jhe ya dhe do Samaria; ta nga Muri hakku ami ei ta nginu pa ya?” (Rowi do Yahudi adho do era nga lua pedu nga do Samaria.)

¹⁰Ta bhale ke ri Yesus, ”Kita do toi he ri au ne lua ruba dhara Deo, jhe do toi lema ri au ta nadu ne do ami ei ne pa au, do bhara tatu ke au miha do ta ami ta nginu pa No, jhe do ta wie ri No pa au ne ei muri mada ne.”

¹¹Ta lii ke ne mobanni do naanne, ”Bhule dho Muri nga haba-dhulu, jhe ne ei holo do nadhe, do dhai meramma. Ngati mii Muri ne nara ei muri mada ne?

¹²Yakub le miha, ama-appu jhi ne, do wie jhi ne ei-holo do nadhe. No miha, do dhulu ti dhe lema ne ei-nginu no; mina harre lema ne ana-oha no he nga nanga'a-nabha da no he. Pa dhara penge Muri, ta do rihi ri ko Muri ngati Yakub?”

¹³Ta lii ke Yesus pa no, ”Ddau do nginu eiloko do nadhe do ta hae koko ri.”

¹⁴”Tapulara do nginu ne eiloko do ta wie ri Ya ne, adho ke no do ta hae koko ri lohe la lodho do nami-mii ne. Rowi ne eiloko do ta wie ri Ya ne, do ta jadhi mada ei-wattu pa dhara no, jhe wattu la tele, jhe do ta wie pa no ne muri mada do petu nga do peloro ne.”

¹⁵Ta lii ke mobanni do naanne, ”Muri, wie we pa ya ne eiloko do naanne mita do dho i'a ri ya hae koko, mita do dho tenge ri ya ta mai ma aggu eiloko ri ti dhe.”

¹⁶”Kako we au la pedoe ne ddau pa hedhapa au ne, jhe bhale au ma dhe,” ane Yesus pa no.

¹⁷Bahel ri mobanni do naanne, ”Bhule dho ya nga ddau pa hedhapa,” ”Do petu tarra ma ne lii au do napoanne,” ane Yesus pa no.

¹⁸”Rowi do lammi wari ke au ne alla pebanga-ammu, jhe ne momone do manga hela'u nga au ne, pa dara awe nadhe do adho tarra ma ta ddau pa hedhapa au.”

¹⁹”Pa awe nadhe, toi ke Muri ri ya ta heddau nabi,” ane mobanni do naanne.

²⁰”Ama-appu jhi ki wie hu nga mejura pa Deo, do wie hu nga mejura pa kolo bho jo do nadhe, tapulara lii ddau-rai Muri he, titu wata pa Yerusalem we ne era wie hu nga mejula ddau pa Deo.”

²¹”Parahajha we au,” ane Yesus pa no, ”pa hahhi awe hine, ddau do ta wie hu nga mejura pa Ama, adho ke pa bhojo do nadhe ri, jhe do adho lema ke ta pa Yerusalem ri.

²²Mu do Samaria, do wie hu nga mejura pa Deo do dho tade dae ri mu, tapulara jhi do Yahudi, do wie hu nga mejura pa Deo do tade ke ri jhe.

²³Tapulara do ta hine ne awe, jhe hari lema do nee ke, jhe ri kuaha Henga Deo do ta wie hu nga mejura ke ddau-ddau pa Ama, mii Deo do petu-petarra do mina mii ne ddhei Ama.

²⁴Rowi ne Deo na naanne, Henga, jhe titu wata nga kuaha Henga Deo we ne nara ddau-ddau ta wie hu nga mejura pa Ama, do mina mii No ne era.”

²⁵Ta lii ke ne mobanni do naanne pa Yesus, ”Toi ke ri ya ne Duae Mone ma'i-Mone golo ne (do pale ta Kristus ne) do ta dakka. Ki nga dakka No, do ta pepeke ke hari-hari lai pa di.”

²⁶”Ya ma ke No ri,” ane Yesus pa no, ”Ya ke, do nee pa dhara pedai lii nga au dhe, pa awe nadhe.”

²⁷Pa awe do naanne lema, ta bhale le ke ne ana hekola Yesus he. Ta madalae ke ro ne heleo Yesus do era do pedai lii nga heddau mobanni. Tapulara bhule dho heddau he ti telora ro do bhani ta kebhali pa mobanni do naanne, ”Ina, paralu ne nga?” Kiadho ta kebhali pa Yesus, ”Ta nga Ama hakku pedai lii nga mobanni do nanidhe?”

²⁸Moko ta hane ke ri mobanni do naanne ne guhi no pa anne, jhe perai la dha ra rae, jhe la lii no pa ddau-ddau do pa ni he.

²⁹”Mai ko la heleo ne ddau do pika ne nga ne do ngaddi ta tao ri ya. Wue marra ke, ta No ke Duae Mone mai Mone golo ne?”

³⁰Moko ne ddau-ddau he ta mahhu-anni ke ngati dhara rae ne, jhe kako la nga Yesus.

³¹Pa dhara awe naanne lema ta perihe ke Yesus ri ana hekola No he ta nga'a, ”Ama Guru, nga'a ko we,” ne ane ro.

³²Tapulara ta bhale ke ri Yesus, ”Do era ma nga'a pa Ya, do dho toi ri mu.”

³³Moko ne ana hekola No he ta pekebhali ke ro heddau nga heddau, ”Adho marra ta do era ddau ma pengaddu nga'a tu No?”

³⁴Moko ta lii ke Yesus, ”Ne bhara nga'a Ya, wala dho ke ngati pedute ne lua ddhei No do pepue Ya ne, nga do pemoke ne lua jhagga do alle pejhole ri No ne pa Ya.

³⁵Pa ane mu, ’Appa warru ri do ta dhai ke la awe ghattu.’ Tapulara ne lii Ya pa mu: Heleo ko we ne maa hedhe do ihi ke, do ta mate he ke ne awe-ghattu ne.

³⁶Ddau do ghattu do jhari ke ta hamme ne pai-pala no, jhe do ta pekupe ke ne ihi-habha tu lua muri mada no do petu nga do peloro ne. Moko ddau mone liba nga mone ghattu, do ie ke ta mengallu nge nga kehaka dhara hela'u-la'u.

³⁷Li perajja do nadhe do petu lema, ’Heddau do mone kujha, do wala ne do ghattu.’

³⁸Pepu mu ri ya la ghattu pa maa do adho do habha ri mu; maa do jhagga ri ddau do wala, jhe mu ke ne do hamme ne lua mangngi ngati lua jhagga ro he.”

³⁹Ae ne do Samaria he, do ngati dhara rae do naanne do parahajha pa Yesus, taga tari do lii ne mobanni do naanne, ”Do pali ri No hari-hari ie ta ne nga we ne do alla petao ri ya.”

⁴⁰Moko ta dhai ta peabu ne do Samaria he nga Yesus, ta meggai ke ta ame No ri ro mita pe ko nga ro. Hakku ta pee ke No pa anne dhue lodho ne tui.

⁴¹Ta alla pemina harre ta ju ae ri ke ne ddau do parahajha pa Yesus taga ta ri ne nga ne do ajha ri No miha pa ro.

⁴²Ta lii ke ro pa mobanni do naanne, ”Ne parahajha jhi pa awe do nadhe, adho ke tari lipika au he we pa jhi, tapulara do rangnge miha ke ri jhi ngati No, jhe toi tarra ke ri jhi ta do tarra ke ta No dhe, ne Mone Pehelame raiwawa dhe.”

⁴³Ta tobo le ta dhue lodho Yesus ne pee pa Sikhar, ta pekaddhi ke No la Galilea ri.

⁴⁴ Do alla ke Yesus miha pe lii, ”Heddau nabi adho do nara ta takkepekerihe pa rai no miha.”

⁴⁵ Tapulara ta dhai No la Galilea, ta hamme ke No ri ddau-ddau pa ni nga mengallu nge nga kehaka dhara, rowi do era le ro pa Yerusalem pa lodho Nga'a Kewahhu Paskah ne, jhe do ngaddi ri ro hari-hari ne do tao ri Yesus he pa ni.

⁴⁶ Ta alla pemina harre ta bhale ke Yesus la Kana pa ihi rai Galilea, do pa ni do ngaddi No ta pebhari eloko ta jadhi ei-ago. Pa rae do napoanne do era heddau pegawe mone pereda, do ne ana no do era do paddha pa Kapernaum.

⁴⁷Ta rangngi no ta do bhale ke Yesus la Kana pa ihi rai Galilea, ta kako ke no langa Yesus, ta la ame Yesus ta kako la Kapernaum, ta la peie ne ana no do era pa dhara ta mate ta happo henga ke.

⁴⁸Ta lii ke Yesus pa pegawe do naanne, ”Ki do dho ngaddi dae mu lua madalae, adho dae mu do parahajha.”

⁴⁹Ta bhale ke ri pegawe do naanne, ”Muri marri-ai we ne kako nga do dho made dae ne ana ya ne.”

⁵⁰Ta bhale ke ri Yesus pa no, ”Bhale we au, nnai ke do ie ne ana au ne.” Ta parahajha ke ne ddau do naanne pa lii Yesus ne, moko ta bhale ke no.

⁵¹Pa telora rujhara ne ddau do naanne, ta dakka ke ne naannu-naannu no la pika pa no, ”Muri, ie ke ne Ana Muri ne.”

⁵²Moko ta kebhali ke ne ddau do naanne pa naannu no he, ta wabba henga ne jhari ta ie ne ana no ne. Ta bhale ke ri ro, ”Midha ne, era ma ta pa wabba ahhi he, ne ie no ngati emo ne.”

⁵³Moko ta henge ke ri ama naiki do naanne ta do pa awe do mina harre lema ke ne lii Yesus pa no, ”Ie ke ne ana au ne.” Moko ta parahajha ke no nga hari-hari ana-oha no he pa Yesus.

⁵⁴Na anne ke ne lua madalae do kedhue, ne do tao ri Yesus pa Galilea ta dhai No ta dakka ngati Yudea.