Read Sabu LUA RASUL-RASUL 26 Bible Online

LUA RASUL-RASUL 26 - Sabu bible

LUA RASUL-RASUL 26

¹Ta lii ke Agripa pa Paulus, ”Ta wie ke ne kehoo pa au ta pedai lii tu ta pemola-anni.” Moko ta dhede ruwai ke Paulus jhe wie ne lilolo no do mina hedhe,

²”Muri Mone Duae Agripa! Pa dhara penge ya, ya dhe ddau do rihi mangngi do nara ta pedhae ne lii lolo mii lua pemola-anni, rihi-rihi pa hedhapa Muri Mone penaja nga hari-hari likela do pelake do alla ke pepedhai ri do Yahudi he panaja nga ya;

³rihi-rihi do dhai toi ke ri Muri Mone ma jhara uku lua-lai do Yahudi. Rowi do mina harre ke ta menangnge ke ri ya pa Muri Mone mita dhanno ne lii pejhara ya nga merai nge nga dhara.

⁴Ri hari-hari do Yahudi do toi ke ne muri mada ya rai ti awe nga ngarru ne ko ya. Do toi ke ri ro ta do rai ngati nga ngarru ne ko ya, do alla ke ya pemuri mada pa telora ddau rai ya ma iha pa Yerusalem.

⁵ Do dhai toi ke ro ne toi jhara lua ya. Jhe kita wae ro, do nara ke ri ro ta peteleo, ta do rai ti petari ya do muri mada mii heddau do Farisi nga do pedutu uku do dhai rui pa dhara aigama jhi.

⁶Jhe pa dhara awe nadhe ne ke ya do titu pa dhe tu ta pereha ne hala ya taga tari do parahajha ya pa lijaji do tao ri Deo nga ama-appu jhi.

⁷Lipejaji do naanne ke ne do pee nga henao ri hari henguru do dhue huhu do Israel, hakku pee ma ro nga wie hu nga mejura pa Deo anni lodho nga anni maddha. Jhe taga tari do parahajha pa lijaji do naanne ke ya, bhoke Muri Mone lii pa ya ta do hala ri do Yahudi he.

⁸Tanga ke ne do Yahudi he hakku do dho nara ta parahajha ta Deo do pemuri bhale wari ddau do made?

⁹ Pa uru jhara he lema, ya le miha do nga lua tada ta do jhamma ta tao ne nga we tu ta pelawa nga Yesus do Nazaret ne.

¹⁰Jhe do tarra ne do alla petao ri ya do mina harre pa Yerusalem. Nga huri kuaha ngati kattu-kattu mone tunu-menahu he, ae ke ne ddau do halla-anni pa Deo ne do alla pepemaho ri ya la dhara ammu bhaddo. Rihi ri ti naanne, do rihi mengallu dhara ya ki nga wolo ro ta pemade.

¹¹Jhajhi wari ya ne kako la dede nga dhaba ro pa ammu-ammu hebhajha, tu ta pehahhi ro ta pehile ri ro ne do parahajha ri ro ne. Do dhai pana tarra ne ade ya penaja nga ro, hakku kako ya lohe la rae-rae do hewale he la hudhi nga peraga ro la era-era do na harre.”

¹²”Nga lua pedabbho do mina harre ke ne kako ya la Damsyik do nga aggu huri kuaha ngati kattu-kattu mone tunu-menahu he.

¹³Pa telora rujhara, pa dhara awe nattu lodho he Muri Mone, ta ngadde ke ri ya hahhi weo do rihi ke lala ngati mada lodho. Ne kelala do naanne ta kehabbha ke pekehero ya nga ddau-ddau do penau nga ya he.

¹⁴Ta herabba ke jhi hari-hari la worai. Moko ta rangnge ke ri ya ne lipedai pa dhara lii Ibrani do pali mina hedhe pa Ya, ’Saulus, Saulus! Tanga au hakku pee loro nga pehedue ya? Do medae ma ta dhue ta hape ri au ne lua paddha, kinga pee koma au nga pelawa-petaddhu nga lua hewai-hewewe no do jadhi ta muri ri au ne.’

¹⁵Moko ta kebhale ke ri ya, ’Nadu ke Au we Muri?’ Ta bhale ke ri Muri, ’Ya ke dhe Yesus do pehedue ri au ne.

¹⁶Kaddhi we au jhe titu! Do ta pengaddhi-anni ma ya pa au do nga lua pedabbho ta dhede au ta ddau do ta pekako ne lua jhagga Ya. Do jhamma ri au ta la pepeke pa ddau do hewala, ne nga ne do ngadde ri au pa dhara lo dho do nadhe, jhara lua Ya nga jhara lua ne nga we ne do medae ta pengadde pa au ri Ya hine.

¹⁷Do medae ta gole au ri ya ngati do Israel nga ngati ddau-ddau do wala rai do adho do Yahudi. Do medae ya ta lii pa au ta kako la nga ro,

¹⁸ta la boka ne namada ro, mita ie ro ta mahhu-anni ngati dhara kerabba, jhe maho la dhara teleo, mita ludu ke ro ngati liubu Wango, jhe ma ho la dhara lua pereda Deo. Moko ri do parahajha ro pa Ya, ne lubhu harro nga menyilu do tao ri ro do ta pehai-pehuba ke, jhe do ta jadhi ke ro ta ai ala annu-niki Deo do jhujhu do pidhi ri Deo.’ ”

¹⁹”Rowi do mina harre ke, Muri Mone Agripa, do pee loro ya nga halla-anni pedute ne lua do ngadde ri ya ne, do alle pehamme ri ya ngati Deo ne.

²⁰ Nga peke mola-mola ri ya pa ddau-ddau he, ta do jhamma ro ta jharra ngati lubhu harro nga menyilu ro jhe jhula-anni pa Deo nga pedhelo ri ro pa dhara muri mada ro ta do alla ke ro pejharra ngati lubhu barro nga menyilu ro. Pepeke ri ya uru jhara ne lai do naanne pa Damsyik, jhe itu la Yerusalem nga pa ha ri hewue ihi rai Yudea nga mina harre lema pa telora ddau do adho do Yahudi.

²¹Moko taga tari lai do naanne ke, ne kappe ya ri do Yahudi he pa dhara Ammu Deo, jhe petadi ro ta kale ne rujhara ta pemade ya.

²²Tapulara hape ma dhara awe nadhe ne koma ya do herimo-heruge ri Deo, hakku nara koma ya ta titu pa dhe tu ta pepeke ne lipika ya pa hari-hari ddau — do kepai nga do naiki. Nenga ne do pale ri ya do nadhe, adho ke ta do wala ri ngati do pedare ri Musa nga nabi-nabi;

²³ ta do ne Duae Mone-ma'i Mone-golo do jaje ri Deo ne, do jhamma ta dhui-hape lua hedui-herui, jhe do jadhi ta ddau do petari rai ne do kaddhi bhale wari ki alla ke pemade, mita ri naanne ke ne nara No ta pepeke ne teleo ne — wala dho ke ngati lua helama to na ie ne — ie ta pa ddau do Yahudi, mina harre lema pa ddau-ddau do adho do Yahudi.”

²⁴Pa dhara nga pedhae ko ri Paulus ne lilolo no, ta peka ke Festus, ”Alla ke pewujhu Paulus. Ri lua mmau dhara au, alle ke pepejadhi au ta wujhu!”

²⁵Tapulara ta bhale ke ri Paulus, ”Wujhu dho ya Muri Mone ee. Lipali-lipedai do pale ri ya dhe do petu jhe do mahhu ngati penge do mmau.

²⁶Ri Muri Mone Agripa miha do dhai toi ne jhara lai-lai do na harre. Rido minaharre hakku bhani ya nga teleo-teleo ta pedai lii pa hedhapa Muri Mone. Jhe ketarra ke ri ya lema, ta do bhule dho ke kakhi lai ngati lai-lai do naharra do dho toi ri Muri Mone, rowi hari-hari ne na harra adho do jadhi pa era do pehune peniti.

²⁷Mina mii Muri Mone Agripa, parahajha marra Muri Mone nga do pale ri nabi-nabi he? Pa penge ri ya, do parahajha ma Muri Mone!”

²⁸Moko ta lii ke Agripa pa Paulus, ”Ne penge ri au do dhai memudhe pa dhara hekewu'u namada he we ne bhare ya ri au ta jadhi do Herani?”

²⁹Ta bhale ke ri Paulus, ”Awe do henginga ko, do merai ko, ta hebhajha ya pa Deo mita ie Muri Mone nga Tuan-tuan he do dhanno ne lii ya do pa dhara lodho do nadhe, nara ta jadhi mii ya le — wala ngati tuki do nadhe!”

³⁰Pa pedakka rahi Muri Mone Duae, gubernur, Bernike, nga hari-hari do wa la he ta titu ke.

³¹Ta dhai ro la tele ta pedai ke ro heddau nga heddau, ”Ddau do nadhe, bhule dho do tao hahhi lai do jhamma no ta wole pemade kiadho ta pemaho la dhara ammu bhaddo.”

³²Ta lii ke Agripa pa Festus, ”Ddau do nadhe do jhamma ke ta gole, kita do adho he no do dhuki ta ne kewallu no dhe ta la pereha pa kato era happo kewallu ngati Kehe.”