Read Sabu LUA RASUL-RASUL 10 Bible Online

LUA RASUL-RASUL 10 - Sabu bible

LUA RASUL-RASUL 10

¹Pa Kaisarea do era heddau momone ne ngara no Kornelius. No heddau kapatei ”Horodhadhu Italia”.

²No heddau do meda'u ri Deo nga hari-hari ddau do era pa dhara ammu nga kemali no, do wie hu nga mejura pa Deo. Do ae ke no ne ruba dhara nga do Yahudi do kehia he, jhe do loro-loro ke no ne hebhajha pa Deo.

³Pa dhara helodho, era ma pa wabba tallu maddha lodho ne, ta ngadde ke ri Kornelius nga teleo-leo pa dhara hahhi lainii, heddau naju Deo do dakka jhe la pedoe no, ”Kornelius!”

⁴Ta ketarre ke ri Kornelius ne naju Deo do naanne, jhe meda'u, jhe lii no, ”Ta era nga'a Tuan?” Ta bhale ke ri naju Deo ne, ”Ne lihebhajha au nga lua ruba dhara do tao ri au he, alla ke pehammi ri Deo, jhe do henge au ri Deo.

⁵Pepu we ri au pa dhara awe nadhe ne ddau la Yope, la pedoe heddau ne ngara no Simon, do ne ngara-merai ne Simon Petrus.

⁶Nanne do pee taha no pa ammu heddau mone pelumu kuri ne ngara no Simon do pee pa tabbi dahi-ae ne.”

⁷Ta ludu le ne naju Deo do pe dai lii nga Kornelius ne, ta pedoa ke ri Kornelius do dhue ddau naannu nga he ddau do horodhadhu mone jage no, do henarru ne muri mada no.

⁸Ta pedhire ke ri Kornelius pa ro ne nga ne do alla pejadhi ne, ta alla pemina harre ta pepu ke ro la Yope.

⁹Bhale ma jhammi-ae he, pa loro jhara kako ko ro, jhe do hedharra ke ro la Yope, ta ha'e Petrus la dhida ammu ne tu ta la hebhajha.

¹⁰Ta menganga do pehilo-wole ke no, jhe do ddhei ta nga'a ke no. Pa dhara nga pemoko ko ne nga'a he ta pengadde ke pa Petrus hahhi lai nii.

¹¹Ta ngadde ke ri no, liru era ke do boka-anni, jhe era hahhi do mii bhalla do balla he do pedhule ma raiwawa, jhe do akke pa hari appa tebuku.

¹²Pa dhara bhalla do naanne do era hari-hari worawwu bhada do laa kae, hari-hari bhada do rodho ri kabu nga doli la do mellai.

¹³Moko ta era ke ne lipedai do lii pa no, ”Petrus, kaddhi weau! Kehabbha we jhe nga'a we!”

¹⁴Ta bhale ke ri Petrus, ”Adho Muri eeh! Ngaddi de dho ya ta nga'a ie ta ne nga we ne do petaru kiadho do dho pejhamma.”

¹⁵Tapulara ta lii ri ke ne lipedai do naanne pa no, ”Ne nga ne do peteleo ri Deo ta do ie ta nga'a, bhole ege ri au ta do petaru ri.”

¹⁶Ne lai nii do naanne ta kebhale ke tade tallu wari, ta alla pemina harre moko ta dhede ke ne bhalla do naanne la era do mmau do megala.

¹⁷Ta bhingu ke Petrus ne penge ne nga ne lua pedabbho ngati lai nii do napoanne. Pa dhara nga penge-nge ko ri Petrus, ta dhai le ke ne ddau pepu Kornelius he. Era ke ro do titu pa ubha kelae ammu Simon ne.

¹⁸Moko ta pedoa ddau ke ro jhe kebhali, ”Era we adho pa dhe, heddau tamu do ta pee taha he we pa dhe, ne ngara no Simon Petrus?”

¹⁹Pa dhara nga petadi ko Petrus ne penge ne lua pedabbho lau nii do naanne ta lii ke Henga Deo pa Petrus, ”Wo Petrus, hee do tallu ddau ta ma kale au.

²⁰Henginga we au ne kaddhi jhe puru la dha'i ni dhe, jhe bhole kepapi ne la pedutu ro, rowi Ya ke ne do pepu ro.”

²¹Moko ta puru ke Petrus la dha'i ne, jhe lii pa ddau-ddau do na harre, ”Ya ke ne do kale ri tuahhu he. Ta ma mii tuahhu he?”

²²Ta bhale ke ri ro, ”Pepu ri Kapatei Kornelius ta mai ma dhe. No heddau do woie nga do meda'u ri Deo, jhe hari lema do dhai takke pekerihe no ri hari hari do Yahudi. Heddau naju Deo do alla peli pa no, ta ma ame ama ta kako la ammu no, mii libhale ngati lihebhajha no, do alla ke peli pa no ta dhanno ne nga ne do medae ama ta lii pa no.”

²³Moko ta lii ke Petrus pa ro ta maho ko tu ta bba'i ko ro pa maddha do naanne. Bhale ma jhammi-ae he, ta kaddhi ke Petrus jhe kako penau nga ro hela'u-la'u. Do parri ddau do parahajha pa Yope do pedutu hela'u le nga ro.

²⁴Bhale ma helodho ti naanne jhe itu dhai ro la Kaisarea. Pa ni do lore ke pemata ri Kornelius nga a'a-ari no he, mina harre lema ri ihi anga-ihi anga ddhei no he do alla le ke pepedoa ri no.

²⁵Ta dhai Petrus, ta kako ke Kornelius la hapo no, jhe la mejura pa hedhapa no.

²⁶Tapulara ta happe dhangnge ke no ri Petrus, jhe lii pa no, ”Kaddhi we au! Ya lema miha ddau raiwawa.”

²⁷Pa dhara nga pedai lii ko Kornelius, ta maho ke Petrus la dhara ammu ne. Ta ngaddi ke ri Petrus do ae ddau ke paanne do peteni.

²⁸Moko ta lii ke Petrus pa ro, ”Do toi ke ri tuahhu-tuahhu he miha, ta do adho do ie do Yahudi ta peabu kiadho ta pedu nga ddau do wala rai pedutu nga aigama Yahudi. Tapulara ri Deo miha do alle ke pepedhelo pa ya ta do adho ya do ie ta ege ie ta heddau he ta do peluri, kiadho ta do dho pejhamma.

²⁹Taga ri do mina harre ke hakku ta ame ya ri tuan ta mai ma dhe, bhule dho ya nga lua pelabba-anni. Hakku pa dhara awe nadhe, do ddhei ke ri ya ta toi, ta nga hakku ame ya ta mai ma dhe.”

³⁰Ta bhale ke ri Kornelius, ”Pa tallu lodho do ludu, era le ma mii pa dhara do mina hedhe, do pa dhara awe nga hebhajha ya pa ammu dhe, pa wabba tallu maddha lodho he, ta harra hewakka ke heddau momone do titu pa hedhapa ya. Ne bhara pake no do weo do kana.

³¹Ta lii ke no pa ya, ’Kornelius! Do hamme ke ri Deo ne lihebhajha au jhe do henge ke ri No ne lua ruba dhara au.

³²Hakku pepu we ddau ri au la Yope, la pedoe heddau ne ngara no Simon Petrus. No nnai do pee pa dhara hemelila he we pa ammu Simon mone pelumu kuri ne, ne ammu no do pa tabbi dahi.’

³³Ri do mina harre ke hakku ta pepu dhangnge ke ri ya ne ddau do la pedoe Tuan he. Jhe Tuan do dhai tarra ne woie ade tu ta dakka ma dhe. Pa dhara awe nadhe, hee ke jhi do peteni pa hedhapa Deo tu ta dhanno hari hari ne nga ne do lii Deo pa Tuan tu ta pedhae pa jhi.”

³⁴ Moko ta lii ke Petrus, ”Pa dhara awe nadhe toi tarra-tarra ke ri ya, ta do ri Deo do tao pehela'u we hari-hari ddau.

³⁵Ddau do meda'u pa Deo nga do tao lua mola nga mira, ddau do mina harre ke ne do hammi ri Deo, jhe pedhuli dho No ta ddau rai nami we.

³⁶Do toi ke ri tuahhu he ne ihi lipika do ngati Deo ne, do pedhae pa do Israel he. Ne lii do naanne jhara lua pedhuri-pemira do pelake jhara Yesus Kristus ne, do Muri ri hari-hari ddau.

³⁷Do toi ke ri mu ne nga ne do alla pejadhi pa hari hewue Yudea, do jhari rai ngati Galilea ta moko ne pejhiu do lii ri Yohanes ne.

³⁸Do toi ke ri mu ta do alle ke pepidhe ri Deo, Yesus Kristus do Nazaret ne, jhe do wie ke pa No ne Henga Deo do nga kuaha ne. Do toi ke ri mu ma, ta do Yesus do kako la hebhakka-bhakka tu ta la tao lua ie, perie ri No hari-hari do wujhu, rowi Deo ne do penau pelere nga No.

³⁹Do ngadde ri namada ke ri jhi, hari-hari ne do tao ri No pa ihi rai do Yahudi nga pa Yerusalem. Maji le ma ta mina harre, alle ke ri ro peketoe peabbha-rappa jhe pemade No.

⁴⁰Tapulara pa lodho do ketallu ne, alle ke No pepemure bhale wari ri Deo ngati dhara made mada, jhe pengadde No pa ddau-raiwawa

⁴¹adho pa hari-hari ddau, titu wata ke pa jhi he we do alla ke pepidhi uru-jhara ri Deo, tu ta jadhi hakahi-hakahi No: Jhi do nga'a-nginu hela'u-la'u nga No, ta alle No pepemure bhale wari ngati lua made mada ne.

⁴²Jhe pepu jhi ri No ta la pepeke ne Li Hagha Dhara do naanne pa ddau he, jhe peteleo ta do No ke ne do alle pepedhede ri Deo ta jadhi Mone Happo hala ddau do muri nga do alla pemade.

⁴³Ri hari-hari nabi do pedae ke ne jhara lua No. Ne lii ro, hari-hari ddau do parahajha pa Yesus, domedae ta pehai-pehuba ne lubhu harro nga menyilu ro ri kuaha ngati Yesus.”

⁴⁴Pa dhara nga pedai lii ko Petrus, ta puru ke Henga Deo jhe la helibhu hari-hari ne ddau do dhanno ne lii do naanne.

⁴⁵Ne do Yahudi do parahajha do pedute Petrus ngati Yope he, ta madalae ke ro hari-hari ta ngadde ri ro ta do wie le ri Deo ne Henga No pa ddau do wala rai do adho do Yahudi.

⁴⁶Rowi do rangngi ke ri ro ne ddau-ddau do naharre do pedai lii pa dhara heworawwu-heworawwu lipedai, jhe wue waje ne lua dhida nga ketutu Deo ne. Moko ta lii ke Petrus,

⁴⁷”Hakku ko ta heleo ri mu, ne ddau-ddau do na hedhe do nara lema ke Henga Deo hela'u mii di lema. Hakku nara ko ma ke ddau ta pelabba-labba-anni tu ta pejhiu ri eiloko?”

⁴⁸Moko ta lii ke Petrus ta pejhiu ro pa dhara ngara Yesus Kristus. Ta alla pemina harre ta ame ke Petrus ta pee ko nga ro, pa dhara parri lodho he.