Read Sabu 2 KORINTUS 12 Bible Online

2 KORINTUS 12 - Sabu bible

2 KORINTUS 12

¹Do tarra bhule dho nelua mangngi ne ta latta anni. Tapulara do ddhei lema ya ta pehewu ne lai-lai do pengaddi ri Deo pa ya, pa dhara wahyu kiadho pa dhara lai nii.

²Do tade ri ya heddau do Herani, do pa henguru appa bhue ttau do ludu, do dhede la era do rihi dhida nga kelodo pa era do mmau do megala. (Toi dho ri ya ta do ngi'u do petu-petarra ne No, ne do dhede do naanne, we naanne mii hahhi lai nii hewe — ri Deo we ne do toi). Pa ni ne ddau do naanne do dhanno ne lai-lai do dho nara ta pale ri ddau raiwawa, jhe adho lema do wie pa ddau raiwawa ta pale.

³Pale ko ri ya hewari ri: Do toi ri ya ta do ne ddau do nadhe do dhede ke la Firdaus. (Toi dho ri ya, ta do ngi'u do tarra-tarra ne, ne do dhede do naanne, we naanne hahhi lii nii he we — Deo we miha ne do toi.) Pa ni ne ddau do naanne do ta dhanno ne lai-lai do dho nara ta pale ri ddau raiwawa, jhe adho lema do wie pa ddau raiwawa ta pale.

⁵Jhara lua ddau do naanne ke ne do ddhei ta pehewue ri ya, adho jhara lua ngi'u ya miha. Ki jhara lua ngi'u ya, wata ke ta peteleo ne lai-lai lua keloe ya he we, ne do ddhei ta pehewue ri ya.

⁶Kita ddhei he lema ya ta pehewue hahhi lai, wae dho ya ta jadhi mone bhoe do omo-koho, do medae ya ta pali lai do petu we. Tapulara do ta tahe ke ri ya ne ngi'u ya, mita do dho era ddau do penge ta ya dhe ta do rihi ngati ne nga ne do ngadde ri no ta tao ri ya kiadho ti do alle pedhanno ri no ne nga ne do alle pepale ri ya.

⁷Tapulara mita ie ya ta do dho rihi wue-anni taga tari lai do pengaddi pa lai nii do na harre moko ta wie ke pa ya heworawwu lua paddha pa ngi'u ya do mii hahhi nalu he ngati Wango. Hakku wie ne paddha do naanne pa ya mita do dho wue-anni ke ya.

⁸Tallu wari ke ya pehebhajha pa Muri mi ta bhete ne lua paddha do naanne ngati ya.

⁹Tapulara bhale ri Muri, ”Do hajha do ddhei Ya nga au, napoanne do waji ke au; rowi ne kuaha Ya do ta ju ta rihi rui ki do pa dhara keloe au.” Rowi do mina harre ke, do rihi mengallu dhara ke ya ta pehuwue ne lua keloe ya ne, rowi kinga keleo ke ya, moko pa dhara awe naanne ke Kristus ne toi ri ya do era do herimo-heruge ya ri lua rui nga kedi No.

¹⁰Hakku do mengallu dhara ke ya ri lua keloe-lua keloe ya he. Do mengallu dhara lema ya, taga tari Kristus hakku nara ya lua kare nga menihe, ta hudhe ta perage nga narro-lake ri ya ne hedui-herui. Rowi ki nga keloe ke ya, moko pa dhara awe naanne ke ya ne rui.

¹¹Do tarra alla ke ya petao mii heddau do bhodho he — tapulara mu ke hari-hari ne do tao pa ya hakku jadhi ya ta do bhodho. Do ne pa petu ne do jhamma ke ya ta puji ri mu. Rowi maji lema ta dho bhule nga kebhue nga-nga tapulara ngaddi tu-tu dho ya ta jharra ki penaja ke nga ”rasul-rasul” do rihi ngati ihi do na harre.

¹²Lua madalae-lua madalae nga lua do rihi nga ti ihi he nga lua jhagga-lua jhagga do mone-ae he do pedhelo ke pa mu nga merai nge-merai dhara, tu ta peteleo ke pa mu ta do ya dhe heddau rasul.

¹³Pa dhara lai ne nga ke ne do kura, ne do dho heleo mu ri ya, kinga penono nga jemaat-jemaat do wala he. Jaga-jaga ke ta wata pa dhara lai do na dhe we: rowi do dho pehedui mu ri ya pa dhara heleo ne muri mada ya. Pehuba we ri mu ne hala do naanne!

¹⁴Pa dhara awe nadhe tu pa do ketallu wari ke ya ne moko ta la heahu mu. Jhe wae dho ya ta pehedui mu, rowi ne do ddhei ya adho ne nga ne do unu ri mu, tapulara ngi'u mu. Rowi adho ana-ana he ne do kale muri mada tu ina-ama he, tapulara ina-ama he ne do kale muri mada tu ana-ana he.

¹⁵Rowi do mina harre ke, do nga mengallu nge nga kehaka dhara ya, ta alla hari hari ne nga we tu mu, lohe ma ngi'u ya lema miha. Kida mina harre ke ne lua ddhei ya nga mu, ta do jhamma ri ke mu ta kura ne lua ddhei nga ya ri?

¹⁶Nah, kido o'o ma mu ta do dho ngaddi ya ta pehedui mu, maji lema ta mina harre, era ma do lii, ta do ya dhe do dhai i'a kelakku; ta ya do nara lua mangngi ngati mu, ri loro jhara do pote nga appi.

¹⁷Mina mii ne jadhi! We do pelake jhara ddau-ddau do pepu ri ya la nga mu he, ne dha'u ya lua mangngi he ngati mu?

¹⁸Alle ke ri ya pepepue Titus ta kako la heahu mu, jhe lii ya pa do Herani do wala he ta kako penau nga no. We do era Titus nga happi lua mangngi ngati mu? Tapulara jhi hari do dhue, do jhagga nga lua pedabbho do hela'u, jhe do hela'u we ne loro jhara-loro jhara do tao ri jhi.

¹⁹Wue marra ta penge ri mu ta do jhi hedhe, hape ma dhara awe nadhe do petadi ta ddhei ta pemola-anni penaja nga mu? Lakka ta do dhai keliru mu ki do mina harre! Do toi ma ri Deo ta do hari-hari ne do pale ri jhi he, do pedute lua Kristus. Jhe hari-hari ne do tao ri jhi he, tu ta perui ne lua muri mada lua pedu mu nga Deo.

²⁰Ta kepapi ne ade ya, ta do ki dhai ke ya ta la heahu mu, jhe abu mu pa do mii do henao ri ya. Jaga-jaga hine ta do era do pehala, do pebubu dhara, pepana ade, do pehenge nga ngi'u miha we, do pekara-pewaggi, do pehiu-pebhagi heddau nga heddau, wue-anni bhaja rebho, jhe do kenya'u nga buluru.

²¹Meda'u ya nge ngeta he ki dhai ya ta dakka hi ne, do medae ya ta pewawe ri pa hedhapa mu, jhe do medae ya ta tangi, taga tari ae ti telora mu, do uru he do muri mada pa dhara lubhu harro nga menyilu ko, adho do lari-anni jhe adho do pengaha ngati tao ne wui-ai wui-tao do lila lau pagga biri he, do ra'i-do tongo he nga do dho jhamma tu-tu he.