Read Sabu 1 KORINTUS 1 Bible Online

1 KORINTUS 1 - Sabu bible

1 KORINTUS 1

¹ Tuahhu-tuahhu jemaat Deo pa Korintus! Alla ke tuahhu he pepedoa ri Deo tu ta jadhi annu-niki No, rowi Tuahhu he do unu ke ri Kristus Yesus nga hari-hari ddau pa mii we ne do wie hu nga mejura pa Muri di Yesus Kristus, do Muri ro, jhe do Muri di lema. Ya, Paulus, nga tuahhu di Sostenes, nga henao ki ie mudhe he, Deo Ama di nga Muri di Yesus Kristus, ta wie ne lua tarro ie nga menyarro mangngi nga lua mengallu nge nga kehaka dhara tu mu.

⁴Loro-loro ne pedhae ri ya ne kolo lii-ae pa Deo tu mu, rowi do alle ke ri mu pehamme nga henate ne lua ruba dhara Deo ne do pelake jhara Yesus Kristus.

⁵Rowi do jadhi ke mu ta unu-oha Kristus moko ne muri mada mu do kaja nga kete'e ke pa dhara hari-hari lai. Ne lua tada mu jhara hari-hari lai, do dhai lohe ke, jhe do dhai i'a ke mu ne ajha pa ddau ne tada mu do napoanne.

⁶Napoanne do teleo ke, ta do ne lii jhara lua Kristus do dhai lohe ke ne munu la dhara ade mu,

⁷hakku bhule dho ke mu nga kura nga gahara pa dhara heworawwu lua ruba dhara he, pa dhara mate ri mu ne awe dakka Muri di Yesus Kristus, jhe do ta ngadde ri hari-hari ddau.

⁸Kristus miha ne do jaga nga meniga mu hape la pedakka rahi; mijhi ki dakka No bhale wari, abu mu pa dhara nga do dho bhule lua kura nga terujha.

⁹Deo do nara ta parahajha di nga kemolo. No ke ne Deo do alla pepedoa mu ta jadhi hahhi nga Ana No, Yesus Kristus Muri di.

¹⁰Tuahhu-tuahhu! Pa dhara ngara Muri di Yesus Kristus, ne ami ri ya, mita ie ke mu hari-hari ta hela'u lii nga langu, mita ie do dho era ne lua petala pehagghi pa telora mu. Do jhamma ke mu ta jadhi hahhi we, hewue ade nga penge.

¹¹Rowi do dakka ne ddau-ddau ngati dhara ammu Kloë ma pika pa ya ta do era ne lua pehihu pa telora mu.

¹² Ne do pedabbho ri ya, ta do era pa telora mu do lii mina hedhe, ”Ya pedute Paulus,” jhe era ri do lii, ”Ya pedute Apolos,” lii do wala ri, ”Ya pedute Petrus,” jhe era ri do lii, ”Ya pedute Kristus.”

¹³Do nara dhe ane Kristus ta pebhage-bhage! Adho Paulus ne do ketoe-peabbha-rappa tade made tu mu! Mu lema adho pejhiu ta jadhi ddau pedute Paulus, we adho?

¹⁴ Mangngi ma, rowi ngaddi dho ya ta pejhiu ie ta heddau he ti telora mu, wala ngati Krispus nga Gayus.

¹⁵Bhole era heddau he do dhai ta lii, ta do alle ke no pepejhio ri ya, majhi lema no ta jadhi ddau pedute ya.

¹⁶ (Oo tarra, Stefanus nga na-oha no, do pejhiu ri ya tarra ma ro. Tapulara wala ngati do na harre, pa toi ri ya he, bhule dho ke do wala ri ne do pejhiu ri ya).

¹⁷Ne pepue ya ri Kristus, adho tu ta la pejhiu ddau, wata ke tu ta la pepeke ne Li Hagha Dhara do ngati Deo ne, jhe ne naanne lema do jhamma ta jhagge ri ya nga do dho tenge ta pake ne lua i'a ta pedai lii mii ddau raiwawa ne, mita do dho parahuma wue ke ne higa ngati lua made lua made Kristus pa kolo ajhu ketoe ne.

¹⁸Rowi tu ddau-ddau do ju la dhara apa nga kerewe, ne lii jhara lua Kristus pa kolo ajhu ketoe ne, do jadhi ta lii hewo'o he we. Tapulara tu di do alla pegolo peballa kattu he ri Deo, ne lii do napoanne hahhi loro jhara ti Deo ke tu ta pedhelo ne kuaha No ke.

¹⁹ Rowi pa dhara Buku Lidara-Likewahhu deo, do lii Deo, ”Lua uku nga mmau dhara ddau do nga lua tada do ta pekenyawu-nyela ke Ya, jhe ne lua tada ddau-ddau do lohe lua tada do medae ta peila ri Ya.”

²⁰ Nah, ne nga ke ne guna ne ddau mone mmau dhara he pa danni raiwawa do nadhe? Do peteleo ke ri Deu ta do ne lua uku nga mmau dhara raiwawa do na dhe do hewo'o tu-tu we.

²¹Rowi ta mina mii lema ne lua mmau dhara ddau raiwawa, nara dho rowi no ta tade Deo ri lua mmau dhra no we miha. Tapulara, do ti uku nga mmau dhara Deo ri ko we, moko ta maddhi ke pa dhara No ta pehelama ne ddau-ddau do parahajha pa No, do pelake jhara lii do pepeke ri jhi ne, do ege ta do hewo'o ne ri raiwawa.

²²Do Yahudi do pedhuki nga lua madalae mii telia, jhe do Yunani do pekerihe ne lua mmau dhara raiwawa dhe.

²³Tapulara di hedhe wata ke pepeke Kristus do made pa kolo ajhu ketoa ne we. Lii do naanne ke ne do dho maddhi pa dhara do Yahudi, jhe do ege ta do hewo'o ri ddau do adho do Yahudi. Jhe ri ddau do adho do Yahudi do ege ta hahhi lua bhodho we.

²⁴Tapulara tu ddau-ddau do alla pepedoa ri Deo — ie ta do Yahudi — mina harre lema ddau do adho do Yahudi — ne lii do naanne do mii hahhi loro jhara ngati Deo ke, ta peteleo ne kuaha nga uku nga mmau dhara No.

²⁵Rowi ne do heleo do mii lua bhodho he pa Deo, napoanne do rihi ngati lua mmau dhara ddau raiwawa; jhe ne heleo ta lua keloe ne pa Deo, do rihi ngati lua rui nga kedi ddau raiwawa.

²⁶Tuahhu-tuahhu! Hakko ko ta henge ri mu mina mii ne lua mu ta dhai ta pedoa he mu ri Deo. Adho hudi we ti telora mu do mmau dhara kiadho do nga ku aha, do nga era mejaddhi do dhida pa dhara namada ddau raiwawa.

²⁷Rowi tarra do nga hengaja Deo ne pidhi ne do ege ta do bhodho he ri raiwawa nadhe, mita mekae dhara ne ddau-ddau do mmau dhara he. Jhe ri Deo lema, alla ke pe pidhi ne ddau do ege ta do keloe he ri raiwawa dhe mita mekae dhara ne ddau do here-hereba he.

²⁸Pidhi ri Deo ne ege ta do wawa he, do rihi ri ko ti do na harre do ege ta do dho bhule nga kebhue nga-nga he ri raiwawa dhe, mita pemae-tebho-ttaei ri Deo do ege ta do kerihi he ri raiwawa dhe.

²⁹Jhe ri do mina harre ke bhule dho ke heddau he do nara ta wue-anni pa hedhapa Deo.

³⁰Deo ma miha ne do tao hakku nara Tuahhu he ta jadhi hahhi nga Kristus Yesus. Pelake jhara Kristus, ne pejadhi di ta mmau dhara. Jhe do pelake jhara No lema ke, ne peie bhale wari nga ngi'u No miha, do pejadhi di ta annu-niki do petone ta unu No we miha, nga do peballa kattu di.

³¹ Hakku, mii do hure do bhuke pa dhara Buku Lidara-Likewahhu Deo, ”Ddau do ddhei ta latta latta-anni, do jhamma ke ta latta-anni pa dhara ne nga ne do tao ri Muri we.”