Read Sabu 2 KORINTUS 6 Bible Online

2 KORINTUS 6 - Sabu bible

2 KORINTUS 6

¹Rowi jhi do jhagga hela'u-la'u nga Deo, moko ne ami ri jhi nga meggai petu-tu pa mu, bhole hore we parahuma wue ne lua woie ade Deo ne.

² Pa dhara Buku Lidara-Likewahhu Deo, do lii Deo, ”Pa awe do maddhi ne ko, do alle ke au pedhanno-petenae ri Ya, jhe pa lodho helama tona ie ne, alla ke Ya peruba dhara au.” Henge we pewoie-ie, pa dhara awe nadhe ke ne awe do maddhi ne. Awe nadhe ke ne lodho ta peballa kattu ne!

³Wae dho jhi ta pekire ta do hala ne lua jhagga jhi. Rowi do mina harre ke pee ma jhi nga petadi ta do dho wie ne era jhalli ie ta pa heddau he tu ta wie hala ne pa lua jhagga jhi ne.

⁴Do wala ri ti naanne, pa dhara hari-hari lai, ta pedhelo ke ri jhi, ta jhi hedhe annu-annu ri Deo. Rowi, hari-hari worawwu lua hedui-herui alla ke ri jhi pedhui pe hape, jhe nga makka tee nga wangnge;

⁵ dede-merahhu jhi, hahhi la dhara ammu bhaddo, peworo-penyabbhu jhi ta pemade jhe dede jhe dhaba; dhai penina jhi ne jhagga hakku jhajhi ta do dho bba'i nga jhajhi wari lema ta do dho bhule nga nga'a nga nginu.

⁶Nga ade do mola do mira, nga uku nga mmau dhara, makka tee nga wangnge, jhe nga ade do woie, ne pedhelo ri jhi ta do jhi hedhe do naannu-naniki ri Deo. Mina harre lema nga peketoe-anni pa lua ruba dhara Henga Deo, nga lua hajha nga ddhei do petu-petarra,

⁷jhe pepeke ne lii do ngati Deo ne, jhe nga kuaha Deo, ne pedhelo ri jhi ta do jhi hedhe annu-annu ri Deo. Jhi do parru pa lua ddhei Deo, mii hahhi rakka he tu jhi, tu ta pemuhu nga ta jaga ngi'u.

⁸Do takka pa dhara kire jhi, tapulara do kara do menihi lema; do nara lipuji, jhe do nara likara nga waggi lema. Maji lema jhi ta do mola, do peanynyi ma jhi ta do pote do appi.

⁹Do ege ke jhi ta ddau do dho tada ri ddau, tapulara do tada ma jhi ri hari-hari ddau. Do penge ke jhi ta do made, tapulara do teleo ko ma jhi ta do muri.

¹⁰Maji lema ne ade jhi ta do pehedui, ta mina harre lema pee ma jhi nga mengallu dhara. Kita heleo he, jhi hedhe do kehia nga gahara, tapulara jhi hedhe alla ke pepekaja do ae ddau. Kita heleo he, jhi hedhe bhule dho nga wuru ne nga-nga, tapulara ne pa petu ne hari-hari ne nga we do unu ri jhi.

¹¹Tuahhu-tuahhu do hajha do ddhei ya pa Korintus! Do lii mola-mola ke jhi pa mu. Alla ke ri jhi pedhute ne ihi ade jhi pa mu.

¹²Henabbhi dho ri jhi ne ade jhi tu mu, wata mu ri we do henabbhi ade tu jhi.

¹³Pa awe nadhe, mai we ya ma pedai lii nga mu mii penaja nga ana-ana ri ya miha. Boka we ne ade mu penaja nga jhi.

¹⁴Bhole wae ta peheujhu-headde nga ddau-ddau do dho parahajha pa Yesus; rowi ne lai do mina harre adho do mangnga. Mina mii ne nara lua ie ta peheujhu nga lua apa nga kerewe! Nara dho teleo ta peheujhu nga lua kerabba.

¹⁵Bhule dho loro jhara, Kristus ta hela'u lii nga Wango. Ne nga ne lua pehela'u ne pa telora do Herani nga ddau do adho do Herani?

¹⁶ Ne nga ne lua pedu pa telora Ammu Deo nga ammu kepue-era udu nga bhaja? Di hedhe Ammu Muri, Deo do muri ne. Deo miha do pali, ”Do ta pee ke ya pa telora ro, jhe muri mada hela'u-la'u nga ro. Ya do ta jadhi Deo ro ke, jhe ro do ta annu-niki Ya ke.

¹⁷ Rowi do mina harre ke, pejjau-anni we ngati ddau-ddau do dho tade Deo he, jhe petala-anni we mu ngati ro. Bhole pemane tu-tu nga hari-hari do wwau do benga, moko do ta hamme ke mu ri Ya.

¹⁸ Ya do ta jadhi ke ta Ama ri mu, jhe mu do ta jadhi ta ana-ana ri Ya, mina harre ke ne ane Muri do Mone Rihi Wiki higa nga pereda ne.”