Read Sabu LUA RASUL-RASUL 8 Bible Online

LUA RASUL-RASUL 8 - Sabu bible

LUA RASUL-RASUL 8

¹Pa dhara awe do naanne lema ta jhari ke ta hudhi nga peraga ne do herani do pa Yerusalem, hakku hari-hari ne ddau do manno do kaho he ta menyabbha ke la hebhakka-hebhakka, la hari hewue Yudea nga Samaria, titu wata rasul-rasul he we ne do adho.

²Ne ddau-ddau do nga lua meda'u he pa Deo, ta kako ke ro la pedane Stefanus jhe nga tangi pedihi noho taga no.

³ Tapulara Saulus do petadi teru ke ta peila ne do herani he. Ta narru ke ri no ti hewue ammu la hewue ammu jhe la nuni pemahhu la tele ne ddau-ddau do parahajha he jhe pemaho la dhara ammu bhaddo.

⁴Ri ddau-ddau do parahajha he ta peja'e-pepeke ke ne Li Hagha Dhara do ngeti Deo ne la hebhakka-bhakka.

⁵Ta kako ke Filipus la Samaria jhe la pepeke pa ddau-ddau do pa ni ne jhara lua Duae Mone Mone ma'i-Mone golo do jaje ri Deo ne.

⁶Ta rangngi ri ddau-ddau he ne do pedae ri Filipus ne, jhe ngaddi ne lua-lua madalae do tao ri Filipus he, ae ngati ro do pedhanno nga ne nga ne do peke ri no he pa ro.

⁷Ae ne wango do mahhu-anni nga peka-ka ngati dda-ddau do wujhu. Dhai ae ne ddau do made heatta nga do kai ne do peie.

⁸Moko dhai tarra ne mengallu nge nga kehaka dhara ne ddau do pa Samaria he.

⁹Pa dhara rae do naanne era heddau momone ne ngara no Simon, do tui bhalle ke ne pebilu ri no ne do Samaria he ri lipana no. Jhe laje ri no pa do Samaria he, ta no heddau do dhai tarra.

¹⁰Moko hari-hari ddau pa dhara rae do naanne, ngati hari-hari lapi ddau-rai do pedhanno ke nga no. Ne ane ro pa ddau do naanne, ”Ddau nadhe do nga lua rui nga kedi ngati Deo do dhai ketoo ne, do lii ta ’Lua rui do pehilo-wole ne.’ ”

¹¹Do dhai ke ne pebilu ri no ne ddau he ri lipa na no ne, hakku do dhai pedhanno ke ne ddau he nga no.

¹²Tapulara ta pepeke ke ri Filipus pa ro ne jhara Li Hagha Dhara do peteleo jhara mina mii Deo ne medae ta pereda mii Duae, nga jhara lua Yesus Kristus, Duae Mone ma'i-Mone golo ne. Moko ta parahajha ke ro nga lii do pedhae ri Filipus pa ro he, moko ta pejhiu ke ie ta momone mina harre lema ne mobanni he.

¹³Simon lema miha parahajha. Ta alle no pepejhio, pee nga pedute Filipus ri no. Ta jadhi ta ju madalae ke Simon, ri lua-lua madalae do jadhi he.

¹⁴Ta rangngi ke ne rasul do pa Yerusalem he ta ne ddau-ddau do Samaria he do hamme ke ne lipedai Deo ne. Ri do mina harre ke ta pepu ke ri ro Petrus nga Yohanes la ni.

¹⁵Ta dhai Petrus nga Yohanes la ni, ta hebhajha ke ro tu do Samaria he, mita ie ro ta nara Henga Deo,

¹⁶rowi do dho dakka dae Henga Deo la helibhu ro ie ta heddau he; alla pepejhiu pa dhara ngara Yesus he ko we ro.

¹⁷Moko ta dhede ruai ke Petrus nga Yohanes pa wokolo do Samaria he, moko ta hamme ke ri ro ne Henga Deo ne.

¹⁸Do ngadde ri Simon ta do taga tari takka ruai ne rasul he la wokolo ddau he, hakku hamme ri ro Henga Deo. Ri do mina harre ta ggu doi ke Simon la nga Petrus nga Yohanes,

¹⁹jhe lii no, ”Wie we pa ya le ne kuaha do naanne, mijhi kinga takka ya ruai pa wokolo nadu we, moko ne ddau do na harre ta nara le ke ne Henga Deo ne.”

²⁰Tapulara ta lii ke Petrus, ”Apa nga kerewe au nga doi au do na harre! Pa penge au ne nga ne do wie ri Deo ne do ta walli ri doi?

²¹Bhole dho au nga unu pala tu ta pedutu pa dhara lua jhagga jhi dhe, rowi ne ade au do kelakku pe naja nga Deo.

²²Rowi do mina harre ke hane we ne penge au do woapa ne, jhe ami we au pa Muri, mita ie ta pehuba ri No ne lua penge au do woapa ne!

²³Rowi do toi ri ya, ne ade au do huke ri lua pana dhara, jhe au dhe naannu ri laua apa nga kerewe ne.”

²⁴Moko ta lii ke Simon pa Petrus nga Yohanes, ”Ruba kowe ne dhara mu ta ami pa Muri, mita ie ne nga ne do pale ri tuahhu he, nara dho hahhi he ta lakka pa ya.”

²⁵Ta moko le Petrus nga Yohanes ne wie lipejhara nga pepeke ne lipedai Muri ne, ta bhale ke ro la Yerusalem. Jhe pa loro jhara kako ro, pepeke ri ro ne Li Hagha Dhara ne pa rae-rae do Samaria he.

²⁶Ta lii ke heddau naju Deo pa Filipus, ”Pekaddhi we la bira Bhollau la rujhara do ngati Yerusalem ju la Gaza ne.” Ne rujhara do naanne do keliu-kejidho.

²⁷Moko ta pekaddhi ke Filipus. Pa dhara awe do naanne do era heddau pegawai ngati dhara rae banni-ae Etiopia do pa dhara awe ta bhale ke no la rai la liha no. No heddau pegawai mone-ae do pemoko hari-hari lua kaja nga kete'e Kandake banni-ae ihi rai Etiopia. Ne ddau do naanne ti wie hu nga mejura pa Deo la Yerusalem, jhe do pa dhara nga ta bhale ke no, do nga ha'e doka. Pa dhara nga mejaddhi no pa dhara doka ne, do nga ajhe ri no ne buku Nabi Yesaya.

²⁹Ta lii ke Henga Deo pa Filipus, ”Kako au la pehedharra-anni nga doka do napoanne.”

³⁰Moko ta kako ke Filipus la pehedharra-anni nga doka do naanne, ta rangnge ke ri no ne ddau do naanne do era nga ajhe Buku Yesaya. Ta kebhali ke Filipus pa no, ”Tada ma ke Tuan ne nga ne do ajhe ri tuan ne?”

³¹Ta bhale ke ri ddau do naanne, ”Mina mii ne nara ya ta tada, ki do dho era ne ddau do peteleo pa ya?” Moko ta perihe ke Filipus ri no ta ha'e la dhara doka ne, jhe la mejaddhi hela'u-la'u nga ddau do naanne.

³² Na hedhe ke ne lilolo do ajha ri ddau do naanne, ”Hala dho ke no mii ki'i jhawa do lere ta la kehabbhe he, mii hengi'u ki'i jhawa do dho i'a kebee he, kinga ghute ne rrau No, mina harre ke, bhule ledho no nga i'a boka ubha he.

³³Ta kare ta menihe ke No, jhe tao pa no e'e ne ddhei he ke, jhe bhete ne wue wohenga No ngati danni raiwawa do nadhe, hakku bhule dho ke heddau he do nara ta pedae-pejha'e ne kolo loro No.”

³⁴Ta lii ke ne pegawai mone-ae do ngati Etiopia ne pa Filipus, ”Hakko ko we ta peke pa ya, nadu ke ne do pedabbho ri nabi do nadhe? Jhara lua ngi'u no ke miha, we jhara lua ddau do hewala?”

³⁵Moko ta jhari ke Filipus ta pedai lii; ta pe ke ri Filipus ne lilolo do na harre, mii lai petari tu ta peke ne Li Hagha Dhara jhara lua Yesus pa pegawai mone-ae do naanne.

³⁶Pa telora loro jhara kako ro, ta dhai ke ro la era do era nga ei. Ta lii ke ne pegawai mone-ae do naanne, ”Heleo, oni ke ne ei pa nidhe! Ne nga ri ko ne kura tu ta pejhio ya?” [

³⁷Ta lii ke Filipus, ”Kinga parahajha ke Tuan nga hewue nge danni-ade, do nara ke Tuan ta pejhio ma.” Ta lii ke ne pegawai mone-ae do ngati Etiopia ne, ”Do parahajha tarra ke ya nga hewue nge danni-ade pa Yesus Kristus ta do tarra ta No ke ne Ana Deo ne.”]

³⁸Moko ta lii ke no ta pengahe ne doka ne; ta alla pemina harre, ta puru ke ro hari do dhue nga Filipus la dhara ei ne, jhe pejhio no ri Filipus.

³⁹Ta dhai ro ta mahhu-anni ngati dhara ei ne, ta pemarre ke Filipus ri Henga Deo ti anne. Ngadde dho ke no ri pegawai mone-ae do naanne. Ta kako teru ke ne pegawai mone-ae do naanne nga mengallu nge nga kehaka dhara.

⁴⁰Ta era ke Filipus pa Asdod. Jhe pa dhara nga peterue ri Filipus ne loro jhara kako no, pee ke ri no nga pepeke ne Li Hagha Dhara jhara lua Yesus pa hari-hari rae tade dhai no la Kaisarea.