Read Sabu 2 KORINTUS 1 Bible Online

2 KORINTUS 1 - Sabu bible

2 KORINTUS 1

¹ Tuahhu-tuahhu jemaat Deo pa Korintus nga hari-hari annu-niki Deo pa hari hewue Akhaya. Ya, Paulus, rasul Yesus Kristus, do dhede taga tari lua ddhei Deo, hela'u-la'u nga tuahhu di Timotius,

²do pee nga henao ki ie mudhe he Deo Ama di nga Muri di Yesus Kristus ta wie pa ne lua tarro ie nga menyarro mangngi nga lua mengallu nge nga kehaka dhara.

³Lua dhida nga kelodo tu Deo, Ama ri Muri di Yesus Kristus. No ke ne Ama do dhai manynyi nge danni ade, nga No ke Deo do mone wei lua rui tu ta titu halla-anni pa dhara ade nga penge ddau raiwawa.

⁴No ke ne do perui ade nga penge jhi pa dhara penaja jhi heworawwu-heworawwu lua hedui-herui, mita ri lua rui nga kedi do hamme ri jhi ngati Deo ne, ri jhi lema do nara ke ta perui ne ade nga penge ddau do pa dhara lua hedui-herui.

⁵Lua hedui-herui do narro do lake ri Kristus he, do ae lema ke ne do narro do lake ri jhi. Jhe do pelake jhara Kristus lema ke, ne ade nga penge jhi do dhai rui nga kedi ke.

⁶Kinga do narro do lake ke ri jhi ne lua hedui-herui, napoanne tu ta perui ne ade nga penge mu lema ke, tu lua helama tona ie mu. Ki do perui ke ne ade nga penge jhi, moko mu lema do dutu ta perui ke, jhe ri do mina harre ke ta makka tee nga wangnge le ke mu pa dhara hedhape ne lua hedui-herui mii do dhue do hape ri jhi lema.

⁷Do pee nga ketarra ri jhi pa dhara ade jhi, nga do dho ngaddi te era nga lua kepapi ne pa dhara ade jhi jhara lua Tuahhu he rowi do toi ke ri jhi ta do mu lema do dui hape hedui-herui ke hela'u-la'u nga jhi. Jhe rowi do mina harre ke, mu lema do dutu ke ta perui hela'u-la'u nga jhi.

⁸ Tuahhu-tuahhu! Do ddhei le jhi ta toi ri mu ne jhara lua hedui-herui do dhue do hape ri jhi pa ihi rai Asia. Ne lua hedui-herui do dhue do hape ri jhi pa ni do dhai tarra ne mejanni tu jhi, hakku ri do mina harre ke do happo ke ne lua henao pa jhi ta do ta era ko jhi ta muri mada ri,

⁹hala dho ke mii do alla pehappo he ke ne hala jhi ri lua wolo ta pemade. Tapulara hakku jadhi ne lai do na harre mita do dho peini-anni ke jhi pa lua rui nga kedi jhi miha tapulara do jhamma ta peini-anni pa mone pemuri bhale wari do made ne we.

¹⁰No ke ne do alla pepeludu jhi ngati lua made mada do meliri dhara ne. Jhe No lema ke ne do medae ta peludu jhi pa lodho-lodho do ta medae ne, rowi pa No ke ne halle ne lua henao jhi.

¹¹Do ketarra ke pa dhara ade jhi, ta do ri lii hebhajha mu ke tu jhi, moko ta peludu ke jhi ri Deo ngati lua hedui nga herui. Do maddhi ke pa dhara Deo ne lii hebhajha do ae he, hakku alle ke ri No pe wie pa jhi ne lua tarro ie nga menyarro mangngi, jhe rowi do mina harre ke do medae ke ta ne ddau peha'e ne kolo lii ie-ae pa Deo.

¹²Dhai balla ke ne dhara kodo jhi, rowi ne ade nga penge jhi do perue ke pa jhi, ta do ne muri mada jhi pa danni raiwawa do nadhe — rihi-rihi ne lua pedu jhi nga Tuahhu he — alla ke ri jhi pepekako nga ade do pudi nga do mmau. Ne tao ri jhi ne lai do naanne, adho ri uku nga mmau dhara ddau raiwawa, tapulara nga lua rui nga kedi do wie ri Deo.

¹³Ne do bhuke ri jhi dhe pa mu wata ke jhara lai-lai do nara ta ajha nga do nara ta kappa ri mu we. Pa awe nadhe lohe dho ke jhi ne tada ri mu, tapulara ne henao ri ya do medae ma ta tada ri mu ta tada jhi nga petu-tu hine. Jhe ri do mina harre ke, pa awe dakka Muri di Yesus hine, do medae ma ta balla ne dhara kodo mu taga jhi, do mina mii jhi lema do balla ne dahara kodo taga mu.

¹⁵Taga tari lua ketarra do mina harre ke moko ya pa uru he do peito ta la heahu mu mita ie mu ta nara ne lua tarro ie nga menyarro mangngi dhue wari lipa.

¹⁶ Do peito ri ya ta la heahu mu ie ta ju nga ta bhale pa loro jhara kako ya la Makedonia, mita nara ya ta rabhe ri mu pa loro jhara ya ju la Yudea.

¹⁷Tapulara alle ke ri ya pelare ne do peito ri ya do naanne; nah kido tarra ke ta mina harre ta do ta pedhelo ke ta ya dhe adho do tatu ne lua penge? Pa dhara ta peito ne lai do naanne, ta do tao pa dhara lua ddhei ya he ke miha, hakku hetakka lii ta, ”jadhi”, jhe dhai ri nabbho li ri ta, ”jhadi dho ke”?

¹⁸Pa dhara ngara Deo do nara ta parahajha ne ri di, ne lijaji ya pa Tuahhu he, adho dhe bhoke ”Jadhi” jhe ”jadhi dho ke”.

¹⁹ Rowi Yesus Kristus, Ana Deo, do pepeke ri Silas, Timotius, nga ri ya lema pa mu ne, adho dhe bhoke ta ddau do ”Jadhi” nga ”Jadhi dho ke.” Do wala ngati naanne, No ke ne lii ”Keoo” ngati Deo.

²⁰Rowi do pelake jhara No ke, alla ke Deo pe ”Keoo” penaja nga hari-hari lijaji No. Jhalli pa naanne ke hakku pali di ta ”Amin” pa Deo aga Yesus Kristus. Hakku tao ri jhi mina harre mita ie ke ta pedhede pekelode Deo.

²¹Deo miha ne do tao pa jhi nga pa Tuahhu he ta titu halla-anni pa dhara he ujhu-headde nga Kristus, No lema ke ne do pidhi di tu ta petone ta tu No we.

²²Tu do na poanne ke di pejhue ri Deo ta jadhi unu No jhe wie ne Henga No pa dhara ade di mii hahhi petakka tu di ta do medae ta wie ri No pa di hari-hari ne do jaje ri No.

²³Deo ke ne hakahi ya — rowi do toi ke ri No ne ihi ade ya — hakku do dho jadhi ya ta kako la Korintus, rowi ddhei dho ta pehedui ri ya ne ade mu.

²⁴Pehahhi dho mu ri ya jhara lua ne nga ne do jhamma ri mu ta parahajha, ro wi do dhai tarra ke mu ne parahajha pa Kristus. Wata ke ya ta jhagga hela'u-la'u nga mu mita ie mu ta ju mengallu nge nga kehaka dhara.