Read Sabu ROMA 1 Bible Online

ROMA 1 - Sabu bible

ROMA 1

¹Tuahhu-tuahhu hari-hari pa Roma do hajha-do ddhei Deo nga do alla ke pe pedoa ri Deo ta jadhi annu-niki No. Alle ke ya pepidhe pedhede jhe petone ri Deo tu ta pepeke ne Li Hagha Dhara do ngati Deo ne.

²Ne Li Hagha Dhara do naanne do alle ke pejaje ri Deo pa awe do uru do pelake jhara nabi-nabi No he nga do alle pehure-pebhuke pa dhara Buku Lidara-Likewahhu Deo.

³Ne Li Hagha Dhara do naanne jhara lua Ana Deo, Muri di Yesus Kristus. Mii ddau raiwawa, No kolo loro Daud,

⁴tapulara ti kebhihu Deo, No do teleo ke ta Ana Deo. Ne lai napoanne do teleo ke ngati kuaha do rihi nga ihi do pelake jhara lua kaddhi No ngati lua made-mada.

⁵Do pelake jhara No lema ke ne wie ri Deo pa ya ne lua ruba dhara tu ta jadhi rasul, mita ie ke ya — ta takke pekerihe Kristus — ta hewewe ddau-ddau ngati hari-hari ddau rai, mita ie ro ta parahajha jhe halla-anni.

⁶Ne do pedabbho nga hari-hari ddau rai, do maho ke ta mu lema do era pa Roma he; do alla lema ke mu pepedoa tu ta jadhi annu-niki ri Yesus Kristus.

⁷Taga tari do mina harre ke hakku tu ta bhuke ri ya ne huri do nadhe tu mu. Jhe nga ito nga henao ri ya, Deo do Ama ri di nga Muri di Yesus Kristus ne do ta wie ne lua tarro ie nga menyarro mangngi nga lua mengallu nge nga kehaka dhara tu mu.

⁸Petari-tari pelake jhara Yesus Kristus, peha'e ri ya ne kolo liie nga ae pa Deo taga Tuahhu-tuahhu he hari-hari; rowi hari hewue raiwawa dhe do rangngi ke ta do parahajha tarra ke mu pa Kristus.

⁹Do pee nga henge mu ri ya, kinga hebhajha ke ya. Deo ke ne hakahi ne ta do ne nga ne do pale ri ya dhe, do petu tarra. No ke Deo do pemoke ri ya nga hewue nge danni ade, nga loro jhara ta pepeke ne Li Hagha Dhara jhara lua Ana No ne.

¹⁰Do ami nga petu-petarra ke ri ya pa Deo, ki ie mudhe he ya wie pa ya ne awe do kehoo pa awe nadhe mita kako ya la peabu nga mu.

¹¹Rowi do ddhei tarra-tarra ke ya ta la peabu nga mu mita nara le ri ya ta pebhage nga mu ne lua ruba dhara ngati Henga Deo tu ta perui mu.

¹²Ne do pedabho ri ya dhe wala dho ke taga tari do hela'u-la'u ke di do parahajha ke pa Yesus Kristus, moko do nara ke di ta perui heddau nga heddau.

¹³ Tuahhu-tuahhu! Mita ie ri mu ta toi ta do jhajhi wari ke ya ne era nga lua ddhei ta la peheabu nga mu, tapulara ta era-era we ne rulabba ne. Ne ddhei ya mita ne lua jhagga ya ta era le nga wila nga wue pa telora mu, hela'u le mii lua jhagga ya pa telora ddau-ddau do wala do adho do Yahudi he pa era do wala-wala he.

¹⁴Rowi ya do nga tenge penaja nga hari-hari ddau; ddau do i'a hadha nga do adho do i'a hadha, ddau do hekola nga do adho do he kola.

¹⁵Taga ri do mina harre ke hakku do ddhei tarra ke ya ta la pepeke ne Li Hagha Dhara ne pa mu do pee pa Roma lema.

¹⁶ Do dhai tarra ya ne parahajha jhara Li Hagha Dhara ne, rowi ne lii do naanne lua rui nga kedi Deo tu ta ma pehelama hari-hari ddau do parahajha, petari-tari do Yahudi, jhe itu ri ddau do wala rai he.

¹⁷ Rowi ri Li Hagha Dhara do naanne ke ne peteleo ri Deo mina mii ne loro jhara tu ta ie bhale wari ne lua pedu di ddau raiwawa nga Deo; jhe ne loro jhara ne, wala dho ke parahajha Deo, rai ti petari lohe la pedakka rahi. Ne napoanne mii do hure do bhuke pa dhara Buku Lidara-Likewahhu Deo, ”Ddau do parahajha pa Deo, hakku nara ta ie bhale wari ne lua pedu nga Deo, ddau do na poanne ke ne do medae ta muri mada!”

¹⁸Ngati era do mmau do megala ne pedhelo ri Deo ne lua paddhu nga kete bubu dhara No penaja nga hari-hari lubhu harro nga menyilu nga lua apa nga kerewe ddau raiwawa, jhe taga tari lua apa nga kerewe ke ne do labbe ddau raiwawa ta hamme ne liajha do petu ne jhara lua Deo.

¹⁹Ne nga ne do nara ta toi ri ddau raiwawa jhara lua Deo do teleo ke pa dhara ade nga penge ddau raiwawa, rowi do alle ke pepeteleo ne lua do na harre ri Deo ma miha pa ddau raiwawa.

²⁰Rai tare ta peera raiwawa ri Deo ne wue nga bha'u Deo do dho ngadde ne, jhara lua No mii Deo ne nga kuaha No do peloro ne, do nara ke ta toi ma ri ddau raiwawa ti hari-hari do alla pepeera ri No he. Hakku bhule tu-tu dho ke pa ddau raiwawa ne era jhalli ri tu ta pemola-anni.

²¹ Deo do tade ma ri ddau raiwawa, tapulara takke dho Deo pekerihe ta mii Deo he, jhe i'a le dho ma ta wie kolo lii ie pa No. Do wala ri ne do tao ri ddau raiwawa, wata ke ddhei ta penge ne lai-lai do dho bhule nga pejhara we; ne ade ro do ke rabba ke.

²²Pa penge ro do mmau dhara ke ro, tapulara ne pa petu ne do bhodho ro.

²³ Adho ro do wie hu nga mejra pa Deo do peloro ne, tapulara pa nalu-nalu do tao ti ajhu nga wowadu do mii hia nga wewo ne nga we do kemuki do na ra ta made; do mii ddau raiwawa, do lila, bhada do appa laa kae nga do rodho ri kabu.

²⁴Ri do mina harre ke ta heni ke ro ri Deo pepelala-jhani-ani pepereda ri lua ddhei ade ro do apa do kerewe he, hakku tao ri ro ne lai-lai do ra'i do tongo penaja nga ro miha.

²⁵Deo do petu ne, gate ri ro ri ne nga-nga do dho petu he. Adho Mone Peera ne tapulara pa bhara do peera he ri ro ne wie ro huunga mejura nga do pemoke ri ro nga woie. Jhe ne do pa petu ne pa Mone Peera ne ke ne do jhamma ri ro ta pedhede pekelode lohe la lodho do na mi-mi ne! Amin.

²⁶Rido mina harre ke, ne do tao ri ddau raiwawa, moko ta hani ke ro ri Deo ta pedutu nga lua ddhei nge nga ade ro do apa do kedhaha he. Ne mobanni-mobanni ro he, adho ke do era ri nga lua matta dhara nga momone do mii pa tima he pa ddau raiwawa, tapulara do matta dhara nga mobanni hela'u ke.

²⁷Mina harre lema ne momone he adho ke ro do bba'i woie hela'u nga mobanni mitima he pa ddau raiwawa, tapulara do bba'i hela'u nga momone hela'u ke. Ne momone he do tao ne lai-lai do pemekae dhara ddau penaja nga momone hela'u hakku do hammi ke ri ro ne lua wolo do pekatta nga wui ai ro do woapa he.

²⁸Rowi do dho bhule ke ddau raiwawa nga lua paralu ta tade Deo, moko ta hani ke ri Deo ne lua penge ro peapa-pekedhaha, hakku ta dhawu ke ro ne tao ne lai-lai do dho ie ta tao ri ro.

²⁹Ne ade ro do tobo do huke ke ri hari-hari lai do apa do kedhaha, do adho do petu; do tobo ke ri lua lala nga lai do apa do kerewe, do wwau do benga nga lua takka nui-takka bubu; do huke ri lua ddhei ta hiu-ta bhagi ddau, pehala-pealla, pote nga appi nga lua takka nui. Ddhei ta pedai ngara ddau,

³⁰ddhei ta peapa ngara ddau do wala wue-anni nga kura ajha, do paddhu nga kete nga Deo, jhe do ddhei nga lua pengedhe. Do dhai i'a ro ne kale loro jhara do wiu tu ta tao lai-lai do woapa. Pelawa-petaddhu nga ina nga ama;

³¹jhe wae dho ro ta i'a jhara lua-lai ddau do wala; adho do mola nge, jhe adho do era nga ade do i'a ruba dha ra nga ddau nga ddau ihi-anga.

³²Do toi ma ri ro, do ki pedutu nga lii do dare ri Deo, ne ddau do tao hari-hari ne na harre do jhamma ke ta wolo pemade. Maji lema ta mina harre, ta tao ma ri ro ne lai-lai do na harre jhe rihi ri ko ti na harre do maddhi pa dhara ro lema ki tao ddau do wala ne lai do mina harre.