Read Sabu YOHANES 9 Bible Online

YOHANES 9 - Sabu bible

YOHANES 9

¹Pa dhara nga kako Yesus ta ngadde ke ri No heddau do bhaddu rai ti awe ta metana.

²Moko ta kebhali ke ne ana hekola Yesus he, ”Ama Guru, ta nga ne ddau do nadhe hakku metana nga bhaddu? Taga tari lubhu harro nga menyilu do tao ri no miha, we taga tari lubhu harro nga menyilu do tao ri ina nga ama no?”

³Ta bhale ke ri Yesus, ”Hakku bhaddu no, adho taga tari lubhu harro nga menyilu no, jhe adho lema taga tari lubhu harro nga menyilu ina nga ama no, tapulara mita ie ke ta ngadde ri ddau ne kuaha Deo do jhagga pa dhara ngi'u no.

⁴Pa dhara awe anni lodho ko, do jhamma ke di ta jhagga ne lua jhagga No do pepue Ya dhe. Do dhai ne awe maddha, jhe nara dho ke heddau he ta jhagga.

⁵ Nga era ko Ya pa danni raiwawa do nadhe, Ya ke ne teleo raiwawa ne.”

⁶Ta alla Yesus peli mina harre, ta penyi'o ke ri No ne ilu No la worai, jhe pehiwo ri No ne ilu No ne nga worai. Ta alla pemina harre, ta pelobe ke ri No pa namada ddau do naanne,

⁷jhe lii No, ”Kako we au la labbho ne tanga-mada au la Eilobo Siloam.” (Siloam pa lii rai di ’Ddau pepu’.) Moko ta kako ke ne ddau do naanne la labbho ne tanga-mada no ne. Ta dhai no ta bhale, ta nara ke no ta ngaddi ne nga-nga.

⁸Ne do rae do kowa no he nga ddau-ddau do ngadde no pa do uru jhara he do era ta hemata-mata ai ta ami ne nga-nga he pa ddau, ta lii ke ro hari-hari, ”Adho ke ta no ma dhe ne ddau do tima ta hemata ai ta ami ne nga-nga ne?”

⁹Era do lii, ”Tarra, no ke.” Tapulara era ri ma do lii, ”Adho, no dhe do miga ta pehela'u worawwu he we ddau do naanne.” Tapulara ta lii ke ne ddau do naanne ma miha, ”Do tarra ke ta Ya ke Ya ke dhe no.”

¹⁰Ta kebhali ke ro pa ddau no naanne, ”Mina mii ne jadhi, hakku nara au ta ngaddi wari?”

¹¹Ta bhale ke ri ddau do naanne, ”Ri ddau do ne ngara No Yesus, do pehiwo lubhu hudi, jhe pelobe ma namada ya, jhe lii pa ya, ’Kako au la labbho ne tanga mada au la Eilobo Siloam.’ Moko ta kako ke ya. Pa dhara nga labbho ri ya ne tanga mada ya ne, ta nara ke ya ta ngaddi ne nga-nga.”

¹²Ta kebhali ke ro, ”Nnai ke la mii ne ddau do naanne?” Bhale ri no, ”Toi dho ke ri ya ta nnai pa mii-mii ri No.”

¹³Ne lodho pehiwu worai ne Yesus nga ilu ne, do lakka pa lodho Pengaha-ihi. Ta aggo ke ne ddau do naanne ri ddau he la nga do Farisi he.

¹⁵Ta kebhale ke ri do Farisi he pa ddau do naanne, mina mii ne loro jhara hakku nara no ta ngaddi ne nga-nga. Ta bhale ke ri ddau do naanne, ”Tao ri wolubhu ri No pa na mada ya, jhe labbho ri ya ri ei, moko ta ngaddi he ke ya.”

¹⁶Ta lii ke do parri ngati do Farisi he, ”Do teleo ke ddau do tao lai do naanne ta adho ddau do ngati Deo, rowi adho No do pedhuli nga lodho Pengaha-ihi.” Tapulara lii do wala he ri, ”Mina mii ne jadhi, ddau do nga lubhu harro nga menyilu ne nara ta tao lua madalae-lua madalae do mina hedhe?” Moko ta jadhi lua pehihu pa telora ro.

¹⁷Moko ta kebhali ke ne do Farisi he pa ddau do naanne ri, ”Mina mii pa pe nge au ne jhara lua ddau do peie au ne, hakku nara au ta ngaddi?” Bhale ri ddau do naanne, ”Nabi No.”

¹⁸Tapulara wae dho ta parahajha ne kattu do Yahudi he, ta do ne ddau do naanne do bhaddu tarra pa uru jhara he, tapulara pa dhara awe nadhe do nara ke ta ngaddi wari. Ri do mina harre ke, ta pedoa ke ri ro ne ina nga ama ddau do naanne,

¹⁹jhe kebhali pa ro, ”Do tarra ke ne ana mu dhe ta do bhaddu rai ti awe ta metana? Mina mii no ne nara ta ngaddi ri pa dhara awe nadhe?”

²⁰Ta bhale ke ri ina nga ama ddau do naanne, ”Do tarra, ta no dhe ana jhi jhe do bhaddu tarra no rai ti awe metana.

²¹Tapulara mina-mii hakku nara no ta ngaddi bhale wari pa dhara awe nadhe, toi dho ri jhi. Jhe nadu ne do peie no, toi le dho ma ri jhi. Kebhale we pa no ma miha, rowi no miha do kepai ke, do nara ke ta bhale miha ri no.”

²²Hakku lii ne ina nga ama ddau do naanne mina harre rowi do meda'u ro penaja nga mone pereda do Yahudi he; rowi do hela'u lii ke ro, ta do nadu we do ketarra ta Yesus ke ne Duae Mone ma'i-Mone golo ne, ie dho ke ta maho la dhara ammu hebhajha.

²³Taga tari do mina harre ke hakku ta lii he ke ne ina nga ama ddau do naanne, ”Do kepai ke no, kebhali we pa no ma miha.”

²⁴Moko ta pedoe ke ri ro ne ddau do naanne, jhe lii pa no, ”Dhede ko au hu pa, ta do ta pali do petu-petarra au. Ne toi ri jhi ne ddau do naanne, dau do nga lubhu harro naga menyilu.”

²⁵Moko ta bhale ke ri ddau do naanne, ”ddau do nga lubhu harro nga menyilu ko No, adho ko, toi dho ri ya. Tapulara we, hahhi lai ne do toi ri ya, do uru he, ya dhe do bhaddu, jhe pa dhara awe nadhe, do nara ke ya ta ngaddi ne nga-nga.”

²⁶Moko ta lii ri ke ro pa no, ”Ne nga ne do tao ri no pa au? Mina mii ne tao ri No hakku nara au ta ngaddi?”

²⁷Bhale ri ddau do naanne, ”Do alle ke ri ya pepedhire pa mu, tapulara wae dho ri mu ta dhanno. Ta nga hakku do dho wae ri mu ta dhanno? Wue marra mu do ddhei ta jadhi ana hekola No lema?”

²⁸Moko ta pedaddhe ke ne ddau do naanne ri ro, jhe lii pa no, ”Au ke dho ne ana hekola No; adho jhi! Jhi hedhe ana hekola Musa.

²⁹Do toi ke ri jhi ta do alla ke Deo pepedai lii nga Musa. Tapulara jhara lua ddau do nadhe, toi dho ri jhi ta dakka ngati mii No.”

³⁰Ta bhale ke ri ddau do naanne, ”Dhai madalae tarra, toi dho ma ri mu ta ti mii ne dakka No, tapulara alle ke ya pepeie ri No, hakku nara ke ya ta ngaddi.

³¹Ri ya miha do toi ke, ta Deo adho do wae ta pedhanno nga ddau do nga lubhu harro nga menyilu, titu wata nga ddau do takke pekerihe Deo we, nga do pedute ne lua ddhei No.

³²Rai tare ta era raiwawa, ngaddi de dho ta rangngi ta do era ddau do bhaddu rai ta metana do nara ta ngaddi ne nga-nga.

³³Ki do adho ma ne ddau do naanne do ngati Deo, nara dho No ta tao ne nga-nga.”

³⁴Ta bhale ke ri ro, ”Ne nga? Au dhe do tobo ri lubhu harro nga menyilu rai tare ta metana, ddhei ta ma ajha jhi ri ko ma ri au!” Moko rai ngati awe do naanne ta lii ke ro pa no ta bhole maho la dhara ammu hebhajha.

³⁵Ta rangngi Yesus ta do alle ke pehudhe ne ddau do naanne ngati ammu hebhajha. Ta kale ke ri Yesus ne ddau do naanne, jhe lii pa no, ”Parahajha au pa Ana Ddau Raiwawa?”

³⁶Ta bhale ke ri ddau do naanne, ”Nadu ke No we Muri? Rubu ko we dhara ta peke pa ya, mita ie ya parahajha pa No.”

³⁷Bhale ri Yesus pa no, ”Do ngadde ke No ma ri au. No ke do nee do pedai lii dhe nga au pa dhara awe do nadhe.”

³⁸”Parahajha ke ya, Muri,” ne ane ddau do naanne, jhe mejura no pa hedhapa Yesus.

³⁹Ta lii ke Yesus, ”Ne dakka Ya ma danni raiwawa do nadhe, tu ta ma pehappo hala ke, mita ie ddau do bhaddu nara ta ngaddi, jhe ddau do ngaddi jadhi ta do bhaddu.”

⁴⁰Do parri ddau do Farisi do era paanne do dhanno ta do lii mina harre Yesus, moko ta kebhali ke ro pa Yesus, ”Ne pedabbho Au, ta jhi hedhe do bhaddu lema ke?”

⁴¹Ta bhale ke ri Yesus, ”Kita do petu mu ta do bhaddu, moko bhule dho ke mu nga lubhu harro nga menyilu. Tapulara rowi do lii ma mu, ’Do ngaddi ma jhi’ na panne ne pa petu ne do pa dhara lubhu harro nga menyilu ke mu.”