Read Sabu 1 KORINTUS 10 Bible Online

1 KORINTUS 10 - Sabu bible

1 KORINTUS 10

¹ Tuahhu-tuahhu! Do jhamma ke ta henge ri tuahhu he ne nga do alla pejadhi pa ama-appu di he pa awe pedute Musa ri ro. Hari-hari ro do herimu ri merammu, jhe nga helama ro ne pagge Llau Mea ne.

²Tu ta jadhi ddau-ddau pedute Musa, ro hari-hari do pejhiu pa dhara merammu ne nga pa dhara dahi do naanne.

³ Ro hari-hari do nga'a bhara nga'a unu pala lua pedu nga Deo do he la'u we,

⁴ nga nginu bhara nginu unu pala lua pedu nga Deo do hela'u we. Ro hari-hari nginu ngati lede wowadu unu pala lua pedu nga De do penau-pelere nga ro he; ne lede wowadu do naanne wala dho ke ngati Kristus miha.

⁵ Maji lema ta mina harre, mengallu dhara dho Deo ri lua ae ro he, hakku ri do mina harre ke, made ro pebhari-guri pa dhara kebhalla-ae.

⁶ Hari-hari ne poharre do jadhi ta telia ke pa di, tu ta penge ri di, mita ie ke di ta bhole ddhei ke di nga lai-lai do apa do kerewe, mii ddhei ri ro he.

⁷ Mina harre lema mita do dho wie ke di hu nga mejura pa ajhu pa wowadu mii tao ri haghe ti telora ro. Pa dhara Buku Lidara-Likewahhu Deo era do hure do bhuke, ”Moko ne ddau rai do na harre ta jhari ke ta nga'a ta nginu jhe ledo tu ta wie hu nga mejura pa ajhu pa wowadu.”

⁸ Ie dho ta tao kenyo-langa huka mii do tao ri haghe ti telora ro. Rowi do dhue nguru tallu tabbha ddau ngati telora ro do made pebhari-guri pa dhara helodho ne we, taga tari tao ri ro ne lai do naanne.

⁹ Ie dho di ta hakko Muri nga hekemada-mada, mii do tao ri haghe ti telora ro pa awe do uru, hakku tu ro ta made hibhi ri ketaru.

¹⁰ Jhe mina harre lema, ie dho di ta pegu-pegallo mii do tao ri haghe ti telora ro pa awe do uru he, hakku ri do mina harre ke, pemade ro ri Malaikat Made Mada ne.

¹¹Hari-hari ne lai do na harre alla ke pejadhi pa ro do na harre mita jadhi ta telia ke tu ddau-ddau do wala. Jhe hari-hari napoharre do hure do bhuke lema tu jadhi lua pehewina tu di. Rowi do na hedhe do muri mada pa awe pedakka rahi raiwawa ke.

¹²Ddau do penge ke ne ngi'u no ta do titu halla-anni ke, do jhamma ke ta meniga pewoie-ie, mita do dho dhai ri ta keloli ri.

¹³Rowi ruhakku do na mii we ne do narro do lake ri Tuahhu, na poharre lua ruhakku do tima ta narro ta lake ri ddau raiwawa. Tapulara Deo do pee nga parro ma ne lijaji No. Hane dho Tuahhu pehakko do rihi ngati do makke ri au ta hape. Pa awe ta lakka ne ko Tuahhu ri ruhakku ne, do ta wie ri no pa tuahhu ne loro jhara mita ie Tuahhu ta rui jhe nara ta titu halla-anni.

¹⁴Rowi do mina harre ke, wo Tuahhu-tuahhu ya do hajha do ddhei ri ya, do jhamma ke ta paddhu nga lua wie hu nga mejura pa ajhu nga wowadu.

¹⁵Ne pedai ya lii nga mu, mii pedai lii nga ddau do mmau dhara. Do jhamma ke ta dhahe miha ri mu ne li ya do nadhe.

¹⁶ Pa dhara awe ngino ko ri di ne ei-ago ne jhe peha'e kolo li ie nga ae pa Deo, ta do adho ke ne lai napoanne ta peteleo pa di ta do jadhi hahhi ke di nga Kristus pa dhara lua made No? Jhe pa dhara awe nga pebhage-bhage ne ri di ne roti ne tu nga'a hela'u-la'u ne, ta do adho ke napoanne do ta peteleo pa di, ta do jadhi hahhi ke di nga ngi'u Kristus?

¹⁷Rowi titu wata hewue we ne roti ne, jhe di hari-hari do nga'a ngati roti do hewue do naanne ma, moko di do ae he do jadhi ke ta hahhi ngi'u we.

¹⁸ Hakku ko ta heleo ne ddau-ddau do Yahudi he. Ro he do nga'a ne bhara jhula do pa dhida era jhula bhara jhula ne, ro ke ne ddau-ddau do jadhi ta hahhi ke nga era bhara jhula ne.

¹⁹Ne nga ne lua pedabbho ya nga naanne? Ajhu nga wowadu kiadho lema bhara nga'a do udu do bhaja tu ajhu nga wowadu do naharre, bhule dho nga kebhue nga-nga.

²⁰ Ne nga ne do udu do bhaja pa era udu nga bhaja tu ajhu nga wowadu he, adho ke do jhula pa Deo, tapulara pa henga-henga kerabba he ke. Jhe wae dho ya, ta jadhi hahhi mu nga henga apa nga kerewe do na harre.

²¹Ie dho mu ta nginu ngati kabha nginu ei-ago Muri, jhe pa dhara awe naanne lema nginu ri ngati kabha nginu ei-ago henga apa nga kerewe ri. Ie do mu ta nga'a pa meja Muri, jhe dhai ri pa meja henga apa nga kerewe ri.

²² We do ddhei mu ta pepane ne ade Muri? Do rihi rui ke di ngati Muri?

²³ Ane ddau, ”Ie ta tao pa e-e ne ddhei di we.” Do petu! Tapulara adho hari-hari ne do ddhei di he do ta peie ne muri mada di.

²⁴Bhole era heddau he do pe nga petadi ta tu lua paralu ngi'u miha we. Do jhamma ie ta nadu we ta petadi ta tu lua paralu ddau do wala lema.

²⁵Ie mu ta nga'a ne nga we do pewie pa paha hedhai. Tenge dho ta kale toi uru jhara maji le ta era ne lai-lai do mejanni pa dhara ade nga penge mu.

²⁶ Rowi pa dhara Buku Lidara-Likewahhu Deo era do hure do bhuke, ”Raiwawa nadhe hari hewue nga hari-hari do era pa dhara no do unu ri Muri.”

²⁷Ki nga pedoa mu ri ddau do adho do Herani ta la nga'a, jhe petobe ri mu ne lipedoa do naanne, nga'a we mu ne nga ne do pemoko ri ro. Tenge dho ta kale toi ta ngati mii ne bhara nga'a do naharre mita do dho era ne lua mejanni pa dhara ade nga penge mu.

²⁸Tapulara ki era ddau do lii pa mu, ”Bhara nga'a do napoanne do alle ke peude nga bhaje tu ajhu nga wowadu,” bhole nga'a mu ne bhara nga'a do naanne, rowi nga heleo ne lua paralu ddau do naanne jhe taga tari lii kewuru ngati dhara ade nga penge.

²⁹Ne do pedabbho ri ya adho taga tari lii ngati ade nga penge mu miha, tapulara ngati lii ade nga penge ddau do naanne. Wue marra ta era ddau do kebhali, ”Wah ta nga hakku labbe ne lua balla kattu ya taga tari lii ade nga penge ddau do wala?

³⁰Ki ri nga'a ya bhara nga'a nga peha'e kolo lii ie nga ae pa Deo, ta nga hakku kare ri ya ri ddau taga tari bhara nga'a do naanne?”

³¹Ie ta ne nga we do tao ri Tuahhu — ta nga'a ko Tuahhu kiadho ta nginu ko Tuahhu — tao we hari-hari ne napoharre tu ta pedhede-petutu Deo.

³²Muri mada we mina ne worawwu, mita ie ne muri mada Tuahhu ta do dho pebunu ddau do wala la dhara lubhu harro nga menyilu.

³³Muri mada we mu mii muri mada ya le. Do ta petadi ke ya ta kale ne loro jhara tu ta pemengallu dhara hari-hari ddau pa dhara hari-hari lai nga do dho bhule lua pedabbho ta pemangngi ngi'u miha. Ne pedabbho ya wata ke mita ie ke ro hari-hari nara ta pehelama.