Read Sabu ROMA 8 Bible Online

ROMA 8 - Sabu bible

ROMA 8

¹Pa awe nadhe adho ke do era ri ne lua wolo tu ro do muri mada pa dhara heujhu headde nga Kristus Yesus.

²Rowi ne uku Henga Deo ne do pejadhi di ta peheujhu headde nga Kristus Yesus, do alle pepeballe kattu ya ngati uku do pedubhe lubhu harro nga menyilu nga lua made mada ne.

³Ne nga ne do dho nara ta jhagge ri uku aigama ne, taga tari di ddau raiwawa do keloe, ne do na harre alla ke petao ri Deo. Alle ke pepejharre ri Deo ne kuaha lubhu harro nga menyilu pa dhara wue ddau raiwawa nga loro jhara pepue ne Ana No miha, do dakka pa dhara lua do hela'u nga ddau raiwawa do nga lubhu harro nga menyilu, tu ta ma pehai-pehuba lubhu harro nga menyilu.

⁴Ne tao ri Deo ne naanne mita ie ke ne ddhei No do peteleo pa dhara uku aigama Yahudi ne nara ta pekako pa dhara ngi'u di do muri mada nga pedute Henga Deo, jhe do adho ke do pedute ne wue ddau raiwawa ne.

⁵Ddau-ddau do muri mada pedutu nga wue ddau raiwawa, do pee nga penge ne nga we ne do ddhei ri wue ddau raiwawa ne we. Tapulara ddau-ddau do muri mada pedute Henga Deo do pee nga penge ne nga ne do ddhei Henga Deo ne.

⁶Kinga ne lua penge au do pereda ke ri wue ddau raiwawa ne pa pedakka ne lua made mada. Tapulara kinga ne pe nge au do pereda ri Henga Deo ne, pa pedakka ne muri mada nga lua pedhuri-pemira nga Deo.

⁷Ddau do ne lua penge no do pereda ri wue ddau raiwawa ne, ddau napoanne do pemuhu nga Deo; rowi ne ddau napoanne adho do pewawa-anni pa uku Deo.

⁸Ddau-ddau do muri mada pedute wue ddau raiwawa, adho do nara ta pemengallo dhara Deo.

⁹Tapulara mu, adho do muri mada pedute nga wue ddau raiwawa ne. Mu do muri mada pedute Henga Deo — do tatu ke ta Henga Deo ne do rihi rui pa dhara ngi'u mu. Ddau do adho do era Henga Kristus, ddau napoanne adho unu Kristus.

¹⁰Tapulara ki Kristus ne do muri pa dhara ade mu, moko maji lema ta made ne ngi'u mu taga tari lubhu harro nga menyilu, tapulara do ta wie pa mu ri Henga Deo, rowi ne lua pedu mu nga Deo do ie ke.

¹¹ Kinga Henga Deo do pemure Kristus ne ngati dhara made mada ne, do muri pa dhara ngi'u mu, moko No do alle pepemure Kristus ngati dhara made mada ne, do medae lema ta pemuri ne ngi'u mu do nara ta made do napoanne. Ne tao ri No ne napoanne ri Henga No ke do muri pa dhara mu ne.

¹²Taga tari do mina harre, Tuahhu-tuahhu, do nga lua titu di, tapulara adho lua titu penaja nga wue ddau raiwawa ne; adho ke di do tenge ri ta muri mada pedute ne lua ddhei no.

¹³Rowi kinga muri mada mu pedute ne wue ddau raiwawa ne, moko do medae ke mu ta made, tapulara ki ri kuaha Deo, do ta pemade teru ke ri mu ne wui-ai wui-tao mu do pa dhara lubhu harro nga menyilu ne, moko do medae ke mu ta muri.

¹⁴Ddau-ddau do parru do kedhagu ri Henga Deo, ro ke ne ana-ana ri Deo.

¹⁵ Rowi ne Henga do wie ri Deo ne pa mu adho do ta pejadhi mu ta naannu, jhe muri mada mu pa dhara meghighi-meda'u. Tapulara kinga Henga Deo ne do pejadhi mu ta ana-ana ri Deo. Jhe ri kuaha Henga Deo ne, ta pedoe ke Deo ri di ta ”Ama, Ama yae!”

¹⁶Henga Deo do hela'u-la'u nga henga di ne peteleo ta do di hedhe do ana-ana ri Deo ke.

¹⁷Nah, ki do ana-ana ri Deo ke di, moko di lema ana hammi puhaka, do medae ta hammi ne pai-pala mangngi do pemoke ri Deo tu ana-ana No. Do medae ta hammi ke ri di hela'u-la'u nga Kristus ne nga we ne do pemoke ri Deo tu No; rowi ki do dhui-hape ke di hedui-herui hela'u-la'u nga Kristus, moko di lema do ta pedhida-pekelodo hela'u-la'u nga Kristus ke.

¹⁸Hari-hari lua hedui-herui do dhui do hape ri di pa dhara awe nadhe, pe dutu nga pekire ya he, nara dho ta pejhare-mere nga lua weo nga kana do medae ta peteleo pa di ne hine.

¹⁹Hari hewue raiwawa do pa dhara mara matti-matti ke ne mate ne awe ta peteleo ri Deo ne ana-ana No he.

²⁰ Rowi raiwawa do alle ke pehane pemajje-pekero'o, adho ri lua ddhei raiwawa miha, tapulara hane ri Deo ma miha ta mina harre. Maji lema ta mina harre, era ko ma ne lua henao do nadhe:

²¹rowi pa dhara heawe raiwawa do medae ma ta gole peballa kattu ngati higa do ta peape-pekerewe no jhe do medae le ta peballe kattu nga pedhede-peketute hela'u-la'u nga ana-ana Deo he.

²²Do toi ke ri ma lohe hape ma dhara awe nadhe hari hewue liru nga raiwawa do penina noho ke taga tari lua dhui nga hape lua hedui-herui mii heddau ina do penina-noho pa dhara ta kehoo dhara.

²³ Jhe adho ta tu hari hewue liru nga raiwawa we ne do penina noho, di lema do penina noho pa dhara ade nga penge di. Alle ke ri di pehamme Henga Deo mii lua ruba dhara Deo do petari rai, tapulara do pee ko ma nga mate Deo ri di ta ma golo ne ngi'u di hari heddau nga ta ma pejadhi di ta ana-ana ri No.

²⁴Rowi ri do henao ke, moko ta pehelama ke di. Tapulara kinga do ngadde ke ri ne nga ne do henao ri di ne, moko napoanne adho ke lua henao ri. Rowi nadu ke do pee ko ma nga henao heworawwu lai ki do alle ke pengadde ri no?

²⁵Tapulara ki do henao heworawwu lai do adho dae do ngadde ri di, moko do ta mate ke ri di nga merai nge-merai dhara.

²⁶Mina harre lema Henga Deo do ta dakka ma rabhe di kinga keloe di. Rowi do dho toi dae ri di, mina mii ne jhamma di ta hebhajha; Henga Deo ke miha ne do la mengadha nga Deo, tu ta la menangnge tu di do nga lua ito nga henao do mina harre ne worawwu meramma hakku do dho nara ke ta pale ri.

²⁷Moko do Mone tarri lohe ne ade ddau raiwawa, do toi ke ne lua ddhei Henga ne, rowi ne liami Henga pa Deo do tu annu-niki Deo ma, jhe do hela'u nga lua ddhei Deo ma.

²⁸Do toi ke ri di ta do ta peato ma hari-hari lai ri Deo, hakku do ta wie ma ne wila nga weu do woie ne tu ddau-ddau do hajha nga ddhei nga No, nga do pedoa ri No, pedutu nga ne nga do peito ri No.

²⁹Ro ne do alla pebhidhi ri Deo he, do alla lema ke pepetatu rai ti petari rai tu ta jadhi ta heworawwu nga Ana No, Yesus Kristus. Jhe ri do mina harre ke ne Ana No do do naanne do jadhi ta do petari ke pa telora do ae tuahhu-tuahhu.

³⁰Mina harre ke ne pedoa ri Deo, ro ne do alla pepetakka he ri No uru jhara lai uru rai tare, jhe ro ne do pedoa ri Deo he, do wie ke ri Deo ne loro jhara ta pe ie bhale wari nga Deo, do peobo ke ro pa dhara muri mada ngati Deo miha.

³¹Ne nga ke no do nara ta pale jhara hari-hari do na harre? Ki Deo ke ne do anga jhara nga di, nadu ke ne do nara ta pelawa ri nga di?

³²Nga Ana No le miha, hajha dho ma ke No ri, hakku ta jhole he ma ke ri No ri, ta tu di hari-hari, mina mii ri ko ta do dho medae ta wie ri No pa di hari-hari ne do wala he?

³³Nadu ke ne do nara ta roho di ri, annu-niki do alla pejhujhu-pepidhi ri Deo, ki do peteleo miha ke ri Deo ta di hedhe do dho bhule ke nga hala?

³⁴Do era ri ko ne ddau do ta wie hala pa di? Yesus Kristus hine ne do ta titu tu di! No ke ne do alla pemade, kiadho rihi ri ko ti naanne do alle ke pepemure bhale wari ngati lua made mada, jhe do nnai ke No la nga Deo, pa era parru kuaha ne.

³⁵Do era ri ko ne do nara ta ma labbe ne lua ddhei Kristus ti nga di? Nara marra lua hedui-herui ta ma labbe No, kiadho lua dede nga dhaba, kiadho lua menganga dhallu, kiadho lua kehia nga gahara, kiadho lua apa nga kerewe, kiadho lua made mada?

³⁶ Pa dhara Buku Lidara-Likewahhu Deo do hure do bhuke mina hedhe, ”Helodho-rai balla-bilu do pee ke jhi nga muri mada pa raimawo made mada taga Au. Do dho hala ke jhi mii naki'i do ddhei ta jhue ta kehabbha he.”

³⁷Adho! Rihi ri ti naanne pa dhara hari-hari lai do na harre do nara ke di ne lua nara do kemolo ngati No do Mone hajha nga ddhei nga di ne!

³⁸Rowi do parahajha tarra ya, ta do pa hari hewue raiwawa, ie ta made hape la muri mada, ie ta naju Deo hape la mone higa nga kuaha, ie ta lua hedui-herui do do pa dhara awe nadhe lohe la awe do medae ta dakka ne kiadho higa-higa do wala he ri ko;

³⁹ie ta lai-lai do pa liru nidhe, ie lema ta lai-lai do era pa raiwawa kiadho ne nga we do wala he, hari-hari nara dhoke ta labbe Deo tu ta hajha ta ddhei nga di, mii do alle pepedhelo ri No do pa dhara Kristus ta hajha ta ddhei nga di, mii do alle pepedhelo ri. No do pa dhara Kristus Yesus, Muri di.