Read Sabu LUA RASUL-RASUL 24 Bible Online

LUA RASUL-RASUL 24 - Sabu bible

LUA RASUL-RASUL 24

¹Lammi lodho ngati naanne Kattu Mone-ae mone tunu-menahu Ananias nga kattu-kattu do Yahudi he ta kako ke la Kaisarea, hela'u-la'u nga heddau mone-ubha, ne ngara no Tertulus. Ta la mengadha ke no la nga Gubernur Feliks, jhe pedhae ri no ne likela ro penaja nga Paulus.

²Ta pedoe ke Tertulus la hedhapa ta la kelole ne likela ro penaja nga Paulus, mina hedhe ne ane no, ”Tuan Gubernur do dhida nga kelodo! Pa dha'i pereda Tuan ke ne rai nga li ha jhi ne dhai ketanna. Jhe ri lua uku nga mmau dhara Tuan, ae ke lai do woie ne do alla pepekaddhi tu ddau rai jhi.

³Hari-hari ne lai do napoharre do hamme loro-loro ri jhi nga kolo lii ie nga ae, jhe do takke pekerihe dhai dhida ri jhi, ie ta pa mii we.

⁴Tapulara mita do dho rihi ne rabe awe ngati Tuan, ne menang nge ri ya, ruba ko we ne dhara Tuan ta dhanno ne likela jhi do nabhabha do nadhe.

⁵Abo ri jhi ne ddau do nadhe ta ddau mone tao lua kenya'u nga buluru do ta ma pehedui ddau. Pa hebhakka-bhakka pe nga era we ne lua kenya'u nga buluru ne do tao ri no dhe pa telora do Yahudi. Jhe no dhe do jadhi ta kattu ngati kejie ddau do Nazaret he.

⁶Rihi ngati nanne ri, alle ke ri no pe ddhei ta hakko pekewette ri rue nga taru ne Ammu Deo, tapulara ta kappe ke no ri jhi. [Do peito ke ri jhi ta pereha ne hala no pedutu nga uku aigama jhi ma miha.

⁷Tapulara ta dakka ke la rabe no ri komeda Lisias ti dhara wolaabba jhi,

⁸jhe pereda no mita ie ne ddau-ddau do penaja nga no ta ma mengadha nga Tuan ma dhe.] Ki nga pereha ri Tuan ne ddau do nadhe, do medae ma ta dhanno miha ri Tuan ngati no ta do petu ne nga ne do lii jhi do nahedhe pa tuan penaja nga no dhe.”

⁹Ne ddau-ddau do Yahudi do era pa anne lema dutu le ke ta peanynye Paulus nga peketarra hari-hari ne do pale ri Tertulus ne.

¹⁰Moko ta wiu-ai ke ne gubernur ne pa Paulus ta do ie ke Paulus ta pedai lii. Moko ta lii ke Paulus, ”Do lore petoi ta do Tuan do ttau-ttau ke ne jadhi ta mone happo hala pa rai do nadhe. Taga tari do mina harre ke do dhai mengallu ke ya ta kelole ne lilolo ya pa hedhapa Tuan.

¹¹Do nara ta pereha miha ri tuan, rowi rihi de dho ngati henguru dhue lodho do ludu ta kako ke ya la Yerusalem ta la hebhajha.

¹²Jhe ngaddi dho ya ta abo ri do Yahudi he ta era ta pehala ie ta nga nadu we, kiadho ta pekupu ddau ta tao lua kenyau nga buluru ie ta pa Ammu Deo, mina harre lema pa ammu-ammu hebhajha ie ta pa mii we pa dhara do naanne.

¹³Nara le dho ma ri ro ta perue ne lilolo ro do alle pepedhae ri ro pa Tuan penaja nga dhe.

¹⁴Tarra do jhamma ri ya ta kelole mola pa Tuan ta do ya dhe, do wie hu nga mejura pa Deo ama-appu jhi pedutu nga liajha Yesus, do ne ane ro, napoanne ke ne do hala ne. Tapulara do pee ma ya nga parahajha nga hari-hari ne do era do hure do bhuke pa Buku Musa nga pa Buku Nabi-nabi.

¹⁵Hela'u lema mii ro, ya lema do nga lua henao pa Deo, ta do hari-hari ddau do medae ta kaddhi bhale wari ki alla ke pemade — ddau-ddau do tao lua ie, mina harre lema ddau-ddau do tao lua apa nga kerewe.

¹⁶Rowi do mina harre ke hakku pee ma ya nga petadi nga woie-ie mita ie ne ade nga penge ya, era do mmau penyaja nga Deo, mina harre lema panaja nga ddau raiwawa.

¹⁷ Ta ludu pa parri bhue ttau, adho ke ya do era pa Yerusalem, ta bhale ke ya la ni nga aggu doi ruba-dhara tu ddau-rai ya ma miha, nga tu ta la wie bhara jhula pa Deo.

¹⁸Pa dhara nga jhagge ri ya ne lai do naanne, ta ngadde ke ya pa dhara Ammu Deo ri ro, jhe ne era ya paanne tu ta la pemoko-anni pa lua pemmau-anni. Adho do era ddau lowe hela'u-la'u nga ya, jhe hari lema bhule dho lua kenya'u nga buluru pa anne pa dhara awe do naanne.

¹⁹Wa ta ke ne do era pa anne do parri ddau do Yahudi ngati Asia we. Ro ke ne do jhamma ta era pa dhe tu ta ma pemaho ne likela ro pa Tuan, ki do era ro nga likela penaja nga ya.

²⁰Ki do adho, hani we ne ddau-ddau do na harre ma mi ha ta ma peteleo ne hala do ngadde ri ro pa ya, pa dhara awe aggo ne ya la hedhapa Kattu-kattu Aigama he.

²¹ Ne do ngadde ri ro, wata ke ri lipedai do hahhi nadhe we, do pale ri ya pa hedhapa ro do mina hedhe: Ne pereha ya pa dhara lodho do nadhe taga tari do parahajha ya, ta do ne ddau-ddau do alla pemade do ta muri bhale wari.”

²²Moko ri Feliks do ae ke ne toi ne jhara liajha Yesus ne, moko ta henabbhe ke ri no ne lua peowu do naanne. Ta lii ke no, ”Ne kewallu do nadhe do medae ta pehappo ri ya, kinga dakka komeda Lisis ma dhe.”

²³Moko ta pereda ke no pa kattu horodhadhu do jage Paulus ne, mita pe ma Paulus nga tahe, tapulara nga wie lua kehoo hudi he pa Paulus, jhe mina harre lema, do wie lua ke pa ihi anga-ihi anga Paulus ta wie ne nga we kinga era ke ne lua paralu Paulus.

²⁴Ta ludu parri lodho ta dakka ke Feliks nga ihi-ammu no Drusila heddau do Yahudi. Moko ta pepu ke ddau ri Feliks ta la aggo Paulus. Ta dhai ta dhanno ke ri Feliks ne lipedai Paulus jhara lua parahajha pa Kristus Yesus.

²⁵Tapulara ta dhai ta peterue ri Paulus ne lipedai no jhara mola nga henarru nga lua makka tee-makka wangnge nga jhara lua wolo pa Lodho Pedakka Rahi raiwawa, ta jadhi ta meda'u ke Feliks jhe lii no, ”Bhale ko we au pa awe nadhe. Do medae ma au ta pedoe ri kinga era ne awe pa ya.”

²⁶Pa dhara awe naanne lema do henao ke ri Feliks ta nara doi ri Paulus. Taga tari do mina harre ke, hakku do loro-loro Feliks ne pepu ddau ta la pedoe Paulus tu ta la pedai lii nga no.

²⁷Ta ludu dhue bhue ttau, ta hoo ke Feliks ri Perkius Festus mii gubernur, jhe taga tari Feliks do ddhei ta aggu ne ade do Yahudi he, ta hane he ke Paulus ri no pa dhara ammu bhaddo.