Read Sabu LUA RASUL-RASUL 9 Bible Online

LUA RASUL-RASUL 9 - Sabu bible

LUA RASUL-RASUL 9

¹Pa dhara awe naanne lema pee ke Saulus nga petadi ta pehudhi nga pemade ne ddau do parahajha pa Yesus he. Ta kako ke no la nga kattu mone-ae mone tunu-menahu ne,

²jhe la ami no huri-kuaha tu ta kako la nga kattu-kattu ammu hebhajha do Yahudi he pa Damsyik, mijhi ki peabu no nga ddau-ddau do parahajha pa Yesus he, do nara ke ri no ta kappa jhe aggu la Yerusalem.

³Pa dhara nga kako no ju la Damsyik, ta dhai ta unu la rae do naanne, ta ke wa'a hetakka ke ne kelala ngati liru jhe la kehabbha pekehero Saulus.

⁴Ta herabba ke Saulus la worai jhe rangnge ri no hahhi lipedai do lii pa no, ”Saulus, Saulus! Ta nga hakku pehedue Ya ri au?”

⁵Ta kebhali ke Saulus, ”Muri, nadu ke Au?” Ta bhale ke ri lipedai do naanne, ”Ya ke, Yesus do pehedue ri au dhe.

⁶Tapulara pa awe nadhe kaddhi we au jhe maho la dhara rae dhe. Pa ni do ta pake ri ya pa au, ne nga ne do jhamma ta tao ri au.”

⁷Ta haraghagha ke ne ddau-ddau do hela'u-la'u nga Saulus he, jhe nara doke ta lii nga-nga ri, rowi do rangnge ri ro ne lipedai do naanne, tapulara ngaddi dho ri ro ie ta heddau he.

⁸Moko ta kaddhi ke Saulus ta titu, jhe boke ne namada no, tapulara ngaddi dho ke no ne nga-nga. Hakku ta kedhago ke ri ro ne ruai Saulus jhe hebake la Damsyik.

⁹Tallu lodho ne tui nara dho Saulus ta ngaddi ne nga-nga, jhe mina harre lema ne worawwu tui, bhule tu-tu dho no ta nga'a ta nginu ne nga-nga.

¹⁰Pa Damsyik do era heddau ne ddau do pedute Yesus, ne ngara no Ananias. Pa dhara hahhi lai nii, ta lii ke Muri pa no, ”Ananias!” Ta bhale ke ri Ananias, ”We Muri.”

¹¹Ta lii ke Muri, ”Kako we au pa dhara awe nadhe dhangnge la ammu Yudas pa Rujha Molo ne. Kebhale ri au pa ni heddau ne ngara no Saulus do ngati Tarusus ne. Ne ddau do naanne do nnai pa dhara hebhajha,

¹²jhe pa dhara lai nii do ngadde ke ri no heddau momone ne ngara no Ananias, do dakka la nga no jhe la takke ne ruai la wokolo no, mita nara no ta ngaddi bhale wari.”

¹³Ta bhale ke ri Ananias, ”Muri, do ae ke ne lii ddau do rangngi ri ya, ne jhara lua ddau do nadhe, rihi-rihi jhara lua hudhi nga peraga do tao ri no pe naja nga annu-niki Au pa Yerusalem.

¹⁴Jhe pa dhara awe nadhe ne dakka no ma dhe, do wie lua ke pa no ri kattu-kattu mone tunu-menahu he tu ta ma kappa ne ddau-ddau do parahajha pa Au he.”

¹⁵Tapulara ta lii ke Muri pa Ananias, ”Kako we au! Rowi do alle ke ri Ya pepidhe no tu ta pekako ne lua jhagga Ya, mita ie no ta la pepeke ne jhara lua Ya pa ddau-ddau-rai do wala he do adho do aigama Yahudi nga pa duae-duae, jhe mina harre lema pa do Israel he.

¹⁶Jhe ri Ya miha do ta peteleo pa no hari-hari ne lua hedui-herui do ta dhue ta hape ri no taga Ya.”

¹⁷Moko ta kako ke Ananias la ammu do naanne jhe la takke neruai no pa woko lo Saulus, jhe lii no pa Saulus, ”Wo tuahhu ya Saulus, ri Muri Yesus do ngadde ri tuahhu ne, pa rujhara do ta ju ma dhe ne, mita ie tuahhu ta ngaddi bhale wari jhe tobo au ri Henga Deo ne.”

¹⁸Pa dhara awe naanne dhangnge, ne nga marra do mii nai nadu'u he, ta bunu ke ngati namada Saulus, moko ta nara ke Saulus ta ngaddi bhale wari. Moko ta kaddhi ke Saulus, jhe pejhio no.

¹⁹Ta alla no penga'a-penginu, ta rui bhale wari ke no. Ta pee ke Saulus nga ddau do parahajha pa Yesus he parri lodho ne tui.

²⁰Ta kako ke no la ammu-ammu hebhajha, jhe jhari no ta pepeke jhara lua Yesus, ta Yesus ke ne Ana Deo ne.

²¹Ta madalae ke ne ddau he hari-hari, ne dhanno ne lii Saulus do naanne. Ta lii ke ro, ”Adho no ma ke dhe do pemade hari-hari ddau do parahajha he pa Yerusalem? Jhe ne dakka no ma dhe, do ta ma kappa nga ta ma aggu ne ddau do parahajha he la nga kattu-kattu mone tunu-menahu he!”

²²Tapulara ta ju rui ke ne lua penau Saulus nga ddau he. Ne telia-telia do pedae ri no jhara lua Yesus do mina harre ne wowarru pekatta ta do Yesus ke ne Duae Mone ma'i-Mone golo ne, hakku nara dho ke ta pebhata ri ne do Yahudi do pee pa Damsyik he nga no ri.

²³ Dhai dho ta mina mii le ne tui, ta pehela'u lii ke ne do Yahudi ta pemade Saulus.

²⁴Tapulara ne lua do perijho ri ro do naanne do nara ta toi ri Saulus. Anni maddha nga anni lodho, pee ke ri ro nga jaga bharra ne ubha-ubha toka rae he tu ta mate Saulus ta pemade.

²⁵Tapulara pa dhara herammi, ta aggo ke Saulus ri ddau do parahajha he, jhe la pedhule ri ro pa dhara hewue keraja jhara kolo tebo rae ne.

²⁶Ta kako ke Saulus la Yerusalem, jhe pa ni ta kale ke ri no ne rujhara ta la peobo nga do parahajha pa Yesus he. Ta tapulara do meda'u ne ddau do parahajha he penaja nga Saulus, rowi do dho parahajha dae ro nga Saulus ta do alla tarra-tarra ke no pejadhi ta ddau do parahajha pa Yesus.

²⁷Ta dhai ta dakka ke Barnabas la nga no, jhe aggo no la nga rasul-rasul he. Ta pedhire ke ri Barnabas pa ro ne jhara lua mina mii Saulus ne ngadde Muri pa telora rujhara ne, nga mina mii ne lii Muri pa Saulus. Peke lema ri Barnabas mina mii ne bhani Saulus ta ajha ddau pa Damsyik nga ngara Yesus.

²⁸Moko ri do mina harre ke ta pee ke Saulus nga ro, jhe kako no la peliba nga dhai bhani dhallu pa hari hewue Yerusalem nga ngara Yesus.

²⁹Saulus do pedai lii jhe pebhata le ma nga do Yahudi do pake lii Yunani he, tapulara kale ri ro ne rujhara tu ta pemade Saulus.

³⁰Ta dhai ta toi ne lai do naanne ri ddau do parahajha do hewala he, ta aggo ke Saulus ri ro Kaisarea, ta alla pemina harre ta moe ke no la Tarsus.

³¹Moko ta ketanna ke ne jemaat pa hari hewue Yudea, Galilea nga Samaria. Nga do rabhe ri Henga Deo, nga ri lua meghighi-meda'u pa Muri, moko ne jemaat jemaat do na harre ta ju rui nga ju ta ae ke.

³²Ta kako ke Petrus la hebhakka-hebhakka la heahu ne jemaat-jemaat he. Helodho ta kako ke no la heahu ne naannu Muri he do pa Lida.

³³Pa ni ta peabu ke no nga heddau momone ne ngara no Eneas do made heatta, jhe do adho ke do ngaddi ta kaddhi ri ngati era bba'i no, aru bhue ttau ke ne tui.

³⁴Ta lii ke Petrus pa Eneas, ”Eneas, Yesus Kristus ke ne do peie au. Kaddhi we au, jhe pe ie we ne era bba'i au.” Pa awe naanne dhangnge ta kaddhi ke Eneas.

³⁵Hari-hari ne ana-rai pa Lida nga Saron do ngadde Eneas, moko ta parahajha ke pa Muri.

³⁶Pa Yope do era heddau mobanni ne ngara no Tabita. No heddau do parahajha pa Yesus. (Ne ngara no kinga pa dhara lii Yunani Dorkas do kinga pebhale ma lii di ’roha’). Do loro-loro ke no ne tao lai-lai do woie ta ruba dhara nga ddau-ddau do kehia nga gahara.

³⁷Pa dhara awe naanne ta lakka ke no ri paddha, jhe moko ta made. Ta alle pepejhio ei, ta aggo ke la takke la kama do pa dhida.

³⁸Yope adho do rihi ne jjhau nga Lida. Hakku ne ddau do parahajha pa Yesus do era pa Yope ta rangngi ke ta do era Petrus pa Lida, moko ta pepu ddau ke ro la nga Petrus jhe nga lijaji do mina hedhe, ”Marri-ai-ai we ne dakka ma dhe.”

³⁹Ta kaddhi dhangnge ke Petrus pedutu ro. Ta dhai la Yope ta aggo ke no la kama do pa dhida ne. Hari-hari ne mobanni moniki-wue do paanne he, ta la pewore ke Petrus jhe tangi, jhe pejhujhu ri ro pa Petrus ne bhajhu-bhajhu nga juba-juba do jhau ri Dorkas tu ro he pa awe nga muri mada ne ko no.

⁴⁰Ta lii ke Petrus pa ro hari-hari ta mahhu-anni, ta lakku rutu ke Petrus jhe hebhajha. Ta alla pemina harre ta naja hedhapa ke no ju la nga ngi'u Dorkas ne, jhe lii, ”Tabita, kaddhi we!” Moko ta boka ela ke Dorkas, ta ngadde ke Petrus ri no, ta mejaddhi ke no.

⁴¹Moko ta parro ke ne ruai no ri Petrus, tu ta rabhe no mita titu. Ta alla pemina harre ta pedoa ke ri Petrus ne ddau-ddau do parahajha nga mobanni moniki-wue he do era paanne, jhe wie ri No, Dorkas do alla ke pemuri bhale wari ne pa ro.

⁴²Ta menyabbha ke ne lii jhara lai do naanne la hebhakka-hebhakka, pa hari hewue Yope, hakku do jhajhi ae ddau do parahajha pa Yesus ta do No ke ne Duae Mone ma'i-Mone golo ne.

⁴³Ta pee ke Petrus pa ni parri lodho ne tui pa ammu heddau mone pelumu kuri.