Read Sabu 1 KORINTUS 3 Bible Online

1 KORINTUS 3 - Sabu bible

1 KORINTUS 3

¹Mu, ne pa petu ne, adho ke ya do nara ta pedai lii nga mu mii ddau do nga Henga Deo. Wata ke ya ne nara ta pedai lii nga mu mii nga ddau do pe ko nga muri mada pedute nga lua ddhei raiwawa, mii nga ddau do mii namea he ko pa dhara lua parahajha no pa Kristus.

² Do uru he, wata ke ne do nara ri ya ta wie pa mu bhara nga'a namea we, adho bhara nga'a tu ddau do kepai, rowi adho dae mu do dhai rui tu lai do naanne, rowi do pe ko ma mu nga muri mada pedute nga wue mu do ddau raiwawa ne,

³rowi ki do pe ko ma mu nga pepana ade pehala heddau nga heddau, ta do adho ke lua napoanne do ta peteleo ta do mu do pe ko ma nga muri mada pedute ne wue ddau raiwawa ne, mii ddau do dho tade Deo?

⁴ Ki do era ko do pali, ”Jhi do pedute Paulus,” jhe do wala ri, do lii, ”Ya do pedute Apolos,” ta do adho ke napoanne ta do ta peteleo ta do tuahhu he do pa dhara alu nga hadha mii ddau-ddau raiwawa dhe?

⁵Ne pa petu ne nadu ke Apolos? Jhe nadu ke Paulus? Jhi hedhe wata ke mii ddau-ddau kako-kaddhi he we ngati Deo, do alla pehewai-hewewe mu tu ta parahajha pa Kristus. Jhi hedhe wata ke ta pekako he we ne lua jhagga do alle pejhole pa jhi heddau-heddau ri Muri.

⁶ Ya ne do kujha, Apolos ne do bhui, tapulara Deo miha ne do pemuri ne naajhu he.

⁷Hakku ne do herihi, Deo we miha, rowi No ke ne do pemuri ne. Do kujha nga do bhui ne bhule dho nga lua kerihi ne;

⁸ro hari do dhue do hela'u we. Heddau-heddau do ta hamme ne pai pala pedutu nga lua dhutu ei-kebahhu ro.

⁹Jhi hedhe ddau-ddau do hela'u we ne jhagga tu Deo; jhe mu ke ne lada maa ko'o Deo. Tuahhu-tuahhu, do mii ammu Deo lema.

¹⁰Nga lua mmau dhara do wie ri Deo, ya mii heddau do mone i'a petitu ammu, alle ke pejhare ne era tu ta petito ne ammu do naanne, jhe ddau do wala ne do petito ne ammu do naanne pa dhida era do naanne. Heddau-heddau do jhamma ke ta heleo pewoie-ie mina mii ne petito ri no pa dhida era do naanne.

¹¹Deo miha ne do alle pepejaddhe Kristus ta do titu wata No he ke ne era tu ta petito ne ammu do naanne, jhe bhu le dho ke ne era do wala ri.

¹²Era ne do petitu pa era do naanne, do pake mela-lara, jhe era do pake mela pudi, era do pake wowadu do gaa do merake, era do pake ajhu, jhe era do pake ruwidu.

¹³Lua jhagga heddau-heddau do ta teleo ma hine, pa awe dakka bhale wari Kristus. Rowi pa dhara lodho do naanne do medae ma ta teleo ri ai, ne lua jhagga heddau-heddau. Rowi do ta uje ma ri ai jhe petato ne pedakka ngati lua jhagga do na harre.

¹⁴Ki ne ammu do petito pa dhida era do naanne do dho kappu ri ai ne, moko ne mone petitu ne do ta nara me ne pai-pala.

¹⁵Tapulara ki do kappu ne do jhagge ri ddau do naanne, moko do ta ha'i no, tapulara no miha do medae me ta helama, mii heddau do mahhu-anni ngati dhara rao ai he.

¹⁶ Toi ma ke ri Tuahhu he ta do mu he dhe Ammu Deo? Jhe Henga Deo do pee pa dhara mu?

¹⁷Kinga era ddau do peape ne Ammu Deo ne, ddau do napoanne do ta peape lema ri Deo. Rowi Ammu Deo do petone ta tu Deo we, jhe mu ke ne ammu do naanne.

¹⁸Bhole era ie ta heddau he do pelue ne ngi'u no miha. Kinga era ddau ti telora mu do ege ne ngi'u no ta do mmau dhara pedutu nga lua dhahi raiwawa dhe, ddau napoanne do jhamma ke ta jadhi ta do bhodho, mita ie no ta tarra-tarra ta do mmau dhara.

¹⁹ Rowi ne do ege ta do mmau dhara ri raiwawa dhe, do bhodho pa dhara namada Deo. Pa dhara Buku Lidara-Likewahhu Deo do hure do bhuke, ”Do hii ri Deo, ne ddau-ddau do mmau dhara he ri lua mmau dhara ro ma miha.”

²⁰ Do era lema do hure do bhuke mina hedhe, ”Do toi ma ri Muri ne lua penge ddau-ddau do mmau dhara he, lua penge do dho bhule nga guna.”

²¹Rowi do mina harre ke, bhole era heddau he do pedhede-dhede ddau raiwawa rowi hari-hari ie ta ne nga we do alla ke pewie ta jadhi ta unu ri mu.

²²Paulus, Apolos, Petrus, raiwawa do nadhe, lua muri mada nga lua made mada, awe nadhe ko nga awe do medae ta dakka ne ko, hari-hari napoharre do unu ri mu ke.

²³Jhe mu do unu ri Kristus ke, jhe Kristus do unu ri Deo ke.