Read Sabu LUA RASUL-RASUL 18 Bible Online

LUA RASUL-RASUL 18 - Sabu bible

LUA RASUL-RASUL 18

¹Ta alla pemina harre ta langnga ke Paulus ti Atena jhe kako la Korintus.

²Pa ni ta peabu ke no nga heddau do Yahudi ne ngara no Akwila, ddau ngati rai Pontus. Akwila ta itu ko we ta dakka ngati Italia hela'u-la'u nga ihi-ammu no Priskila. Hakku dakka ro la Korintus taga ta ri lii Kehe Kladius do lii pa hari-hari do Yahudi ta mahhu-anni ngati Roma. Ta la he ahu ke ro hari do dhue ri Paulus,

³jhe pee no pa ni nga ro jhe jhagga hela'u-la'u nga ro, rowi ne lua jhagga ro do hela'u we nga Paulus, jhagga ammu bhalla-lai.

⁴Tapulara hadhi dhai la lodho Penga-ihi, kako Paulus la padai lii la ammu hebhajha, mita ie ne do Yahudi he mina harre lema ne do Yunani he ta parahajha pa Yesus.

⁵Ta dhai Silasnga Timotius ngati Makedonia, ta pake ke ri Paulus hari-hari ne awe no ta pepeke ne lii do ngati Deo ne pa do Yahudi he, ta do Yesus ke ne Duae Mone-mai Mone-golo do jaje ri Deo ne.

⁶Tapulara rowi do pee ma ne ddau he nga pebhata jhe kare-menihe Paulus, moko ta latte ke ri Paulus ne awu ngati bhara pake no mii hahhi tada tu ta pehewina ro jhara lua hala ro. Ta lii ke no, ”Kinga nappi mu ri lua apa nga kerewe, napoanna hala mu ma miha! Ta golo-ai ke ya! Jhari ngati dhara awe nadhe, do medae ke ya ta kako la nga ddau-ddau do adho do Yahudi.”

⁷Moko ta hani ke ro ri Paulus jhe kako la pee pa ammu do pa hebhakka ngati ammu hebhajha ne. Ne ammu do naanne ammu heddau do adho do Yahudi, tapulara do wie hu nga mejura pa Deo. Ne ngara ddau do naanne Titius Yustus.

⁸Tapulara Krispus, kattu ammu hebhajha do naanne nga hari-hari ana-oha no do parahajha ke pa Yesus. Jhe ae ri ke ne do Korintus do hewala he do dhanno ne lii do pedhae ri Paulus ne, jhe do parahajha ke ro pa Yesus moko ta pejhiu he ke ro.

⁹Herammi pa dhara hahhi lai nii, ta lii ke Muri pa Paulus, ”Bhole meda'u! Pedae teru we ri au, jhe bhole pehangngo-anni.

¹⁰Rowi do era ma Ya do penau-pelere nga au. Bhule dho heddau he do nara ta tao lua apa penaja nga au, rowi ae ne ddau pa rae do nadhe do ddau-ddau ri Ya.”

¹¹Rowi do mina harre ke ta pee ke Paulus hewue ttau hebhakka ne tui jhe ajha ri no pa ro ne lipedai Deo ne.

¹²Pa awe Galio ne do jadhi ta gubernur pa Akhaya, ta pehela'u lii ke ne do Yahudi he ta pelawa nga Paulus, jhe aggo ri ro Paulus la era happo kewallu.

¹³Ta pemaho ke ro likela do mina hedhe, ”Ne ddau do nadhe do peli nga ddau lowe mita wie hu nga mejura pa Deo nga pake ne loro jhara do wala ngati lii do dare ri Musa!”

¹⁴Ta mina harre ta ddhei ta bhale ri Paulus ne lii ro do naanne, alla dhangnge ke Galio pe li pa do Yahudi he, ”Wo ddau-ddau do Yahudi! Kita ne lii kela mu do nadhe ta hahhi lua hihu nga pagga kiadho hahhi lua tao apa, do jhamma ma ri ya ta dhanno nga woie.

¹⁵Tapulara nadhe hahhi lua pebhata jhara lipedai-lipedai nga ngara-ngara nga jhara uku-uku mu ma miha! Hakku do jhamma ta pemoko ri mu ma miha. Wae dho ya ta pereha ne lai-lai do mina hedhe!”

¹⁶Moko ta hudhi ke ro la tele ri Galio.

¹⁷Moko ta kappe ke ri ro Sostenes, kattu ammu hebhajha ne, jhe wabbe no pa hedhapa meja era happo ke wallu ne. Tapulara wae tu-tu dho Galio ta pedhuli nga lai do naanne.

¹⁸ Alla penaanne, tui ko Paulus ne pee pa Korintus. Ta alla pemina harre ta pelangu ke Paulus nga ddau-ddau do parahajha do pa Korintus he, jhe pekaddhi hela'u-la'u nga Priskila nga Akwila la Siria. Pa Kengkrea ta peghuti rukattu ke Paulus rowi do alle ke pehane pemedera ri no, pedute nga lipejaji no nga Muri.

¹⁹Ta dhai no la Efesus, ta hani ke Priskila nga Akwila ri Paulus, jhe maho no la dhara ammu hebhajha, ta pehuru penge ke no nga do Yahudi he paanne.

²⁰Ta ame ri ro Paulus ta pee petui ko nga ro, tapulara wae dho Paulus.

²¹Maji lema ta mina harre pa awe ta pekaddhi ne no, ta lii ke no, ”Kinga ruba ko dhara Muri, do medae ri ma ya ta bhale ma dhe.” Ta alla pemina harre ta pekaddhi ke no ngati Efesus.

²²Ta alla Paulus pepuru pa Kaisarea, ta kako ke no la Yerusalem tu ta la pelangu nga jemaat pa ni, jhe teru no la Antiokhia.

²³Rihi dho ne tui pa ni, ta pekaddhi ri ke no la heahu ihi rai Galatia nga Frigia tu ta la perui ne lua manno nga kaho ngati ddau do parahajha he.

²⁴Pa dhara awe naanne lema ta dakka ke la Efesus heddau do Yahudi do metana pa Aleksandria, ne ngara no Apolos. Do dhai i'a pedai lii no nga do dhai mami no pa Buku Lidara-Likewahhu Deo,

²⁵do alla ke no pehekola tu ta tada jhara lua Yesus. Moko nga dhai mengallu nge kehaka dhara ne ajha ri no nga dhai woie ne jhara lua Yesus, maji lema ta wata jhara lua pejhiu Yohanes we ne do toi ri no.

²⁶Nga bhano dhallu Apolos ne jhari ta pedai lii pa ammu hebhajha, nga pa awe dhanno ri Priskila nga Akwila ne liajha no, ta aggo ke Apolos ri ro la ammu ro. Pa ni ta pejhare ke ri ro pa Apolos nga rihi wo ie ri, ne jhara lua pedabbho Deo tu ta wie ne lua helama tona ie ne, do pela ke jhara Yesus tu ddau raiwawa.

²⁷Ta dhai ta era ne lua ddhei Apolos ta pe kaddhi la Akhaya. Moko ne ddau-ddau do parahajha he pa Yesus, do pa Efesus he ta bhuki huri ke tu tuahhu-tuahhu do parahajha pa Akhaya, mita ie ro ta hamme Apolos. Ta dhai Apolos la Akhaya, do dhai woie tarra ne lua ruba dhara no penaja nga ddau-ddau do ri lua ruba dhara Deo, alla ke ro pe parahajha pa Yesus.

²⁸Rowi do nga dhai pekeparru-anni tarra ne pejharra ri Apolos ne do Yahudi he pa dhara lua pebhata pa hedhapa ddau lowe. Jhe peteleo ri Apolos nga pake ne lilolo-lilolo ngati Buku Lidara-Likewahhu Deo ta do tarra ta Yesus ke ne Duae Mone-ma'i Mone-golo ne.