Read Sabu LUA RASUL-RASUL 20 Bible Online

LUA RASUL-RASUL 20 - Sabu bible

LUA RASUL-RASUL 20

¹Ta ketanna le ne lai do pa Efesus ne, ta pekupu ke ri Paulus ne do herani he, jhe perui ro ri no. Ta alla pemina harre ta pelangu ke no nga ro, jhe peterue ri no ne loro jhara kako no la Makedonia.

²Ta kako ke no la heahu ne ihi rai-ihi rai do pa Makedonia he. La heahu ri no hari-hari ne era do na harre, jhe ae ne wie ri no ne lira'a-litakka pa ddau-ddau do parahajha pa Yesus he do era pa era do naanne tu ta perui ro. Ta alla pemina harre ta kako ke no la Yunani.

³Tallu warru no ne tui pa ni. Moko pa dhara nga pemoko-moko-anni no ta pekaddhi jhara kowa la Siria, ta era ke ne lii ta do ne do Yahudi he do peli ke ta pemade no. Rowi do mina harre ke ta happo ke ri no tu ta bhale jhara Makedonia.

⁴Sopater ana Pirus do ngati Berea do penau hela'u nga no, mina harre lema Aristarkus nga Sekundus do Tesalonika ne, nga Gayus do Derbe ne. Mina harre lema Timotius, Tikhikus nga Trofimus ddau ngati ihi rai Asia he.

⁵Do uru ke ro ngati jhi, jhe la mata jhi ri ro pa Troas.

⁶Ta alla pe rame Nga'a Roti do dho bhule nga muu ne, ta pekaddhi ke jhi ngati Pilipi. Lammi lodho jhe itu dhai jhi la pekupu nga ro hela'u pa Troas. Pee jhi pa ni hewue do migu ne tui.

⁷Pa dhara maddha do ta hedhape lodho Migu ta pekupu ke jhi ta nga'a hela'u-la'u mii tuahhu he. Ta pedai-dai lii ke Paulus nga ddau he rowi bhale ma jhammi-ae ne do ddhei ta pekaddhi ke jhi. Tade dhai hape la awe telora maddha he, pee koma Paulus nga pedai lii teru.

⁸Ne era pekupu jhi he, pa dhara kama pa dhida, do ae lapu pa anne.

⁹Heddau ana momone do ngarru do era do mejaddhi pa jhanela, ne ngara no Eutikus. Ri do adho do era nga pengaha Paulus ne pedai lii, moko ta mengattu dhai ke no tade bba'i mejaddhi no pa jhanela ne. Moko ta bunu ke no la dha'i ngati jhanela bhaja tallu do naanne. Ta dhai ta la dhede ri ro era ke do made dhangnge.

¹⁰Tapulara ta puru ke Paulus la dha'i ne, jhe kedhake ri no nga bba'i pehereba-anni pa dhida ana do ngarru do naanne. Ta lii ke Paulus, ”Bhole kebhaddi, ne ko ma no do muri!”

¹¹Ta alla pemina herre ta ha'e bhale wari ke Paulus la dhida ne, jhe la pebhagi-bhagi ne roti he, jhe nga'a hela'u-la'u. Ta alla Paulus pepedai lii dhai ae, lohe la jhammi-ae he, moko ta pekaddhi ke Paulus.

¹²Ta aggo ke ri ddau he ne ana do ngarru do alla pemuri bhale wari do na anne bhale la ammu no. Dhai mengallu nge nga kehaka dhara ne ade ro.

¹³Ta kako ke jhi la kapa jhe pekaddhi uru jhara la Asos ta la mate Paulus tu ta la aggo no la kapa ne. Do alla ke ri no pepeato mina harre, rowi do ta kako jhara kolo lede no ju la ni.

¹⁴Ta peabu jhi pa Asos, ta ha'e dhangnge ke Paulus la kapa ne, jhe pekaddhi jhi la Metilene.

¹⁵Ngati ni pe kaddhi wari jhi, jhe bhale ma jhammi-ae ne ta dhai ke jhi la do penaja nga Khios. Pa nalli ne ta dhai ke jhi la Samos, jhe helodho ri ta dhai ke jhi la Miletus.

¹⁶Do alla ke pepehappo ri Paulus ta do dho hare la Efesus, mita do dho hora awe ri pa ihi rai Asia. Kita ie mudhe he, do ddhei ke no ta dhai nga henginga la Yerusalem pa lodho mone-ae Pentakosta ne.

¹⁷Ngati Miletus ta moa huri ke Paulus tu kattu-kattu ngati jemaat Efesus mii ta dakka la peabu nga no.

¹⁸Ta dhai ro, ta lii ke Paulus pa ro, ”Tuahhu do toi ke ri mu ta do mina hedhe ke ne muri mada ya nga era ko ya pa telora mu, jhari ngati lodho petari ne tade dhai ya la Asia.

¹⁹Nga wawa nge danni-ade jhe nga huti ei-namada do ae ya ne jhagga tu Muri pa telora lua hedui-herui do dhue do hape ri ya lua do woapa do perijho ri do Yahudi he.

²⁰Do toi ke ri tuahhu he ta do adho ke ya do era nga meghighi-ghighi ri ne pepeke pa mu ne nga ne do paralu tu mu. Ajha mu ri ya pa era peteni-era peteni ddau lowe nga pa ammu-ammu.

²¹Ie ta pa do Yahudi mina harre lema pa do wala rai loro-loro ne pekebhaddi ro ri ya mita ie ta jharra ngati lubhu-harro nga menyilu ro, jhe dakka ma nga Deo, mina harre lema mita parahajha ro pa Muri Yesus.

²²Pa dhara awe nadhe tu ta pedute ne lipereda Henga Deo, ta kako ke ya la Yerusalem. Jhe toi dho ri ya ta ne nga ne do ta jadhi pa ngi'u ya pa ni.

²³Wata ke ne do toi ri ya pa hewue-hewue rae, nga teleo-te leo ne peke pa ya, ta do medae ya ta maho la dhara ammu bhaddo nga do medae ya ta dhui hape lua hedui-herui.

²⁴ Tapulara pedhuli dho ya nga muri mada do nadhe, hadhi we ta nara ri ya ta pemoke ne tenge do alle pejhole ri Muri Yesus pa ya jhe hadhi we ta pee ma ya nga halla-anni tade dhai hape la pedakka rahi muri mada ya tu ta pepeke ne Li Hagha Dhara jhara lua ruba dhara Deo ne.

²⁵Bhale ke ri ya ti ma heahu tuahhu-tuahhu he hari-hari, jhe alle ke ri ya pepeke lema ne jhara mina mii Deo ne pereda mii heddau Duae. Pa dhara awe nadhe, ne pa toi ri ya, adho ke ya do medae wari ti ta peabu nga tuahhu-tuahhu he.

²⁶Rowi do mina harre ke nga dhai rui ne lii ya pa mu pa dhara lodho do nadhe, ki nga era pa telora mu do medae ta nappi ri lua apa nga ke rewe hine, napoanne adho ke hala ya ri.

²⁷Ngaddi dho ya ta perai ngati tenge ya tu ta pejhare pa mu hari-hari ne lua pedhabbho Deo ne.

²⁸Do jhamma ke ta jage ri mu ne ngi'u mu, jhe jaga lema we hari-hari ne do herani do alla pejhula ri Henga Deo pa mu tu ta jaga ri mu; rowi do alla ke mu pepidhi ta mone jaga jemaat. Do jhamma ke ta jaga ri mu ne jemaat Deo do naanne mii mone bhata, ne jaga naki'i-naki'i no, rowi do alla ke ri Deo pepejadhi ne jemaat he ta unu-oha No miha, do pelake jhara lua made Ana No miha.

²⁹Ki nga ludu ke ya do medae ta dakka ne ngaka addu-ngaka addu do bhani ma telora mu. Jhe ne ddau-ddau do jaga ri mu he do na harre do medae ta jadhi ihi-ani ngati ngaka addu do naharre ke.

³⁰Rihi ri tinaanne, ngati telora tuahhu he miha do medae ta hhau ne ddau-ddau do ta ma pepeke ne lii do dho petu. Hakku tao ri ro mina harre mita ie ke ne ddau do parahajha pa Yesus he, jadhi ri ta huli ta teballi jhe pedutu ro.

³¹Rowi do mina harre ke, jaga meniga we mu pewoie-ie! Henga we ri mu ta do tallu bhue ttau ne tui ya, jhe do ae ke ne ei-namada ya do dhute, ngaddi dho ya pengaha, ie ta anni-lodho nga anni-maddha ne ajha mu heddau-heddau.

³²Pa dhara awe nadhe ta jhula ke mu ri ya pa Deo, mita ie ke ri No ta piara-peluja mu jhe mita ie ke mu ta parru pa lii lua ruba dhara Deo we. Deo do nga higa nga kuaha ta perui mu nga do wie pa mu ne lua tarro ie nga menyarro mangngi do lore pepemoke ri No tu hari-hari annu-niki No.

³³Ngaddi de dho ya ta ddhei ta nara doi ngati mu kiadho bhara, ie ngati heddau he.

³⁴Do miha ma ke ri tuahhu he ta do ngati eikebahhu ya ma miha ne nara ta petobe ri ya ne lua paralu ya nga hari-hari ihi anga do pedute ya he.

³⁵Pa dhara hari-hari lai do pedhelo ke ri ya ne loro jhara pa mu, ta do ri lua wohe la'a rui do mina harre ke, ne jhamma di ta ruba dhara nga do keloe. Rowi do jhamma ta henge ri di ne nga ne do alle pepale ri Muri di Yesus miha do mina hedhe, ’Rihi mengallu nge nga kehaka dhara ta wie ngati ta hammi.’ ”

³⁶Ta moko le Paulus ne pedai lii, ta lakku rutu ke ro hari-hari jhe hebhajha.

³⁷Ta tangi ke ro hari-hari jhe ngape Paulus, jhe pelangu ro nga no.

³⁸Bhale ma ne do rihi pehedui ne ade ro, rowi do lii ke Paulus pa ro ta do adho ke ri ro do medae ta ngadde ri Paulus. Moko ta la pengaddo ke Paulus ri ro hape la dhara kapa.