Read Sabu 2 KORINTUS 5 Bible Online

2 KORINTUS 5 - Sabu bible

2 KORINTUS 5

¹Rowi do toi ri jhi kinga ne ammu — ngi'u do nadhe — do pee ri di pa raiwawa do nadhe ki dhai ta bhage pemenyalle, do medae ma ta pemoke ri Deo tu di hewue ammu pa era do mmau do megala ne, do tao ri Deo miha, jhe do adho ke do ta apa wari ri.

²Pa dhara ammu do pa dhara awe nadhe, do penina noho ke di rowi do ddhei ke di ta la pee pa dhara ammu di do pa dhara era do mmau do megala ne.

³Ne ammu di do naanne, ngi'u di ke do wowiu ne.

⁴Pa dhara nga pee ko di pa dhara ammu do ngati raiwawa do nadhe, do pee ko di nga penina noho, rowi do mejanni ne bhara dhui bhara hape di. Adho taga tari ta ddhei ta mahhu-anni ngati ngi'u do ngati raiwawa do nadhe, tapulara rowi do ddhei ke di ta pake ne ngi'u do ngati era do mmau do megala ne, mita ne ngi'u di do nara ta made do nadhe, ta pereda ke ri do muri ne.

⁵Deo miha ne do pemoke tu di ne lai do naanne, jhe wie ri No miha ne Henga No pa di mii hahhi era parru he.

⁶Rowi do mina harre ke ne ade jhi do pee nga rui ne toi ri jhi. Do toi ri jhi, ki do pee koma jhi pa dhara ngi'u jhi do nadhe, moko do jjau ko jhi moko do jjau ko jhi ngati ammu do medae ta la pee ri jhi ne hela'u-la'u nga Muri.

⁷Rowi jhi do muri mada nga jhalli pa dhara lua parahajha pa Kristus, adho do jhalli pa ne nga ne do ngadde ri namada ngi'u dhe,

⁸taga tari do naanne ke hakku pee ma ne ade jhi nga halla-annni. Do rihi ddhei ke jhi ta mahhu-anni ti ngi'u jhi do nadhe mita nara jhi ta la pe hela'u ngi Muri.

⁹Rowi do mina harre ke, do pee ke jhi nga wohe la'a rui tarra tu ta la pemengallo dhara No, ie ta pa awe nga era ko jhi pa dhara ammu jhi do pa dhe, ie ta pa ammu jhi do pa ni ne.

¹⁰ Rowi do tatu ke di hari-hari do medae ta la penaja pa hedhapa era era happo hala Kristus, jhe heddau-heddau do medae ta hamme ma ne pala pedute nga wui ai tao no pa danni raiwawa do nadhe, wui ai wui tao do woie we do woapa.

¹¹Do toi ke jhi ne nga ne lua pedabbho ngati lua meda'u pa Muri, ri do mina harre ke, hakku pee jhi nga petadi ta peketarra pa dharra ade ddau jhara lua ngi'u jhi. Do dhai meramma ne tada jhi ri Deo, jhe henao ri ya do tada lema jhi ri mu pa dhara ade mu.

¹²Nga ri nadhe, ami dho mu ri jhi ta puji ne ngi'u jhi. Wata ke ne ddhei jhi, ta wie hahhi era jhalli do woie we pa mu tu ta peworena ne ade mu penaja nga jhi, mita ie ta toi ri mu mina mii ne jhamma ta ta wie ne libhale pa ddau-ddau do rihi ne heleo worawwu ddau we, jhe adho do heleo ne wue-wue no.

¹³Kinga jhi hedhe hala dho ke mii ddau do hala kattu he, napoanne tu ta pekerihe ne lua ddhei Deo. Jhe kinga ngaddi ke jhi ta mii do ie he, napoanne tu lua ie mu ke.

¹⁴Lua hajha nga ddhei Kristus ke ne do pereda pa jhi, jhe do toi ke ri jhi, ki alla ke heddau pemade tu hari-hari ddau, moko ne lua pedabbho do napoanne ta do hari-hari ddau do alla ke pemade.

¹⁵Ne made Kristus tu hari-hari ddau, mita ie ke ne ddau-ddau do muri he, muri mada dho ke tu ngi'u no we miha, tapulara tu Kristus do alla ke pemade ne jhe do pemure bhale wari tu lua ie ro.

¹⁶Rowi do mina harre ke, adho ke jhi do heleo ddau ri pedutu nga lua dhahi ddau raiwawa ri. Do tarra ma ta do ngaddi jhi ta peege Kristus ta mii ddau raiwawa he, tapulara pa dhara awe nadhe adho ke jhi do ta tao ri mina harre.

¹⁷Ddau do heujhu headde nga Kristus, do jadhi ta ddau do wiu tu-tu ke. Ne do dui ne adho ke do era ri — hari-hari do jadhi ke ta do woiu.

¹⁸Hari-hari ne na harre do jhagga ke ri Deo. Pelake jhara Kristus ta tao ke ri Deo ta peie bhale wari nga No, jhe lii pa di mita ie le ne ddau-ddau do wala ta nara le loro jhara ta peie le nga Deo.

¹⁹Do pepeke ke ri jhi ta do pelake jhara Kristus ke, ne tao ri Deo tu ddau raiwawa mita peie bhale wari nga ngi'u No. Ne tao ri Deo ne napoanne nga dho pekire ke nga hala-ludu do alla petao ri ddau raiwawa penaja nga ngi'u No. Jhe do alla ke Deo pe lii pa jhi tu ta pepeke ne lii do naanne.

²⁰Hakku jhi hedhe ddau-ddau pepu-peju Kristus. Pelake jhara jhi, Deo miha ne do pedhae ne litakka No. Pa dhara ngara Kristus, ne ami ri jhi nga petu-petarra, hamme we ne ruwai ruba dhara Deo pedhule ne, do wie ne loro jhara tu mu ta peie bhale wari nga No.

²¹Adho do era Kristus nga lubhu harro nga menyilu, tapulara pedhue pehape pa No ri Deo ne lubhu harro nga menyilu di, mita ie ke di ta peie bhale wari nga Deo, ri peheujhu headde nga Kristus.