Read Sabu 1 KORINTUS 12 Bible Online

1 KORINTUS 12 - Sabu bible

1 KORINTUS 12

¹Nadhe ri jhara lua karunya do ngati Henga Deo. Jhara lai do naanne, ne ddhei ya ta toi ri Tuahhu he ne nga ne do petu-tu ne.

²Henge ko we ri mu pa awe nga do dho tade dae Muri ri mu, do ddhei ko mu ta pedutu ne lua wie hu nga mejura pa ajhu nga wowadu do dho i'a pedai lii he.

³Do jhamma ke ta toi ri mu, ta do ki ddau do parro do kedhago Henga Deo, adho do nara ta pa li, ”Lua unu kolo-taddhu tu Yesus!” Mina harre lema bhule dho heddau he do na ra ta pali, ”Yesus ke ne Muri!” kiadho ne ddau napoanne do parro do kedhago ri Henga Deo.

⁴ Do era jhajhi ae worawwu la ne do wie ri Henga Deo, tapulara hari-hari ne na harre do wie ri Henga do hahhi ne we.

⁵Do era jhajhi ae worawwu jhagga do ta jhagge tu Muri, tapulara ne Muri do ta pemoke ne, Muri do heddau ne le ma we!

⁶Do ae loro jhara ta pekako ne lua jhagga Muri, tapulara ne do wie lua rui nga kedi tu ta jhagge ne lai do napoanne pa nadu we, do ngati Deo do hahhi naanne ma we.

⁷Tu lua ie di hari-hari, do jhagga ke Henga Deo ie ta pa nadu we.

⁸Pa heddau wie ri Henga, ne lua rui nga kedi tu ta pedai lii nga peke parru-anni. Pa do wala ri, wie ri Henga ne lua mmau dhara tu ta peteleo jhara lua Deo.

⁹Ri Henga do naanne ma ne do wie pa heddau ne rui nga kedi do rihi ngati ihi tu ta parahajha pa Kristus, jhe pa do wala ri, wie ne kuaha ta peie ddau, ri Henga do naanne ma.

¹⁰Pa heddau ri wie ne kuaha ta tao ne lua madalae, jhe pa do hewala ri wie ne karunya tu ta pepeke ne lai do ta peito-perijho ta tao ri Deo. Wie ri Henga do naanne pa do hewala ri ne lua ta i'a petala-tala nami ne lai do ngati Henga Deo ne, jhe nami ne do adho ne. Era do tala-tala nami ne lai do ngati Henga Deo, jhe nami ne do adho ne. Era do wie ne lai mita nara ta pedai lii pa dhara heworawwu-heworawwu lipedai, nga lipedai do madalae, jhe era do wie mita nara ta peteleo ne lua pedabbho ngati lipedai do na harre.

¹¹Hari-hari ne do na harre do ngati lua do jhagge ri Henga do hahhi do naanne ma; heddau do wie ne karunya do wala me pedute nga lua ddhei Henga do naanne ma miha.

¹² Kristus hala dho ke nga ngi'u ddau raiwawa; hahhi we ne ngi'u ne, tapulara do ae ne ai-alla. Hari-hari ne ai-alla do na harre, maji lema ta do ae, do jadhi hahhi ngi'u we.

¹³Mina harre lema di hari-hari, ie ta do Yahudi hape la do adho do Yahudi, annu-annu lohe la do balla kattu, alla ke di pepejhiu ri Henga do hahhi ne we, mita jadhi ta hahhi ke pa ngi'u Kristus ne. Ri di hari-hari do toi nga kehamme ke ne Henga do naanne.

¹⁴Rowi ngi'u dhe we miha, adho ngati hahhi ai-alla ne we, tapulara ngati jhajhi ae ai-alla no.

¹⁵Kita lii he kae, ”Ya dhe adho ma ruai, ri do mina harre ke ya dhe adho ke nalu ngati ngi'u,” napoanne adho do petu ta do ne kae ne do adho nalu ngati ngi'u.

¹⁶Jhe ki ta lii wodilu, ”Taga tari do adho ya namada moko ya dhe adho nalu ngati ngi'u,” napoanne lema adho do petu ta do wodilu do adho nalu ngati ngi'u ne.

¹⁷Kita hari hengi'u do jadhi ta namada we, mina mii ke ne ngi'u ne, ne nara ta dhanno nenga-nga ri?

¹⁸Do ngaddi ke ri di ta do alla ke petatu ri Deo, ne era tu nalu-nalu do na harre pa ngi'u do nadhe. Hahhi-hahhi nalu do petatu ke pa era ro ma miha pedute nga lua ddhei Deo.

¹⁹Kinga hari-hari do ta hahhi nalu we, na mii ri ke ne do pale ta ngi'u ne?

²⁰Hakku tarra ma ta do era do ae ne nalu, tapulara ngi'u ne wata hahhi we.

²¹Rowi do mina harre ke, nara dho namada ta lii pa ruai, ”Paralu dho ya nga au!” kiadho lii kattu pa kae, ”Paralu dho ya nga au!”

²²Ne woie, nalu-nalu ngi'u do ege ta do keloe he, do rihi ri ko ne paralu tu di;

²³nga nalu-nalu do ege ri di ta do dho bhule nga kebhue he, lakka ta do rihi ri ko ne do wie pekerihi ri di. Nalu-nalu ngi'u do heleo ta do dho bhule nga lua gaa nga jhamma he, moko na harre ri ko ne do rihi ne heleo ri di.

²⁴Ne nalu-nalu ngi'u do heleo ta do woie he, adho ke do tenge ta heleo ri. Do alla ke ri Deo pepeato mina harre ne worawwu ne ngi'u di, hakku ne nalu do wawa ne kebhue he do takka pekerihi ke.

²⁵Jhe ri do mina harre ne ngi'u dhe adho ke do pebhage bhage, ri hahhi nalu do ta heleo ke ne nalu do haghe he.

²⁶Ki nga paddha ke hahhi nalu, hari-hari ne nalu do wala he do ta paddha lema ke, ki hahhi nalu nara lipuji, hari-hari ne nalu do wala he do ta mengallu dhara ke.

²⁷Tuahhu he hari-hari do hela'u-la'u ke ta ngi'u Kristus, jhe mu heddau-heddau do ai-alla ngati ngi'u do naanne ke.

²⁸ Mina harre lema pa dhara jemaat, do alla ke ri Deo pepeato ne era tu heworawwu-heworawwu ddau. Uru jhara-jhara rasul-rasul; kedhue, nabi-nabi, ketallu, guru-guru, je ro ri do tao lua madalae, jhe ro ri do tao lua peie ddau do paddha kiadho ta ruba dhara nga ddau do wala, kiadho do jadhi ta mone bhau-bhata, kiadho tu ta pedai lii nga heworawwu-heworawwu lipedai do madalae.

²⁹Ro adho ta hari-hari do jadhi ta rasul kiadho ta nabi, kiadho ta guru-guru we. Adho ro hari-hari do nga kuaha ta tao lua madalae,

³⁰kiadho ta peie ddau, kiadho tu ta pedai lii pa dhara heworawwu-heworawwu lipedai do madalae, kiadho tu ta pebhale ne lipedai-lipedai do na harre.

³¹Rowi do mina harre ke, do jhamma ke mu ta la'a rui nga petarra-tarra mii ta nara do kerihi ngati lua-lua do na harre. Maji lema ta mina harre, pa lai do ta medae do nadhe ri, ta peke ke ri ya ne loro jhara do rihi ie tu mu.