Read Sabu 1 KORINTUS 14 Bible Online

1 KORINTUS 14 - Sabu bible

1 KORINTUS 14

¹Do jhamma ke mu ta wohe la'a rui, tu ta hajha ta ddhei nga ddau-ddau do do wala. Jhe wohe la'a rui we mu lema mita nara mu ne karunya-karunya do ta wie ri Henga Deo, ne do rihi tu-tu ne, mita nara ta pedhae ne lua do pe ito ri ta tao ri Deo tu ddau raiwawa.

²Ddau do pedai lii pa dhara lipedai do madalae ddau napoanne adho pedai lii nga ddau raiwawa, tapulara no pedai lii nga Deo. Bhule dho ddau do tada ne nga ne do pale ri no, rowi Henga Deo ne do lii pa nota pale ne lai-lai do toi ri Deo we.

³Bhale ri ddau do pedhae ne do ngati Deo ne do pedhae ri no pa ddau raiwawa, tu ta perui ro, tu ta pedidi ro nga tu ta pemengallu dhara ro.

⁴Ddau do pedai lii pa lipedai do mada lae, wata ke tu ta perue ngi'u no we miha, bhale ri ddau do pedhae ne lii do ngati Deo ne, ta rabha — ta dharru jemaat mita rui ro.

⁵Do dhai tarra ne woie kita nara he mu hari-hari ta pedai lii do madalae. Tapulara ne do rihi ie, kinga nara Tuahhu he ta pepeke ne lai-lai do peito-perijho ta tao ri Deo he, do rihi mone-ae ngati ddau do pedai lii pa dhara lipedai do madalae, wala ri ki ddau do pedai lii pa dhara heworawwu-heworawwu lipedai do madalae ne, do nara ri no ta peteleo ne nga ne do pale ri no ne, mita ie ri jemaat ta hamme ne lai do ie ne ngati lai do napoanne.

⁶Kita jadhi he ya ta dakka la nga mu, jhe pedai ya lii pa dhara heworawwu-heworawwu lipedai do madalae ne nga ke ne guna tu mu? Bhule tu-tu dho nga guna ie ta he wuru he! Do wala ri kita peteleo ri ya hahhi lipedai ngati Deo, kiadho ta peteleo ri ya hahhi lai jhara lua Deo, kiadho ta pedhae ri ya ne lii do ngati deo, kiadho ta wie lii ajha ri ya pa mu.

⁷Nalu-nalu lii lodho do dho bhule nga henga le ie ta hewuru he, mii kehidho nga ketadu, ki ggai, jhe adho do teleo ne likebholu he, mina mii ne nara ta toi ri ddau ne nga ne alu do pemange ri ro he?

⁸Hahhi telia do wala ri, ki tiu ke terope e'e ne abo we, nadu ke do ta pemoko-anni ta la pemuhu?

⁹Mina harre lema ne lua i'a ta pedai lii pa dhara heworawwu-heworawwu lipedai do madalae. Ki Tuahhu nga lua i'a au we ne pali ne lipedai-lipedai do dho teleo, bhule dho heddau do tada ne nga ne do pale ri Tuahhu ne. Ne lipedai au he do ta marra miha unu he ma we.

¹⁰Pa raiwawa do nadhe era do mina harre ne worawwu ae lipedai, tapulara bhule dho ngati hahhi he ne lipedai do na harre ie ie ta heubha he do dho bhule nga lua pedabbho.

¹¹Tapulara ki do dho tada ya ne lipedai do pale ri heddau ddau do pake ne lipedai do naanne, hala dho ke mii heddau do wala rai ne penaja nga ya, mina harre lema ya penaja nga no.

¹²Jhara lua mu miha, do toi ri ya ta do ddhei tarra mu ta nara ne karunya-karunya ngati Henga Deo. Tapulara ne do kerihi tu-tu ne, do jhamma ke mu ta la'a rui tarra ta pake ne i'a mu do nara ta rabha-ta dharru jemaat mita ie ro ta rihi ie ri.

¹³Ri do mina harre ke ne ddau do pedai lii pa dhara lipedai do madalae, do jhamma ke ta ami pa Deo, mita ie pa no ta wie ne lua mmau dhara tu ta peteleo ne nga ne do pale ri no ne.

¹⁴Rowi kinga hebhajha nga lipedai do madalae, tarra ne henga do hebhajha, tapulara ne penge ya nara dho ta kako.

¹⁵Hakku ki do mina harreke, ne nga ke ne do jhamma ta tao ri ya? Nadhe ke ne jhamma ta tao ri ya: Ta hebhajha ke ya ri henga ya, tapulara do ta hebhajha lema ke ya ri penge ya. Do medae ya ta jhuka lodho ri henga ya, tapulara do ta ddhei lema ke ya ta jhuka lodho ri penge ya.

¹⁶Rowi kinga peha'e ke Tuahhu kolo lii ie-ae pa Deo ri henga he we, jhe do era ddau do wala do dho tada ne lipedai do madalae do ngati Henga Deo do naanne, moko ne ddau do naanne nara dho ta lii, ”Do maddhi ke pa ya,” penaja nga lihebhajha mu do naanne, rowi adho do toi ri no ne nga ne do pale ri au do naanne.

¹⁷Maji lema ne lihebhajha au pa Muri do dhai tarra ne woie, tapulara we ne lihebhajha au do naanne bhule tu-tu dho nga guna tu ddau do wala.

¹⁸Peha'e ri ya ne kolo lii ie-ae pa Deo, rowi ya miha do nara ta pedai lii pa dhara heworawwu-heworawwu lipedai do madalae, rihi ngati he hari-hari.

¹⁹Maji lema ta mina harre, pa dhara lua peowu — peteni tu ta wie hu nga mejura pa Muri, do rihi ddhei ya ta pake lammi ubha lipedai do toi ri ddau ngati pake tabbha-tabbha ubha lipedai pa dhara lipedai do madalae. Rihi ddhei ya ta mina harre, mita nara ya ta ajha ddau.

²⁰Tuahhu-tuahhu! Bhole penge ri mii namea he. Pa dhara lua do apa-do kerewe do jhamma ke mu ta pee ma mii naiki he. Tapulara pa dhara lua penge, do jhamma ke mu ta mii ddau do kepai.

²¹ Pa dhara Buku Lidara-Likewahhu Deo, do hure do bhuke mina hedhe, ”Ane Muri, ’Nga pelake jhara ddau-ddau do pedai lii pa dhara lipedai do wala wewo, do ta pedai lii ke Ya pa kejie ddau do na hedhe. Rihi ri ko ti naanne nga pelake jhara ddau-ddau do wala rai do ta pedai lii ke Ya nga annu-niki Ya; maji lema ta mina harre, wae dho ro ta pedhanno nga lipedai Ya.’ ”

²²Hakku karunya tu ta pedai lii nga heworawwu-heworawwu lipedai do madalae, mii tada he we tu ddau do parahajha. Jhe karunya tu ta pepeke ne lua do peito ri Deo ta tao tu ddau raiwawa, naanne tu ddau do parahajha.

²³Rowi do mina harre ke, ki ta unu pala he, pa dhara lua peowu-peteni jemaat, moko ki hari-jemaat do pedai lii pa dhara heworawwu-heworawwu lipedai do madalae, jhe dakka do parri ddau do wala, kiadho ddau do adho do Herani, do bhara tatu ke ta lii ne ddau-ddau do na harre ta do alla ke mu hari-hari pewuju!

²⁴Tapulara ki hari-hari ke Tuahhu he do pedhae ne lii do ngati Deo ne, jhe dakka heddau do adho Herani, kiadho ddau tele, moko ne lai-lai do pepeke ri Tuahhu he hari-hari do ta peteleo ne lubhu harro nga menyilu ddau do naanne, jhe ta toi tarra ri ddau do naanne ne lubhu harro nga menyilu no.

²⁵Lai-lai do pewune pa dhara ade no do ta peteleo ke, jhe ri do mina harre ke do ta pewawe ke ri no ne ngi'u no, jhe wie no hu nga mejura pa Deo. Do ta ketarra ke ri no ta Deo do era pa telora mu.

²⁶Hakku Tuahhu-tuahhu, ne nga ke ne pedabbho hari-hari ne do na harre? Kinga peowu-peteni ke mu ta wie hu nga mejuara pa Muri, era do jhuka lodho, era do ajha ddau, era do pepeke hahhi lai ngati Deo, era do pedai lii pa dhara li padai do madalae, jhe era do peteleo ne nga ne do pale do naanne. Tapulara hari-hari ne napoharre do jhamma ke ta tao tu ta ajha ddau nga tu lua ie hari-hari.

²⁷Kinga era do ta pedai lii pa dhara lipedai do madalae do jhamma ke ta dhue kiadho ta rihi ae do tallu ddau, jhe do ta pepahu-pahu heddau nga heddau. Jhe do jhamma ta era ne ddau do ta peteleo ne nga ne do pale ri ddau do pedai lii do na harre.

²⁸Ki do dho bhule ddau do nara ta peteleo, moko ne ddau do pedai lii pa dhara lipedai do madalae do na harre do jhamma ke ta pehangngo-anni pa dhara lua peowu-peteni do naanne. Hawi we ro pepedai lii pa dhara ade nga Deo.

²⁹Do dhue kiadho do tallu ddau we ne ddau do era nga lii do ngati Deo, do jhamma ke ta pedhae ne lii do naanne, jhe ri do haghe he dhahe ne nga ne do pale do naanne.

³⁰Tapulara, ki ne lii do ngati Deo ne, dakka pa heddau do wala ri do pa dhara nga mejaddhi ko pa dhara lua peowu-peteni do naanne, moko ne ddau do era pa dhara pedai lii ne do jhamma ke ta pengaha.

³¹Nga loro jhara do mina harre ke, Tuahhu he hari-hari, ki alla ke heddau jhe itu heddau ri, ne nara ta pedhae ne lii do ngati Deo ne, mita ie hari-hari nara ta hammi ne liajha jhe rui ne lua parahajha.

³²Karunya do ngati Henga tu ta pedae ne lii do ngati Deo ne, nara ta peato nga woie-ie ri ddau do ta pe dhae ne lii do naanne.

³³Ne deo do naanne ne, Deo do ddhei nga lua do kenya jhe nga do ketanna, adho No Deo do ddhei nga lua do kenya'u nga buluru. Hela'u mii do jadhi pa dhara hari-hari jemaat Deo,

³⁴mobanni do jhamma ke ta pehangngo-anni pa awe peowu-peteni jemaat. Adho ro do nara lua ta pedai lii. Ie dho ro ta jadhi kattu, napoanne do penau nga uku aigama.

³⁵Ki do ddhei ro ta toi hahhi lai, do jhamma ke ro ta kebhali pa ddau pa hedhapa ro pa ammu nga kemali ro. Do dhai pemekae dhara ddau, ki pedai lii ke heddau mobanni pa dhara lua peowu-peteni jemaat.

³⁶Do dakka ngati mu ke ne lipedai Deo ne? We do titu wata pa mu we ne pedhae ne lii do ngati ne?

³⁷Kinga era ne ddau do kedo'o ade ta do era ne karunya do hamme ri no ngati Henga Deo tu ta pedhae ne lii do ngati Deo ne, ki adho lai do wala ri ngati Deo, do jhamma ke ta toi ri ddau do na poanne, ne nga ne do bhuke ri ya do nadhe, lipereda ngati Muri.

³⁸Tapulara kinga era do hamme ne nadhe, bhole pedhuli we nga no.

³⁹Rowi do mina harre ke, Tuahhu-tuahhu, la'a rui we mu ta pedhae ne lii do ngati Deo ne, tapulara bhole labba ne ddau do ddhei ta pedai lii pa dhara heworawwu-heworawwu lipedai do madalae.

⁴⁰Tapulara hari do jhamma ke ta jhagga nga woie jhe nga kenyajjhe.