Read Sabu 2 KORINTUS 8 Bible Online

2 KORINTUS 8 - Sabu bible

2 KORINTUS 8

¹ Tuahhu-tuahhu, ne ddhei jhi do ie lema ta toi ri mu jhara lua do mina mii ne woie Deo nga jemaat-jemaat pa Makedonia.

²Do alla ke ro peuji ri lua hedui-herui do mejanni. Tapulara pa telora lua hedui-herui do na harre, ta mengallu nge nga kehaka dhare we ro, jhe do dhai tarra ne woie ne ade ro, pa dhara wie ri ro ne lua ruba dhara tu ta rabha ta dharru ddau do wala, maji lema ro ta do dhai kehia nga gahara.

³Do nara ya ta lii jhe adho do raehere ri, ta do tarra ne do wie ri ro he pedutu nga mina mii ne do dhae ri ro, kiadho rihi ri ko ti naanne. Jhe adho do era ddau do lii pa ro,

⁴ta pee we ro nga meggai pa jhi, kita ie mudhe he, ro le ta wie ne lua ruba dhara ro tu annu-niki Deo do pa Yudea he.

⁵Ne nga ne do wie ri ro do ri hi tarra ne ae ngati peira ri jhi he. Uru-uru jhara ko, jhula ri ro ne ngi'u ro pa Muri, ta alla pemina harre pa jhi lema, penau nga lua ddhei Deo.

⁶Ri do mina harre ke hakku do dhai tarra jhi ne lii pa Titus — do jhare ne lai do nadhe — mita ie ta pekako teru ri no ne lai do woie do nadhe pa telora mu lema.

⁷Do ketutu ke mu pa dhara hari-hari lai. Pa dhara lua parahajha lema pe ko ma mu ta do ketutu, pa dhara peteleo ne lua tada, pa dhara lua mmau dhara, pa dhara hari-hari worawwu lua la'a rui muri mada, nga pa dhara lua ddhei, nga pa dhara lua ddhei penaja nga jhi. Rowi do mina harre ke do ie le ke mu ta do ketutu lema pa dhara lai do woie do nadhe.

⁸Lii dho ya mii hahhi lipereda he pa dhara lai do napoanne. Tapulara nga peteleo mina mii ne mejhanni ddau do wala ne ruba dhara nga ddau nga ddau ihi-anga, ri ya lema do ddhei ta toi ta dhai hape la mii ne lua ddhei mu.

⁹Rowi do toi tarra ke ri mu ma ta do petu tarra ta do rihi ddhei Yesus Kristus, Muri di penaja nga di. Do kaja do kete'e No, tapulara tao ri No ne ngi'u No ta jadhi do kehia nga gahara tu lua paralu mu, mita ri lua kehia No ke do naanne, ta jadhi ke mu ta kaja ta kete'e.

¹⁰Pedutu nga lua tada ya, do petu ke ki nga pemoke ri ne lai ne nga ne do jhare ri pa ttau do ludu ne. Rowi mu ke ne do petari-tari do penge nga do jhare lai do nadhe.

¹¹Nah, ri do mina harre ke, do jahmma ke ri mu ta pekako teru ne lai do naanne pedutu nga do mina mii ne do dhae ri mu. Do jhamma ke mu ta mejhanni tarra tu ta pemoke ne lai do naanne, do mina mii ne mejhanni mu pa do uru he pa dhara ta pedae ne lai do naanne.

¹²Ki do era ne lua ddhei ade mu ta wie ne nga-nga, moko do ta hammi ma ri Deo ne nga ne do ta wie mu do na harre pedute nga ne nga nedo era pa mu, adho pedutu nga ne nga do dho bhule pa mu.

¹³Bhule tu-tu dho ya nga lua pedabbho ta peludu ddau do wala ngati lua titu ro, jhe pemejanni pa mu ri. Tapulara taga tari mu, pa dhara awe nadhe, do waji ke pa dhara hari-hari lua, moko do jhamma ke mu ta petobe ne lua kura nga gahara ro. Kinga era mu ri hine pa dhara lua kura nga gahara, jhe do era ro pa dhara lua waji pa hari-hari lua, moko ro ri ke ne do ruba-dhara nga mu. Kiri do mina harre ke, moko hari dhue bhakka do hela'u-la'u ke ne perabha-pedharru.

¹⁵ Pa dhara Buku Lidara-Likewahhu Deo, era do hure do bhuke, ”Ddau do nara do ae, adho do ta era nga do kerihi jhe ddau do nara do hudi, adho do ta era pa dhara lua kura nga gahara.”

¹⁶Do dhai tarra ne kolo lii ie-ae pa Deo, rowi do alle ke ri No pepejadhi Titus ta mappe nga mejhanni mii jhi le, tu ta ruba dhara nga mu!

¹⁷Rowi Titus adho ke do ddhei ta petobe ne liami he we, tapulara no lema tade mina harre neworawwu mappe ta la ruba dhara nga mu, hakku ti lua ddhei no miha ne aggu lihappo tu ta kako langa mu.

¹⁸Penau nga no, do naanne le do moe ri jhi heddau tuahhu, do dhai takke pekerihe ri hari-hari jemaat taga tari lua jhagga no pa dhara pepeke ne Li Hagha Dhara do ngati Deo ne.

¹⁹Do wala ri ngati naanne, ne ddau do naanne do alle ke pepidhe lema jhe petato ri jemaat-jemaat tu ta penau nga jhi pa loro jhara kako jhi. Rowi do medae ke jhi ta kako jhara tu ta la pengaddu ne bhara lua ruba dhara do na harre mita pekelode ke Muri, mita toi lema ke rimu ta do tarra jhi do nga moko ta ruba dhara.

²⁰Jhi lema do nga jaga pewoie-ie, mita do dho era ne ddau do wie hala pa jhi pa dhara la pengaddu ne bhara lua ruba dhara do dhai ae mina hedhe.

²¹ Jhi do ddhei ta tao do mola-mola we, adho ta pa hedhapa Muri we, tapulara lema pa hedhapa ddau raiwawa.

²²Hela'u-la'u nga Titus nga tuahhu do naanne, nanne lema do moe ri jhi heddau tuahhu ri. Alle ke ri jhi pehakko no jhajhi wari, jhe do teleo ke ta do ddhei ta ruba dhara. Jhe pa dhara awe nadhe, do rihi ddhei ri ke no ta ruba dhara mu, rowi do nga lua henao do mone-ae no penaja nga mu.

²³Jhara lua Titus, no ihi-anga ya, do jhagga hela'u nga ya tu ta ruba dhara nga mu. Jhe jhara lua do dhue ddau tuahhu do penau nga Titus he, ro hari do dhue do pepu ri jemaat-jemaat, jhe do jadhi lua do peballe dhara kodo Kristus.

²⁴Ne henao ri jhi do nara ke ri mu ta pedhelo ne lua hajha nga ddhei mu penaja nga ro, ne nga ne do pewue ri jhi jhara lua mu do petu tarra.