Read Sabu LUA RASUL-RASUL 7 Bible Online

LUA RASUL-RASUL 7 - Sabu bible

LUA RASUL-RASUL 7

¹Ta kebhale ke ri Kattu Mone-ae mone tunu-menahu ne pa Stefanus, ”Do petu we adho, hari-hari ne lilolo ddau-ddau do na hedhe?”

² Bhale ri Stefanus, ”Tuahhu-tuahhu nga Ama-ama! Nga do dho lari-anni dae ama-appu Abraham la Haran, pa awe pa Mesopotamia ko no, ta dakka ke Deo dhida do kelodo ne la nga no,

³jhe lii pa no, ’Hane we ri au ne rai nga liha au, nga a'a-ari au. Kako we au la do medaea ta pejhujhe ri Ya pa au.’

⁴ Moko ta pekaddhi ke Abraham ngati ihi rai Kasdim, jhe lari-anni la Haran. Ta alla pemade ne ama ri Abraham ne, ta tao ke ri Deo pa Abraham mita lari-anni no ma rai do nadhe.

⁵ Pa dhara awe naanne bhule de dho hekewudi he ngati ihi rai do nadhe do wie ri Deo pa Abraham ta jadhi unu-oha ri no nga kolo loro no. Pa awe naanne, Abraham bhule de dho nga ana.

⁶ Tapulara nadhe ke ne do pale ri Deo pa Abraham ’Ne kolo loro au do ta pee mii ddau do wala-rai pa rai ddau do wala. Ddau-ddau rai do naanne do ta jhalli ta kerupu ro, jhe tao do rihi ngati woapa pa ro, pa dhara appa ngahu bhue ttau ne tui.

⁷ Tapulara do ta wolo ri Ya ne ddau rai do jhalli do kerupu do ro he, jhe do ta mahhu-anni ro ngati ihi rai do naanne, jhe do ta wie hu nga mejura ro pa Ya, pa era do nadhe.’

⁸ Ta lalla pelii mina harre, ne ruakki lijaji do naanne ta perue ke ri Deo ri lua dara ngutu. Ta alla Ishak pemetana, ana ri Abraham, ta dare ngutu ke Ishak ri Abraham pa dhara pemuri aru lodho. Mina harre lema ke Ishak ne dare ngutu Yakub ana no ne. Jhe Yakub dara ne ngutu hari henguru do dhue ne ana no he, do jadhi ta ama-appu ri di do Yahudi.

⁹ Ama-appu di do na harre, ta pana dhara ke Yusuf, hakku ta pewie ke Yusuf ri ro ta jadhi naannu pa Mesir. Tapulara Deo do penau-pelere nga Yusuf,

¹⁰ jhe gole no ngati hari-hari lua hedui-herui no. Do wie ke pa ne uku nga mmau dhara ri Deo pa dhara awe la mengadha no la nga Firaun duae Mesir ne, hakku ta dhede ke no ta jadhi gubernur rai Mesir ri Firaun nga jadhi ta mone pereda pa dhara rae Firaun.

¹¹ Ta dhai ta jadhi ke ne lua menganga-rai pa hari he-ihi rai Mesir nga Kanaan do worawwu hedui tarra pa hari-hari ddau. Ama-appu di nara dho ke nga'a-nginu.

¹²Moko ta rangngi ke Yakub ta do era gandum pa Mesir, moko ta pepu ke ri no ne ana-ana no he, do ama-appu ri di he, ta kako la ni tu do petari-rai.

¹³ Ta dhai ro ta kako pa awe du kedhue wari ne, ta pi ka wari-anni ke Yusuf pa tuahhu-tuahhu no he, ta no ke Yusuf. Pa awe do naanne ke ne toi ri duae Mesir ne jhara lua a'a-ari Yusuf he.

¹⁴ Ta alla pemina harre, ta moa lii ke Yusuf pa ama no Yakub tu ta ame no nga hari-hari ana-oha no ta lari-anni la Mesir — hari-hari ro do pidu nguru do lammi ddau.

¹⁵ Moko ta lari-anni ke Yakub la Mesir, jhe pa ni ke no nga ama-appu di he ne made.

¹⁶ Ta dhai ma leto he ta aggu ke ne rui ro he bhale la Sikhem jhe pedana pa raidare do alle pewalle ri Abraham ri doi do ae ngati huhu do Hemor pa Sikhem.

¹⁷ Ta hedharra le ne awe ta petobe ne lijaji Deo ne pa Abraham, ne ddau di he do ju ae ke.

¹⁸Pedakka rahi ta pereda ke heddau duae do dho tade Yusuf pa Mesir.

¹⁹ Ne duae do naanne do dhai woapa ne wui ai-wui tao no pa ddau di nga pa ama-appu di he. Ta pehahhi ke ri duae do naanne pa ro mita hora ne ana ro do itu ta metana he, jhe hani mita made.

²⁰ Pa awe do naanne ke Musa ne me tana, ana do dhai mone-ie. Tallu warru no ne peloje pa ammu ama no,

²¹ ta alla pemina harrre ta hore ke no, ta aggo ke putiri Firaun, jhe peloje no ta mii ana ri putiri Firaun ne.

²²Hari-hari lua mmau dhara do era pa Mesir ta ajha ke pa no, jhe jadhi no ta ddau do nga higa do dhai tarra pa dhara lipedai nga pa dhara wui ai-wui tao.

²³ Ta dhai Musa ta pemuri appa nguru bhue ttau, ta muri ke ne lua ddhei pa dhara ade no ta la heleo ne lua muri mada ddau-rai no do Israel.

²⁴Moko ta ngadde ke ri no heddau do Mesir do era do dede heddau do Israel, moko ta ange ke ri no ne ddau do dede ne jhe pemade ri no ne do Mesir ne.

²⁵Pa penge ri Musa, do toi ke ri ddau-rai no he ta do pa dhara nga pake ke Musa ri Deo tu ta golo ro. Tapulara teleo ta do dho tada dae ro.

²⁶Ta bhale ma jhammi-ae ri ta ngaddi ke ri Musa do dhue ddau do Israel do era do pehala, moko ta kale ke ri no ne loro jhara ta peie ro. Ta lii ke no, ’Mu hedhe do petuahhu. Ta nga hakku pehala mu?’

²⁷Moko ta nyakke ke Musa la ngiri ri ddau do dhabe ihi-anga no ne, jhe lii no pa Musa,

²⁸’Nadu ke ne do dhede au ta jadhi kattu nga ta mone pehappo hala jhi? Adho ke au do ddhei ta pemade ya le mii do tao ri au midha ne pa do Mesir ne?’

²⁹ Ta rangnge ri Musa ne lii ddau do naanne, ta perai ke Musa ngati Mesir, jhe la pee la ihi rai Midian. Pa ni ta ngaddi ana ke no do dhue ddau.

³⁰ Ta ludu ta appa nguru bhue ttau ta dakka ke heddau naju Deo la nga Musa pa kebhalla-ae peumu nga Lede Sinai. Ne naju Deo do naanne dakka pa dhara weo ai pa ro'a koo nga huki do era pa dhara nga weo ko.

³¹Ta madalae ke Musa ne heleo ne lai do naanne, hakku ta kako ke no la pehedharra-anni mita toi ta ne nga ne naanne. Moko ta rangnge ke ri no ne lii Muri,

³²’Ya ke ne Deo ama-appu au; Ya ke ne Deo Abraham, Ishak nga Yakub.’ Moko ta kerijjhi-keraggu ke Musa ri meda'u, hakku bhani dho ke no ta heleo ne ro'a koo nga huki do naanne.

³³Moko ta lii ri ke Muri, ’Boke we ne helapa au ne, rowi ne worai do pa era titu au ne, worai do mmau do megala ke.

³⁴Do ngaddi nga do rangngi ke ri Ya ne lua paddhu nga kemari lua hedui-herui annu-niki Ya pa Mesir. Do rangngi ke ri Ya ne lua penina-noho ro, jhe do ta puru ke Ya ta la golo ro ta peballa-kattu. Pa awe nadhe, mai we au! Do ta pepue ke au ri Ya, ta bhale la Mesir.’

³⁵ Musa do nadhe ke, ne do nyakke ri do Israel nga pali lipedai do mina hedhe, ’Nadu ke ne do alle pedhede au ta jadhi kattu nga mone pehappo hala jhi?’ Tapulara no ri ko ma ne do pepue ri Deo tu ta jadhi kattu nga mone ma'i-mone golo ro, nga lua rabbha nga dharru ngati naju Deo do dakka la nga no pa ro'a-koo nga huki do weo ne.

³⁶ Musa do naanne ke ne do aggu do Israel ta mahhu-an ni ngati Mesir nga tao ne lua-lua madalae nga lai-lai do rihi ngati ihi ne ma dalae pa rai Mesir, pa dhara Llau Mea nga pa dhara kebhalla-ae, pa dhara appa nguru bhue ttau ne tui.

³⁷ Musa do naanne lema ke ne do lii pa do Israel, ’do medae ta wie ri Deo pa mu heddau nabi do pidhe ngati telora mu ma miha, hela' u mii pidhe ya lema ri No.’

³⁸ Musa ke ne do era pa telora do Israel pa dhara kebhalla-ae, do jadhi ta mone titu pa telora tu naju Deo do pedai lii nga no pa Lede Sinai tu ama-appu di he. No ke ne do hamme ngati Deo ne lipedai do mu ri ne tu ta pedhae pa di.

³⁹Maji lema ta mina harre, wae dho ma ama-appu di ta pedhanno nga no. Ta nyakke we no ri ro, jhe ddhei ta bhale la Mesir.

⁴⁰ Ta lii ke ro pa Harun, ’Tao kowa ne deo-deo tu jhi, mita ie ri deo-deo do na harre ta lere ta kelau jhi. Rowi toi dho ke ri jhi ta ne nga ne do jadhi pa Musa do alla peaggu jhi he ta mahhu-anni ngati Mesir ne!’

⁴¹ Moko pa dhara awe naanne ta tao ke ri ro hengi'u nahapi, ta alla pemina harre ta jhula ke ri ro ne bhara jhula nga menahu pa deo nahapi do naanne, jhe tao ri ro lai tao nga'a tu ta wie hu nga me jura bhara do alle petao ri ro miha.

⁴² Moko ta hani ke ro ri Deo, jhe pelala jhani-ani la wie nga mejura pa moto-moto do era pa ihi liru. Ne lai do napoan ne do penau ke nga do hure do bhuke pa dhara buku nabi-nabi. Do mina hedhe, ’Wo ddau-ddau do Israel! Adho dhe tu Ya mu ne kehabbha bhada nga tunu-menahu pa dhara appa nguru bhue ttau he ne tui pa dhara kebhalla ae ne.

⁴³Ammu era mejura pa Molok we ne do wewe ri mu la hebhakka-bhakka hela'u-la'u nga moto do tao ri mune ta mii Refan do periho ri mu ta deo ne, jhe pa no ke mu ne wie hu nga mejura. Rowi do mina harre ke do ta hora ke mu ri Ya, la era do dhai jjhau lohe la ihi rai Babel.’

⁴⁴ Ne Ammu bhalla-lai era dakka Deo ne ma nga ddau raiwawa do era ma pa ama-appu di he pa dhara kebhalla-ae. Ne ammu bhalla lai do naanne do tao pedu tu nga lipereda Deo ma pa Musa, jhe do tao pedute nga telia do pengadde ri Deo ma pa Musa.

⁴⁵ Ammu bhalla lai do naanne ke ne do aggo teru ri ama-appu di lohe ma dhara awe Yesus, jhe kako ro la rabe ne rai do nadhe ngati dhara wolaabba ddau-ddau do hudhi ri Deo pa hedhapa ro. Ne ammu do naanne era paanne lohe ma awe Daud.

⁴⁶ Ri Daud do pemengallo ne dhara Deo, jhe ami no mita wie lua ri Deo pa no tu ta petitu hewue ammu tu Deo, do pa No ke Yakub ne wie hu nga mejura.

⁴⁷ Tapulara Salomo ke ne do petito ammu ne tu Deo.

⁴⁸Maji lema ta mina harre Deo do rihi dhida nga kelodo ne, pee dho No pa dhara ammu do tao ri ddau raiwawa; rowi pa dhara buku nabi do era hure do bhu ke mina hedhe,

⁴⁹ ’Liru ke ne era mejaddhi Ya, jhe raiwawa ke ne era jhalli kae Ya. Ammu do mina mii ke ne do petito ri mu tu Ya? pa mii ke ne era pengaha tu Ya?

⁵⁰Ta do adho ke ta Ya ma ne do tao hari-hari ne nga we?’ mina harre ke ne lii Deo.

⁵¹ Do tarra ne keti kewadu kattu tuahhu-tuahhu he jhe do dhai tarra nehedui ta pedhanno nga Deo! Ne wodilu mu do rihi tu-tu ke ne hoe nga ketipa penaja nga lipedai Deo! Do hela'u ke mu nga ama-appu mu he do pee nga pelawa-petaddhu we nga Henga Deo!

⁵²Do era ri ko ne nabi do dho dede do dho dhaba ri ama appu muri? Pemade ri ro ne ddau-ddau pepu-peju Deo do rai uru rai tare he do alla ke pepepeke ta do ne Annu Deo do mola do mira ne do medae ta dakka ne. Jhe pa dhara awe nadhe alla ke mu petao apa, jhe pemade ne Annu Deo do naanne.

⁵³Ri naju-naju Deo he do alla ke pepedhai ne lidara-lidara Deo he pa mu, tapulara wae dho ri mu ta pedute!”

⁵⁴Ta rangnge mina harre ri Kattu-kattu Aigama he, hari-hari ne lipedai Stefanus, dhai paddha ne ade ro, jhe dhai bubu dhara ro nga Stefanus.

⁵⁵Tapulara Stefanus do tobo ke ri Henga Deo ne ta tengara ke la liru. Ta ngadde ke ri no ne weo nga kana Deo, nga Yesus do era do titu pa era pereda No do pe hebhakka kedhanga Deo ne.

⁵⁶”Heleo we,” ane Stefanus, ”ngadde ke ri ya ne era do mmau do megala ne, do boka anni, jhe Ana Ddau Raiwawa do titu pa hebhakka-ai dhanga Deo!”

⁵⁷Ta jhammi wodilu ke ne kattu-kattu aigama he, jhe peka-ka ro, jhe hagga hetakka dhangnge ro la wuhe Stefanus.

⁵⁸Ta nune-pera'o-ra'o ke ri ro Stefanus la tele ngati dhara rae ne, jhe kajjhe no ri wowadu. Ne ddau-ddau do heleo ne lai do napoanne ta la takka ke ri ro ne bhara Stefanus pa hedhapa heddau ana do ngarru ne ngara no Saulus.

⁵⁹Pa dhara nga wuhe ri wowahu Stefanus, ta peka ke Stefanus, ”Wo Yesus Muri ya, hamme we ne henga ya.”

⁶⁰Moko ta lakku rutu ke Stefanus, jhe peka nga lipeka do maddu, ”Muri, bhole pehape we pa ro ne lubhu harro nga menyilu ro do nadhe!” Ta alla no pepali mina harre ta made le ke no. Saulus do mengallu dhara lema ri lua made do naanne.