Read Sabu YOHANES 7 Bible Online

YOHANES 7 - Sabu bible

YOHANES 7

¹Ta alla pemina harre ta bela ta lappa ke Yesus la hebhakka-bhakka pa Galilea. Wae dho ke No ta kako la Yudea, rowi ne mone pereda do Yahudi he do nga lua pedabbho ta pemade No.

² Pa do naanne do umu ke ne lodho nga'a kewahhu Leowa Ngati Ruajhu.

³Moko ta lii ke ne tuahhu Yesus he pa Yesus, ”Pekaddhi we Au ngati dhe, jhe kako we la Yudea, mita ie ne ana hekola Au he ta ngadde ne lua jhagga Au.

⁴Bhule dho ddau do ta pewune ne lua jhagga no, ki do ddhei ma no ta jadhi ddau do ketoo ngara. Kinga tao ri Au ne lai-lai do mina harre, do jhamma ke ta toi ri hari hewue raiwawa dhe!” (

⁵Rowi tuahhu ne tuahhu No he adho lema do parahajha pa No).

⁶Ta bhale ke ri Yesus pa ro, ”Dhai de dho ne awe tu ya, tapulara kinga tu mu awe do nami we, do ta jadhi he we.”

⁷Bhule dho ne rujhara tu raiwawa do na dhe ta pepana dhara nga, rowi do jhajhi wari ke ne peteleo ri Ya ta do woapa ne wui ai-wui tao no.

⁸Kako we mu ma miha la lua nga'a kewahhu do naanne, wae dho Ya ta kako, rowi ddhai de dho ne awe tu Ya ta kako la ni.

⁹Mina harre ke ne lii Yesus pa ro he, jhe No lema ta pee ke pa Galilea.

¹⁰Ta ludu le ne tuahhu Yesus he, la lua nga'a kewahhu do naanne, ta kako le ke Yesus miha-miha la ni nga do dho ie tari heddau he.

¹¹Pa lua rame nga'a kewahhu do naanne, ta kale ke Yesus ri mone pereda do Yahudi he, jhe kere-kebhale, ”Nnai ke No pa mii ne?”

¹²Ae ke ne ddau do jhari ta pekewuru-wuru jhara lai No. Era do lii, ”Ddau do woie dhe No,” Era ri do lii, ”Adho! No do pehuli-peteballi ddau lowe ma.”

¹³Tapulara bhule dho bhani ta pedai nga peteleo-leo ne jhara lua No ne, rowi do meda'u ro penaja nga mone pereda do Yahudi he.

¹⁴Pa telora lua rame nga'a kewahhu do naanne, ta maho ke Yesus la dhara Ammu Deo, jhe jhari ta ajha ddau.

¹⁵Ta madalae ke ne mone pereda do Yahudi he, jhe lii, ”Mina ne ddau do nadhe ne nara lua mmau dhara do mina hedhe ne worawwu ae, jhe do adho ma No do ngaddi ta hekola?”

¹⁶Ta bhale ke ri Yesus, ”Ne nga ne do ajha ri Ya do na hedhe, adho liajha nagati Ya, tapulara liajha ngati No do pepue Ya dhe.

¹⁷Ddau do ddhei ta pedute ne lua ddhei Deo, do medae ma ta toi ne liajha Ya dhe ta do dakka ngati Deo, we ngati Ya miha.

¹⁸Ddau do wie liajha ngati no miha, ddau napoanne do ddhei ta kale ngara he ke. Tapulara ddau do kale ngara No do pepue ya dhe, ddau napoanne ddau do mola, adho do era nga lua pote nga appi pa no.

¹⁹Ta do adho ke Musa ma, do alla ke pewie pa mu ne lipereda-lipereda ngati Deo? Tapulara pa telora mu bhule dho ie ta heddau he do pedutu ne lipereda do na harre. Ta nga mu hakku ddhei ta pemade Ya?”

²⁰Ta bhale ke ri ddau lowe he, ”Alla ke au pewuju! Nadu ke ne do ddhei ta pemade Au?”

²¹Ta bhale ke ri Yesus, ”Titu wata hahhi lua jhagga we, ne do ta tao ri Ya pa lodho Pengaha-ihi, ta madalae dhangnge ke mu.

²² Wie ri Musa ne uku tu ta dara ngutu — maji lema ne uku napoanne, ne pa petu ne adho do dubhu Musa, ta pulara ngati ama-appu mu, nga do dho pe'e dae Musa. Taga tari do mina harre ke, ta pa lodho Pengaha-ihi lema do ddhei mu ta dara ngutu ddau.

²³ Ki do tao ma ri mu ne lai do naanne, mita do dho pehihu nga uku Musa jhara lua dara ngutu, ta nga mu hakku bubu dhara nga Ya taga tari peie ddau hari ta heddau pa lodho Pengaha-ihi?

²⁴Bhole henginga ne lii ta do hala pa ddau nga jhalli pa lai do ngadde ri namada we, tapulara do jhamma ta jhalli pa lua mola-mira.”

²⁵Ta alla pemina harre ta era ke do parri ddau ngati Yerusalem do lii, ”Adho ke ta no dhe ne ddau do pa dhara nga kale ta pemade ne?

²⁶Heleo we, ta pedai lii nga balla kattu we No pa hedhapa ddau lowe, jhe pi'a dho do era ta lii nga-nga pa No! Adho marra ke ta do toi ke ri mone pereda unu di he, ta do No ke dhe ne Duae Mone ma'i-Mone golo ne?

²⁷Tapulara we, kinga dakka ne Duae Mone ma'i-Mone golo ne, bhule dho ie ta heddau he do toi ta ngati mii ne kolo kepue No. Tapulara jhara ddau do nadhe do toi ri di ne kolo nga kepue No.”

²⁸Ta alla pemina harre, pa dhara nga ajha ddau pa dhara Ammu Deo, ta kejarre hetakka ke ne lipedai No nga lipedai do maddu, ”Hakku ne toi ri mu, nadu ke Ya dhe? Ne dakka Ya dhe, adho ngati lua ddhei Ya miha. Ya dhe, do pepue ri No ke, do nga higa ta pepue Ya, jhe do pa No ke ne jhamma di ta parahajha. Tapulara tade dho No ri mu.

²⁹Ri ya we ne do tade No, rowi Ya dhe do dakka ti nga No, jhe No ke ne do pepue Ya.”

³⁰Pa dhara awe do naanne do dhei ke ro ta kappe Yesus, tapulara bhule dho do bhani ta la ramme No, rowi do dho dhai dae ne awe ne.

³¹Ae ti telora ddau do na harre do jhari ta parahajha pa No, jhe lii, ”Kinga dakka ne Duae Mone ma'i-Mone golo ne, do nara ri ko ne No ta tao lua madalae do rihi ae ri ngati do tao ri ddau do nadhe?”

³²Do rangngi ri do Farisi he mina mii ne lipekewuru ddau lowe he ne jahara lua Yesus ne. Ri do mina harre ke, hela'u-la'u nga kattu-kattu mone tunu-menahu he, ta pepu ke ri ro do parri ddau mone jaga Ammu Deo ta la kappe Yesus.

³³Ta lii ke Yesus pa ddau lowe do pa dhara Ammu Deo he, ”Ne pa dhara hedhiki he ke Ya, ne era hela'u-la'u nga mu. Ki alla pemina harre, do ta bhale ke Ya la nga No do pepue Ya dhe.

³⁴Do ta kale Ya ri mu, tapulara nara dho ke mu ta peabu nga Ya; rowi adho mu do nara ta dhai la era do naanne, la era do era Ya ne.”

³⁵Moko ta lii ke ne mone pereda do Yahudi he, heddau pa heddau, ”Ta la mii marra ke No, hakku lii No ta do dho nara ke di ta peabu nga No? Adho marra No hino ta kako la nga do Yahudi do hhai pa rai ddau do hewala he, do pee pa telora do Yunani he, jhe ta la ajha do Yunani he?

³⁶Ne nga ke ne pedabbho lidai No; kinga kale No ri di, nara dho ke ri di ta peabu nga No? Mina harre lema, adho di do nara ta dhai la era do No ne?”

³⁷ Pa lodho pedakka rahi lua nga'a kewahhu do naanne, pa lodho do rihi mone ae ne, ta titu ke Yesus pa dhara Ammu Deo, jhe pedai lii, ”Ddau do hae koko do jhamma ke no ta dakka ma nga Ya tu ta ma nginu.

³⁸ Jhara ddau do parahajha pa Ya, do hure do bhuke pa dhara Buku Lidara-Likewahhu Deo, ’Ngati dhara ade ro do ta pegabbho ke ne mili ne eiloko do wie muri mada ne.’ ” (

³⁹Ne pedabbho Yesus do naanne, jhara lua Henga Deo, do medae ta hamme ri ddau do parahajha pa No. Rowi pa dhara awe do naanne adho do wie dae ne Henga Deo ne, rowi adho dae Yesus do pekelode ri lua made No ne.)

⁴⁰Ae ne ddau he do dhanno ne lipedai Yesus do naanne, hakku era ri telora ro do lii, ”Ddau do nadhe rae here dho ke ta do adho ri, ta Nabi do naanne!”

⁴¹Do wala he ri do lii, ”Nadhe ke ne Duae Mone ma'i-Mone golo ne!” Tapulara era lema do lii, ”Ah, ta mina-mii hakku ne Duae Mone ma'i-Mone golo ne, dakka ngati Galilea?

⁴² Pa dhara Buku Lidara-Likewahhu Deo, do era do hure do bhuke, ta do ne Duae Mone ma'i-Mone golo ne, kolo loro Daud do ta dakka ngati Betlehem, ngati rae nga kowa Daud.”

⁴³Pa pedakka ta jhari ke ne ddau do na harre ta pebhata heddau nga heddau jhara lua Yesus ne.

⁴⁴Era do ddhei ta kappe Yesus, tapulara bhule dho heddau he do la kappe No.

⁴⁵Ta dhai ta bhale ke ne Mone Jaga Ammu Deo he, do pepu ta la kappe Yesus ne; moko ta kebhali ke ne kattu-katu mone tunu-menahu he nga do Farisi he pa ro, ”Ta nga hakku do dho aggo No ri mu ma dhe?”

⁴⁶Ta bhale ke ri mone jaga do na harre, ”Wah, bhule de dho ddau do pedai lii mii No!”

⁴⁷Ta lii ke ne do Farisi he, ”Jaga ke mu hedhe ta do alla ke pepehuli ri ddau do naanne?

⁴⁸Do era ke ngati mone pereda di kiadho ngati do Farisi he do parahajha nga No?

⁴⁹Tapulara ne ddau lowe do na hedhe, adho do tada lidara Musa. Jhe ta mina mii lema ro hidhe ddau do alla ke pehammi ne lua-unu kolo taddhu.”

⁵⁰ Heddau ngati do Farisi do na harre, Nikodemus do ngaddi ta dakka la nga Yesus. Ta lii ke Nikodemus pa do Farisi do wala he,

⁵¹”Pedutu nga Uku, heddau ddau ie dho ta wole ki do adho dae do dhanno ne lilolo nga do dho pereha dae ne wui-ai wui tao no.”

⁵²Ta bhale ke ri ro pa Nikodemus, ”Adho ke ta au lema ngati Galilea? Pereha miha we ri au pa dhara Buku Lidara-Likewahhu Deo! Do ta ngadde ri au ta do dho bhule nabi do dakka ngati Galilea!” [

⁵³Ta alla pemina harre ta bhale ke ne ddau he hari-hari la ammu.