Read Sabu 1 KORINTUS 7 Bible Online

1 KORINTUS 7 - Sabu bible

1 KORINTUS 7

¹Pa awe nadhe ddhei ta pedae ko ri ya jhara lua do pale ri mu pa dhara huri mu ne. Ki dho banga-ammu heddau momone, napoanne do woie.

²Tapulara mita do dho luu ri ta tao ne lai-lai do dho jhamma, rihi ie heddau momone ta era nga ihi-ammu miha, jhe heddau mobanni ta era nga ddau pa hedhapa miha.

³Momone do jhamma ta petobe ne tenge no mii heddau momone penaja nga ihi-ammu no, jhe mina harre lema ne do jhamma ta tao ri heddau mobanni; heddau-heddau petobe ne tenge no penaja nga heddau.

⁴Mobanni bhule dho nga kuaha pa ngi'u no miha; ne do nga kuaha penaja nga ngi'u no, momone ne. Mina harre le ma momone, bhule dho nga kuaha penaja nga ngi'u no miha, ne do nga kuaha pa ngi'u no, mobanni ne.

⁵Bhole pejjau-anni heddau ngati heddau mii momone nga mobanni. Ie ma pa dhara hemelila he we ta pejjau-anni, tapulara do pehela'u lii hari do dhue. Rowi ri tao mina harre nara hari do dhue ta hebhajha nga ketanna. Ki alla pemina harre, bhale wari la pehedharra-anni heddau nga heddau mii momone nga mobanni. Ki do adho ke do mina harre, do memudhe he we mu ta pedute ne liubu ngati henga kerabba ne, rowi do dho rui mu ta labbe ne lua pegabbho ade mu ne.

⁶Ne lii ya do nadhe adho mii lipereda, tapulara mii litakka lii.

⁷Ne pa petu ne, rihi ddhei ya, ki hari-hari ddau ta jadhi mii ya hedhe. Tapulara heddau-heddau do alla ke pehammi ne karunya ngati Deo. Heddau nara karunya do nadhe, heddau ri nara karunya do na nidhe.

⁸Pa ro do dho banga-ammu he dae, nga pa mobanni-mobanni do alla ke pemade ne ddau pa hedhapa ro he, mina hedhe ne litakka ya: Rihi ie Tuahhu he ta mii ya hedhe.

⁹Tapulara kidho nara ma ri Tuahhu he ta tahe ne lua pegabbho tuahhu, rihi ie ma Tuahhu ta banga-ammu. Rowi rihi ie tuahhu ta banga ammu, ki do pee ma nga pegabbho-gabbho ne lua pegabbho ade mu pa dhara muri mada Tuahhu he.

¹⁰ Penaja nga ro do alla pebanga-ammu he, mina hedhe ke ne lipereda ya: (Ne pa petu ne adho ya ne do wie lipereda ne tapulara Muri.) Heddau mobanni do alla pebanga-ammu, bhole hane ri no ne ddau pa hedhapa no ne.

¹¹Tapulara ki do alle ke ri no pe hane ne ddau pa hedhapa no ne, do jhamma ke no ta bhole era ri nga ddau pa hedhapa, kiadho ta bhale la nga ddau pa hedhapa no ne. Jhe heddau momone ie dho ta pehagghi nga ihi-ammu no.

¹²Pa do wala he, ne lii takka ya he ke miha, adho ngati Muri — kinga heddau momone do Herani do banga-ammu nga heddau mobanni do dho parahajha pa Kristus, jhe do ddhei ma no ta muri mada hela'u nga momone do Herani ne, momone do naanne ie dho ta pehagghi nga mobanni do naanne.

¹³Jhe ki era heddau mo banni do Herani do banga-ammu nga heddau momone do dho parahajha pa Kristus jhe ne momone do naanne do ddhei ma ta pee hela'u nga mobanni do heranni ne, moko mobanni do naanne ie dho ta pehagghi nga momone do naanne.

¹⁴Rowi momone do dho parahajha, do pejhamme ke ta jadhi ai-alla annu-niki Deo ri lua banga-ammu no ne nga momone do alla ke pejadhi ta unu ri Deo. Ki do adho ke do mina harre, do tatu ke ne ana-ana ro he ta ana-ana do dho tade Deo, jhe ne pa petu ne, ne ana-ana do naharre do ege ke ta mii ai-alla annu-niki Deo.

¹⁵Tapulara kinga ta langnga ne ddau-ddau do dho parahajha he, bhole labba ro. Pa dhara lai do naanne ludu ke Tuahhu, rowi ne ddhei Deo mita nara ke Tuahhu nga pedhuri-pemira.

¹⁶Rowi Tuahhu mii mobanni — do parahajha ke pa Muri — mina mii ke ne nara ta toi nga kehamme ri Tuahhu ta do dho nara ta pehelame ne ddau pa hedhapa au ne? Mina harre lema Tuahhu momone do Herani, mina mii ne nara ta toi nga kehamme ri au, ta do Tuahhu adho ke do nara ta pehelame ne ihi-ammu au ne?

¹⁷Do jhamma ke mu heddau-heddau ta peato ne lua muri mada mu pedute nga lua parru nga kedhagu Muri, mina mii ne do alla pepetatu ri Deo, pa awe pedoe ne mu ri Deo ri Deo tu ta parahajha pa No. Nanne ke lua peato tu ta ajha ri ya pa hewue-hewue jemaat.

¹⁸Unu pala he, kinga do alle ke heddau-ddau pedare ngutu pa awe hamme ri no ne lipedoa Deo, moko tenge dho ke ri ddau do naanne ta kale ne loro jhara ta peele ne tada-tada lua dara ngutu do naanne. Mina harre lema, kinga heddau-ddau ki do dho dare dae ne ngutu no pa dhara hamme ri no ne lii pedoa Deo, bhole tenge ri we no ta ami ta dare ne ngutu no.

¹⁹Roei ne lua pedutu nga lua do dho pedutu lua dara ngutu, do he we we, bhule dho nga lua guna nga-nga. Ne do kerihi ne, wata ke ki pedutu ne lipereda-lipereda Deo we.

²⁰Do jhamma ke heddau-heddau ta pee ma nga muri mada nga do mina mii di ne era pa awe hamme ne ri di ne lipedoa Deo ne.

²¹Kinga pa awe pedoe ne Tuahhu, Tuahhu do mii heddau naannu, tenge dho Tuahhu ta hedui ne penge ne lai do napoanne. Tapulara kinga do ta medae Tuahhu ta nara ne lua kehoo tu ta balla kattu, pake we ne lua kehoo do naanne.

²²Rowi heddau naannu do parahajha ke pa Muri, ddau Muri ke no, jhe do balla kattu ke no. Jhe heddau do balla kattu do parahajha no pa Muri, naannu Kristus ke no.

²³Do alle ke Tuahhu pewalle ri Deo, jhe ne kebhue Tuahhu do mmau ke ne ma'e ri No. Rowi do mina harre ke, bhole jhole ri we ngi'u tuahhu tu ta jadhi naannu ri raiwawa dhe.

²⁴Hakku, Tuahhu, ta do pa dhara do mina mii lema ne ngi'u au pa awe pedoe ne, do jhamma ke Tuahhu ta pee ma nga muri mada mina harre ma hela'u nga Deo.

²⁵Tu ddau-ddau do dho banga-ammu dae. Jhara lua do naanne, hammi dho ya lipereda ngati Muri. Maji lema ta mina harre mii heddau do ri lua ruba dhara Muri, do jhamma ke ri mu ta parahajha, ta wie ke ri ya ne litakka pa mu.

²⁶Ki nga penge ne hari-hari ne lai do medae ta dakka ta ma pehedui pa dhara awe do nadhe, penge ri ya, rihi ie ke kita pee ma ddau nga narro ne muri mada do mina mii ne era no pa dhara awe nadhe.

²⁷Ki do era ke Tuahhu nga ihi-ammu, bhole kale ri ne rujhara ta golo-anni ngati ihi-ammu ne. Ki do adho dae Tuahhu do era nga ihi-ammu, bhole tenge ri Tuahhu ta kale ihi-ammu.

²⁸Tapulara ki nga banga-ammu Tuahhu, lua napoanne adho ta hahhi lua lubhu harro nga menyilu. Mina harre lema kinga banga-ammu heddau ana mobanni do ngarru, adho napoanne ta hahhi lua lubhu harro nga menyilu. Wata ke, tu ro do banga-ammu he do medae ro ta penaja nga lua hedui-herui do ae. Jhe ne ddhei ya, Tuahhu he ta ludu ngati lua hedui-herui do na harre.

²⁹Ne pedabbho ya mina hedhe, Tuahhu-tuahhu: Adho ke do ae ri ne awe tu di. Jhari ngati awe nadhe, nadu we do nga ihi-ammu, do jhamma ke no ta muri mada mii ddau do dho bhule nga ihi-ammu he,

³⁰ddau do tangi, ta muri mada mii ddau do dho hedui ade he, ddau do mari, tao we mii ddau do dho mengallu dhara he; ddau do alla pewalli, tao we mii ddau do dho bhule nga nenga-nga he;

³¹jhe ddau do peketali-too nga lai raiwawa do nadhe, do jhamma ke ta muri mada mii ddau do dho kewallu-nya'u he ri lai-lai do na harre. Rowi rajja dho ke raiwawa do nadhe nga lua no do era pa dhara awe do nadhe, ne medae ta janna bholo ngala.

³²Ne ddhei ya, mita ie ke Tuahhu he ta ludu ngati lua hedui. Ddau do adho do era nga ihi-ammu do ta nara no ta petuje ne penge no pa lai-lai do pedu nga Muri, rowi do ddhei no ta pemengallo dhara Muri.

³³Tapulara ddau do nga ihi-ammu do medae ta rihi rrau ta penge ne lai-lai raiwawa dhe rowi do ddhei no ta pemengallo dhara ihi-ammu no ne;

³⁴jhe pedakka ne penge no do pebhage-bhage ke. Heddau mobanni do adho do era nga ddau pa hedhapa, kiadho heddau ana mobanni do ngarru, do medae ta ae ne penge ne lai-lai do pedu nga Muri, rowi do ddhei no ne ngi'u nga hemanga no ta unu ri Deo. Tapulara heddau mobanni do nga ddau pa hedhapa, do petuje ri no ne lua penge no pa lai-lai raiwawa, rowi do ddhei no ta pemengallo dhara ne ddau pa hedhapa no ne.

³⁵Ne bhuke ri ya hari-hari ne napoharre tu lua ie mu ma miha, adho nga lua pedabbho ta labba mu ngati lua nadhe kiadho ngati nanidhe. Ne do ddhei ri ya, wata ke mita ie ri Tuahhu ta jage ne do petu nga do pejhamma ne, jhe mita nara Tuahhu ta petuje ne penge tuahhu pa Muri we.

³⁶Ki penge ke ri heddau ta do nara ke no ta tao ne lai do jhamma pa ddau ddhei no, jhe do dho nara ke ri no ta labbe ne lua pegabbho ade no, jhe penge ri no ta do paralu no ta banga-ammu nga ana mobanni do ngarru do naanne do ie ke ri no ta tao ne nga ne do penge ri no ta do woie ne. Hala dho no. Kinga banga-ammu ro.

³⁷Tapulara kinga alla ke heddau-ddau pe aggu lihappo pa dhara ade no tu ta do dho banga-ammu dae no nga dddau-ddhei no ne, jhe ne lihappo no do naanne adho ri lua pehahhe, moko ne do tao ri no do naanne lai do woie, hadhi ta do rui we no.

³⁸Ki peheatte, ddau do banga-ammu, do ie ne do tao ri no ne do naanne, jhe ddau do dho banga-ammu, ro rihi ie ri, ne do tao ri no ne do naanne.

³⁹Heddau mobanni do alla ke pebanga-ammu do akke ke no nga ddau pahedhapa no ne, pa dhara nga muri mada ko ne ddau pahedhapa no ne. Kinga alla ke pemade ne ddau pa hedhapa no ne, moko ne mobanni do naanne do e'e ne ddhei no he ke ta banga-ammu ri nga momone do ddhei no; hadhi we ne lua banga-ammu no do naanne ta do peloko-nga'a Herani.

⁴⁰Maji lema ta mina harre, ne do rihi mangngi ri ko, kinga do dho banga-ammu ri no. Napoanne lua dhahi ya he we miha, tapulara pa toi ri ya he, ne do pale ri ya dhe do ngati kuaha Henga Deo.