Read Sabu LUA RASUL-RASUL 2 Bible Online

LUA RASUL-RASUL 2 - Sabu bible

LUA RASUL-RASUL 2

¹ Ta dhai le la lodho Pentakosta ne, ta peteni ke hari-hari ne ddau do pa rahajha he pa hahhi era.

²Ta harra hewakka ke ne likedu mii likedu raga nga opo he ngati liru jhe la herimo ne ammu do mejaddhi ro ne.

³Moko ta ngaddi ke ri ro do mii huu kolo weo ai he do kehabha la hebhakka-bhakka jhe la kajji pa wokolo ro heddau-heddau.

⁴Moko ta tobo ke ro hari-hari ri Henga Deo, jhe jhari ro ta pedai lii pa dhara heworawwu-heworawwu lipedai. Pedai ro pedutu nga mina mii ne lii Henga ne pa ro ta pali.

⁵Pa awe do naanne ae ne do Yahudi, ngati hari hewue raiwawa, do pee pa Yerusalem. Ne ddau-ddau do na harre, ddau do pedute ne lipedai Deo.

⁶Ta dhai ta rangngi ri ro ne likedu do naanne, dhai ae ne ddau he do dakka la peworo. Ta kebhaddi ke ro hari-hari ne dhanno ne lipedai ddau do parahajha he, do pali pa dhara lipedai ro heddau-heddau.

⁷Nga madalae, jhe pee ro nga penina ne dhanno, ”ta lii ke ro, ddau-ddau do pedai lii do na hedhe, do Galilea hari we adho?

⁸Ta mina mii ne jadhi hakku rangngi ri di, ro do pedai lii pa dhara lii rai di miha?

⁹Di hedhe ddau-ddau ngati Partia, Media, Elam, ngati Mesopotamia, Yudea, Kapadokia, ngati Pontus nga Asia.

¹⁰Ngati Frigia nga Pamfilia, ngati Mesir ngati ihi rai-ihi rai Libia do peumu nga Kirene; era do dakka ngati Roma,

¹¹era ddau-ddau do Yahudi jhe era lema ddau-ddau do wa la rai, do maho aigama Yahudi, era lema do dakka ngati Kreta nga Arab. Rangi ri di, ro hari-hari do pedai lii pa dhara lii rai di miha-miha, jhara lai-lai do madalae do tao ri Deo!”

¹²Nga madale jhe nga henganga ne ubha he ta pekebhali ke ro heddau nga heddau, ”Ne nga ke ne pa petu ne na hedhe?”

¹³Tapulara era ri ma ne ddau he do kara, jhe lii, ”Ah, hee do mawo ro hedhe!”

¹⁴Moko ta titu ke Petrus hela'u-la'u nga do henguru heddau rasul he, jhe jhari ta pedai lii nga ddau lowe he. Nga lipedai do maddu, ta pedai lii ke no, ”Tuahhu, ddau-ddau do Yahudi, nga hari-hari do pee pa Yerusalem! Dhanno ko we pewoie-ie ri mu, rowi nee ne lai do jhamma ta peteleo ri ya pa mu.

¹⁵Ne ddau-ddau do na hedhe adho ta mawo, mii do penge ri mu, rowi awe nadhe itu ta wabba heo jhammi-ae kowe.

¹⁶Tapulara jhara lai do nadhe, do alle ke pepeke ri Deo do pelake jhara Nabi Yoël:

¹⁷ Ane Deo, ’Pa awe pedakka rahi do ta pepure ri Ya ne Henga Ya la woloko hari-hari ddau. Ana-ana mu do momone nga mobanni, do ta pepeke pa mu ne lai-lai do peke ri Ya pa ro. Ana-oha do ngarru do ta ngaddi ne lai-lai do pedhelo ri Ya pa ro. Ina-ama mu he do ta nii ne lai nii do wie ri Ya pa ro.

¹⁸Pa annu-annu Ya lema — ie ta momone lohe la mobanni — , do ta pepure ri Ya ne Henga Ya pa lodho-lodho do na harre. Do ta pepeke ri ro ne lai-lai do peke ri Ya pa ro.

¹⁹Do ta tao ri Ya ne lua-lua madalae pa dhida nidhe pa ihi liru nga lai-lai do rihi meliri dhara pa dha'i, pa raiwawa dhe; do ta era raa nga ai, buru-rai nga habbhu.

²⁰Mada lodho do ta kerabba guru-rai, warru do ta mea mii raa he nga do dho dhai dae ne Lodho Muri ne. Lodho do mone-ae nga do ketoo-kelodo ne ta dhai.

²¹Pa awe naanne ddau do peko-peka pa Muri do ta pehelama.’

²²Tuahhu-tuahhu, ddau-ddau do Israel! Dhanno ko we ne nga ne do ta pale ri ya do nadhe: Yesus do Nazaret ne, do alle ke pewie pa No ne tenge ri Deo tu tuahhu he. Ne lai do nadhe do dhai teleo ke pa lua-lua madalae nga lai-lai do rihi ngati ihi do tao ri Deo he pa telora mu do pelake jhara Yesus ne. Hari-hari ne napoharre do toi ke ri mu ma.

²³ Pedutu nga lua pedabbho No miha, alle ke pepehappo ri Deo tu ta jhole Yesus pa mu. Jhe pa dhara jhole No ke do naanne, alle ke No pepemade ri mu, rowi do hane No ri mu ta ketoe peabbha-rappa ri ddau do tao apa nga kerewe he.

²⁴ Tapulara alle ke ri Deo pepemure bhale wari No ngati telora ddau-ddau do made. Alle ke No pedalle-peho bhe ri lua made mada, tapulara gole No ri Deo, rowi ie dho lua made mada ta pereda pa No.

²⁵ Jhara Yesus do naanne ke do ngaddi Daud ta lii, ’Do ngadde ke Muri ri ya do era loro pa hedhapa ya; do era pe keraha ya, mita do dho kerattu wari ke ya ie ta ri ne nga we.

²⁶Ri do mina harre ke ne ade ya ta mengallu nge nga kehaka dhara ke ne ubha ya ta pali ke ne lii wue-waje; jhe ne ngi'u ya dhe do ta mata ke nga ketanna pa dhara ro'a raidare.

²⁷Rowi hane dho ya ri Au ta pee pa era manga ddau do made. Hane dho ri Au ne naannu au do pedhanno nga lii Au, pemae tebho-ttai, jhe ele mina harre he we.

²⁸Do pejhujhe ke ri Au ma pa ya ne loro jhara do ju la lua muri mada do ne. Ne lua mengallu nge nga kehaka dhara do dhai tarra ke ne pedabbo rowi do era Au ne do penau-pelere nga ya.’

²⁹Tuahhu-tuahhu, wie ko we ya ne awe ri mu ta pedae mola-mola ne jhara lua Daud, ama-appu di ne. Do alla ke no pemade, jhe do alle ke no pepedane; jhe ne raidare no do nee ma pa telora di lohe ma dhara awe do nadhe.

³⁰ Do alla ke Deo pepejaji nga Daud, pa dhara lipehupa, ta do heddau ti kolo loro Daud do ta dhede ri Deo ta jadhi Duae. Rowi do toi ke ri Daud ne jhara lijaji do naanne, jhe taga tari no lema heddau nabi,

³¹do toi lema ke ri no no nga ne do ta tao ri Deo. Hakku ri do mina harre ke, alla ke no pepedara ta do ne Duae Mone ma'i-Mone golo do jaje ri Deo ne, do ta muri bhale wari ngati dhara made mada. Ta lii ke Daud, ’Hane dho No ta pee loro pa dhara rae ddau-ddau do made; ne ngi'u No hane dho pemae-tebho-ttai, jhe moko ta mina harre he we.’

³²Yesus do nadhe ke ne do pemure bhale wari ri Deo ngati dhara made mada. Do ngadde ri namada miha ke ri jhi hari-hari do na hedhe, ne lai do naanne.

³³Alle ke No pedhede pa era mejaddhi do rihi dhida, jhe do wie ke pa No ne kuaha ri Deo, jhe hamme ne Henga Deo do alle pejaje ri Ama ne. Jhe ne nga ne do rangnge ri mu pa dhara awe nadhe, Henga do nanne ke, do tude ri No ma wo kolo jhi hedhe.

³⁴ Daud miha ngaddi dho ta ha'e le era do mmau do megala, tapulara alla ke No pepali, ’Ane Muri pa Muri ya; Mejaddhi we au pa hebhakka kedhanga Ya,

³⁵tade pejhunu-peru'u ri Ya ne ihi-muhu ihi lawa Au he!’

³⁶Ri do mina harre ke, do jhamma ke ta toi tarra ri hari-hari do Israel, ta Yesus do alle peketoe peabbha-rappa ne ri mu, No ke ne do alle pepejadhe ri Deo ta Muri nga Duae ma'i-Mone golo ne!”

³⁷Ta rangngi ri ddau-ddau do na harre ne lai do naanne, dhai hedui ne ade ro. Moko ta kebhali ke ro pa Petrus nga pa rasul-rasul do wala he, ”Tuahhu-tuahhu ne nga ke ne do jhamma ta tao ri jhi?”

³⁸Ta bhale ke ri Petrus, ”Jharra we mu ngati hari-hari lubhu harro nga menyilu mu. Jhe do jhamma ke mu heddau-heddau ta pejhiu pa dhara ngara Yesus Kristus, mita pehuba ne lubhu harro nga menyilu mu. Moko do ta hamme ke ri tuahhu he ne Henga Deo ne ngati Deo.

³⁹Rowi ne nga ne do jaje ri Deo ne, do tu mu ke ke nga tu ana-ana mu, mina harre lema tu ddau-ddau do era pa era do jjhau-jjhau — hari-hari ddau do pedoa ri Deo Muri di tu ta dakka la nga No.”

⁴⁰Mina harre ke ne peteleo ri Petrus pa ro. Jhe ae ri ko ne lipedai Petrus do wala he, jhe lii pa ro ta mahhu-anni ti telora ddau-ddau do tao apa nga kerewe do na hedhe, do ta wolo ri Deo hedhe.

⁴¹Ae ddau do parahajha pa ne nga ne do pale ri Petrus ne, moko ta pejhiu ke ro. Moko ne kejie ddau do parahajha he pa dhara awe do naanne ta ju ae ke pa dhara lodho do naanne jadhi ta do tallu tabbha ddau ri.

⁴²Jhe do halla-anni tarra pa hammi ne liajha rasul-rasul he, jhe era loro-loro pa dhara lua peowu-peteni hela'u-la'u. Nga'a hela'u-la'u ro, mina harre lema hebhajha hela'u-la'u ro.

⁴³Dhai ae ne lua madalae do tao ri rasul he, hakku ta madalae ke jhe meda'u hari-hari ddau.

⁴⁴ Ne ddau do parahajha he, pee ke ro nga peheujhu-headde ta jadhi hahhi, jhe ne nga we ne unu oha ro, do pake hela'u-la'u ke ri ro.

⁴⁵Pewie ri ro ne unu-oha ro, jhe ne kebhue he ta pebhagi-bhagi ke pa te lora ro pedutu nga lua paralu ro heddau-heddau.

⁴⁶Helodho-helodho era loro ro la peowu-peteni la Ammu Deo; jhe nga'a jhe nginu hela'u-la'u nga mengallu nge nga kehaka dhara jhe nga wawa nge danni ade pa ammu-ammu ro.

⁴⁷Pee loro ro nga wue-waje Deo, jhe hari-hari ddau do ddhei nga ro. Ti helodho la helodho pee nga pebhuwu-petaba ne ae ro ri Muri, ne ddau-ddau do pa dhara henate ne lua helama tona ie ne.