Read Sabu LUA RASUL-RASUL 28 Bible Online

LUA RASUL-RASUL 28 - Sabu bible

LUA RASUL-RASUL 28

¹Ta dhai jhi nga helama la kolo lede, jhe itu toi ri jhi ta do naanne pulu Malta.

²Ne ddau pa pulu naanne do dhai mahu le ne penaja nga jhi. Ta hammi ke jhi hari-hari nga woie ri ro, jhe peweo ro ai tu jhi ta menyiru rowi do jhari ke ta dakka ajji, jhe hari lema ngallu do meringi.

³Ta keworo kelai ajhu ke Paulus jhe takka la dhara rao ai ne. Pa dhara nga takka ri no ne kelai ajhu he la dhara rao ai ne, ta mahhu-anni ke hengi'u debhoho ri pana ae ne, jhe la hibhe ne ruwai Paulus.

⁴Ta dhai ta ngaddi ri ana rai pa anne ne debhoho ne do peratte pa ruwai Paulus ta lii ke ro heddau pa heddau, ”Do tatu ne ddau do nade ta heddau do alla pepemade ddau, hakku maji lema no ta do ludu ke ti lua hedui ngati dahi ne, hane dho no pe muri mada ri Banni-ae do dho i'a bibhi-hebhakka ne.”

⁵Tapulara ta latte ke ri Paulus ne debhoho do naanne la dhara rao ai ne nga do dho bhule le ta era ta paddha he pa no ngara ta hudi he.

⁶Pa dhara penge ana-rai do paanne, adho ke do rajja ri, do medae ke ta bhai ne ruwai Paulus, jhe heragga hetak ka no ta made. Tapulara ta mate-mate ri ro, jhe bhule ta jadhi lai nga-nga pa Paulus, moko ta lari-anni ke ne penge ro jhe lii pa Paulus ta no heddau deo.

⁷Rihi dho ne jjau ngati era do naanne do era ne worai unu Publius kattu mone-ae pa pulu naanne. Ta hammi ke jhi ri no nga woie nge-danni ade la nga no pa dhara tallu lodho ne tui.

⁸Pa dhara awe do naanne do era do paddha ne ama ri Publius ne. Ta emo jhe do pupu ri. Ta la heaho ke no ri Paulus, jhe hebhaja Paulus nga takke ne ruwai no pa do paddha ne, moko ta ie dhangnge ke ne do paddha ne.

⁹Ri lai do naanne, moko hari-hari ddau do paddha pa pulu do naanne ta dakka ke la nga Paulus, moko ta peie he ke ro ri Paulus.

¹⁰Ae ne bhara parahee do wie ri ro pa jhi, jhe dhai jhi ta pekaddhi he, ta dakka ke ro nga aggu la kapa ne nga we ne do paralu pa loro jhara ka ko jhi he.

¹¹Ta tallu warru jhi pa Malta, ta pekaddhi ke jhi ngati pulu do naanne, ha'e jhara hewue kapa ngati Aleksandria, do pee nga penawu pa anne pa dhara awe meringi ne. Ne ngara kapa ne, ”Deo do Kedue Kastor nga Poluks.”

¹²Ta penawu ke jhi pa rae Sirakusa, jhe pee jhi tallu lodho ne tui pa ni.

¹³Nga ti ni ta pekaddhi ri ke jhi ri ore dhae lohe la rae Regium. Bhale ma jhammi ae, ta dakka ke ngallu ngati Bhollau, hakku pa dhara dhue lodho ta dhai ke jhi la Putioli.

¹⁴Pa ni ta peabu ke jhi nga do parri ddau do parahajha pa Yesus, jhe ri liperihi ro, ta pee ke jhi nga ro hewue do migu ne tui. Moko ta pekaddhi ke jhi la Roma.

¹⁵Do rangngi ke ne tuahhu-tuahhu do parahajha pa Yesus do pa Roma he, hakku ta dakka ke ro ta la peabu nga jhi hape la Paha Apius nga Pasanggrahan Tallu ta la peabu nga jhi. Ta dhai Paulus ta peabu nga ro, ta pe ha'e kolo lii ie ke Paulus pa Deo jhe ta rui le ke ne ade no.

¹⁶Ta dhai la Roma, ta wie lua ma pa Paulus ta pee pa tele jhe nga jage ri do horodhadhu.

¹⁷Ta tallu lodho ta pedoa ke ri Paulus ne mone kettau-mone kettau do Yahudi he do era pa era do naanne. Ta teni le ro, ta lii ke Paulus pa ro, ”Tuahhu-tuahhu! Ya dhe bhule dho ta tao hala nga-nga pa ddau-ddau di he kiadho ta hihu ne uku nga hadha rai di do hammi ri di ngati ama-appu di he. Meji lema ta mina harre ta kappe ke ya ri ro pa Yerusalem jhe jhole ya la wolaabba do Roma.

¹⁸Ta alle pepereha ne kewallu ya, do ddhei ke ro ta gole ya, rowi do teleo ke ta dho ngaddi ta tao hahhi hala he do jhamma ta wole ri lua wolo made.

¹⁹ Tapulara taga tari do pe ma ne do Yahudi he nga ketakki, hakku ie nga dho ie ta ami ke ya mita ie ne kewallu ya dhe ta ma happo ri kato era happo kewallu Kehe Roma ke. Hakku tao ya mina harre adho taga tari do era hahhi lua kela ri ya penaja nga ddau ya miha.

²⁰Jhe ri do mina harre ke hakku ta ami ke ya ta abu nga mu hari-hari, rowi alle ke ya pepetuke taga tari Mone-mai Mone-golo do ito nao ai ri do Israel ne.”

²¹Moko ta lii ke ro pa Paulus, ”Ngaddi le dho jhi ta hammi ie ta hebhalla huri he ngati Yudea jhara lua Tuahhu. Nga bhule le dho heddau tuahhu he do dakka ngati ni do era ta pedai-pejha'i le nga jhi jhara lua Tuahhu, kiadho ta ma pedae ngara apa he Tuahhu ri ro.

²²Tapulara jhi lema do ddhei ta dhanno ne jhara lua parahajha Tuahhu, rowi do rangngi ke jhi ta do alle ke pekare pemanihe ne liajha do pedute ri Tuahhu ne.”

²³Moko ta petatu ke ne awe ri Paulus tu ta peabu nga ro. Pa lodho do naanne ae ne ddau do dakka la era pee Paulus ne. Rai jhammi-ae lohe la maddha lodho, ne peteleo nga pepeke pa ro ri Paulus jhara lua mina mii Deo ne pereda mii heddau Duae. Nga pake ne lilolo-lilolo Buku Musa nga Buku Nabi-nabi, petadi Paulus ne kale loro jhara mita parahajha ro pa Yesus.

²⁴Era ma do parahajha nga ne nga ne do lii Paulus ne, tapulara era lema do dho pa rahajha.

²⁵Nga lua tada do pehihu ro, ta hane ke ne era do naanne ri ro, ta alla Paulus pe lii mina hedhe pa ro, ”Do dhai petu tarra ne nga nedo pale ri Henga Deo do pelake jhara Nabi Yesaya pa ama-appu mu!

²⁶ Ne lii Deo, ’Kako we la lii pa ddau-rai do nadhe: Do ta pee ma mu nga halla-anni ta dhanno, tapulara adho do medae ta tada; do pee ma mu nga heleo tapulara adho do medae ta toi ne nga ne do ta jadhi.

²⁷Rowi do kedu'u ke ne lua penge ddau-rai do nadhe, do hoe ke ne wodilu ro jhe do pebba'i ke ne namada ro. Nadhe hakku jadhi mita ie ke ne namada ro ta bhole ngaddi ne wodilu ro bhole rangngi ne lua penge ro bhole tada jhe bhole bhale wari nga Ya moko do medae ke ri Ya ta peie ro.’ ”

²⁸Pedakka rahi ta lii ke Paulus, ”Tuahhu-tuahhu do jhamma ke ta toi ri mu ta do ne lii jhara lua helama tona ie do ngati Deo ne pa awe nadhe alle ke pepeke pa ddau-ddau do wala rai do adho do Yahudi. Rowi do medae ke ri ro ta pedute?” [

²⁹Ta alla Paulus pe lii mina harre ta langnga ke ne do Yahudi he ngati era do naanne nga pebhata heddau nga heddau.]

³⁰Dhue bhue ttau Paulus ne pee pa Roma, pa ammu do kehewe miha ri no. Nga mengallu dhara no ne hammi hari-hari ddau do dakka la heaho no.

³¹Jhe bhani dhallu no ne pepeke pa ro, ne jhara lua mina mii Deo ne pereda mii he ddau Duae nga jhara lua Muri Yesus Kristus. Jhagge ri Paulus ne na harre nga balla kattu, nga do dho bhule ke ne nga-nga ri do labbe no.