Read Sabu 1 KORINTUS 15 Bible Online

1 KORINTUS 15 - Sabu bible

1 KORINTUS 15

¹Jhe pa awe nadhe, Tuahhu-tuahhu, ne ddhei ya mita henge bhale wari ri mu ne jhara Li Hagha Dhara do ngati Deo ne, do pepeke ri ya do uru he pa mu. Do hamme ke ri mu, jhe do parahajha ke mu pa Kristus taga ri Li Hagha Dhara do naanne ke.

²Ki do bharra tarra ke ne parro ri mu, ne nga ne do pepeke ri ya ne, moko ne Li Hagha Dhara do naanne, wala ri ki parahajha Tuahhu nga do dho bhule lua tada.

³ Ne nga ne do alle ri ya pepedhae pa Tuahhu he, napoanne do alle ke ri pe mamme lema. Ne do rihi tarra ne paralu do mina mii ne do hure do bhuke pa dhara Buku Lidara-Likewahhu Deo, ne pedhae ri ya pa mu, ta do ne made Kristus taga lubhu harro nga menyilu di ke,

⁴ do alle ke No pepedane, tapulara ta alla pemina harre do pemure bhale wari ke pa lodho do ketallu ne. Napoanne lema do hure do bhuke ke pa dhara Buku Lidara-Likeawahhu Deo.

⁵ Do peke lema ri ya pa mu, ta do ne Kristus do pemure bhale wari do naanne, do alla lema ke pepengaddi-anni pa Petrus, alla pemina harre pa hari henguru do dhue rasul he.

⁶Ta alla pemina harre, pengaddi-anni ri No do lammi ngahu rihi ddau pedute No he. Rihi rrau ko ne ddau do na harre he ko do muri hape ma dhara awe do nadhe, wata do parri ddau ko we ne do alla ke pemade.

⁷Ta alla pe mi na harre, ta pengaddi-anni ke Kristus pa Yakobus, jhe alla pemina harre pa hari-hari rasul he.

⁸ Pa do pedakka rahi tu-tu ne, ta pengaddi-anni ke No pa ya lema — ya do mii ana mea do metana pa do dho dhai warru he.

⁹ Ya dhe rasul Muri do rihi wawa. Adho ya do jhamma ta pale ta rasul, rowi do alla ke ri ya pe dede nga dhaba ne jemaat Deo he.

¹⁰Tapulara ngati lua ruba dhara Deo, nee ke ya do jadhi do mina mii ya ne era pa dhara awe nadhe. Jhe do dho perahuma wue lema Deo ne pehai-pehuba ya.

¹¹Hakku ngati nadu we ne hamme ri mu ne Li Hagha Dhara ne — ie ta ngati ya kiadho ngati rasul-rasul do wala he ko — napoanne jadhi dho ta hahhi lai. Ne do paralu, alla ke ri jhi pepeke ne Li Hagha Dhara ne, jhe do parahajha ke Tuahhu he.

¹²Kinga ne do pepeke ri jhi ne, ta do alle ke Kristus pepemure bhale wari ngati dhara made mada, ta nga hakku era pa telora mu do lii ta ne do made do adho ke do ta pemuri bhale wari ri?

¹³Ki do tarra ta do adho ke do made do pemuri bhale wari, napoanne do pedabbho ke ta Kristus do adho do pemure bhale wari.

¹⁴Jhe kita do tarra he ta do adho Kristus do pemure bhale wari ngati dhara made mada, moko bhule dho ke nga guna nga-nga ne lipepika jhi he, jhe hari lema bhule dho ke nga guna nga-nga ne lua parahajha mu, rowi ne lua parahajha mu bhule le dho ma nga era jhalli nga-nga.

¹⁵Rihi ri ti napoanne, do teleo ke ta jhi hedhe ta do pote jhara lua Deo, rowi ri jhi hedhe do pepeke ke ta do alle ke Kristus pepemure bhale wari ri Deo ngati dhara made mada, jhe ne pa pedakka ne adho ma do pemure bhale wari No — ki do tarra ke do made adho ke do pemuri bhale wari!

¹⁶Rowi ki do adho ke do made do pemuri bhale wari, moko adho lema ke Kristus do pemure bhale wari ngati dhara made mada.

¹⁷Jhe ki do adho ke Kristus do pemure bhale wari, moko ne lua parahajha mu lema wata ke mii hahi lii nii-wue he we, ki do mina harre pee ko ma mu pa dhara lubhu harro nga menyilu, jhe do adho ke do nga lua henao nga-nga ri.

¹⁸Napoanne le ma ne pa petu ne, ne do Herani do alla pemade he, adho lema ke do nga lua henao.

¹⁹Kinga ne lua henao di pa Kristus wata ke pa muri mada di we do danni raiwawa do nadhe we, moko ngati hari-hari ddau pa raiwawa dhe, di ke hedhe do rihi ha'i nga bhangi!

²⁰Tapulara we, do teleo ke Kristus ta do alle ke pepemure bhale wari ngati dhara made mada. Nadhe ke ne era parru-era jhalli ta do tarra ddau-ddau do ne ddau-ddau do alla pemade he do ta pemuri bhale wari.

²¹Rowi ne maho lua made mada ma danni raiwawa do nadhe, do lake jhara heddau ddau we, mina harre lema ne lua muri bhale wari ngati lua made mada ne, ne wie pa ddau raiwawa do pelake jhara heddau ddau lema we.

²²Rowi do mina mii hari-hari ddau raiwawa ne made taga tari do jadhi ta hahhi ke nga Adam, mina harre lema ke hari-hari do made ne pemuri, rowi do jadhi ta hahhi ke nga Kristus.

²³Tapulara heddau-heddau do medae ta pemuri pedutu nga awe ro ma miha, ne petari-tari Kristus ke, jhe ki alla pemina pa awe dakka No ri hine, do ta lere ke ri ddau-ddau do maho ta do unu ri Kristus he.

²⁴Ki alla ke pemina harre ta dhai ke ne lua pedakka rahi raiwawa. Pa dhara awe do naanne do medae ke ta pejharra ri Kristus hari-hari lua pereda, hari-hari lua kuaha nga hari-hari lua rui nga kedi; je do medae ta jhole ri No ne kuaha No ne mii heddau duae pa Deo, Ama di.

²⁵ Do jhamma ke Kristus ta pee ko nga pereda tade dhai ta pejadhi ri Deo hari-hari ne ihi muhu-ihi lawa Kristus ta pewawa-anni pa No.

²⁶Ne ihi muh do pedakka rahi ne do medae ta pejharre ne, lua made mada ke.

²⁷ Pa dhara Buku Lidara-Likewahhu Deo do hure do bhuke mina hedhe, ”Alla ke pepejadhi ri Deo hari-hari lai ta pewawa-anni pa No.” Hakku do teleo ke, ne nga ne pedabbho ri ”hari-hari lai” naanne, wala ngati Deo miha, Ana Deo do ta pewawe ne ngi'u No pa Deo do alla pepejharra hari-hari lai ta pewawa-anni pa Kristus.

²⁸Tapulara ta alla hari-hari pepejharra la dha'i pereda Kristus, moko No miha, Ana Deo, do medae ta pewawe ne ngi'u No miha pa Deo do alla petao hari-hari mita pewawa-anni pa No. Moko Deo miha do medae ta pereda pa hari-hari do na harre.

²⁹Ki do adho ke do made do pemuri bhale wari, ta nga hakku era ddau do pejhiu tu ddau do made? Tu ta nga ro hakku tao ri ko ne lai naanne?

³⁰Jhe ta nga lema ke jhi ne ddhei ta pehedhapa nga lua hedui-herui ti heawe la heawe?

³¹Tuahhu-tuahhu! Helodho-helodho, ya ne makka tee nga wangnge pa hara dhue hape ne lua hedui-herui, taga tari do dhai mengallu dhara ne ade ya jhara lua muri mada mu taga tari do parahajha ke mu pa Kristus Yesus, Muri di.

³² Ki ta heleo ne naane wata ngati kebhihu ddau raiwawa ne we, ne nga ke ne lua mangngi tu ya, tu ta petadi, do dho hala mii pelawa nga bhada bhani he pa dhara rae do nadhe, pa Efesus dhe? Ki do tarra ke do made ta do dho pemuri bhale wari, nah, rihi ie we di ta pedutu we mii leperajja do mina hedhe, ”Mai we di ma nga'a ma nginu nga ma mengallu nge nga kehaka dhara, rowi bhalli-rai do ta made ke di.”

³³Bhole luu we! Lua penao do woapa do ta peape ne wue muri mada do woie.

³⁴Era we nga lua tada pa dhara awe nadhe, jhe bhole tao ri we lubhu harro nga menyilu. Do ne pa petu ne do jhamma ke mu ta mekae dhara, rowi do era pa telora mu do dho tade dae Deo.

³⁵Wue marra ta era do kebhali, ”Mina mii ke ne ddau do made he ne pemuri bhale wari? Ngi'u do mina mii ke ne do wie pa ro, ki alla ke ro pepemuri bhale wari?”

³⁶Do bhodho tarra! Ki kujha Tuahhu he wini la ro'a worai, ne wini napoanne nara dho ta muri, ki dho mada dae.

³⁷Jhe ne wini do kojhe ri Tuahhu ne la ro'a do naanne — mii namuhi gandum kiadho wini do wala marra — adho namuhi ne we, adho hari hekepue ngati naajhu do medae ta muri ne.

³⁸Deo miha ne do medae ta wie ne wue nga amma ne pa wini do naanne, pedute nga do mina mii ne do heleo ri No ta do woie ne tu naajhu do napoanne. Tu heworawwu-heworawwu wini do petala-tala ma ne wie ri Deo ne wue nga amma pa najhu do naharre.

³⁹Ngi'u ngati hari-hari do nga henga, adho do hela'u pa hari-hari. Ddau raiwawa do nga heworawwu ngi'u ma, mina harre lema bhada do nga heworawwu ngi'u do wala ma; do lila do nga ngi'u do wala ri ma ro, jhe nadu'u-nadu'u do wala wewo ri ma ne ngi'u ro.

⁴⁰Mina harre lema nalu-nalu do era pa ihi liru nga nalu-nalu do era pa raiwawa. Nalu-nalu do era pa ihi liru do nga gaa nga jhamma ro ma hahhi-hahhi, jhe mina harre lema ne nalu-nalu do era pa dhanni raiwawa do nadhe.

⁴¹Lua gaa nga jhamma mada lodho do wala ma ngati lua gaa nga jhamma mada warru. Moto-mo to nga lua gaa nga jhamma ro ma miha. Rihi ri ko ti naanne ri, moto-moto le miha do nga lua gaa nga jhamma do wala ri ma hewue ngati hewue.

⁴²Mina harre lema ke ne jhara lua ddau-ddau do made do pemuri bhale wari he. Ne ngi'u do pedane ne, ngi'u do nara ta wwau, tapulara ngi'u do pemure bhale wari ne, adho ke ngi'u do nara ta apa ri.

⁴³Pa dhara awe ta pedane ne, ne ngi'u do naanne, ngi'u do woapa nga do keloe, tapulara ki alle ki alle ke pepemure bhale wari, moko ne ngi'u do naanne, ngi'u do woie nga do rui do kedi.

⁴⁴Pa dhara awe ta pedane ne, ne ngi'u do naanne do ngati raiwawa, tapulara ki alle ke pepemure bhale wari, moko ne ngi'u do naanne do ngati raiwawa, tapulara ki alle ke pepemure bhale wari, moko ne ngi'u do naanne ngi'u do wie ri Henga Deo. Era ngi'u do ngati raiwawa, jhe era lema ngi'u ngati Deo.

⁴⁵ Pa dhara Buku Lidara-Likewahhu Deo era do hure do bhuke mina hedhe, ”Ddau raiwawa do petari rai, Adam, do jadhi ke ta do muri,” tapulara Adam do pedakka rahi ne, No Henga do wie muri mada.

⁴⁶Ne do dakka uru jhara ne, do ngi'u raiwawa ne, adho do era ne lua pedu nga Deo. Ne ngi'u do nga lua pedu nga Deo ne do dakka leto.

⁴⁷Adam do petari ne do tao ngati worai, tapulara Adam do kedhue ne, do dakka ngati era do mmau do megala.

⁴⁸Ddau-ddau raiwawa dhe do mii Adam do petari ne ke, do tao ngati worai, tapulara ddau do ngati era do mmau do megala ne, do mii do dakka ngati era do mmau do megala ne ke.

⁴⁹Rowi ta do mina mii lema di do na hedhe do mii Adam do tao ngati worai, moko hine do medae ta jadhi le mii No do dakka ngati era do mmau do megala ne.

⁵⁰Ne pedabbho ya, Tuahhu-tuahhu, nadhe ke: Ne ngi'u do tao ngati raa nga manynyi, nara dho ta maho la dhara Raiwawa Deo do Wowiu ne, jhe ne ngi'u do nara ta made dhe, adho do nara ta jadhi ta do peloro ne.

⁵¹ Heleo we ne lai do wowune do nadhe: Adho ta hari-hari di ne do medae ta made, tapulara di hari-hari do medaea ta bhari-anni.

⁵²Ne lai napoanne do ta jadhi hetakka we pa dhara hekewu'u namada, pa awe tio ne wotabbe do pedakka rahi ne. Rowi pa dhara nga tio ne wotabbe do naanne, ddau-ddau do made do medae ke ta pemuri bhale wari nga ngi'u do muri peloro ne, jhe di hari-hari do ta lari ke.

⁵³Ne ngi'u do nara ta made do nadhe do jhamma ke ta hoo ke ri ngi'u ngi'u do dho nara ta made wari ne, jhe ne ngi'u do ngati raiwawa dhe do jhamma ta hoo ri ngi'u do ngati era do mmau do megala ne.

⁵⁴ Ki alle ke pe hoo ne ngi'u do nara ta made do nadhe ri ngi'u do dho nara ta made ne, nga ki nga hoo ke ne ngi'u do ngati raiwawa dhe ri ngi'u do ngati era do mmau do megala ne, pa dhara awe naanne ke jhe itu jadhi ne nga ne do hure do bhuke pa dhara Buku Lidara-Likewahhu Deo, ”Lua made alle ke pepeele, lua nara do ne ke pa dhara wolaabba!”

⁵⁵ ”Wo lua made mada, pa mii ke ne lua nara au? Wo lua made mada pa mii ke ne raho lua tappu au?”

⁵⁶Ne raho lua tappu au wala dho ke ngati lubhu harro nga menyilu, jhe ne lua jhagga lubhu harro nga menyilu do pelake jhara uku aigama.

⁵⁷Tapulara pe ha'e kolo lii ie-ae pa Deo; do wie ke ri No pa di ne lua nara ne, do pelake jhara Yesus Kristus Muri di.

⁵⁸Rowi do mina harre ke, Tuahhu-tuahhu do hajha do ddhei ya, do jhamma ke mu ta titu halla-anni. Jhagga we mu teru tu Muri nga petu-petarra, rowi do lo re ke ri mu petoi ma, ta do hari-hari ne do jhagge ri tu Muri, adho do medae ta parahuma wue.