Read Sabu LUA RASUL-RASUL 22 Bible Online

LUA RASUL-RASUL 22 - Sabu bible

LUA RASUL-RASUL 22

¹”Ama-ama nga Tuahhu-tuahhu hari-hari! Do medae ko ri ya ta peke pemole ne jhara lua ya pa mu. Dhanno we ri mu!”

²Ta dhai ta rangnge ri ro, Paulus do pedai lii pa dhara lii Ibrani, moko ta ju ketanna ke ro. Ta pe terue ke ri Paulus ne lii pedai no.

³ ”Ya dhe do Yahudi, do metana pa Tarsus pa ihi rai Kilikia, tapulara do kepai pa dhe ma ya, pa Yerusalem dhe, jhe do hammi nga woie ne liajha ngati guru mone-ae Gamaliel pa dhara lua uku do dare ri Musa pa ama-appu di. Hela'u lema mii Tuahhu he hari-hari do pa dhara lodho do nadhe, ya lema do dhai mejhanni tu Deo.

⁴ Alla ke ri ya pedede tade made ne ddau-ddau do pedutu ne liajha do wowiu do naanne. Hari-hari ro ie ta momone mina harre lema mobanni, kappa ri ya jhe pemaho la dhara ammu bhaddo.

⁵Kattu mone-ae mone tunu-menahu miha nga Kattu-kattu Aigama do nara ta peteleo ta do ne lii ya do nadhe adho do pote. Rowi ro ke ne do alla pewie hahhi huri tu ya ta la kappa hari-hari ddau do parahajha pa liajha do wowiu do naanne, jhe aggu ro ri ya ma Yerusalem ta ma wolo.”

⁶”Pa telora loro jhara kako ya, do hedharra ke nga Damsyik, pa awe nattu lodho he, hahhi weo do kelala ta dakka hetakka ke ngati ihi liru la herimo ya.

⁷Ta herabba ke ya la worai jhe rangnge ri ya hhahi lipedai do lii pa ya, ’Saulus, Saulus ta nga ke hakku pehedue Ya ri au?’

⁸Moko ta kebhale ke ri ya, ’Nadu ke Au, we Muri?’ ’Ya dhe Yesus do Nazaret, do pehedue ri au ne,’ ne bhale ri No.

⁹Do ngadde ma ne kelala do naanne ri ddau-ddau do hela'u-la'u nga ya pa anne, tapulara rangnge dho ri ro ne lipedai do pali pa ya ne.

¹⁰Moko ta kebhali ri ke ya, ’Ne nga ke ne do jhamma ta tao ri ya, Muri?’ Ta bhale ke ri Muri pa ya, ’Kaddhi we au jhe maho la Damsyik. Pa ni do medae hine ta peke pa au ri ya jhara hari-hari ne ddhei Deo ta tao ri au.’

¹¹Ta bhaddu ke ya ri weo do dhai herii do naanne. Hakku ta hebake ke ya ri ihi anga-ihi anga ya he maho la Damsyik.

¹²Pa ni do era heddau ne ngara no Ananias. No heddau do mmau nga do kenanno pa dhara pedute ne uku do dare ri Musa he. Do dhai pekerihe no ri hari-hari do Yahudi do pee pa Damsyik.

¹³Ta dakka ke no la heaho ya, jhe la titu no pa keraha ya. Ta lii ke no, ’Tuahhu Saulus, ngaddi wari we au.’ Pa dhara awe naanne dhangnge ta pekaddhe ke ri ya ne tanga mada ya, ta ngadde dhangnge ke no ri ya.

¹⁴Ta lii ri ke no pa ya, ’Alle ke au pepidhe ri Deo ama-appu di mita ie ke ta toi ri au, ne lua pedabbho No, jhe ngadde Yesus, Ana Deo do jhagge ne lua ddhei Deo, jhe hari lema do rangnge ri ya ne lipedai Yesus miha.

¹⁵Do medae ke au ta jadhi hakahi tu ta la pepeke pa hari-hari ddau ne do alle pengadde nga do rangnge ri au ne.

¹⁶Pa dhara awe nadhe dhangnge bhole mata ta petui-tui ri. Kaddhi we au, jhe jhole we ne ngi'u au ta pejhio. Peloro-anni we au pa Muri mita ie au ta pebhalle kattu ngati lubhu harro nga menyilu au.’ ”

¹⁷”Ta bhale ke ya ma Yerusalem, jhe pa dhara awe hebhajha ya pa Ammu Deo, ta tobo ke ya ri Henga Deo.

¹⁸Ta ngadde ke Muri ri ya; ta lii ke No pa ya, ’Henginga we au ne pekaddhi ngati Yerusalem, rowi ne ddau-ddau pa dhe adho ke do medae ri ta hamme ne lipika au jhara lua Ya.’

¹⁹Ta lii ke ya, ’Muri, do toi ma ri ro nga kehamme-hemme ta do ya dhe do alla ke pemaho-kelua la ammu-ammu hebhajha tu ta la kappa ro jhe dede ne ddau-ddau do parahajha pa Au he.

²⁰ Mina harre lema ta dhai ne hakahi unu Au ne, Stefanus ta tuke pemade ne, ya lema miha do era paanne, jhe do mengallu dhara lema ya ne jhara lua pemade no do naanne. Rihi ri ti naanne, ya ri ko ma ne jaga bhara-bhara ngati ddau do tuke pemade no ne.’

²¹Tapulara ta lii ri ke Muri pa ya, ’Kako we au, rowi do medae au ta pepue ri Ya la era do jjau la nga ddau-ddau do adho do Yahudi.’ ”

²²Pee ko ma nga ketanna ne ddau he, ne dhanno ne lipedai Paulus, tapulara pa lipedai no do pedakka rahi ne, ta peka ke ro pemaddu-maddu, ”Ta pemade he we ne ddau do mina poharre. Adho ke no do jhamma ri ta muri mada.”

²³Pa dhara nga peka he ro, ta kewiu-wiu ke ri ro ne juba ro he, jhe hibha awu la dhida.

²⁴Moko ta lii ke ne komeda horodhadhu Roma ne ta aggo Paulus la dhara tasi, mita pereha no jhe dhabe ri gui mita ta toi, ta nga hakku mi na harre ne worawwu peka ne do Yahudi he, penaja nga no.

²⁵Tapulara ta alle Paulus peujhe ri ro tu ta dhabe ri gui, ta lii ke Paulus pa kattu horodhadhu do titu paanne, ”Do ie ma ke ta dhabe heddau ddau do ana-rai pereda Roma nga do dho pereha dae uru jhara ne hala no?”

²⁶Ta rangnge mina harre ri kattu horodhadhu do naanne, ta kako ke no langa komeda ne jhe lii no, ”Ne nga ke ne lai nadhe, ne do medae ta tao ri Ama? Ne ddau do nadhe ana-rai pereda Roma!”

²⁷Moko ta kako ke ne komeda do naanne la nga Paulus jhe kebhali no, ”Hak ko ko ri au ta peke pa ya, do tarra ke au ta ana-rai pereda Roma?” Ta bhale ke ri Paulus, ”Tarra, ya dhe ana-rai pereda Roma.”

²⁸Ta lii ri ke ne komeda ne, ”Ya lema do ma'i dhai mejanni tu ta jadhi ana-rai pereda Roma!”

²⁹Pa dhara awe do naanne dhangnge ne do horodhadhu do ddhei ta pereha Paulus he, ta pejjau-anni dhangnge ke ti anne, bhale ne komeda ne ta meda'u ke no taga tari do alle ke ri ro pepetuke Paulus ri rate, jhe Paulus ana-rai Roma.

³⁰Do rihi ddhei ta toi ri komeda horodhadhu ne, ne nga ne do jadhi ta kepue lai hakku wie hala pa Paulus ri do Yahudi he. Rowi do mina harre ke ta bhale ma jhammi-ae ta pedoa ke ri no ne kattu-kattu mone tunu menahu he nga Kattu-kattu Aigama he la peowu. Moko ta la gole ke Paulus ngati petu ke ne, ta alla pemina harre ta aggo ke la hedhapa ro hari-hari.