Read Sabu 2 KORINTUS 7 Bible Online

2 KORINTUS 7 - Sabu bible

2 KORINTUS 7

¹Tuahhu-tuahhu ddhei ya! Hari-hari ne lijaji do na harre do petuje nga di ke. Rowi do mina harre ke do jhamma ke di ta pemoo ne ngi'u di ngati hari-hari lai do pera'i ne ngi'u nga hemanga di. Do jhamma ke di ta meghighi-meda'u pa Deo, mita nara di ta muri mada do petone tu Deo we nga kemolo.

²Hammi henata we jhi pa dhara ade mu. Bhule dho jhi nga tao hala nga-nga ie ta penaja nga heddau he do alla ke peperugi ri jhi. Ngaddi tu-tu dho jhi ta happi lua mangngi ie ngati nadu we.

³Hakku lii ya mina harre, adho mita pebunu hala pa mu. Rowi mii do lii ya ma pa mu do uru he do rihi ddhei jhi nga mu, jhe jhi ke ne do peihi-anga tuki-ai nga mu pa dhara made nga muri.

⁴Do tobo ne lua parahajha ya penaja nga mu. Rihi ri ti naanne ri do dhai balla ne kodo ya penaja nga mu! Maji lema jhi ta peabu nga ae lua hedui-herui, ne ade jhi dhai mengallu dhara taga mu. Do dhai tarra ne mengallu dhara ne ade ya!

⁵ Ta dhai jhi la Makedonia lema, nara ledho jhi ne awe he ta penagaha keloe he. Ngati hari-hari kebhihu ne dakka ne lua hedui tu jhi; ngati tele dakka ne lua pehala-pealla, ngati dhara ade hhau ne lua meghighi-meda'u.

⁶Tapulara do mangngi ma, rowi do era loro Deo ne do pemengallu dhara jhi ddau do era pa dhara lua atta dhara; do pemengallo ne dhara jhi ri No, ri lua dakka Titus.

⁷Ne kehaka dhara jhi adho ke ta ri lua dakka Titus he we, tapulara lema ti lipika no, do mina mii ne pemengallo dhara no ri mu he. Ne pika no pa jhi, ta do dhai ddhei ke mu ta peabu nga ya; ta do menyaha ke mu pa wui-ai wui-tao mu do uru he, jhe pa dhara awe nadhe do moko ke mu ta ange ya. Lai do napoanne ke ne do rihi pemengallo dhara ya ri.

⁸Maji lema ne huri ya dhe do ta pehedui ne ade mu, tapulara menyaha dho ya ne bhuke ne huri do naanne. Tarra ma pa awe ta heleo ri ya ne huri do naanne, do medae ta pehedui ne penge mu — maji lema ta mina harre — ne lua hedui mu do naanne pa dhara hemelila he we — do wue lema ya ta menyaha.

⁹Tapulara pa awe nadhe mengallu ke ne dhara ya — adho taga tari do hedui ke ne ade mu he, tapulara taga tari lua hedui mu do na harre do nara ke ta lare ne wui-ai wui-tao mu. Do tarra ne lua hedui mu do penau nga lua ddhei Deo. Hakku perugi dho mu ri jhi.

¹⁰Rowi ne lua hedui do mina harre do wie ne lua lari-anni ade do pedubhe ne lua helama tona ie. Jhe bhule dho ddau do menyaha ri lai do naanne. Jhe do petabbu nga naanne, lua hedui do penau nga lua ddhei ddau raiwawa do ta wie ne lua made-mada.

¹¹Hakko ko ta heleo ri mu, ne nga ne do wie pa mu ri lua ddhei do penau nga lua ddhei Deo ne! Ne do hamme ri mu, wala dho ke, do tarra-tarra ke mu ne la'a rui ta pemmau ne lua kenya'u-buluru he! Jadhi ke ta paddhu nga lubhu harro nga menyilu, do meghighi-meda'u ke mu, era ne lua ddhei ta peoli-pejhalli ne heddau nga heddau, jadhi mu ta keharru-kelidu, jhe do pemoko-anni ta wolo ne do hala! Pa dhara hari-hari lai do na hedhe do peteleo ke ta do adho mu do hala.

¹²Hakku maji lema ya ta do alla ke pebhuki ne huri do naanne, ne bhuke ri ya, adho taga tari ddau do hala do naanne. Adho lema taga tari ddau do hedui ri kua hala do naanne. Ne bhuke ri ya ne huri do naanne, mita ie pa hedhapa Deo, do ta toi ke ri mu miha, do mina mii ne mone-ae lua tada mu penaja nga jhi.

¹³Taga tari lai do naanne ke ne nara jhi hale dhara pemengallu. Wala ngati lua hale dhara pemengallu ne, rihi-rihi ri jhi ne mengallu dhara taga tari ngadde ke ne lua mengallu dhara ade Titus; ne ade no do mengallu dhara ri Tuahhu he hari-hari.

¹⁴Tarra do alla ke ri ya pepewue-wue ma mu pa no. Mangngi ma, pemekae dho ma ne dhara ya ri mu. Hari-hari ne do alla pepali ri jhi pa mu do petu tarra. Mina harre lema ne nga ne do pewue ri jhi pa Titus he jhara lua mu do petu tarra lema.

¹⁵Pa awe nadhe do rihi ddhei ri ke no nga mu, rowi do henge ma ri no mina mii Tuahhu he hari-hari ne ddhei ta pedute ne lua hewai-hewewe no, jhe mina mii mu ne hamme no, do takke pekerihe nga do pedhanno mu nga no.

¹⁶Dhai tarra ya ne mengallu dhara, rowi do nara ke mu ta parahajha ri jhi pa dhara hari-hari lai.