Read Sabu GALATIA 1 Bible Online

GALATIA 1 - Sabu bible

GALATIA 1

¹Tuahhu-tuahhu jemaat-jemaat pa ihi rai Galatia, Ya, Paulus nga hari-hari tuahhu do Herani do hela'u-la'u nga ya, do nga lua henao, ki ie mudhe he, Deo Ama di nga Muri di Yesus Kristus ta wie ne lua tarro ie nga menyarro mangngi nga lua helama tona ie tu mu. Ne jadhi ya ta rasul adho do pelake jhara ddau raiwawa kiadho ta ri dhede ri ddau raiwawa, tapulara ri Yesus Kristus nga ri Deo Ama di, do alle pepemure Yesus Kristus ngati dhara made mada.

⁴Tu ta pedute ne lua ddhei Deo Ama di, alle ke pejhole ri Kristus ne ngi'u No ta jadhi ki'i para manu hiba tu lubhu harro nga menyilu di, mita ie ke di ta pehelama tona ngati awe do apa do kerewe do nadhe.

⁵Lua dhida nga ketutu lohe la lodho do nami mii ne! Amin.

⁶Ta madalae we ya jhara lua Tuahhu-tuahhu he! Ne pedoa mu ri Deo taga ta ri lua ruba dhara Kristus, tapulara pa dhara awe nadhe, mina harre mu ne wo rawwu henginga ne naja-kejhunga ngati Deo, jhe pedutu ne ”li hagha dhara” do wala ngati Li Hagha Dhara do ngati Deo ne.

⁷Do ne pa petu ne adho do era ne ”li hagha dhara” do wala ri. Rowi do era ne ddau-ddau do peliba pa mu ne ”li hagha dhara” jhara lua Kristus do alle ke ri ro pepepote jhe pekenyawu ne penge mu.

⁸Ddau do pelebe ne ”li hagha dhara” do wala ngati Li Hagha Dhara do pelebe ri jhi ne, hane we no pe wole ri Deo — maji lema ne ddau do na harre ta jhi miha, kiadho ta naju Deo ngati era do mmau do megala ne miha!

⁹Do alla ke jhi peli uru jhara pa mu, jhe pa dhara awe nadhe ri, hewari ri ne lii jhi pa mu: Ddau do peliba ne ”li hagha dhara” do wala ngati Li Hagha Dhara do alle pehamme ri mu ngati jhi ne, ne ddau do naanne do jhamma ke no ta wole ri Deo!

¹⁰Ta do ro lai do naanne ke ane, hakku wue marra ya ta do era lua henao ta hamme ri ddau raiwawa? Adho tu-tu mina harre! Wata ke ne do henao ri ya, wata ke lua ketarra ngati Deo we. We do era marra ya dhe nga kale loro jhara ta happi ne ade ddau raiwawa mita hajha ro nga ya? Ki do tao ko ma ya mi na harre, moko ya dhe adho ke naannu Kristus.

¹¹Do jhamma ke ta toi ri tuahhu-tuahhu he, ta do ne Li Hagha Dhara do pele be ri ya ne, adho dakka ngati ddau raiwawa.

¹²Adho ngati ddau raiwawa ne hamme ri ya ne lii do naanne, jhe bhule dho heddau do ajhe ya. Yesus Kristus miha ne do peke pa ya ne ihi ngati Li Hagha Dhara do naanne.

¹³ Do bhara tatu ke, ta do rangngi ke mu ne jhara lau muri mada ya do uru he mii heddau do pedute aigama Yahudi. Do toi ke ri mu ma mina mii ne worawwu woapa ne wui-ai ya penaja nga jemaat Deo he, jhe mina mii ne worawwu petadi ya ta peele ne jemaat Deo ne.

¹⁴ Pa dhara ua pekako aigama Yahudi, ya do ri ngati jhajhi ae do Yahudi do hela'u pemuri he nga ya. Do dhai mappe tarra ya pa dhara lai-lai do pedu nga lua uku aigama Yahudi nga hadha ama-appu jhi.

¹⁵ Tapulara taga tari lua ruba dhara Deo, alle ke ya pepidhe ri. No rai nga do dho metana dae ya, jhe pedoe ya tu ta pemoke No.

¹⁶Ta peteleo ke ri Deo pa ya jhara lua Ana No, mita ie ne Li Hagha Dhara jhara lua Ana No ne, nara ta pepeke ri ya pa ddau-ddau do adho do Yahudi. Pa dhara awe naanne, kako dho ya la nga nadu-nadu ta la ami lira'a-litakka.

¹⁷Kako ledho ma ya la nga ddau-ddau pa Yerusalem, do uru ngati ya ne jadhi rasul. Tapulara kako la ihi rai Arab we ya, jhe ngati ni bhale ri ya la Damsyik.

¹⁸ Ta ludu tallu bhue ttau, ta kako ke ya la Yerusalem, tu ta la petada nga Petrus. Pe ya nga no henguru lammi lodho ne tui.

¹⁹Peabu dho ya nga rasul-rasul do wa la he, wala ngati Yakobus we, do tuahhu ri Muri ne.

²⁰Ne nga ne do bhuke ri ya dhe do petu tarra. Do toi ma ri Deo ta do adho ya ta pote!

²¹Ta alla pe mina harre ta kako ke ya la ihi rai-ihi rai Siria, nga Kilikia.

²²Lohe la awe do naanne tade de dho ya ri jemaat-jemaat Herani do pa Yudea pa dhara lua penaja tanga mada.

²³Do rangngi ke ri ro ma ne lii ddau, ”Ne ddau do hudhi do peraga jhi do uru he, pa dhara awe nadhe, nnai ke no do pe peke ne lua parahajha do ddhei ta peele ri no ne.”

²⁴Moko ta wue waje ke Deo ri ro.