Read Sabu ROMA 6 Bible Online

ROMA 6 - Sabu bible

ROMA 6

¹Ki do mina harre ne nga ke ne do nara ta pale ri di? Do jhamma ke di ta pee nga dhawu we ne tao lubhu harro nga menyilu, mita ju loro ne ha jha nga ddhei Deo nga di?

²Bhara tatu ta adho do mina harre! Adho ke lubhu harro nga menyilu ne do nga higa ri pa di, hakku mina mii ri di ne ddhei ta pee loro pa dhara muri mada do ddhei ta tao lubhu harro nga menyilu?

³Toi ke we adho ri Tuahhu-tuahhu he ta do pa dhara awe nara ei-herani ne di, do ujhe ke di pehekeradde nga Kristus Yesus? Nadhe ne pa petu ne, ta pekeheradde ke di nga lua made Kristus.

⁴ Ri lua pejhiu do naanne ke di nga Kristus jhe made hela'u nga No, mijhi mina mii Kristus ne pemure bhale wari ngati dhara made mada, ri lua higa nga kuaha Ama do mone dhida nga kelodo ne, mina harre lema ke di ne nara ta narro nga lake ne hahhi muri mada do wowiu.

⁵Ki do hahhi ke di nga Kristus, rowi do made ke di hela'u nga No, do medae lema ke di ta jadhi hahhi nga No, rowi do pemuri bhale wari le ke di mii No lema.

⁶Do toi ke ri di ma ta do wue di do dui ne mii ddau raiwawa ne, do alle ke pepemade hela'u-la'u nga Kristus pa ajhu ketoe ne higa wue di do tobo ri lubhu harro nga menyilu ne ta pemae tebho ttei ke; jhe ri do mina harre ke adho ke di ri do naannu ri lubhu harro nga menyilu ri.

⁷Rowi ki do made ke heddau ddau, ddau do napoanne do alle ke pepeballe kattu ngati kuaha lubhu harro nga menyilu.

⁸Ki do alla ke di pemade hela'u nga Kristus, do parahajha ke di, ta do di lema do medae ke ta muri hela'u nga No.

⁹Rowi do toi ke ri di ma ta do Kristus do alle ke pepemure bhale wari ngati dhara made mada, jhe adho ke No do madae ri ta made, lua made mada bhule dho ke nga higa ri pa ngi'u No.

¹⁰Lua made mada do narro do lake ri Kristus ne, lua made penaja nga lubhu harro nga menyilu ne ke. Lua mada napoanne tu hewari we ne jadhi lohe la lodho do nami-mii ne. Jhe ne muri mada do narro do lake ri No pa dhara awe nadhe, muri mada tu Deo ke.

¹¹Ri mu lema do jhamma ke ta ege ne ngi'u mu ta do made ke mu penaja nga lubhu harro nga menyilu, tapulara muri mada pa dhara lua pedu do dhai bharra nga Deo do pelake jhara Yesus Kristus.

¹²Bhole jhane ri we ne muri mada mu do pa dhara hemelila dhe ta pereda ri lubhu harro nga menyilu, mita ie mu ta do dho pedute ri ne lua ddhei no do woapa ne.

¹³Bhole jhole ri we ri Tuahhu he ne nalu-nalu ngi'u mu la dhara higa lubhu harro nga menyilu tu ta pake pa lua pedabbho do woapa ne. Tapulara jhole we ri mu ne ngi'u mu pa Deo mii ddau do alla pelari-anni ngati dhara made mada la dhara muri mada. Jhole we ne ngi'u mu hari heddau pa Deo mita pake tu ta jhagge ne lua ddhei Deo.

¹⁴Ie dho ke lubhu harro nga menyilu ta pereda ri pa mu, rowi adho ke mu do muri mada pa dha'i uku aigama Yahudi ri, tapulara pa dha'i pereda lua ruba dhara Deo ke.

¹⁵Pa awe nadhe, kita peheatte ne nga ke? Do ie ke di tao lubhu harro nga menyilu, rowi do adho ke di pa dha'i pereda uku aigama Yahudi, tapulara do pa dha'i pereda lua ruba dhara Deo ke? Adho tut-tu mina harre.

¹⁶Do toi ke ri mu ma ta do kinga jhole ke ri mu ne ngi'u mu pa heddau ddau tu ta jhagge ne lua ddhei no, moko mu do jadhi ke naannu ri no ke do pedutu ri mu ne — naannu ri lubhu harro nga menyilu we, do ta aggo mu la dhara lua made mada ne we jadhi ta naannu do pedhanno nga lii Deo, jhe ri do mina harre do peie wa ri ke nga Deo.

¹⁷Tapulara kolo lii ie nga ae ne do jhamma ta pedhae pa Deo! Rowi do pa uru jhara he, mu do jadhi annu ri lubhu harro nga menyilu tapulara pa awe nadhe do nga hewue nge danni ade ke mu ne pedute ne liajha do petu do alle pewie pa mu ne.

¹⁸Do alle ke mu pepeballa kattu ti dhara lubhu harro nga menyilu, jhe pa awe nadhe do jadhi ke mu ta naannu tu lua ddhei Deo ke.

¹⁹Rowi ne lua tada mu do mina harre ne worawwu keloe, ta pake ko ri ya ne telia-telia jhara lua penaannu-anni, mita ie mu ta henginga ne tada. Rai do uru he, do jhole ke ri mu hari heddau ne ngi'u mu mii naannu lai-lai do ra'i do tongo nga do woapa tu lua pedabbho do apa do kerewe ne. Mina harre lema pa dhara awe nadhe do jhamma ke mu ta jhole ne ngi'u mu hari heddau, mii naannu tu lua ddhei Deo, jhe do petone wata ke pa lua pedabbho-lua pedabbho Deo we.

²⁰Pa awe jadhi ta naannu ne mu ri lubhu harro nga menyilu, adho ke do pereda ri lua ddhei Deo.

²¹Pa awe do nadhe ne nga ke ne lua mangngi do ta hamme ri mu ngati lai-lai do pa dhara awe nadhe do mekae ke mu ki tao ri mu ne na harre? Ne wui-ai wui-tao do na harre wata ke ta aggu ne lua made we!

²²Tapulara pa awe nadhe alla ke mu pepeballa kattu ngati lubhu harro nga menyilu, jhe mu do jadhi ke ta annu ri Deo. Ne lua mangngi mu, do petone ke ne muri mada mu ta tu Deo we, jhe ne lai do napoanne do ta wie ke pa mu ne muri mada do petu nga do peloro ne.

²³Rowi lua made mada, nepoanne pai-pala ngati lubhu harro nga menyilu; tapulara lua muri mada do petu nga do peloro ne hela'u nga Kristus Muri di, napoanne do wie ri Deo nga do dho bhule nga kebhue.