Read Sabu LUA RASUL-RASUL 3 Bible Online

LUA RASUL-RASUL 3 - Sabu bible

LUA RASUL-RASUL 3

¹Pa dhara helodho, pa wabba tallu maddha lodho he, ta kako ke Petrus nga Yohanes la Ammu Deo, pa awe ta la hebhajha.

²Pani pa ubha kelae do pehu ne ta ”Kelae do Merake”, do era heddau momone do kai rai ta metana. Helodho-helodho do ta aggo ke ne ddau do naanne la pemejaddhe la ubha kelae ne, tu ta ami-ami pa ddau-ddau do ta maho la Ammu Deo ne.

³Ta dhai ta ngaddi ri ddau do naanne Petrus nga Yohanes ta maho la dhara Ammu Deo, ta hehata-ai ke no ta ami ne nga-nga pa ro hari do dhue.

⁴Moko ta ketarre ke no ri Petrus nga Yohanes, jhe lii Petrus pa no, ”Ketarri jhi!”

⁵Moko ta ketarri ke ri no Petrus nga Yohanes, jhe nga henao ta nara nenga-nga ti ro.

⁶Tapulara ane Petrus langngu no, ”Bhule dho ya nga doi ie ta hedoi he. Tapulara nenga ne do era pa ya, napoanne we ne do ta wie ri ya pa au. Ri kuaha Yesus Kristus do Nazaret ne, kaddhi we au jhe kako we!”

⁷Moko ta parro ke ri Petrus ne ruai kedhanga ddau do naanne, ta rabhe no ta kaddhi ta titu. Pa awe naanne dhangnge ta rui ke ne kae ddau do naanne, mina harre lema ne wopakalae no.

⁸Moko ta kewajji ke no jhe titu, ta jhari ke no ta lappa la hebhakka-hebhakka. Ta alla pemina harre ta maho le ke no la dhara Ammu Deo penau hela'u nga Petrus nga Yohanes. Pa dhara nga kako ne no, ta kewajji-wajji ke no jhe wue waje Deo.

⁹Hari-hari ddau do ngadde ne ddau do naanne do kako jhe nga wue waje Deo.

¹⁰Moko ta toi ke ri ro, ta no do napoanne ddau do mone ami-ami do tima ta mejaddhi pa ubha ”Kelae do Merake” do pa Ammu Deo ne. Dhai madalae ro ne heleo ne lai do jadhi do naanne.

¹¹Ri ddau do naanne ta pee nga pedutu ke Petrus nga Yohanes. Ta dhai ro la kehale do pehune ta ”Kehale Salomo”, ta dakka ke hari-hari ddau la peworo ro ri do madalae ke ro hari-hari.

¹²Ta ngaddi ri Petrus ne ddau-ddau do naharre, ta lii ke no pa ro, ”Wo ddau do Israel, ta nga ke hakku madalae tuahhu-tuahhu he jhara lai do nadhe? Ta nga ke mu hakku pee nga peketarri nga jhi we? Ne pa dhara penge mu, hakku nara ne ddau do nadhe ta kako ri do era ne kuaha pa jhi kiadhoa taga tari do pedhanno jhi nga Deo?

¹³ Deo ri Abraham, Ishak, Yakub, Deo ri ama-appu di, Deo do alle pepe kelode Annu No, Yesus ne. Yesus do alle pe jhole ri mu ne pa mone pereda nga do lawe ri mu pa hedhapa Pilatusne, pa awe do ddhei ke Pilatus ta gole.

¹⁴ No do mmau do megala nga do do woie, tapulara alla ke mu pepelawa nga No, jhe pehahhe Pilatus ri mu mita gole heddau mone pemade ddau tu mu.

¹⁵Alle ke No pepemade ri tuahhu he, do ne papetu ne, No ke ne kepue muri mada tu hari-hari ddau. Jhe do alle ke No pepemure bhale wari ngati dhara made mada. Do ngadde ke ri namada jhi miha ne lai do napoanne.

¹⁶Do ngadde nga do hakahi miha ke ri tuahhu-tuahhu he ne do jadhi pa ddau do kai do nadhe. Rui ke jhe ie ke no, rowi do parahajha ke no pa Yesus nga kuaha No. Rowi do parahajha pa Yesus ke, hakku ie ke ne ddau do nadhe, mina mii ne do ngadde ri mu hari-hari pa dhara awe nadhe.

¹⁷Tuahhu-tuahhu! Pa awe nadhe, toi ke ri ya, ne nga ne do tao ri mu nga kattu-kattu unu mu he, penaja nga Yesus, tao ri mu nga do dho tada nga-nga pa dhara nga tao ne ri mu.

¹⁸Jhe ri loro jhara do mina harre, ta tobo le ke ne nga ne do pepeke ri Deo rai uru-rai tare do pelake jhara hari-hari nabi No, ta ne Duae Mone ma'i-Mone Golo ne do jhamma ta dhui-hape hedui-herui.

¹⁹Rowi do mina harre ke a'a ari tuahhu, jharra we mu ngati lubhu harro nga menyilu mu.

²⁰Do ta dakka ma Muri ma nga mu, jhe do ta narro-ta lake ri mu ne lua mengallu nge nga kehaka dhara pa dhara lua manno nga kaho. Jhe ri Muri do ta pepue ma Yesus ta dakka ma nga mu, rowi do alle ke No pepetakke ta Duae Mone ma'i-Mone golo tu mu.

²¹Do ta pee ko no pa era do mmau do megala ne tade pe jadhi ko ri Deo hari-hari ta do wowiu, mii do alle ke pepale ma ri Deo do pe lake jhara nabi-nabi No do rai uru-rai tare he.

²² Do ngaddi ke Musa ta lii, ’Deo Muri mu do ta pepue ma heddau nabi ma nga mu ngati telora ddau-rai mu ma miha, do mii pepue ya lema ri No. Do jhamma ke ri mu ta dhanno hari-hari ne nga we ne do pale ri nabi do naanne pa mu.

²³ Ddau do dho pedhanno nga ne nga we do pale ri nabi do napoanne, ddau do naanne do ta nyakke ngati annu-niki Deo jhe penappe ri lua apa nga kerewe.’

²⁴Nabi-nabi do ngaddi ta pedhae ne lii do ngati Deo he, jhari ngati Nabi Samuel jhe pelohe ma nabi do dakka leto he, ro hari-hari do pepeke jhara lua-lai awe do nadhe ke.

²⁵ Liajha-liajha do ngati Deo heo, do pedhae ri nabi-nabi he, do tu tuahhu-tuahhu he ke. Pa dhara lipejaji do alle petao ri Deo ne nga ama-appu di he, alla ke Deo pe li pa Abraham, mina hedhe, ’Ngati kolo loro au do ta wie ke ri Ya ne lua tarro ie nga menyarro mangngi tu hari-hari ddau pa danni raiwawa dhe.’ Jhe ne lijaji do naanne do tu mu lema ke.

²⁶Ri do mina harre ke, alle ke pepidhe ri Deo ne Annu No ne, jhe pepue, jhe pepue no uru jhara ma nga mu, mita ie ke ta wie ri no ne lua tarro ie nga menyarro mangngi ne tu mu. Ne loro jhara ne, wala dho ke ti lua ma bhari-ma rihu mu mita jharra mu ngati dhara murimada do apa do kerewe ne.”