Read Sabu LUA RASUL-RASUL 11 Bible Online

LUA RASUL-RASUL 11 - Sabu bible

LUA RASUL-RASUL 11

¹Rasul-rasul he nga ddau-ddau do parahajha he pa hari hewue Yudea do rangngi ke ta do ne ddau-ddau do adho do aigama Yahudi he, do hamme le ke ne lipedai Deo ne.

²Ta dhai ta kako ke Petrus la Yerusalem, ta kare ke no ri ddau-ddau do parahajha he. Ta lii ke ro pa Petrus,

³”Ta nga au hakku la ammu ddau dho dara ngutu? Rihi ri ti naanne, la nga'a ri ko au hela'u-la'u nga ro!”

⁴Rowi do mina harre ke ta peteleo ke ri Petrus,

⁵”Pa dhara nga hebhajha ya pa Yope, ta ngadde ke ri ya pa dhara lii nii. Ne do ngadde ri ya ne, ta era ke mii bhalla do balla he do pepure ngati liru, do akke pa hari appa tebuku, jhe pengaha pa hedhapa ya.

⁶Ta dhai ta heleo ri ya la dhara bhalla do naanne, ta ngaddi ke ya ne bhada-bhada do appa laa kae, bhada-bhada do mellai, do rodho ri kabu nga do lila do mellai.

⁷Moko ta rangnge ke ri ya ne hahhi lipedai do lii pa ya, ’Kaddhi we au! Petrus Kehabbha we jhe nga'a we!’

⁸Tapulara ta bhale ke ri ya, ’Adho, Muri! Ngaddi dho ya ta nga'a do petaru kiadho do dho jhamma.’

⁹Tapulara ta lii ri ke ne lipedai do naanne ngati liru pa ya, ’Bhara do peteleo ke ri Deo ta do ie, bhole kire ri ta petaru.’

¹⁰Tade tallu wari ne ngadde ri ya ne lai do naanne jhe pa pedakka hari-hari ne do na harre ta dhede bhale wari ke la era do mmau do megala.

¹¹Pa dhara awe naanne lema ta dhai ke ne do tallu ddau do ngati Kaisarea, he la ammu do pee ri ya ne.

¹²Moko ta pepue ke ya ri Henga Deo ta kako hela'u la'u nga ro, jhe bhole era ne lua keba'a-kepapi ri. Hari do anna ne tuahhu do na hedhe do pedutu le ma nga la Kaisarea, jhe maho jhi hari-hari la ammu Kornelius.

¹³Ta alla pemina harre ta pedhire ke ri Kornelius pa jhi, mina mii ne ngadde ri no heddau naju Deo do titu pa ammu no jhe lii, ’Pepu we ri au ne ddau la Yope, la pedoe heddau momone ne ngara no Simon Petrus.

¹⁴Do medae ke ta pedhae ri no pa mu ne lii do wie ne lua helama tona ie ne au nga ana-oha au.’

¹⁵Jhe pa dhara pedhae ri ya mina harre,” ne peterue ri Petrus ne lipedhiri no, ”Ta dakka ke ne Henga Deo la wokolo ro, hela'u lema mii do jadhi pa di do uru he.

¹⁶ Moko ta henge ke ri ya, do ngaddi ta lii Muri, ’Yohanes pejhiu ri eiloko he we, tapulara mu do medae ta pejhiu ri Henga Deo.’

¹⁷Hakku teleo ke ta do wie lema ri Deo pa ddau-ddau do adho do aigama Yahudi he, ne lai do hela'u nga do wie pa di pa awe ta parahajha he di pa Muri Yesus Kristus. Rowi do mina harre ke mina mii ke ne nara ta labbe Deo!”

¹⁸Ta rangnge ri ro mina harre, ta pengaha ke ro ne pebhata ri. Moko ta wue-waje ke ri ro Deo. Ta lii ke ro, ”Kido mina harre ke, ddau-ddau do adho do Yahudi lema do wie ke ri Deo ne awe tu jharra ngati lubhu harro nga menyilu ro, jhe henate ne muri mada do petu ne!”

¹⁹ Ta alle Stefanus pepemade, ta jhari ke ta hudhi ta peraga ne ddau-ddau do parahajha he, hakku ta menyabbha ke ro la hebhakka-bhakka. Era do perai hape la Fenisia, era wari do dhai hape la Siprus nga Antiokia. Ta pepeke ke ri ro ne lii do ngati Deo ne wata ke pa do Yahudi we.

²⁰Tapulara ngati ddau-ddau do parahajha he, do ngati Siprus nga Kirene, era lema do kako la Antiokia, jhe pepeke ne Li Hegha Dhara jhara lua Yesus ne pa ddau-ddau do adho do aigama Yahudi he lema.

²¹Ne kuaha Muri do era pa ro lema, hakku ae do parahajha jhe jhula-anni pa Muri.

²²Ne lipedhiri-lipedhiri jhara lai-lai do na hedhe ta rangngi le ke ri Jemaat pa Yerusalem. Moko ta pepue ke ri ro Barnabas la Antiokhia.

²³Ta dhai Barnabas la ni, jhe ngadde ri no mina mii Deo ne ddhei nga ddau-ddau he, dhai mengallu dhara no. Moko ta ami ke ri no ta petarra ne halla-anni pa Muri nga hewue nge danni-ade.

²⁴Barnabas dhe ddau do dhai woie penge danni ade nga do tobo ri Henga Deo, jhe hari lema do dhai parahajha pa Muri hakku ae ddau ne do pedute Muri.

²⁵Ta alla pemina harre ta kako ke Barnabas la Tarsus ta la kale Saulus.

²⁶Ta peabu no nga Saulus, ta aggo ke ri no Saulus la Antiokhia, jhe tobo ta hewue ttau ro ne pekupu nga jemaat pa ni nga ajha do ae ddau. Pa Antiokhia ke ne ddau-ddau do parahajha he, pa petari-tari ne pali ta do Herani.

²⁷Pa dhara awe naanne ta era ke do parri ddau do dakka ngati Yerusalem la Antiokhia.

²⁸ Pa telora ro do na harre era heddau ne ngara no Agabus. Taga ri lipedidi Henga Deo, ta pedara ke no, ta do ta era lua menganga rai do dhai tarra ne hedui pa hari hewue raiwawa. (Jhe tarra ne lai do nadhe ja dhi pa awe pereda Kehe Klaudius.)

²⁹Moko hari-hari ne ddau do parahajha pa Yesus he, ta pehela'u-lii ke ro ta moa lua ruba ddara tu tuahhu-tuahhu do pa Yudea he, moa ro heddau-heddau pedutu nga mina mii ne do dhae ri ro miha.

³⁰Ne lai lua pehela'u lii ro do naanne ta pekako ke ri ro, moko ta pepu ke ri ro Barnabas nga Saulus tu ta la pengaddu ne lua ruba dhara ro do na harre pa kattu-kattu jemaat he.