Read Sabu ROMA 9 Bible Online

ROMA 9 - Sabu bible

ROMA 9

¹Ne nga ne do medae ta pale ri ya dhe do petu, rowi ya dhe do unu ri Kristus. Adho ta pote. Ne ade nga penge ya do parro do pera'o ri Henga Deo, do peketarra pa ya lema ta do ne lipedai ya do petu.

²Do dhai tarra ya ne hedui jhe ne ade ya do pee nga dhui hape hedui,

³taga tuahhu-tuahhu do ddau rai hela'u nga ya. Rowi tu ro ke, do pemoko-anni ke ya ta wole ri Deo nga ta petale ngati Kristus.

⁴ Ro ke ne annu-niki do alla pepidhi jhe do pejadhi ke ri Deo ta ana-ana ri No miha, nga do pedhelo ri Deo ne kuaha No pa ro. Do alla ke Deo petao ne lipejaji nga ro, jhe wie pa ro ne uku aigama ne. Do pake ri Deo pa ro mina mii ne jhamma ro ta wie hu nga mejura, jhe do alla ke ri ro pehammi ne lijaji-lijaji No.

⁵Ro kolo loro ngati ama-appu di. Kristus mii ddau raiwawa ne, do ngati ddau ro ke. No ke ne do rihi dhida ngati hari-hari. Lua dhida nga kelodo tu Deo lohe la lodho do na mii-mii ne! Amin.

⁶Adho ne lua pedabbho lipali ya ta do ne lijaji Deo ne do ludu ke; tapulara adho hari-hari do Israel, ta annu-niki do pidhi ri Deo.

⁷ Adho hari-hari kolo loro Abraham ta ana-ana ri Deo. Rowi do lii Deo pa Abraham, ”Wata ke kolo loro Ishak we ne do medae ta pale ta kolo loro au.”

⁸Napoanne ne pa petu ne, ta do ne kolo loro Abraham do ta jadhi ana-ana ri Deo, wata ke kolo loro do metana ri lijaji Deo we, jhe adho hari-hari kolo loro no.

⁹ Ro wi ne lijaji Deo mina hedhe, ”Pa awe do alle pepetakke, do medae Ya ta dakka ri, jhe Sara do medae ta era nga heddau ana momone.”

¹⁰Nga nadhe lema, ri Ribka metana do dhue ddau ana momone ngati heddau ama we, ngati Ishak do ama-appu di ne.

¹¹Nga do dho metana dae ne naiki do na harre hari do dhue, do alle ke ri Deo pepetone ne lua pidhi No pelohe la awe do ta medae ne. Ne lua pidhi Deo naanne adho do jhalli pa ne nga ne do nara ta tao ri ddau raiwawa, tapulara do jhalli pa lipedoa Deo miha. Rowi pa dhara nga do dho i'a dae nga-nga ne ana Ribka he hari do dhue ta tao do ie nga do apa ko,

¹² do alla ke Deo pe lii pa Ribka, ”Do mone a'a ne, ne do pemoke do mone ari ne.”

¹³ Pa dhara Buku Liadara-Likewahhu Deo do hure do bhuke mina hedhe ne lipali Deo, ”Ya do ddhei nga Yakub, tapulara do paddhu nga Esau.”

¹⁴Ne nga ke ki kewahho ri di pa awe nadhe? Ta do bibhi hebakka ke Deo? Do bahara tatu ta do dho bibhi hebhakka Deo!

¹⁵ Rowi do lii Deo pa Musa, ”Do ta pedhelo ri Ya ne lua ruba Ya pa ddau do ddhei ri Ya, pa ddau do ddhei Ya ta pedhelo ne lua hajha nga ddhei Ya.”

¹⁶Hakku ne lii happo Deo do naanne adho do jhalli pa lua pemoko-anni ddau raiwawa ta hamme, kiadho pa lua petadi ddau raiwawa, tapulara do jhalli pa lua woie penge nga danni ade Deo we penaja nga ddau do pidhi ri No he.

¹⁷ Rowi pa dhara Buku Lidara-Likewahhu Deo do hure do bhuke, ”Do lii Deo pa duae Mesir ne, ’Pejadhi au ri Ya ta duea tu hahhi lua pedabbho do nadhe we, mita ie ke pelake jhara au, ta pedhelo ke ri Ya ne kuaha Ya, jhe ta pejha'e-pewedo ke ne ngara Ya ta ngara do keto-kelodo pa hari hewue raiwawa.’ ”

¹⁸Hakku pedhelo ri Deo ne lua hajha nga ddhei No pa heddau ddau, kinga do ddhei ko Deo ta tao mina harre. Jhe ne do pejadhi heddau ddau ta kattu wowa du, ki do ddhei ke Deo ta mina harre.

¹⁹Nah, Tuahhu do medae ta lii pa ya, ”Kido mina harre ma, ta nga Deo hakku pee ko ma nga wie hala pa ddau raiwawa? Ta do adho ke ta do dho bhule ke heddau he do nara ta labbe ne lua ddhei Deo?”

²⁰ Tapulara, Tuahhu! Tuahhu he ddau ddau raiwawa we. Jhe ie dho Tuahhu ta bhani ta pebhale nga Deo! Ie marra poo bhunga ta kebhali pa mone tao no ne, ”Tanga au hakku tao ya dhe ta mina hedhe?”

²¹Ta do adho ke ne ddau mone tao poo bhunga ne do nga higa ta jhagge ngati worai-arru ne, e'e ne pedute ne lua ddhei ade no miha? Ngati hekewore-arru, ddau do napoanne do nga higa ta tao dhue worawwu poo bhunga: hewue do woie, jhe hewue ri do dho lohe ne woie.

²²Mina harre lema ke nga ne nga ne do tao ri Deo. Ki pedabho ke ri No ta gole kebhalle-alle ne bubu dhara No nga ta pengadde ne lua higa nga kuaha No. Maji lema ta mina harre do merai nge nga dhara No penaja nga ro do jhamma ta wolo taga tari do pebube ri ro ne dhara No.

²³Deo lema do nga lua pepedabbho tu ta pedhelo ne lua mengallu nge nga kehaka dhara do mina harre ne worawwu re'a nga lale do dhute to hegabbhe tu di do hajha do ddhei No. Do alla ke di pepemoko ri No tu ta hamme ta henate ne lua mengallu nge nga kehaka dhara do naanne.

²⁴Di ke hedhe ne do alla pepedoa ri No, adho ta wa ta ngati do Yahudi we, tapulara ngati ddau rai-ddau rai he lema.

²⁵ Rowi pa dhara buku Nabi Hosea, do lii Deo, ”Ddau-ddau do adho do annu-niki Ya, do medae ta pali ta ’Annu-niki Ya’. Ddau rai do adho do hajha do ddhei Ya, do medae ta pali ri Ya ta ’Ddau hajha-ddau ddhei Ya.’

²⁶ Jhe pa era pa mii do lii pa ddau, ’Mu adho annu-niki Ya.’ pa anne, ne ddau-ddau do era pa era do naanne do ta pali ta ana-ana Deo do muri.”

²⁷ Do dhai kejarre ne lii Nabi Yesaya jhara lua do Israel, ”Maji lema do Israel ne ae do mii wolahalae pa tabbi dahi, wata hudi we ne do medae ta helama;

²⁸rowi do medae ta pebunu ri Muri ne lua wolo ri Muri penaja nga hari-hari ihi raiwawa.”

²⁹ Do lii lema Yesaya mina hedhe, ”Kita do adho he do hani ri Deo do Mone Kerihi Wiki Higa ne, ne kolo loro tu di, do bhara tatu alla ke di hari-hari pejadhi mii Sodom nga Gomora.”

³⁰Hakku ki kewahho ke do mina hedhe ke: Ddau rai-ddau rai do wala ngati do Yahudi he, adho ro do petadi mita ie ne lua pedu ro nga Deo ta jadhi ta ie bhale wari. Tapulara taga tari do parahajha ro, moko ta peie bhale wari ke ri Deo ne lua pedu ro nga No.

³¹Wala ri ngati naanne, ddau-ddau do Yahudi do pee nga petadi ta pedute ne uku ne mita ie ne lua pedu ro nga Deo ta jadhi ta ie bhale wari. Tapulara ju ta do dho nara we ri ro ta kajhedhae.

³²Ta nga hakku do nara ri ro ta kajhe-dhae? Rowi do adho ri ro do jhagge nga loro jhara parahajha pa Deo, wata ke ri lua petadi ro he we miha. Moko ta keloli ke ro pa ”Wowadu kedune ku'u ne.”

³³ Jhara lua wowadu do naanne pa dhara Buku Lidara-Likewahhu Deo do hure do bhuke mina hedhe, ”Heleo ko we ne nadhe: Pa Sion do alle ke ri Ya pepejaddhe hewue wowadu do medae ta pekedne ddau; hewue wowadu do worena do medae ta pekeloli ddau. Tapulara ddau do parahajha pa No adho do medae ta happo nge — ta happo dhara.”